Matiye 21

Yɛsə kadzembe Zhɛrəzalɛm

(MRK 11.1-11; LWK 19.28-40; ZHŊ 12.12-19)

1Ma kwa nza hɛ takwa takwa yitea Zhɛrəzalɛm ba'a kwa ntsehe hɛ mbe kwete meleme ta Bɛtfazhɛ, pelɛ ghweme ta yɛ Bekele ne, pa Yɛsə ghwenakɛ mbeli nyi ketəkwə təkwə bake kalə te kema ta ŋkɛ, ma ke sha hɛ: 2«Kwiɗi mə kadzembe meleme nya te kema ta ŋayɛ, dzembema ta ŋayɛ ne, katenewe kwara yɛ tehwepe le wəzege ta ŋkɛ yite. Pelemte mə hɛ ba'a ŋkake ɗa mə hɛ. 3Ma kegezete ŋayɛ ghena kwete wəndə ne, ma pe yɛ sha zhɛne: Nde sleke ŋkwa nza kaɗe. Taghanyɛ ne, katepele hɛ mbeli kaslə.

4Katemene geva ŋkɛ kezha yipə geva ghena nya gezete nde mɛ ŋkwa, ma ke ghena shɛ:

5Ma pe yɛ sha meleme ta Siyon:

Wa nya Meghea ŋa kase sha gha.

Nahe ŋkɛ kenza kande shifə ghə.

Nahe ŋkɛ kenza pelɛ ŋemalea kwara,

pelɛ leve ta kwara,

leve ta wəsə keseɗa nya kefə wəshi.»

6Pa mbeli nyi ketəkwə təkwə Yɛsə slə ba'a menete kala nya gezete nda ŋkɛ ke hɛ. 7Pa hɛ ŋkake kwara shɛ le wəzege ta ŋkɛ, pa hɛ hite lekwesa ta nci te wəmbəa nci, tarame Yɛsə pelɛ. 8Kwele kwele mbeli nyi kepelakeyi lekwesa ta nci kwa hweŋkwa, katsasle dzeve ta wəfe kweci kabete kwa hweŋkwa. 9Ma ke mbeli nyi mbe kema ta Yɛsə ba'a nyi kwetere wəmbəa ŋkɛ Sha tsa lewela: «Tsahe ɓəmə wəzege ta David! Kewəpi wəpi nza wəndə nya kese te sləa Mahwətə! Tsahe Shala nya pelɛ ghweme mbeli!»

10Ma kwa dzembe Zhɛrəzalɛm Yɛsə ne, ntake mbeli pɛtɛ kagəgə geva, ma ke mbeli 'yɛwete: «Wa wəndəa shɛ wa?» 11Ma ke mbeli nyi kwele kwele zhɛnete: «Yɛsə, nde mɛ ŋkwa, nde Nazarɛt nya te hɛɗia Galilɛ.»

Yɛsə mbe ghɛa Shala

(MRK 11.15-19; LWK 19.45-48; ZHŊ 2.13-22)

12Shilimə Yɛsə dzembe ghɛa Shala. Pa ŋkɛ ŋkakave pɛtɛa mbeli nyi kepamte wəshi ba'a nyi kepa wəshi shave mbe, pa tsetsəkwəate tabelea ka mbeɗe cɛdɛ ba'a tsəkwələa ka pamte gheɗepe te hɛɗi. 13Ma ke sha hɛ: «Ma ke rafete geva mbe Ghena ta Shala: Kateheka ghɛa ɗa mbeli kaghɛ kesəkwə ghə. Ama gheyɛ ne, nahe yɛ kezhɛrete ŋkɛ kazlera ta ka ghərəa kɛfi.»

14Kase ka ghwələa kɛfi ba'a ka gwadarea kɛfi sha Yɛsə mbe ghɛa Shala. Pa ŋkɛ mbete hɛ. 15Ntake mbeli nyi te ghəa ka dzeghe Shala ba'a ka rafe wəsə mahalegə kahwepe wənə kwa nakɛ wəshi meŋele nyi menete Yɛsə ba'a ŋwale nyi kezlape ghena hɛ mbe ghɛa Shala, ma ke ŋwalea shɛhɛ: «Tsahe ɓəmə hwelefe ta David.» 16Ma ke hɛ sha Yɛsə: «Nahe na kefave ghena nya geze hɛ tse na?» Ma ke Yɛsə zhɛnete: «E'e. Kegha yɛ kajaŋgate wəka? Ma ke Ghena ta Shala: Laka ŋwale fəshi ba'a yɛ velɛnjɛ ne, nahe na kevate tsahe te ghəa ŋa.» 17Kwa sebe ta ŋkɛ ne, pa Yɛsə slənyɛ yitea hɛ ba'a shavenyɛ mbe meleme kezha dzembe Bɛtani nya hɛnyɛ ŋkɛ mbe.

