GÉNESIS 50
50
1Chashna huañujpimi Joseca, paipaj taitata ugllarishpa, ñavipi muchashpa ninanda huacajurca. 2Chai jipami Joseca, jambishpa causaj paita servij jambijcunataca, paipaj taita huañushcapica, mishquillagu ashnajuj jambicunahuan javichun mandarca. Shina mandajpimi jambijcunaca, taita Israeltaca mishquilla ashnajuj jambicunahuan javinajurca. 3Chuscu chunga punllacunacamanmi, javinataca tucuchirca. Chashna punllacunacamanmi, mishquilla ashnajuj jambihuan javishpa tucuchina carca. Egiptopi causajcunaca, canchis chunga punllacunacamanmi huacanajurca. 4Chai huacana punllacuna yalijpimi Joseca, Faraonbaj huasipi causajcunataca, cashna nirca:
—Cunan cangunapaj ñavipi ñuca ali ricurishca cajpica, Faraonman cashna nigripaichi nipanimi: 5Joseca cashnami nijun: ‘Ñuca taitami, cashna nishpa juramentuchihuarca: Ricui, ñucaca ña huañugrinimi. Ñuca huañushpa pambai tucungapaca, Canaán llactapi tiaj utujutami allachircani. Chai utujupi pambahuangui nihuarcami. Chaimandami cunanga, ñuca taitata pambashpa tigramugripani’ nijunmi nigripaichi— nircami.
6Shina villagrijpimi Faraonga, cashna nirca:
—Pai canda juramentuhuai nishcashnallata, cambaj taitata pambangapaj rilla— nircami.
7Shina nijpimi Joseca, paipaj taitata pambangapaj vichai rirca. Paihuanga, Faraonbaj tucuilla servijcunapash, Faraonbaj huasipi tiaj rucucunapash, Egipto llactamanda tucui rucucunapashmi rinajurca. 8Josepaj huasi ucu puracunapash, tucuilla paipaj huauquicunapash, paipaj taitapaj huasi ucu puracunapashmi rinajurca. Gosén llactapica, paicunapaj huahuacunata, llamacunata, huarmi huagracunatallami saquinajurca. 9Paihuanga carretacunapash, caballocunapi tiarishca soldadocunapashmi vichai rinajurca. Shinami ashtaca ashtaca gentecuna tandanajurca. 10Chashnami, Atad shuti trillana pambaman chayarca. Chai pambaca, Jordán yacu chimba ladomanmi. Chaipimi ninandapacha llaquirishpa, yarishpa yarishpa huacanajurca. Taita huañushcamandaca, canchis punllacamanmi Joseca ninan llaquillapacha carca.
11Chai llactapi causaj cananeocunaca, Atad shuti trillana pambapi chashna huacanajujta ricushpami, cashna ninajurca: “Egiptopi causajcunaca, ninandapacha llaquirishpami huacanajun” ninajurcami. Chaimandami, Jordán yacu chimba ladopi tiaj pambataca, Abel-mizraim shutita shutichinajurca.
12Jacobopaj churicunaca, Jacobotaca imashna paicunata mandashcashnallatami ruranajurca. 13Paicunapaj churicunaca, Canaán llactaman apashpami, Macpela shuti pambapi tiaj jatun utujupi pambarca. Chai pambataca Abrahammi, pambana alpa cachun, heteopura Efrón shuti runata randishca carca. Chai pambaca, Mamre shuti pueblomandaca indi llujshimuj ladomanmi. 14Joseca, paipaj huauquicunandi, paipaj taitata pambangapaj paihuan vichai shamushca tucui gentecunandimi, Egiptoman tigrajurca. Paipaj taitata pambashca jipami, chashna tigranajurca.
José huañushcatami villajun
15Josepaj huauquicunaca, paicunapaj taita huañujpimi, cashna ninajurca: “Joseca, ñucanchitaca napashchari ricunayachingachu. Chashna na ricunayachishpaca, tucui ima nalita rurashcamandami, ñucanchiman cunatallata cunga” ninajurcami. 16Chaimandami, Josepajman cashna nichun cachanajurca: “Cambaj taitaca nara huañushpallatami, cashna nishpa mandarca: 17‘Josetaca, cashna ninguichi: Cunanga, cambaj huauquicuna canda nalita rurashpa, juchata rurashcataca cungapailla. Candaca, nalitamari rurashcanchi ninguichi’ nircami. Chaimandami cunanga, chai nalita rurashcataca cungapai ninajupanchi. Ñucanchica, cambaj taitapaj Taita Diosta servijcunami capanchi nigripaichi” nichunmi cachanajurca.
Shina nishpa villanajujpillatami, Joseca huacarca. 18Paipaj huauquicunapash shamushpami, Josepaj ñaupajpi cungurishpa:
—Canda servingapajmi, caipi capanchi— ninajurca.
19Shina nijpimi Joseca, cashna nishpa tigrachirca:
—Na manllanachu canguichi. ¿Ñucaca, Taita Diospaj randichu tiajuni? 20Cangunaca, ñucata llaquichinatami yarircanguichi. Ashtahuangarin Taita Diosmi, alipaj pushamuhuashca. Chaitaca, cunanmi ricunajunchi. Paimi, ashtaca gentecunata causaihuan charingapaj chashna rurashca. 21Cunanga, na manllanachu canguichi. Ñucami cangunamambash, cangunapaj huahuacunamambash, granocunata carashpa charisha— nijurcami.
Chashna cushichishpami, paicunapaj shunguman chayajta rimarca.
22Joseca, paipaj taitapaj huasi ucu puracunandimi, Egiptopi causajurca. Joseca, patsaj shuj chunga huatatami causajurca. 23Joseca, Efrainbaj churicunataca, quimsa miraicamanmi ricurca. Manasespaj churi Maquir shuti runapaj huahuacunapash, Josepaj maquipimi viñarca.
24Joseca, paipaj huauquicunatami cashna nirca: “Ñucaca huañugrinimi, ashtahuangarin Taita Diosca cangunata ricuj shamungapachami. Shinallata cai llactamandaca Abrahamman, Isaacman, Jacoboman carashapacha nishpa juramentushca llactamanmi vichai pushanga” nircami.
25Joseca, taita Israelpaj churicunataca, cashna nishpami juramentuchirca: “Taita Diosca, cangunataca ricuj shamungapachami. Pai shamujpica, ñuca tullucunata caimanda apanapachami canguichi” nijurcami.
26Joseca, patsaj shuj chunga huatata charishpami huañurca. Egiptopillata huañujpimi Josetaca, mishquillagu ashnajuj jambita javishpa, cajapi churarca.
Currently Selected:
GÉNESIS 50: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.