1 CORINTIOS 16
16
Diospajlla causajcunaman cachangapajmi, culquita tandachishca
1Diospajlla causajcunaman, culquita carashpa cachanataca, Galacia llactapi tandanajuj crijcunatapash mandarcanimi. Chashnallata cangunapash, paicunashna tandachipaichi ninimi. 2Mashnaguta canguna japishpapash, tucuicunallata semana callari punllapi tandachinguichi. Chai culquigutaca, shican churashpa alichipanguichi. Ñuca shamujpira ama tandachinajuchunmi, cashna nipani. 3Ñuca ña chayashpami, canguna carashpa tandachishca culquitaca, Jerusalenbi saquigrichun canguna cachangapaj cartapi agllashca huauquicunatallata cachasha. 4Ñucapash rinapacha cajpica, paicunapash ñucahuan cumba tucushpa ringallami.
Maita rinatami, Pabloca yarijushca
5Macedonia llactamanra chayanatami charini. Macedonia llactata yalimushca jipami, cangunapajman chayamusha. 6Cangunapajman ñuca shamushpaca, cangunahuan ashaguta quedashapashchari. Na cashpaca, tamia quillacuna yalingacamanmi quedaringa. Chai jipami, ñuca maiman rina cajpipash canguna cachahuanguichi. 7Cangunataca yalishpalla ricungapaca, na munanichu. Ashtahuangarin Apunchi Jesús munajpica, unaicamanmi cangunahuan cangapaj munani. 8Shina cashpapash Pentecostés nishca fiesta punllacuna yalingacamanllami, cai Efeso pueblopi cagrini. 9Caipi villajungapaca, pungu pascashcashna alipacha cajpimi, maipipash villajuni. Shina cajpipash, ñucata na ricunayachij runacunaca, ashtacacunami tian.
10Cangunapajman Timoteo chayamujpica, ama manllajuchun, aliguta mingachipanguichi. Paipash ñucashnallata, Apunchi Jesuspajta rurajmi. 11Shina cajpimi paitaca, na yangapi churana canguichi. Ashtahuangarin aliguta tigramuchun, imagutapash carapanguichi. Paitaca, caishuj huauquicunahuan cumba tucushpa tigramunatami shuyajuni.
12Apolos shuti huauquitaca, caishuj huauquicunahuan cumba tucushpa, cangunata ricungapaj richunmi, cutin cutin mingajurcani. Shina mingajpipash, cunambica napacha cangunapajman ringapaj munarcachu. Shina cashpapash, cutin rina tiajpica ringami.
Aliguta causapanguichi nishpami tucuchishca
13Rijcharianshna causanguichi. Canguna crishcatapash, aligutapacha catinguichi. Shinlli jaricunashna, shinlli tucushpa causanguichi. 14Imata rurashpapash, ninan juyaihuanmi rurana canguichi. 15Huauquicuna, panicuna, Estéfanas shuti huauquitaca, paipaj familiacunatapash rijsinguichimi. Paicunaca, Acaya shuti llactapimi Jesusta punda cri callarirca. Shinallata Diospajlla causanajuj crijcunaman, imaguta ruranatapash yariajmi causanajun. 16Shinamandami, paicunashna imaguta rurajcunatapash, shujcunaman aliguta ayudashpa imaguta rurajcunatapash, cazupanguichi nipani. 17Estéfanas, Fortunato, Acaico shuti huauquicuna shamushcamandami, ninanda cushijuni. Cangunaca, carupi causashpa na ayudai ushajpimi, cangunapaj randi ñucataca ayudahuarca. 18Paicunaca cangunatapash, ñuca shungutapash cushichircami. Paicunashna aliguta rurajcunataca, alicachinami canguichi.
19Asia llactapi tandanajuj crijcunami, cangunataca alillachu capanguichi ninajun. Aquila shuti, Priscila shuti crijcunami, paicunapaj huasipi tandanajuj crijcunandi, Apunchi Jesuspaj tucushcamanda, alillachu capanguichi nishpa, cutin cutin ninajun. 20Cangunataca, tucuilla crijcunami alillachu capanguichi ninajun. Ima nalitapash na yarishpa muchashpami, caishujhuan chaishujhuan alillachu capanchi nina canguichi.
21Pablomi, ñuca maquihuambacha caita escribishpa cangunataca, alillachu capanguichi nishpa cachamuni.
22Apunchi Jesusta maijambash na juyajtaca, Dios tucuchingapaj shicanyachishca cachun ninimi. Apunchi Jesusmi shamugrin.
23Apunchi Jesucristopaj ninan juyaica, cangunahuan cachun ninimi. 24Cristo Jesusmanda ninan juyaita ñuca charishcapash, tucui cangunahuan cachunmi munani. Shina cachun.
Currently Selected:
1 CORINTIOS 16: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.