Khaazi 27

Paawulu ontta Rooma

1Wakathi naalakeliyeevo olokhela Etaaliya, Paawulu na anapherezu akina khwinkhiwa namalokozela mmote aari wiitthiwaaye Zhuuliyu, aari nttunkhulu wa khuntti ya anajanka ya mfwalume wa Rooma. 2Khupakhira pankaya ya sitati ya Atirimiitiyu, yaari weettaaye shiini kiina ya nti wa Aaziya. Khulawa mpakha opahari nilawaka naalawaniye Arishitaruku Mmasetoniya wa sitati ya Tizaloonika. 3Mmeesho mwaya, khufiya Sitooni. Zhuuliyu khuntthantta Paawulu wookemaanivo, khumwinkha ruhusa yoolawa owoona ashirikhaawe yoori atthaapo amwinkhe etile yaari onhithajiyaaye. 4Paata ya olaawo Sitooni, khuvira phantte kiina ya Shiipere yoori nijiikitthe, mwaasa wa pheevo zaari zoonivirikanela. 5Nilokhiyeevo pahari ya Siliisiya na Panfiiliya, khufiya Miira, sitati ya nti wa Liisiya. 6Nifiyeevo okhule, namalokozela wa anajanka otule khusikana pankaya ya sitati ya Alishanteriya yaari weettaaye Etaaliya, ye khunipakhirisa nttumpho. 7Khulokha vattiitthi vattiitthi khwa siikhu zawaatta na tafwawuthi khulukhulu khufiya sitati ya Keniitu. Khuhisala niwahi ovira nilawaka mwaasa wa pheevo wiiya zoovirikana, khujikittha phantte ya Esura ya Kereeta na Salimoona. 8Khusala nilawa na tafwawuthi zeetthu, khufiya puuro yaari wiitthiwaaye Patari Yooshapweya, kharipu ya sitati ya Laseeya.

Hasara za safwari

9Paata ya ovira wakathi mwinkeene, olokha khwaaza woopisa, maana wakathi wa ofuka waaviriye. Tiito Paawulu khusala awaahirimiza, 10araka: “Mamwinyi, miiyo kinoona yoori safwari yeetthu enttela wiiya ya woopisa. Enlawa yapuwe hasara khuluyeene khwa pankaya na mapwattha na theenya khwa ohaayi eetthu.” 11Ila namalokozela wa anajanka, olikha osiileza etile Paawulu aari olupaaye, khulottela shawuri za nahota na za mweenyewe pankaya. 12Ooniyeevo yoori patari yaya etile khayaari yooshapweya wiisha wakathi wa mwiita ari attaapho, tiito enki khujilakelela yoori aarina yoorutela olokha na nroromelo wa ofiya Foonika ottuukho alawe avirise wakathi wa mwiita, maana yaari patari ya Kereeta, ethiito yaari weekesaaye phantte lintupweelaawo njuwa na lintthamuwaawo njuwa.

13Khwaaza ovitelela vattiitthi vattiitthi pheevo za kuusi. Yo khusala oona yoori apattha etile aari otakhaaye; tiito khunvuula nankura khusala alawa aweraweraka shiini ya Kereeta. 14Ila oviriyeevo wakathi vattitthiiru, khupuwa pheevo zookhomaala ya tarupa. 15Pankaya khusala evevelushiwa khuhisala ewahi oshintta pheevo, khwiishusha matthaka khusala niwawaziwa ti pheevo. 16Khujikittha na esura ttiitthiiru eniitthiwaaye Kalaawuta, khuwahi okaphula shikareera za pankaya na tafwawuthi khuluyeene. 17Aphano amalinyero khuthuula shikareera khuweza mpankaya, khufukelela nkhoyi wa nankura vanshaluma. Eetta woova okhukuziwa pankaya etile yeettaniwaka mmavula, ari kharipu ya shiini ya Liibiya. Khwiishusha matthaka aya khulikha pankaya etile evevelushiwaka ti pheevo. 18Mmeesho mwaya, ari oohusutiwa saaneene ti pheevo, khwaaza weeselela mapwattha aya mpahari. 19Siikhu ya ttatthu, khweeselela mpahari na makhono aya phantte moote ya zaana kiina za pankaya. 20Wakathi aya otthuupule, khuhisala lipuwa njuwa wala matthottowa siikhu zawaatta na pheevo yaari ovira enivumelaka, mpakha onaashikha nroromelo wa wuusurukha.

