YouVersion Logo
Search Icon

MATEO 7

7
Shujcunataca na yangamanda juchachinachu canguichi nishcami
(Luc. 6:37-38,41-42)
1Pitapash na yangamanda juchachinachu canguichi. Na chashna rurajpimi, Diospash cangunataca na llaquichinga. 2Shujcunata imashnami nalicachinguichi, chashnallatami cangunatapash Diosca llaquichinga. Shujcunata imata rurajpipash, chashnallatami cangunamambash Diosca rurashpa tigrachinga. 3Cambaj huauquipaj ñavipi uchilla jupashna tiajujtara ricungapaj randica, ¿imashpata na cambaj ñavipi caspishna tiajujtara ricungui? 4Cambaj ñavipi shuj jatun caspishna tiajujtara nara anchuchishpaca, ¿imashnata cambaj huauquitaca: ‘Shuyai, cambaj ñavipi uchilla jupashna tiajujta anchuchisha’ nitaca ushanguiyari? 5¡Mishqui shimi, jayaj shungumi cangui! Cambaj ñavipi jatun caspishna tiajujtara anchuchiyari. Chai jipami, cambaj huauquipaj ñavipi uchilla jupashna tiajujtaca ali ricushpa, anchuchi ushangui.
6Imagutapash Diospajlla cachun carashcataca, alcushna causanajuj gentecunaman na caranachu canguichi. Cangunapaj juyailla perlastapash, cuchishna causaj gentecunamanga, na shitanachu canguichi. Paicunaca sarushpa tucuchinman.
Diosta mañanatapash, shujcunaman alita ruranatapashmi yachachishca
(Luc. 11:9-13; 6:31)
7Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami. 8Diosta tucui mañajcunaca, japingami. Mascajcunapash taringami. Punguta huactachijcunapash, pascajpi yaicungami. 9Canguna puramandaca, maijan runata cangunapaj huahuagu shuj tandaguta mañajpica, rumita caranguichiman? 10Na cashpaca, piji aichaguta carahuai nijpica, ¿maijanda culebrata caranguichiman? 11Cangunaca, nalicuna cashpapash, huahuacuna mañajpica imatapash aligutami caranata yachanguichi. Jahua pachapi tiajuj cangunapaj Taitacarin, paita mañajcunamanga, ¿nachu ashtaca alicunata caranman?
12Shuj gentecuna imatapash aliguta canguna rurachun munashpaca, chashnallatami cangunapash shujcunaman aliguta rurana canguichi. Mandashca shimipipash, Profetacuna villashca shimipipash, chashnallatami mandajun.
Quijichi punguta yaicunatami, Jesusca yachachishca
(Luc. 13:24)
13Quichiji pungutami, yaicuna canguichi. Chingaita chingachun pushajuj punguca anchomi, ñambash anchomi. Chaitaca, ashtaca gentecunami yaicushpa purinajun. 14Ashtahuangarin causaita causangapaj yaicuna punguca quichijimi, ñambash quichijimi. Chai ñandaca, huaquingunallami tarin.
Ima cajtapash, aliguta grano fucushcashna cajpimi rijsinguichi
(Luc. 6:43-44)
15Llullashpa villanajuj profetacunamandaca, cuidarinami canguichi. Paicunaca, llamagushna ali ricurishpapash, shungu ucupica shuhuanata yachaj millai atujcunashnami. 16Ima cajpipash grano fucunshna cajta ricushpami rijsinguichi. ¿Uvastaca, casha yurapi fucushcatachu pallan? Na cashpaca, ¿jigostapash cashapi fucushcatachu pallan? 17Shinami tucui ali yuragupica, juyailla fucun. Ashtahuangarin nali yurapica, ima aligupash na fucunllu. 18Ali yuragupica, imapash nalica na fucui ushanllu. Shinallata nali yurapica, imapash aliguca na fucui ushanllu. 19Tucuilla nali fucuj yuracunataca cuchushpami, ninapi shitashpa rupachin. 20Chashnami ima cajpipash, grano fucunshna cajta ricushpa rijsinguichi.
Jesusca, cangunataca rijsitapash na rijsinichu nishcami
(Luc. 13:25-27)
21Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga. 22Chai punllapica, ashtacacunami cashna ninajuhuanga: ‘Apunchi Jesús, Apunchi Jesús, ¿nachu cambaj shutipi canmanda villanajurcanchi? ¿Nachu cambaj shutipi rimashpa, ayacunatapash llujchircanchi? ¿Nachu cambaj shutipi rimashpa, imagutapash rurashpa ricuchircanchi?’ ninajuhuangami. 23Shina ninajujpimi, cashna nisha: ‘Cangunataca, ima horapash na rijsishcanichu. Caimanda anchurichi, nalita rurajcuna’ nishami.
Ishcai huasichijcunamanda Jesusca yachachishcami
(Luc. 6:47-49; Mar. 1:22)
24Ñuca yachachijuj cai shimicunata uyashpa cazuj runataca, aligutapacha yarishpa paipaj huasitaca jatun rumi jahuapi huasichij runahuanmi chimbapurasha. 25Huasichishca jipaca, ninanda tamiajpipash, yacu ninanda shamujpipash, huaira ninanda huactamujpipash, chai huasica jatun rumi jahuapi huasichishca cashcamandaca, na urmarcachu. 26Ashtahuangarin maijambash ñuca yachachishcata uyashpapash na cazuj runataca, t'iyu alpa jahuapi huasichij, juizu illaj runahuanmi chimbapurasha. 27Shina huasichishcataca, ninanda tamiashpa, yacupash ninanda jatarishpa, huairapash ninanda huactamushpaca, chai huasitaca urmachircallami. Tucuilla urmashpami, llaquinayaita tucurirca” nijurcami.
28Jesús chashna juyailla shimicunata rimashca jipaca, gentecunaca pai chashna yachachijujta uyashpami, ricunman quedanajurca. 29Ashtahuangarin Jesusca, yachachina ninan ushaita charishpami yachachijurca. Mandashca shimita yachachijcunashnaca na yachachijurcachu.

Currently Selected:

MATEO 7: QUII

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy