NÚMEROS 36
36
Cazaranalla huarmicuna alpacunata japinata mandashcami
1Joseca, Manasespaj taitami carca. Manasesca, Maquir shuti runapaj taitami carca. Maquir shuti runaca, Galaad shuti runapaj taitami carca. Galaad shuti runapaj mirai familiacunapaj taitacunata mandajcunami, Moisespajmambash, israelcunapaj taitacunapaj huasi ucu puracunata mandajcunapajmambash shamushpa parlanajurca. 2Paicunaca cashnami ninajurca:
—Mandaj Diosca, ñucanchita mandaj quiquin Moisestami, ñucanchi israelcunaman suerteta rurashpa, alpata chaupishpa cuchun mandarca. Shinallata ñucanchi huauqui Zelofehad shuti runa japina alpatapash, paipaj ushicunaman cuchunmi, Mandaj Diosca ñucanchita mandaj quiquin Moisesta mandarca. 3Ashtahuangarin chai huarmicuna, ñucanchi Israel purapillata caishuj aillucunahuan cazarajpica, chai huarmicuna japinajushca alpacunaca, caishuj aillu israelcunapajmi tucunga. Shina rurashpaca, ñucanchi taitamanda japinajushca alpacunatamari quichunga. 4Ashtahuangarin Israel puracunapaj alpacunata tigrachina huata chayajpica, chai huarmicuna japinajushca alpaca, maijan aillu purapi chai huarmi cazarashca cajpipash, chai aillupajmi tucunga. Chashnami ñucanchi taitacunapaj aillu purapi chai huarmicuna japinajushca alpacunaca tucuringa— ninajurcami.
5Paicuna shina nijpimi Moisesca, Mandaj Dios mandashcashnallata, israelcunata cashna nishpa mandarca:
—Josepaj aillu puracunaca, chashna tucunatapachami ninajun. 6Mandaj Diosca, Zelofehad shuti runapaj ushicunamandaca, cashnami mandarca: Paicunapaj taitapaj aillu purahuanga, maijanhuan cashpapash paicuna munashcashna cazarachunlla. 7Shina rurashpaca israelcunaca, paicuna japinajushca alpacunataca, quiquin aillu purapillatami charinga. Shina rurajpimi chai alpaca, chai aillumandaca caishuj aillupajmanga na yalinga. 8Pipaj ushi cashpapash, israelcunapaj aillu purapi paicunapaj cachun alpacunata japina cashpaca, paipaj taitapaj aillumanda familiahuanllatami cazaranga. Israelcunaca, tucuicunallata paicunapaj taitamanda alpacunata japinajuchunmi, chashna cazaranga. 9Shina rurashpaca israelcunaca, paicuna japinajushca alpacunataca, shuj aillumanda caishuj ailluman na yalichinajungachu. Tucui Israel aillucunallatami, paicunapaj alpacunatallata charinga— nijurcami.
10Shina nijpimi Zelofehad shuti runapaj ushicunaca, Mandaj Dios imashna Moisesta mandashcashnallata ruranajurca. 11Maala, Tirsa, Hogla, Milca, Noa shuti huarmicunaca, chashnami paicunapaj taitapaj huauquicunapaj churicunahuan cazaranajurca. 12Zelofehad shuti runapaj ushicunaca, paicunapaj taitapaj familia puracunapi tiaj jarihuan cazarajpimi, paicuna japinajushca alpacunaca, Manasés aillu purapajllata quedarca. Manasesca, Josepaj churimi carca. Zelofehad shuti runapash, Manasespaj mirai purami carca.
13Cai shimicunaca, mandashca shimicuna, pactachinajuchun cushca shimicunami. Cai shimicunataca, Mandaj Diosmi israelcunaman Moisesta mandarca. Cai shimicunataca, Jordán yacu manñapi, Jericó pueblo chimba purapi tiaj Moab llacta pambacunapimi curca.
Currently Selected:
NÚMEROS 36: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.