MATEO 8
8
Lepra ung:uihuan huañujuj runatami, Jesusca alichishca
(Mar. 1:40-45; Luc. 5:12-16)
1Jesús, urcumanda ña urai shamujujpica, ashtaca ashtaca gentecunami catimunajurca. 2Shina shamujpimi, lepra ung:uihuan huañujuj runaca, ñapash Jesuspaj ñaupajpi cungurimurca. Shina cungurishpaca:
—Apunchi Jesús, can munashpaca mapa illajta saquihuai— nircami.
3Shina nijpimi Jesusca, maquita chutashpa chai runata tacarishpa:
—Ari, mapa illaj cachunmi munani— nirca.
Shina nijpimi, chai lepra ung:uica ñapash chingarca. 4Shinamandami Jesusca, chai runataca cashna nirca:
—Ricui, can ali tucushcataca, pimambash ama villanguichu. Ashtahuangarin curapajman rishpa ricurigri. Chaipica, Diosman carangui nishpa Moisés mandashcashnallata, curacuna ricushpa yachajuchun, imagutapash Diosman caragri— nircami.
Patsaj soldadota mandaj runapaj servijta Jesús alichishcami
(Luc. 7:1-10)
5Capernaum shuti puebloman Jesús yaicujpimi, patsaj soldadota mandaj runaca, ninanda mañashpa:
6cashna nijurca:
—Apunchi Jesús, ñucata servij huambragumi, na cuyuri ushaj ung:uihuan llaquinayaita huasipi sirijupan— nircami.
7Shina nijpimi, Jesusca:
—Ñuca rishpa alichishallami— nirca.
8Shina nijpimi, patsaj soldadota mandaj runaca, cashna nijurca:
—Apunchi Jesús, canda ñuca huasiman pushangapaca, jatun pinganayaimi capani. ‘Ali tucui’ nishpa can rimajpillata, ñucata servij huambraguca ali tucupangallami. 9Shuj mandajcuna mandajpimi, ñucapash causajupani. Shinallatami ñucapash, soldadocunataca mandajuni. Shuj soldadota: ‘Ri’ nishpa mandajpica, rinllami. Shinallata: ‘Shamui’ nijpipash, shamunllami. Ñucata servij runata: ‘Caita rurai’ nijpica, ruranllami— nijurcami.
10Shina nijta uyashpami Jesusca, ninanda cushijushpa, paita catijcunataca cashna nijurca:
—Na llullashpami, cangunataca cashna nini: Israel llactapipash cai runagushna alipacha crijtaca, shujtallapash na tarishcanichu. 11Cangunataca, cashnatapashmi nini: Indi llujshimuj ladomanda, indi huashajuj ladomandami, jahua pachapi Dios mandajuj llactaman ashtaca gentecuna shamunajunga. Paicunaca, Abraham, Isaac, Jacobo shuti runacunahuanmi tiarinajunga. 12Ashtahuangarin Dios mandajuj llactaguman yaicugrina gentecunarami, yana yana pushtuman shitai tucunga. Chaipica huacashpa, quirutapash canirishpami tianajunga— nijurcami.
13Shina nishpallami Jesusca, patsaj soldadota mandajtaca, cashna nirca:
—Cambaj huasiman tigrailla. Can crishcashnallatami, ucha ali tucuchun nini— nircami.
Shina nijpimi chai horasllata huambraguca, ali tucushca carca.
Pedropaj suedratami, Jesusca alichishca
(Mar. 1:29-34; Luc. 4:38-41)
14Pedropaj huasiman Jesús chayashpaca, Pedropaj suedra tabardillo ung:uihuan, na jatari ushashca camapi sirijujtami ricurca. 15Chai mamagupaj maquita Jesús tacarijhuanmi, tabardillo ung:uica ñapash anchurirca. Chashna anchurijpimi, chai mamaguca jatarishpa, paicunaman micunaguta cararca.
16Ña tutayajujpimi, aya jundashca ashtaca gentecunataca, Jesuspajman pushamunajurca. Jesusca, shimihuan rimashpallami, chai gentecunamanda ayacunataca llujchirca. Tucui ungushcacunatami alichirca. 17Profeta Isaías punda villajushpaca, cashnami nijurca: “Paillatami, ñucanchipaj ung:uicunatapash, ñucanchi nanaicunatapash aparca” nijurcami. Chashna nishca pactachunmi, Jesusca alichijurca.