21Aavirisiyeevo siikhu zawaatta ahinaje hatha etthu, Paawulu khweemela vakatthi vaya khuwooza yoori: “Mamwinyi, mwaarina ya osiileza shawuri zaka yoohiliiwo Kereeta, maana naari weettela ojiinanela khwa hasara na oharipweyiwa ti pankaya na waashikhiwa pi vitthu. 22Ila apha kiniwuuzani yoori mwiminyale, khina mmote wa mweeyo anttelaaye opwetheya, pankaya ti anttelaaye opwecheya. 23Maana taana osikhu lakipuwelela nlayikha la Nluku mweenyewe miiyo na otule kinimwaputwaaye, 24khukuuza yoori: ‘Paawulu! Ohoove! Enuuhithajiya weeyo olawa weemela okutthanane Seezari. Nluku na rehema yawe awinkha ohaayi na ooshi apale onlokhanaaye.’ 25Khwa ethiito mwiminyale mamwinyi. Kininkhupali Nluku yoori zinteela orettikhana zooshi maana akuuza. 26Ila enihithajiya fweeyo okhukuzeliwa veesura moote.”

27Paata ya ofiya osikhu khumi na nne, neetta othuuliwa ti pheevo neettaniwaka phantte khwa phantte pahari eniitthiwaaye Atiriyaatiku. Payina ya osikhu layili, amalinyero khusala oona yoori naattamela vathi. 28Khwaaza weesa nkhoyi, khoona wiicha waya ori phiima talaathiini na sitha. Khuweja wakathi vattitthiiru, khurutela weeza theenya khusikana orina phiima eshiriini na sapa wiicha waya. 29Oovaka okhukuzeliwa valivula, khuwaatupweeza anankura aya wane a sheezi, khusala alompa yoori oche nasaapiru. 30Eekesaka otthiramo mpankaya mphule, amalinyero khwiishushela shikareera zaya mpahari, ajinkhaka nkhama antakhaaye owaaweza anankura a loomo. 31Aphano Paawulu khumuuza namalokozela otule na anajanka awe yoori: “Amana mamwinyi apa ahisali mpankaya mphu, mweeyo khamwiwahi wuusurukha.” 32Attaaphale anajanka khushija mikhoyi zaafukaniweeyo shikareera khulikha okwa.

33Ohinache saana, Paawulu khuwooza ooshi yoori aje etthu yoojiwa, araka: “Leelo zinretta siikhu khumi na nne neettaka ojeekesela woohiji hatha etthu. 34Nakataalikha kinuuvekelani oja etthu, amana mwiretta toowo phi mwinttelaaye wiiya haayi. Khina mmote wa mweeyo anttelaaye ovulala.” 35Alupiyeevo mattakhuzi apale, khuthuula phaawu khunshukhurwela Nluku vakatthi wa ooshi aya. Aphano khumeya khwaaza orafuna. 36Ooshi khwiiya oolipiseleya na theenya khuja etthu yoojiwa. 37Mpankaya naarimo atthu miiya piiri na saapiini na sitha. 38Paata yooja khurupala, khuvukula mapwattha a tiriku eeselelaka mpahari yoori pankaya yaya eveye.

Ozama

39Wakathi ochiyeevo khuhisala ajuwavo vathi, ila khoona esura yaariina muuttho. Yo khuwaza olawa weeleeza nttumpho pankaya yaya amana ewaheya. 40Yo khuwaashija anankura khuwaalikha mpahari na khutapula khayiro za maleemi. Aphano, khuweza ntthaka laya la loomo, yoori awahi olotta pahari. 41Ila pankaya etile khuphara valivula loomo waya. Sheezi yaya khwaaza opwechiwa ti kuvu za mawipi. 42Anajanka khulakela owoola anapherezu yoori ahifiye vathi atthira. 43Ila namalokozela wa anajanka aari otakha omwiinanela Paawulu, khuwaakhattaza anajanka owaza shawuri nkhama epo. Aphano khuruma yoori apale anjuwaaye woowelela atupweele mpahari alawe vathi. 44Akina arina ya ojuusuru akholaka thaapwa akina akhole vitthu kiina za pankaya. Ti nanna noosurukhiyeezo fooshi fweeyo mpakha ofiya vathi.

Currently Selected:

Khaazi 27: eko

Highlight

Compare

Copy