1 CORINTIOS 14
14
Shuj shuj rimaicunata rimanatami villajun
1Ashtahuan juyaita charishpa catinguichilla. Canguna imata rurai ushachun Diospaj Espíritu caramujujtapash, ucha mascashpa catinguichi. Chaitapash ashtahuan yalica, Dios ima nishcata villana ushaita japinatami mascariana canguichi. 2Maijambash shuj shuj rimaicunata parlajushpaca, na gentecunaman parlajunllu, ashtahuangarin Taita Diosmanmi parlajun. Diospaj Espíritu yuyaita cujpi, pacalla tiajcunata chashna parlajpipash, chaitaca pipash na yachai ushanllu. 3Ashtahuangarin Profeta runaca, shujcuna shinlli crishpa catichun, aliguta yarichishpa catichun, cushijushpa catichunmi villajun. 4Na yachashca rimaita parlajujca, paillata ashtahuan ali crishpa catingapajmi parlajun. Ashtahuangarin Dios ima nishcata villajujca, tandanajuj crijcunatami shinllichijun.
5Shinamandami cangunataca, tucuicunatallata shuj shuj rimaicunata parlachun munaiman. Shina cajpipash, Dios ima nishcata villajcuna cachunmi, ashtahuan munaiman. Yalichishpa villajpash illajpita, shuj shuj rimaicunata parlangapaj randica, Dios ima nishcata villanami ashtahuan ali. Shinami tandanajuj crijcunaca, ashtahuan shinlli tucunga. 6Huauquicuna, panicuna, cunanga cangunapajman ñuca shamushpa, shuj shuj rimaicunatara parlajujpica, ¿cangunapaca imata ali canga? Dios ricuchishcata na villajushpa, na cashpaca imata yachajushcata, na cashpaca Dios ima nishcata, na cashpaca imata yachachingapaj shamushcata parlajushpaca, ¿imapajta ali canga?
7Na causaita charij gaitata huacachijpipash, cítara nishcata tocajpipash, na shuj shujta huacajpica, ¿imashnata gaita cajta, cítara cajtaca yachanman? 8Shinallata trompetapash, na shinlli huacajpica, ¿pita macanajuiman llujshingapaj alichirinman? 9Shinallata cangunapash, shuj shuj rimaicunata parlanajushpa, na yachai ushanalla shimicunata parlanajujpica, ¿maitata can imata nijujtaca yachai ushangayari? Yangatami huairamanshna parlanguichi. 10Cai pachapica, tauca tauca rimaicunami tian. Shina tiashpapash, imata nijujta na yachai ushanaca, shujllapash na tianllu. 11Ashtahuangarin shuj rimaipi parlajujta ñuca na yachashpaca, caru llactamanda shamushca runashnami caiman. Shinallata chai rimajujpash ñucapaca, caru llactamanda shamushca runashnami canman. 12Shinami cangunaca, canguna imata rurai ushachun, Diospaj Espíritu caramujujta japina munaihuanlla causana canguichi. Shina cashpami, chai caramushcahuanga, tandanajushca crijcuna ashtahuan aliguta catingapaj yarina canguichi.
13Shinamandami, maijan cashpapash na yachashca rimaita parlajushpaca, shujcunaman yalichishpa villai ushangapaj, Diosta mañana canguichi. 14Ñucallata na yachashca rimaipi Diosta mañashpaca, ñuca espiritumi mañajun. Shina mañajushpapash, ñuca yuyaipica imatapash na yachajushcanichu. 15Shina cashpaca, ¿imatata rurana cani? Ñuca espirituhuan, Diosta mañajushpaca, ñuca yuyaihuambashmi Diosta mañana cani. Ñuca espirituhuan candajushpaca, ñuca yuyaihuambashmi candana cani. 16Canga, cambaj espirituhuanlla Diosta aligumi cangui nijujpica, shuj na yachaj runa uyajujca, ¿imashnata can pashi nijujtaca: “Shina cachun” ni ushangayari? Paica, can imata nijujtapash na yachanllu. 17Canga, Diostaca aligutapachami pashi nijungui. Ashtahuangarin caishuj uyajca, na shinlli tucunllu. 18Ñucaca, Taita Diostami pashi nijuni. Ñucami, shuj shuj rimaicunapi cangunatapash, tucuicunata yali parlani. 19Ashtahuangarin crijcuna tandanajushcapica, na yachashca rimaipi chunga huaranga shimicunata parlangapaj randica, ñuca entendishca picha shimigutalla parlashpa, shujcunatapash yachachingapajmi ashtahuan munani.
