1 CORINTIOS 15
15
Huañushca crijcuna causarinatami villajun
1Cunanga tucui crijcuna, ali villaita ñuca villashcataca, cutinmi cangunaman yarichimuni. Chai villashcataca, cangunaca aligutami chasquircanguichi. Chaitallatami, cunangaman aliguta catinajunguichi. 2Chaimandami cangunaman ñuca villajushca shimicunata aligutapacha catimushpaca, na yangalla crishcamanda quishpirishcanguichi.
3Cangunaman yachachijushpaca, pundaca ñuca chasquishcatarami yachachijurcani: Dios escribichishca Shimipi nijunshnami Cristoca, ñucanchipaj juchacunamandaca huañurca. 4Dios escribichishca Shimipi nijunshnami, Cristoca pambai tucurca. Ashtahuangarin quimsa punllapica, causarircallami. 5Pai causarishpaca, Pedromanrami ricurirca. Chai jipaca, chunga ishcai yachajujcunamanmi ricurirca. 6Chai jipaca, picha patsaj yali crijcuna tandanajushcamanmi ricurirca. Paicuna puramandaca, taucacunami causanajunra, huaquingunaca ñami huañushca. 7Paicunaman ricurishca jipaca, Jacobomanmi ricurirca. Chai jipaca, pai villachun cachashca tucuicunamanmi ricurirca.
8Tucuicunaman ricurishca jipaca, nara huacharina punllapillata huacharishcashna ñucamanmi ricurihuarca. 9Villachun cachashca runacunapajpash, jipa jipami cani. Taita Diospajlla tandanajushca crijcunata catiriashpa llaquichishcamandami, villachun cachashcami cani ningapaca, pinganayai cani. 10Cunambi ñuca imashna cashpapash, Taita Dios ninanda juyajpimi shina cani. Dios ninanda juyashpa ñucaman mingashpaca, na yanga caramushcachu. Ashtahuangarin ñucami, caishuj villajcunatapash, tucuicunata ashtahuan yalishpa imatapash rurajurcani. Shina rurajushpapash, na ñucallata rurajunichu. Ashtahuangarin Taita Dios ninanda juyashpa ñucahuan cashpami, imaguta rurachumbash, ushaita caramujun. 11Caishujcunapash, ñucapash chaitallatami villanajunchi. Chai shimicunatami, cangunaca crircanguichi.
12Ashtahuangarin: “Huañushcacunapaj chaupimandami, Cristoca causarirca” nishpami villarcanchi. Shina villajpipash, ¿imashpata canguna puramanda huaquingunaca: “Huañushcacunaca na causaringachu” ninajunguichi? 13Shina cashpaca, huañushcacuna na causarina tiajpica, Cristopash na causarishcachu canman. 14Cristopash na causarishca cajpica, yanga yangami villashpa purinchiman. Cangunapash, yangallatami cringuichiman. 15Shina cashpaca, Taita Diosmanda llullashpa villajcunami ricurishun. Ñucanchica: “Taita Diosmi, Cristotaca causachirca” nishpami villanajunchi. Cristo na causarishca cajpica, huañushcacunapash napacha causarinachu canman. 16Huañushcacuna na causarina cajpica, Cristopash na causarishcachu canman. 17Cristo na causarishca cajpica, cangunapash yangallatami cringuichiman. Juchacunapillatami causanguichiman. 18Shina cajpica, Cristota crij huañushcacunapash, chingaita chingashcami canman. 19Cai pachapi causaipajlla Cristota crinimi nishpa shuyanajushpaca, tucui gentecunatapash yali ashtahuan llaquinayaimi canchiman.
