Khaazi 28

Paawulu ari esura ya Maalata

1Wakathi nifiyeevo vathi, neetta ojuwa yoori esura etile yaari wiitthiwa Maalata. 2Eenyewe nti aya opule khunitthantta na huruma khuluyeene khukhoza moottho mwaasa wa vuula na ozizima. 3Paawulu khukusanya khuuni atakhaka yoori atthe vamoottho, khusaruwamo nyookha etthiraka nkukuku khukhola na nkhono. 4Atthu a veesura aphale nawoona evili eri vankhono wa Paawulu, khusala alupa yoori: “Weekhweele mwinyi otu namahusuti, maana oosurukha mpahari, olikha toowo, haakhi khinlawa onlikha wiiya haayi.” 5Ila Paawulu nootathela nyookha etile vamoottho, khuhinretti hatha etthu yootakhala. 6Yo aari weekesela omoona Paawulu ari woovipa ama ofwa nasaapiru, ila khuvira wakathi mwinkeene khuhisala oona enrettaka etthu, khuzukulisa akhili zaya khwaaza olupa yoori ye aari nluku. 7Kharipu ya attaaphale yaarivo puuro ya mwinyi aari wiitthiwaaye Puupiliyu, mfwalume wa esura ya etile. Ye khunipwekherela saana siikhu ttatthu niri aletto awe. 8Aphano papaawe eetta olwaaziwa hooma na ohara taamu. Paawulu khumwaattama yoori amoone, paata ya onttheela makhono na khunlompela eetta ovona. 9Wakathi zirettikhaniyeevo epi, alwele akina a veesura attaaphale khuta na khuvonisiwa. 10Yo khunithoonyeza shitaha khuluyeene, paata ya opakhira mpankaya, khutthaamu zooshi epile naari ohithajiyaazo.

Efiyelo ya Rooma

11Ziviriyeevo nyeezi mittatthu paata ya wiisha mwiita. Veesura attaaphale yaarivo pankaya ya Alishanteriya yaariina ratarato ya miluku za maphapo khupakhira nttumpho. 12Nifiyeevo Sirakuuza, neekhaliyeewo siikhu ttatthu. 13Attaaphale khusala nivira nilawaka mpakha ofiya sitati ya Reshiyu. Mmeesho mwaya khwaaza ovuma pheevo za kuusi, nkatthi wa siikhu piiri neetta ofiya patari ya Puuteyooli. 14Ottuukhule khuwaasikana attwi aanuuziyeeyo wiikhala sumana vamote na yo. Nawiisha khusala nilawa Rooma. 15Attwi arooma khusiila yoori nintta ota, khunithepeeza Vaparasa wa Apiiyu theenya va Wuuzanyisa Mittatthu, Paawulu noowoona khunshukhurwela Nluku na khwiiya woolipiseleya. 16Wakathi nifiyeevo Rooma, Paawulu khwinkhiwa ruhusa ya wiikhala otthwe, na weekeseliwa ti najanka mmote.

Otafusiri wa Paawulu Rooma

17Ziviriyeevo siikhu ttatthu, Paawulu khuwaalaleya Attunkhulu a tiini a mayaahuuti. Wakathi akusanyeyiyeevo, khusala awooza yoori: “Attwiizaku, miiyo akiretteeni hatha etthu khwa zowera za apapazaya, ila khufukiwa Yeruzaleemu khwinkheleliwa mmakhono wa arooma. 18Yo khusala akuuzela na aari otakha okilikha, mwaasa yoori khakoonaneeni hatha paathwili ya husuti moote yaari osuhaaye wuuleeliwa. 19Ila mayaahuuti khusala alupa vitthu zoovonyeya. Tiito kaavekiyeeyo yoori kite kiphukiwe ti Seezari, hatha nkhama akina paathwili yoowaarettela atthu aka. 20Khwa ethiito, kinveka yoori mwite mwittakhulane miiyo. Kimpattikhana kiri mmakwinjili, mwaasa wa nroromelo wa meezirayiilu.”

21Yo khujipu araka: “Khanipwekhereleeni hatha warakha ya Yudeya monkoni wa weeyo, wala khateeni hatha ttwi mmote woolankha ottuukhu alupeziyeeyo etthu yootakhala. 22Khwa attaapho naari otakha osiila khwa phantte yawo shawuri oriinaazo, maana najuwa yoori wakhula vahali enttakhuliwa vitthu zootakhala monkoni wa khuntti eti.”

23Khusiilana orutela okutthana na Paawulu siikhu kiina, khulokotthelana khuntti yene khusala alawa owawe. Waaza supu yooshi mpakha njuwa oveva eettaka owaanozela na alazaka oshaahiti wa ofwalume wa Nluku, eekesaka owaashintta monkoni wa Yinsa, nkatthi wa kano za Munsa na za manapiyu. 24Akinoko khwiiya oshinttiwa khwa mattakhuzi aari olupaaye Paawulu, ila akina khuhikhupaleli. 25Ahinaleevo khusala akheetisana mmote na nzaawe, Paawulu khuwooza mattakhuzi makina araka: “Rooho Ttakatthiifu yattakhula haakhi monkoni wa amarehemu apapazenu, vakatthi wa napiyu Ezaaya yoori:

26“ ‘Olawe vakatthi wa atthu apo wawooze yoori:

“Hatha nkhama mwasiila khiniweeleyani;

hatha nkhama moona khamwinjuwa.”

27Maana rooho za atthu apa piza okhijili,

attiyela mashiilo aya

na khuphunya maasho aya.

Eriwaka khayaari ethiito,

aari owahi woona na maasho aya,

na osiila na mashiilo aya

na oweeleya nroho mwaya

na khurutela mmakhono mwaka keetta owaavonisa.’

28“Apho, kintakha mwijuwe yoori nusura eti ya Nluku aperekheziwa amalapo, yo anteela osiila!” 29Paata ya olupa mattakhuzi apale, mayaahuuti khulaavo eettaka onyakulisana.

Ofukiwa wa Paawulu khwa nyaakha miwiri

30Khwa nyaakha miwiri Paawulu aari nnyupa ethiitile aarentteriyeeyo na khusala awaapwekherela ooshi apale aari oteelaaye omoona, 31awaatafusirelaka Ofwalume wa Nluku woominyalavo na woohiina hatha shaakha awaasomisaka monkoni wa Yinsa Al-Masiihu.

Currently Selected:

Khaazi 28: eko

Highlight

Compare

Copy