Luuka 6:27-49

“Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweeyo. Mwiwaaparikhiye apale anuulaanaanini na mwiwaalompele apale anuurettelaanini zootakhala. Nkhama ntthu oopwakula nlaku limote, na ntthi likina ontheteezele. Nkhama ntthu oovula ajapi yawo, ohinkhattaze othuula hempe yawo. Omwinkhe wakhula otule anuuvekelaaye, nkhama ntthu athuula etile yiiyiye yawo, ohinkhanyarele wuurutisela. Epile mweeyo zinuutuvelaanini oretteliwa pi azeenu, na mweeyo mwiwaarettele azeenu etthiipo. “Amana mwiwaaphetaka apale anuuphetaanini paasi, fwayita ni mwineekeselaaye mmakhono wa Nluku? Hatha anatwampi atthaapo aniwaapheta apale na yo aniwaaphetaaye. Amana mwiwaarettelaka saana apale na yo anuurettelaanini saana paasi, fwayita ni mwinteelaaye wiiyana? Hatha anatwampi atthaapo na yo anretta etthiipo. Amana mwiweepaashaka paasi apale mwinkhupalaaye wuurutiselani, fwayita ni mwinteelaaye wiiyana? Hatha anatwampi atthaapo aniipaashana aroromelaka orutiselana. Mwiwaaphete maatuwi enu, mwiwaarettele zooshapweya, mwiweepaashe mwiheekeselaka wuurutiselani. Toowo tthuvo yenu enttela wiiya khuluyeene na mwinttela wiiya aana a Nwulu wa Pinkuuni, maana Nluku nkemaani hatha khwa apale ahininshukhurwaaye na apale ootakhala rooho. Mwiiye a huruma nkhama etthiipi Papeenu wa pinkuuni naye eeyiye wa huruma. “Mwihimphuke nzeenu yoori mwihiphukiwe; mwihinhukhumu nzeenu yoori mwihihukhumwiwe; mwinswaamihi nzeenu yoori mwiswaamihiwe. Mwiwenkhe azeenu na Nluku ontta owinkhani: na mphimo khwaamili, wookhitteleliwa na wawiitaala mpakha wiittikha. Maana mphimo otthuupo mwimphimanaaye mwinteela ophimelaniwa otthuupo.” Yinsa khulupa nlikaniso mmote araka: “Ntthu woohooni khaninlokoza ntthu woohooni nzaawe, oowiiri antta okwela nliphotto. Nakhiyoni khaninziti mwaaliimu awe, ila wakhula otule ansomiseyaaye saana oniiya nkhama mwaaliimu awe. “Mwaasa aya niini woonaka etutu eriiye mmaasho wa ttwiiyo, ila khuhooni lipikhi liriiye mmaasho mwawo? Enrettikhana toovi weeyo omuuza nzaawo yoori: ‘Ttwiiyaku, nkankaani kuulaze etutu eto eriiye mmaasho mwawo’, na khupe weeyo ohiwahaka woona lipikhi liriiye mmaasho mwawo? Naafikhi! Olazemo khapula lipikhi liriiye mmaasho mwawo, toowo ontta woona saana, khuwahi olazamo etutu eriiye mmaasho wa nzaawo. “Khawiivo muutthi wooshapweya oniimaaye mishumo zootakhala, wala muutthi wootakhala oniimaaye mishumo zooshapweya. Maana wakhula muutthi onjuweya mwaasa wa mishumo zaya. Mmiiwa khinshumiwamo mishumo za muuyu, mmutthalala khanshumiwamo wuuva. Ntthu wookemaani, nroho mwawe onsarulamo vitthu zooshapweya, na ntthu wootakhala rooho, nroho mwawe onsarulamo vitthu zootakhala, maana milomo zawe zinttakhula etthiipile ziitaliyeeyo nroho mwawe. “Mwinkikhuwelelani yoori ‘Mbwana, Mbwana’ mwihirettaka epile kiniwuuzaanini? Miiyo kinuuthoonyezani ntthu anlikananaaye otule ansiilaaye mattakhuzi aka na khushututela. Onlikanana ntthu anjekaaye nyuupa yawe khuthipa khwiichisa saaneene khuttha vanchina la mawe woozivalavo. Khuta nnyeri khupiya nyuupa etile ila khuhisakhinyeyi mwaasa woozivalisiwa. Ila otule ansiilaaye mattakhuzi aka khuhishututeli onlikanana ntthu ajekiyeeyo nyuupa yawe va nshaka woohizivalivo. Khuta nnyeri khupiya nyuupa etile nasaapiru khukwa, khupwecheya khuhisali hatha etthu.”