20Huauquicuna, panicuna, na huahuacunashna yarishpa causanachu canguichi. Ashtahuangarin imatapash nalita ama rurangapajmi, llullu huahuacunashna cana canguichi. Yaringapaca, rucucunashnami causana canguichi. 21Mandashcapica, cashna nishpami escribishca: “Cai llactapi causajcunamanga, shuj shuj rimaicunapimi parlajusha. Na rijsishca runacunapaj shimipimi parlajusha. Shina parlajujpipash ñucataca, na cazuhuangachu nijunmi Jatun Diosca” nijunmi. 22Shina cajpimi, shuj shuj rimaicunata parlashcapash, crijcunaman ricuchingapaca na can. Ashtahuangarin na crijcunaman ricuchingapajmi. Shinallata Dios ima nishcata villanaca, na crijcunapaca na canllu, crijcunapajllami. 23Tucui crijcuna shujllapi tandanajushpa, shuj shuj rimaicunata tucuilla parlanajujpica, nara yachajcunapash, na crijcunapash yaicumushpaca, ¿nachu cangunaca juizu illajcunamari tucushcanguichi ninman? 24Ashtahuangarin Dios ima nishcata tucuicuna villanajujpica, shuj na crijpash, nara yachajpash yaicumushpaca, tucuicuna aliguta villanajujpimi, shinapachami yashpa imatalla rurashcatapash, paillata ricurishpa yarijunga. 25Shina yarijpimi, paipaj shungupi ima pacalla tiajushcapash ricuringa. Shina ricurijpimi: “Taita Diosca, cangunahuambachami cashca” nishpa cungurishpa, Taita Diosta ninanda alicachinga.
26Huauquicuna, panicuna, ¿imatata nisha? Canguna tandanajushpaca, tucuicunallatami shujca shuj Salmota candanata, shujca imagutapash yachachinata, shujca shuj shuj rimaita parlanata, shujca Dios imata ricuchishcata villanata, shujca yalichishpa villanata charinguichi. Imata chashna rurashpapash, crijcunata shinllichingapajmi rurana canguichi. 27Na yachashca rimaita parlashpaca, ishcai cashpa, na cashpaca ashtahuan quimsa cashpapash, catipi catipi parlachun. Shina parlajtaca, shujca yalichishpa villachun. 28Chai parlashcata yalichishpa villaj illajpica, tandanajuj crij puracunapica ama parlachun. Ashtahuangarin paipajllata ali cachun, Taita Diosman parlachun. 29Shinallata Dios ima nishcata villajcunapash, ishcai cashpa, na cashpaca quimsa cashpapash, chaicunalla shuj shuj villachun. Ashtahuangarin caishujcunaca alimi nishpa, nalichu nishpapash ricunajuchun ninimi. 30Chaipi tianajuj puraman maijanmambash villachun yuyaita Dios cujpica, paira villachun punda villajujca upallayachun. 31Cangunaca tucuicunami, Dios ima nishcataca shuj shujlla villai ushanguichi. Tucuicunallata yachajuchun, tucuicunallata aliguta yarishpa causachunmi, shina villai ushanguichi. 32Dios ima nishcata villajpaj espirituca, Profeta runatami cazunajun. 33Taita Diosca, na pandachij Taita Dioschu, ashtahuangarin casilla ali causaiguta caraj Diosmi.
Diospajlla causanajuj crijcuna maijan tandanajuipi ruranshnallata 34tandanajuicunapica, cangunapaj huarmicunaca upalla cachun ninimi. Huarmicunaca, chaipi villanataca, napacha ushanllu. Ashtahuangarin mandashcapi nijunshna cazunami. 35Huarmicuna imata yachajungapaj munashpapash, huasipimi cusata tapuchun nini. Crijpura tandanajushcapi huarmicuna villanaca nalichu, pinganayaimi.
36Taita Diospaj Shimita villanaca, ¿canguna purapichu callarishca, na cashpaca cangunapajmanllachu chayamushca? 37Maijanga: “Dios ima nishcata villajmi cani, Diospaj Espiritutami charini” nijungami. Shina nijushpaca, ñuca cangunaman escribishca cai shimicunaca, Apunchi Jesús mandashca shimicuna cajta yachachun. 38Ashtahuangarin cai mandashcata na cazungapaj munashpaca, ama cazuchun ninimi. 39Huauquicuna, panicuna, Dios ima nishcata villangapajmi, ashtahuan yarina canguichi. Shuj shuj rimaicunata parlanataca, na jarcanachu canguichi. 40Imata rurana cajpipash, na huaglitara rurashpami, imashna rurana cashcashnallata rurana canguichi.
Currently Selected:
1 CORINTIOS 14: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.