20Ashtahuangarin cunanga Cristoca, huañushcacunapaj chaupimandami causarirca. Paica punda causarishpami, paita crij huañushcacuna causarinata ricuchijun. 21Cai pachapica, shujlla runamandami huañunaca callarirca. Shinallata shujlla runamandami, huañushcacunapaj chaupimanda causarinapash callarirca. 22Imashnami Adán runapaj miraicunaca, tucuicuna huañunajun. Chashnallatami Cristohuan causajcunaca, tucuicuna causachi tucunga. 23Tucuicunami, paicuna causarinapillata causaringa. Tucuipaj pundaca, Cristomi causarirca. Chai jipami, Cristo tigramujpica, paipajlla tucushcacuna causaringa. 24Ashtahuan chai jipamanmi, tucurimui canga. Paita na ricunayachij tucui mandajcunatapash, tucuilla mandajcunatapash Cristo tucuchishpami, pai mandajushcataca Taita Diosman cutin tigrachinga. 25Ashtahuangarin Cristota na ricunayachijcunataca tucuicunata, paipaj chaqui sarunapi Dios churana punllacaman Cristo mandajunami ashtahuan ali. 26Tucuripi tucuchi tucuna fiñajca, huañuimi. 27Diosca, tucui imapash cazuchunmi, Cristopaj chaqui sarunapi churashca. Shina tucuita cazuchun churashca nishpaca, tucuita churaj Taita Diospash, Cristopaj ñaupajpi cazuchi tucungami nishpaca, na nijunllu. 28Ashtahuangarin tucuita cazuchijuchun, paipaj ñaupajpi Dios churashca jipami, paipaj Churipash tucuita cazuchijuchun churaj Diosta cazujunga. Taita Diosllami, tucui imatapash tucuipi cazuchijunga.
29Huañushcacuna imashnallapash na causarina cajpica, huañushcacunamanda bautizarijcunaca, ¿imatashi ruran? ¿Imapajshi huañushcacunamandaca bautizarin?
30¿Imashpata ñucanchica, ima horapash llaqui japinalla purinajunchi? 31Huauquicuna, panicuna, ñucami punllandi huañuchi tucunalla purijuni. Ñucanchi Apunchi Jesucristota canguna crij cajpi, cushijushca cashpami cashnataca nini. 32Cai pachapi causanamandalla, Efeso pueblopi millai animalcunahuan ninanda macanajushca cashpaca, ¿imapajshi ali cahuanga? Huañushcacuna na causarina cajpica: “Micushunchi, ufiashunchi, cayaca huañuipajpash canchi” ninchimanmi.
33Na pandanachu canguichi. Nali parlocunaca, alita rurashpa causanajujtapash huaglichinmi. 34Rijcharianshna aliguta yariajlla causashpami, juchataca na rurana canguichi. Canguna puramanda huaquingunaca, Taita Diosta na rijsinllu. Canguna pingai tucuchunmi, chashna nijuni.
35Ashtahuangarin huaquingunaca, cashnami ninga: “¿Imashnata huañushcacunaca causaringa? ¿Imashna cuerpohuanshi causaringa?” ningami. 36Chashna nij runaca juizu illajmari. Ima muyuta can tarpushcapash, na viñanllachu, ashtahuangarin pundaca ismushpa chinganrami. 37Imata tarpushpapash, ña viñashcataca na tarpunguichu. Ashtahuangarin trigota cashpa, na cashpaca ima muyuta cashpapash, muyutallami tarpungui. 38Ashtahuangarin tarpushca muyutaca Taita Diosmi, pai munashcashna viñachin. Tucuilla muyutami, chashnallata viñachin. 39Ima causajcuna tiashpapash, na chashnallata cuerpohuanllu. Gentecunaca shuj cuerpohuan, animalcunapash shuj shuj cuerpohuanmi. Alasyu animalcunapash shuj cuerpohuan, pijicunapash shuj cuerpohuanmi. 40Jahua pachapipash, shuj cuerpocunami tian. Cai pachapipash, shuj cuerpocunami tian. Jahua pachapica, shujmi punchapambagu tian. Cai pachapipash, shujmi juyailla tian. 41Indi punchayachijujpash, luna punchayachijujpash, luzerocuna punchayachijujpash shujmi. Luzerocunaca, shuj shuj punchayachijcunami tian.
