NÚMEROS 35
35
Levitacuna imatalla japinatami villajun
1Jordán yacu ladopi, Jericó pueblo chimba purapi tiaj Moab llacta pambacunapimi Mandaj Diosca, Moisesta cashna nijurca:
2“Israelcunataca, cashna nishpa mandangui: ‘Canguna japinajushca pueblocunamandaca, levitacuna causanajuchun pueblocunata cunguichi. Shinallata chai pueblo muyundicunapi michina alpacunatapash, levitacunaman cunguichi. 3Shina cujpimi levitacunaca, paicuna causangapaj pueblocunata charinga. Shinallata chai pueblo muyundipi michina alpacunaca, paicunapaj animalcunata, huagracunata, paicunapaj tucui animalcunata michingapajmi canga. 4Chai pueblo muyundipi michina pambacunataca, pircashca patamandaca canllaman, chuscu patsaj picha chunga metro anchotami levitacunaman cuna canguichi. 5Chai jipami, chai pueblo canllamandaca, indi llujshimuj ladomambash, iscun patsaj metrota, indi huashajuj ladomambash, iscun patsaj metrotallata, jahua ladotapash, iscun patsaj metrotallata, urai ladotapash, iscun patsaj metrotallata medina canguichi. Shina rurajpimi puebloca, chaupipi quedajpi paicunaca, michina pambacunatapash muyundipi charinga.
6Levitacunaman cuna pueblocunamanda sucta pueblocunaca, huañuchijcuna pacajuna pueblocunami canga. Chai jahuapash, chuscu chunga ishcai pueblocunata cunarami canguichi. 7Levitacunaman cushca tucuilla pueblocunaca, chuscu chunga pusaj pueblocunami, michina pambacunandi paicunapaj canga. 8Israelcuna japinajushca pueblocunamanda levitacunaman cungapaca, cashna ruranguichi: Ashtaca pueblocunata japinajushca aillucunamandaca, ashtaca pueblocunatallata cunguichi. Ashalla pueblocunata japinajushca aillucunamandaca, ashalla pueblocunatallata cunguichi. Tucuicunami, paicunaca mashna pueblocunata paicunapaj cachun japinajushcashnallata levitacunaman cunga’ nishpa mandangui” nijurcami.
Pacajuna pueblocunatami villajun
(Deut. 19:1-13; Jos. 20:1-9)
9Mandaj Diosca, Moisestaca cashnami nijurca:
10“Israelcunaman, cashna nishpa villangui: ‘Cangunaca, ima hora Jordán yacuta ña chimbashpa, Canaán llactaman yaicushpaca, 11pacajuna pueblocunatara agllanguichi. Maijambash napash yashcapi pitapash huañuchishpaca, chaimanmi pacajungapaj calpanga. 12Chai pueblocunaca, huañuchishcamanda randi huañuchij runa ama huañuchijuchun, pacajuna pueblocunami canga. Huañuchij runaca, tandanajushca israelcunapaj ñaupajpi tapuchingacaman chaipi pacajushpami, na huañuchi tucunga. 13Levitacunaman cuna pueblocunamandaca, sucta pueblomi, huañuchijcuna pacajuna pueblo canga. 14Quimsa pueblotami, Jordán yacu ladoman, indi llujshimuj ladopi cuna canguichi. Caishuj quimsataca, Canaán llactapimi cuna cunguichi. Chai pueblocunami, huañuchijcuna pacajuna pueblo canga. 15Huañuchijcuna pacajuna sucta puebloca israelcunapash, caru llactamanda shamushcacunapash, paicuna purapi causajcunapash pacajungapajmi canga. Napash yashcapi huañuchijcunaca, chaipi pacajungapajmi ringa.
16Maijandapash jirruhuan chugrichishpa huañuchishpaca, chai runaca huañuchijpachami canga. Shinamandami, chai huañuchij runapash huañuchi tucunga.
17Shinallata huañuchinalla rumita japishpa chugrichishpa huañuchishpaca, chai runaca huañuchijpachami canga. Shinamandami chai huañuchij runapash, huañuchi tucunga.
