GÉNESIS 49
49
Paipaj churicuna imashna tucunata, Dios villashcatami Jacoboca villashca
1Paipaj churicunata Jacobo cayashpaca, cashnami nijurca: “Jipa punllacunapi canguna ima tucunata villangapaj tandanajumuichi:
2Jacobopaj churicuna, tandanajushpa uyaichi,
cangunapaj taita Israel ima nijujta uyaichi.
3Rubén, canmi ñuca punda churi cangui.
Canmi, ñuca shinllipacha cashcata ricuchij,
ñuca shinllipacha cashpa charishca punda churi cangui.
Canmi, pundapi alicachi tucunatapash,
mandana ushaitapash charingui.
4Ninanda rijuj yacucunashna cashpapash,
cambaj taitapaj camaman vitsiashcamandami,
na pundapi cangui.
Ñuca siririna pushtuman vitsiashcamandami,
canga yangapi churai tucushcangui.
5Simeonhuan, Levihuanga huauqui purami.
Paicunapaj macanajunacunaca, nalita
rurana macanajunacunami.
6Paipura parlanajushcataca, ñuca
shungupica napacha alicachishachu.
Paicunahuan tandanajunataca, yaritapash na yarishachu.
Paicuna ñapash fiñarishpami, runacunataca huañuchirca.
Chashna manllanayaicuna cashpami,
huagracunapaj chaqui angucunatapash fitirca.
7Paicuna ñapash fiñarishcapash, ninan nali
cashcamanda paicuna fiñarishcapash, shinllipacha
cashcamandaca, ninanda nalicachi tucushca cachun.
Ñucami, Jacobomandaca shicanyachisha.
Israel puramandaca, caita chaitami cachasha.
8Judá, candaca cambaj huauquicunami alicachinajunga.
Canmi, canda fiñajcunataca, cambaj
maquihuan cunga tullupi llapingui.
Cambaj taitapaj churicunami,
cambaj ñaupajpi cumurinajunga.
9Judá, canga leonbaj huahuashnami cangui.
Ñuca huahualla, animalcunata japishpami,
vichai tigramurcangui.
Canga, leonshna curcuyashpami, rucu
leonshna micushpa sirijurcangui.
Chashna sirijujtaca, ¿pita rijchachingayari?
10Judá mandana vara caspitaca, na quichungachu.
Paipaj chaqui chaupimandaca, Siloh shamungacaman,
maijan mandajpash na quichungachu.
Paipajmanmi, llactacunapi causajcunaca tandanajunga.
11Paipaj huahua burrotaca, uvas yurapi huatashpa,
paipaj burropaj huahua burrotaca, uvas sapipi
huatashpami, paipaj churajunataca vinopi tajsharca.
Paipaj jahualla churajunatapash,
yahuarshna puca vinopimi tajsharca.
12Paipaj ñavica, vinotapash yali pucami.
Paipaj quirucunapash, lechetapash yali yurajmi.
13Zabulón runaca, mama cuchaman
chayana manñacunapimi causanga.
Barcocuna chayana pueblomi canga.
Paipaj llactaca, Sidón pueblocamanmi canga.
14Isacar runaca, animalcunata pacarichina
chugllapi samangapaj siririj shinlli burroshnami.
15Samanaca aligu cajta, llactapash
juyaillagupacha cajtami ricurca.
Shina cashpapash huasha curcuyajta aparishpami,
impuestota cushpa servijurca.
16Dan runaca, Israel aillu purashnallatami,
paipaj miraicunata mandanga.
17Dan runaca, ñan ladopi chapaj culebrashnami canga.
Chaqui ñan ladopi caballopaj talonda canishpa,
caballo jahuapi tiajujta huashaman urmachinshnami canga.
18Mandaj Dioslla, can quishpichinatami shuyajurcani.
19Gad runataca, soldadocunami, cungashcapi macaj shamunga.
Ashtahuangarin paimi jipamanga, cungashcapi macanga.
20Aser runapaj granocunaca, ali micunacunami canga.
Paimi micunayai granocunata,
jatun mandajman cunga.
21Neftalí runaca, tarugata cacharishcashnami,
juyailla shimicunata rimanga.
22Joseca, ninanda fucuj yurashnami.
Pugyu ladopi ninanda fucuj yurashnami.
Chai yurapaj malquicuna, ashtahuan
viñashpa pata jahuata rijunshnami.
23Paitaca ninandami llaquichinajurca.
Flechacunahuanmi cacharinajurca.
Paitaca, arcohuan flechata cacharijcunami
na ricunayachirca.
24Ashtahuangarin paipaj arcoca, shinllipacha tiajurcallami.
Paipaj rigrapash, paipaj maquipash shinllipachami carca.
Jacoboman ushaita cuj Diospaj maquimandami,
shina carca.
(Israelcunapaj jatun Rumishna, paicunata
Michij Diospaj shutimandami shina carca).
25Cambaj taitapaj Taita Diosmandami, shina canga.
Paimi candaca ayudanga.
Tucuita Rurai Ushaj Taita Diosmandami, shina canga.
Paimi candaca bendicianga.
Jahua pachamandapash, manllanayai ucu ucu
yacucunamandapash, yacuta cachamushpami bendicianga.
Shinallata mamapaj chuchutapash,
mamapaj vijsatapashmi bendicianga.
26Cambaj taita bendiciashcacunaca, ñucapaj ñaupa
taitacuna bendiciashcatapash ashtahuan yalimi carca.
Chai bendiciashcacunaca, causaita causaicaman
tiaj urcu pundacunacaman chayashpami,
Josepaj uma jahuapipash, frentepipash canga.
Paica, paipaj huauqui puramanda
shicanyachi tucushcami carca.
27Benjaminga, imatapash quichujlla atujshnami.
Tutamandata aichataca japishpa micunga.
Chishipica, macanajushpa quichushcacunatami
chaupinga” nijurcami.
Jacobo huañujpi pambashcatami villajun
28Tucui paicunami, chunga ishcai Israel aillucuna carca. Caitami, paicunapaj taita bendiciajushpaca nirca. Tucuicunatami, imashna bendicianashnallata bendiciarca. 29Chaipaj jipami, churicunataca cashna nishpa mandarca: “Ñucaca, ñuca llacta puracunahuanmi tandanajugrini. Heteopura Efrón shuti runata randishca pambapi tiaj utujupi, ñuca taitacunapaj ladopi pambahuanguichi. 30Macpela shuti pambapi tiaj utujupi pambahuanguichi. Chai pambaca, Canaán llactapimi Mamre shuti pueblomanda, indi llujshimuj ladomanmi tiajun. Chai alpatami Abrahamga, heteopura Efrón runata randirca. Chai pambataca, pambana alpa cachunmi randirca.
31Chaipimi Abrahamdapash, paipaj huarmi Saratapash pambarca. Chaipillatami Isaactapash, paipaj huarmi Rebecatapash pambarca. Ñucapash, Leataca chaipillatami pambarcani. 32Chai alpandi, chai alpapillata tiaj jatun utujundi randishcacunaca, Het shuti runapaj miraicunapajmi carca” nijurcami.
33Jacoboca, paipaj churicunata chashna mandashpa tucuchishpaca, paipaj camapi chaquita vichai curpashpa huañushpami, paipaj taitacunahuan tandanajurca.
Currently Selected:
GÉNESIS 49: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.