42Huañushcacuna causarinapash chashnallatami. Huañushcataca, ismunatami tarpunshna pamban. Shina cajpipash na ismuna cuerpohuanmi causaringa. 43Nalicachishcami tarpunshna pambarin. Shina cashpapash punchapamba cuerpohuanmi causaringa. Ushaita na charijtami, tarpunshna pamban. Shina cashpapash, ushaita charij cuerpohuanmi causaringa. 44Aichayu cuerpotami, tarpunshna pamban. Shina cajpipash, Diospaj Espirituta charij cuerpomi causaringa. Aichayu cuerpopash tianmi, Diospaj Espirituta charij cuerpopash tianmi.
45Shina cajpimi escribishcapipash, cashna nijun: “Punda rurashca Adán shuti runataca, causaj almahuanmi rurashca carca” nijunmi. Ashtahuangarin jipa Adanga, causaita caraj Espiritutami charin. 46Diospaj Espirituta charij runaca, na punda tiashcachu. Ashtahuangarin aichayu runami, pundaca tiashca. Chai jipami, Diospaj Espirituta charij Runaca shamurca. 47Punda runaca, alpamanda rurashca cashpami, cai pachamanda carca. Jipa runaca, Apunchi Jesusmi. Paica jahua pachamandami. 48Alpata rurashca runashnallatami, cai pachapi runacunapash. Jahua pachamanda Runashnami, jahua pachaman rinacunapash. 49Imashnami alpamanda rurashca runaman rijchaj canchi, shinallatami jahua pachamanda shamuj Runamambash rijchaj cashun.
50Ashtahuangarin huauquicuna, panicuna, caitallami ningapaj munani: Aichandi yahuarndica, pipash na Taita Dios mandajuj llactaman ringachu. Shinallata ismushpa tucurinapash, na ismushpa tucurinahuanga na tandanajungachu. 51Ricuichi, pipash na yachai ushashcatami villajuni: Na tucuilla huañunachu canchi. Ashtahuangarin tucuillami, mushujman tigrachi tucushun. 52Ñavita ñapash vichashpa ñapash pascaipishnami, mushujman tigrachi tucushun. Tucuripica trompetatami huacachinga. Trompetata huacachijpimi, huañushcacunaca na ismuna cuerpohuan causachi tucunga. Shinallata ñucanchipashmi, mushujman tigrachi tucushun. 53Cai ismuna cuerpoca, na ismuna cuerpotami churajunata charin. Cai huañuna cuerpoca, na huañushpa causaita causana cuerpotami churajunata charin. 54Cai ismuna cuerpo na ismuna cuerpota churajujpi, shinallata cai huañuna cuerpo na huañuna cuerpota churajujpimi, cashna escribishca shimica pactanga: “Tucuita mishajmi, huañuitaca tucuchishca. 55Huañuilla, ¿maipita can tujsishpa huañuchinaca? Pambana utujulla, ¿imashnata mishai ushanguiyari?” nijushcami pactanga. 56Huañuchingapaj tujsinaca juchami. Juchaman ushaita cujpash, mandashca shimicunami. 57Ashtahuangarin Taita Diostaca, pashi ninami canchi. Paimi, nalita mishachunga, ñucanchi Apunchi Jesucristomanda ushaita caramujun.
58Shina cajpimi ñuca juyashca huauquicunacuna, panicuna, Apunchi Jesusta alipacha crishpa catina canguichi. Imata rurachun pai mingashcatapash, ashtahuanmi rurashpa catina canguichi. Apunchi Jesusmanda imatalla ruranaca, na yanga cajta yachashpami, chashna rurana canguichi.
Currently Selected:
1 CORINTIOS 15: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.