NÚMEROS 34
34
1Mandaj Diosca, Moisestaca cashnami nijurca:
2“Israelcunaman, cashna nishpa villangui: ‘Canguna Canaán llactaman yaicujpica, cai llactami cangunapaj canga. Canaán llactaca, chai llactapaj linderocuna imashna canashnallata cashnami canga:
3Urai ladotaca, Zin nishca jichushca pambamandaca, Edom llacta linderocamanmi japinguichi. Janaj lado linderoca, Cachi tiaj Cucha manñamandaca, indi llujshimuj ladocamanmi japinguichi. 4Cai linderoca, urai ladota muyushpami, Acrabim nishca lomaman vichai rinacaman canga. Chaimandaca, Zin nishca jichushca pambacamanmi yalinga. Urai ladomandaca, Cades-barnea shuti pueblocamanmi ringa. Chaimandaca, Hasar-adar shuti pueblocaman rishpami, Asmón shuti pueblocaman yalinga. 5Chai linderoca, Asmón shuti pueblomandaca ninanda jatarij Egipto llacta huaicu yacucamanmi muyunga. Chai linderoca, indi huashajuj ladomanmi tucuringa.
6Indi huashajuj lado linderoca, Jatun Mama Cuchami canga. Chai linderoca, indi huashajuj ladoman linderomi canga.
7Vichai lado linderoca, cashnami canga: Jatun Mama Cuchamandaca, Hor shuti urcucaman señalashpa, mujungunata churanguichi. 8Hor shuti urcumandaca, Hamat shuti puebloman yaicunacaman señalashpa, mujungunata churanguichi. Chai linderoca, Zedad shuti pueblocamanmi ringa. 9Chai linderoca, Zifrón shuti pueblota yalishpami, Hazar-enán shuti pueblopi tucuringa. Chaimi, vichai lado lindero canga.
10Indi llujshimuj lado linderotaca, Hazar-enán shuti pueblomanda, Sefam shuti pueblocaman señalashpa, mujungunata churanguichi. 11Chai linderoca, Sefam shuti pueblomandaca, indi llujshimuj ladoman tiaj Aín shuti pueblocamanmi urai ringa. Chai lindero urai rishpami, indi llujshimuj ladocaman tiaj Cineret shuti mama cucha manñacaman chayanga. 12Chaimandaca, Jordán yacu manñacaman urai rishpami, Cachi tiaj Cuchapi tucuringa. Cangunapaj llactaca, chashna muyundi linderocunahuanmi canga’ nishpa villangui” nijurcami.
13Moisesca, israelcunataca cashna nishpami mandajurca:
“Chai llactatami suerteta rurashpa, cangunapaj cachun chaupishpa cuna. Mandaj Diosmi, cai llactataca iscun aillucunaman, shuj chaupi aillumambash cuchun mandarca. 14Rubenbaj, Gadpaj aillucunahuan, Manasespaj chaupi ailluhuanga, paicunapaj taitacunapaj huasi ucu puracuna mashna cashcashnallatami, alpacunata paicunapaj cachun ña japinajurca. 15Chai ishcai aillucunahuan, chai chaupi ailluhuanga, Jericó pueblo chimbapura llactatami, Jordán yacu manñapi, indi llujshimuj ladoman ña japinajurca” nijurcami.
16Mandaj Diosca, Moisesmanmi cashna nishpa villajurca:
17“Chai alpacunata chaupishpa cuna runacunapaj shuticunaca, caicunami: Eleazar shuti curahuan, Nun shuti runapaj churi Josuehuanmi chaupinajunga. 18Chai alpacunata chaupishpa ayudachunga, tucui aillucunamanda shuj mandajta agllanguichi. 19Chai mandajcunapaj shuticunaca, caicunami: Judá aillumandaca, Jefone shuti runapaj churi Caleb shuti runata agllanguichi. 20Simeonbaj mirai ailluamandaca, Amiud shuti runapaj churi Semuel shuti runata agllanguichi. 21Benjamín aillumandaca, Quislón shuti runapaj churi Elidad shuti runata agllanguichi. 22Dan shuti runapaj mirai aillumandaca, Jogli shuti runapaj churi Buqui shuti mandajta agllanguichi. 23Josepaj churicunamanda, Manasespaj mirai aillumandaca, Efod shuti runapaj churi Haniel shuti mandajta agllanguichi. 24Efrainbaj mirai aillumandaca, Siftán shuti runapaj churi Kemuel shuti mandajta agllanguichi. 25Zabulón shuti runapaj mirai aillumandaca, Parnac shuti runapaj churi Elizafán shuti mandajta agllanguichi. 26Isacarpaj mirai aillumandaca, Azán shuti runapaj churi Paltiel shuti mandajta agllanguichi. 27Aser shuti runapaj mirai aillumandaca, Selomi shuti runapaj churi Ahiud shuti mandajta agllanguichi. 28Neftalipaj mirai aillumandaca, Amiud shuti runapaj churi Pedael shuti mandajta agllanguichi” nijurcami. 29Chai runacunatami Mandaj Diosca, Canaán llactata israelcunaman chaupishpa cuchun mandarca.
Currently Selected:
NÚMEROS 34: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.