2 CORINTIOS 1
1
Alillachu capanguichi nishcami
1Taita Dios munajpi, Jesucristo villachun cachashca Pablomi cani. Corinto pueblopi Taita Diospajlla tandanajuj crijcunaman, Acaya shuti llactapi Diospajlla tucui causajcunamanmi, caitaca huauqui Timoteohuan escribimunchi. 2Ñucanchi Taita Diospash, Apunchi Jesucristopash, ninan juyaita, casilla ali causaiguta cangunaman carachunmi munanchi.
Llaquicunata Pablo apashcami
3Ñucanchi Apunchi Jesucristopaj Taita Diosca, ninanda alicachi tucushca cachun. Paillami, ñucanchita ninanda llaquij, tucuipi cushichij Taita Dios. 4Ñucanchita jatun llaquicuna japijpipash, Diosmi cushichin. Shujcunata jatun llaquicuna japijpipash, Taita Dios ñucanchita imashna cushichinshnallata, ñucanchipash cushichi ushachunmi, chashna cushichijun. 5Cristo ninanda llaquichi tucushcashnami, ñucanchipash llaquichi tucunchi. Chashnallatami Cristoca, ñucanchita ninanda cushichishpa charijun. 6Ashtahuangarin canguna ninanda cushijushpa quishpirichunmi, cai jatun llaquicunataca apanajunchi. Shinallata canguna ninanda cushijushpa quishpirichunmi, Diosca ñucanchita cushichijun. Shinamandami cangunapash, ñucanchishnallata shinlli tucushpa llaquitaca apanajunalla canguichi. 7Cangunata yarishpami, ninanda cushijunchi. Cangunapash, ñucanchishnallatami shinllitapacha llaquita apanajunguichi. Shinallata Diosca cangunatapash, ñucanchitashnami cushichijun. Chaitaca alimi yachanchi. 8Huauquicuna, panicuna, Asia llactapi ñucanchi jatun llaquita apashcata yachachunmi munanchi. Ninandapacha llaquichijpimi, na ashtahuan shinlli tucui ushashpa, cunanga ña huañugrinchimari ninajurcanchi. 9Huañuchi tucunapacha cashcatami, ñucanchillata yacharcanchi. Na ñucanchillata ushaita charishpa, ashtahuangarin huañushcacunata causachij Taita Diosta yariashpa causangapajmi, chashna tucurcanchi. 10Llaquinayaita huañunamandaca Diosmi quishpichirca, cunambipash quishpichijunmi. Paillatami jipamambash quishpichinga. 11Ñucanchimandaca, cangunapash Diosta mañapanguichi. Ashtacacuna ñucanchimanda mañajpica, paimi ñucanchiman imagutapash caranga. Shina carajpimi, ashtacacuna pashi ninajunga.
Imashpa Pablo na Corinto puebloman rishcatami villajun
12Ñucanchica, cai pachapica na nij tucushpallami, juyailla aliguta causanajunchi. Ashtahuambachaca cangunahuan cashpami, shina causarcanchi. Na ñucanchi aliguta yachajushcahuanlla causanachu canchi, ashtahuangarin Taita Dios ninanda juyajujpimi causanajunchi. Ñucanchi imashna causanajujtaca, ñucanchi yuyaillata yachachijpimi ninanda cushijunchi. 13Canguna leyishpa yachajunalla cachunmi, caicunataca escribimunchi. Shinallata tucuillata aligutapacha yuyaipi japichunmi munani. 14Cangunaca, Apunchi Jesús shamui punllapimi, ñucanchi yachachishcamandaca juyailla cushijunguichi. Shinallatami ñucanchipash, cangunamandaca cushijushun. Chaitaca, ñami ashaguta yachanguichi.
15Chaita yariashpami, cangunapajmanra punda shamungapaj munarcani. Dios ashtahuan cangunaman aliguta carachun yashpami, caihuanga ishcaita shamungapaj munarcani. 16Cangunapajmandaca, Macedonia llactaman yalingapajmi munarcani. Shinallata Macedoniamanda tigramushpapash, cangunapajman cutin chayamungapajmi munarcani. Chaimandaca, canguna ñucata Judea llactaman cachachunmi yarijurcani. 17Cashna ñuca yarijushpaca, ¿nachu aliguta yarijupashcani? Na cashpaca, ñuca imata rurasha nijushcataca, ¿ñuca munaillachu: “Ari rurashami, na rurashachu” nijupashcani? 18Cangunaman ñucanchi imagutapash rurashun nishpa: “Ari” nishcatapash: “Na” nishcatapash, Taita Diosca alipachami yachan. 19Ñucapash, Silvanopash, Timoteopash, Taita Diospaj Churi Jesucristomandami, cangunamanga villanajurcanchi. Cristoca: “Ari” nishpapash: “Na” nijuitaca, na yachanllu carca. Ashtahuangarin paica: “Ari” nishcataca pactachinapachami carca.
20Taita Diosca, imatalla carashapachami nishca shimicunatapash, Jesucristomandami: “Ari” nishcataca pactachijun. Chaimandami ñucanchimanda, Taita Diosca punchapambagumari cangui ni tucushca cachun: “Shina cachun” ninajunchi. 21Taita Diosmi ñucanchitapash, cangunatapash, Cristota aliguta catichun shinllichijun. Taita Diosllatami aceiteta talishpa javinshna, paipaj Espiritutapash ñucanchiman caramurca. 22Paillatami, ñucanchi imaguta japigrinata ricuchijuchumbash, ñucanchi shungupi paipaj Espirituhuan sellarca.
23Ashtahuangarin ñuca almata imashna cajta yachaj Taita Diostami mañajuni. Cangunata llaquimandami, Corintoman shamungapaj munashpapash nara shamuni. 24Cangunaca, ñami shinllipacha crijcuna canguichi. Shina cajpimi cashna, chashna crishpami catina canguichi nishpaca, na mandanchi. Ashtahuangarin canguna ninanda cushijushpa causachunmi ayudangapaj munanchi.
Currently Selected:
2 CORINTIOS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.