18Shinallata huañuchinalla caspita japishpa chugrichishpa huañuchishpaca, chai runaca huañuchijpachami canga. Shinamandami chai huañuchij runapash, huañuchi tucunga. 19Huañuchishpa yahuarta jichashcamanda, paitapash randi huañuchingapaj mascaj runami, chai huañuchij runataca huañuchinga. Ima punlla tuparishpapash, paimi huañuchinga.
20Na ricunayachishpa t'angashpa, na cashpaca pacalla chapashpa imahuambash shitajpimi huañunga. 21Na cashpaca fiñanajushca cashcamanda, maquihuan huactashpa chugrichijpimi huañunga. Shinamandami, chai chugrichij runapash huañuchi tucunga. Paica, huañuchij runapachami canga. Shina huañuchishcamanda, paitapash randi huañuchingapaj mascaj runaca, ima punlla tuparishpapash huañuchingallami.
22Ashtahuangarin na fiñanajushca cashpata t'angajpi, na cashpaca napash pacalla chapajushpata, imahuambash shitajpimi huañunga. 23Na cashpaca, huañuchinalla jatun rumita urmachijushpami, paitaca na ricunga. Shina urmachijpica, paipaj jahuapi urmajpimi huañunga. Chai rumita urmachij runaca, paihuanga na fiñanajushcachu cashcanga. Huañuchina yuyaitapash na charishcachu cashcanga. Na cashpaca, fiñaitallapash na fiñashcachu cashcanga. Llaquichingapajllapash na munashcachu cashcanga. 24Shina cajpimi, tandanajushca israelcunaca huañuchij runatapash, huañuchishcamanda randi huañuchingapaj mascajuj runatapash, cai mandashcapi nijunshnallata tapuchinajunga. 25Chai tandanajushcacunami, huañuchij runataca randi huañuchingapaj mascaj runapaj maquimanda cacharichinga. Paicunallatami, chai huañuchij runataca, pacajushpa tiajushca pueblomanllata tigrachinga. Chai huañuchij runaca, Diospajlla aceitehuan javi tucushca, curacunata mandaj huañungacamanmi, chai pueblopillata causajunga. 26Ashtahuangarin chai huañuchij runaca, pai pacajushpa causajuj pueblomanda llujshishpami, maicamanlla pai purinataca yalishpa purijunga. 27Shina purijujpi, randi huañuchingapaj munaj runa tuparishpa, chai huañuchij runata huañuchishpaca, paica na llaquichi tucungachu. 28Chaimandami huañuchij runaca, curacunata mandaj huañungacaman, pai pacajushca pueblopi causajunga. Curacunata mandaj ña huañujpimi, paipaj llactaman tigranga.
Ricushcata villajmandapash, cacharingapaj culquita na japinamandapashmi mandashca
29Cai mandashcacunaca cangunapajpash, cangunapaj miraicunapajpashmi canga. Canguna maipi causanajushpapash, caitami rurana canguichi. 30Huañuchij runataca, taucacuna ricushca cajpillami randi huañuchi ushanga. Ashtahuangarin shujlla ricushca tiajpica, pita cashpapash na huañuchi ushangachu.
31Huañuchij runapash, huañuchi tucunapacha cajpimi, pai ama huañungapaj culquita cungapaj munajpipash, na japina canguichi. Ashtahuangarin paica, huañuchi tucunanapachami.
32Shinallata curacunata mandaj huañungacaman, pai pacajushpa causajushca pueblomanda, paipaj llactaman tigrashpa, ama chaipi causagrichunga, culquita cungapaj munajpipash, na japinachu canguichi.
33Canguna causanajuj llactataca, na mapayachinachu canguichi. Huañuchishpa yahuarta jichashcamandami, mapayashca canga. Chai llactapi yahuarta jichashpa huañuchishcamandaca, na mapa illaj tucungachu. Ashtahuangarin chai huañuchij runata huañuchijpillami, mapa illaj tucunga.
34Canguna causanajuj llactataca, na mapayachinachu canguichi. Chai llactapimi, ñucapash causajuni. Mandaj Dios ñucaca, israelcunapaj chaupipi causajujpimi, na mapayachina canguichi’ nishpa mandangui” nijurcami.
Currently Selected:
NÚMEROS 35: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.