Jesusta catingapaj munajcunamandami villajun
(Luc. 9:57-62)
18Jesusca, ashtaca gentecuna paipaj muyundipi jundariajta ricushpami, cuchata chimbachun, paipaj yachajujcunataca mandarca.
19Chaipica, mandashca shimita yachachij shuj runa chayamushpami:
—Yachachij, can maita rijujpipash catipashallami— nijurca.
20Shina nijpimi Jesusca, cashna nirca:
—Añascunapash, paicuna causana utujuta charinmi. Jahuata rij alasyu animalcunapash, tazinda charinmi. Ashtahuangarin Runa Aichayu tucushca ñuca maigupi siririshpa samanatallapash na charinichu— nircami.
21Paipaj yachajuj puramanda shuj runaca, Jesustaca cashnami nirca:
—Apunchi Jesús, ñuca taitatara pambashpa tigramugringapaj saquihuangui— nircami.
22Shina nijpimi Jesusca, cashna nirca:
—Ñucata catihuai. Huañushcashna causajcunaca, paicunapurallata huañushcata pambanajuchun saquilla— nircami.
Ninan huairahuan cucha jatarijujtami, Jesusca casillata rurashca
(Mar. 4:35-41; Luc. 8:22-25)
23Canoapi Jesús tiarijpimi, paipaj yachajujcunapash catishpa rinajurca. 24Ña cuchata rinajujpica, ninan huaira ñapash shamushpami, cucha yacutaca caiman chaiman shitajurca. Shinamandami yacuca, canoapi jundamui callarirca. Ashtahuangarin Jesusca, puñujurcallami. 25Shina puñujujpimi paipaj yachajujcuna shamushpa, Jesusta rijchachishpaca:
—¡Apunchi Jesús, quishpichihuai, huashajushpa huañugrinchimari!— ninajurca.
26Shina nijpimi Jesusca, cashna nirca:
—Na tucui shunguhuan crij runacuna, ¿imashpata cashna ninanda manllaringuichi?— nishpami jatarirca.
Shina jatarishpami huairatapash, cuchatapash jarcashpa rimarca. Shina rimajpimi, casillagupacha tucurca.
27Shinamandami chai runacunaca, ninanda manllarishpa:
—¿Caica ima runa cajpita, pai rimajtaca huairapash, cuchapash cazun?— ninajurca.
Gadara shuti llactapica, aya jundashca runacunatami Jesusca alichishca
(Mar. 5:1-20; Luc. 8:26-39)
28Cuchata chimbashpaca, Gadara shuti llactamanmi, Jesusca chayarca. Chaipimi, aya jundashca ishcaipura runacunaca, huañushcata pambana utujucunamanda llujshimushpa, Jesusta tuparingapaj shamurca. Chai runacunaca, manllanayai millai cajpimi, chai ñanda yalitaca, pipash na ushan carca. 29Chai runacunaca, ninanda caparishpami cashna ninajurca:
—Taita Diospaj Churi Jesús. Canga ñucanchihuanga, ¿imatata ricunata charingui? Ninanda llaquichina punllapash nara chayajpillataca, ¿imapajta ñucanchitaca llaquichingapaj shamungui?— ninajurcami.
30Chai ladolla pambapica, ashtaca ashtaca cuchicunami micushpa purinajurca. 31Shina cajpimi, chai ayacunaca:
—Cai runacunamanda ñucanchita llujchishpaca, chai cuchicunapi yaicuchun saquihuai— nishpa, ninanda mañanajurca.
32Shina nijpimi, Jesusca:
—Richilla— nirca.
Shina nijpica, chai runacunamanda ayacuna llujshishpaca, cuchicunapi yaicujtami rirca.
Shina yaicujhuanmi, chai ashtaca cuchicunaca, jaca jahua patamanda cuchaman huashajushpa huañunajurca.
33Cuchicunata michijcunaca, puebloman calpashpami, ima tucushcatapash tucuita gentecunaman villanajurca. Shinallata aya jundashca runacuna ima tucushcatapashmi villanajurca. 34Shina villajpimi, chai pueblomandaca tucuilla gentecuna Jesuspajman shamurca. Jesusta ricushpaca: “Cai ñucanchi llactamandaca ripailla” ninajurcami.
Currently Selected:
MATEO 8: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.