Yɛsə kabezla dasekwa

(MRK 11.12-14, 20-24)

18Te hendɛ ta ŋkwa masheke, kwa zhɛneke geva Yɛsə kadzembe meleme, pa ma keseve ŋkɛ. 19Pa ŋkɛ nakɛ kwete dasekwa gwəzləmə mɛa hweŋkwa, pa hendeyite geva yite. Ama ya te we, deke sleke yanakɛ ŋkɛ. Ma ke sha dasekwa shɛ: «Katezhɛne na kaya ɓiyitsa tɛape we.» Te ŋkwa shɛnyɛ, pa dasekwa shɛ ghwelenyɛ. 20Ma kwa nakɛ mbeli nyi ketəkwə təkwə, hehake hɛ va ghena shɛ. Ma ke hɛ 'yɛwete va Yɛsə: «Tsema ghwelenyɛ dasekwa nya tewə ketemə wa?» 21Ma ke Yɛsə sha hɛ: «Kaganda ne, ma 'ya sha gheyɛ: ma kenza nde yɛ ya va gheyɛ ba'a keɗema ghəa ŋayɛ kenza bake bake ne, deke wəsə nya menete nya 'ya le dasekwa yatemene we, ama wərə yɛ kageze: Slə ŋa teke ba'a negheyi ghəa ŋa kwa ndərə, pe yɛ sha ghweme nya, tsagha temene geva ŋkɛ. 22Ma ya yɛ va gheyɛ ne, katekemave yayata wəsə nya 'yɛwe yɛ mbe səkwə ghə yɛ.»

Tema se berete ta Yɛsə wa

(MRK 11.27-33; LWK 20.1-8)

23Pa Yɛsə dzembe ghɛa Shala. Ma kwa teke nda wəshi ŋkɛ ke mbeli ne, hwa'a mbeli nyi te ghəa ka dzeghe Shala ba'a mbelia jama ta ka Zhəwif, ma ke hɛ shɛ: «Le berete ta wa mene wəshi nyi na wa? Wa nde ndeke ŋa hweŋkwa kamene kala nya wa?» 24Ma ke Yɛsə zhɛnete nda ke hɛ: «'Ya kate'yɛwe ghena kwetɛŋe va gheyɛ perə, ma kezhɛnete ɗa ŋkɛ yɛ ne, kategeze ŋayɛ 'ya le nyama nyama berete mene wəshia shɛhɛ 'ya. 25Wa nde ghweneke Zhaŋe kamene batɛme wa, Shala na, na mbeli?» Ma ke hɛ kwelɛ ghəa nci: «Ma kegeze gheɓəmə: Shala nde ghweneke ŋkɛ, a ke gheɓəmə ne, ma ke sha te'yɛwe va gheɓəmə: Va wa ɗema yɛ keyɛte ghena ta Zhaŋe tsagha wa? 26Ama kegeze gheɓəmə: Mbeli nde ghweneke ŋkɛ, ke gheɓəmə ne, kazhɛ ɓəmə ghazlənə va mbeli, va nya nza ŋkɛ nahe mbeli pɛtɛ keɗepe Zhaŋe kande mɛ ŋkwa.» 27Tagha gɛ, ma ke hɛ zhɛnete nda ke Yɛsə: «Keɗepe n'yɛ we.» Ma ke Yɛsə sha hɛ: «Yawa ma 'ya perə ne, kageze ŋayɛ 'ya le nyama nyama berete mene wəshia shɛhɛ 'ya we.»

Yipə pa te ka kesaka ma bake

28Ma ke Yɛsə mtsehete: «Tsema zəzə yɛ te ghena nya tse wa? Ŋwale ya shɛ bake kwete wəndə. Ma ke sha nde ghate: Wəzege ta ɗa, kwiɗi kadzemte wəza ɓeshi. 29Ma ke zhɛnete nda: Kalə 'ya we. Ama temə vireɗi ne, pa zəzəve ghena, cape ŋkɛ kadzemte. 30Pa wəndəa shɛ lə sha nde bake ta wəzege ta ŋkɛ, pa gezete nda kala nya gezete nda ŋkɛ ke nde ghate. Ma ke wəzegea shɛ zhɛnete: E'e, kalə 'ya yita, ama kese ŋkɛ kalə we. 31Nyama hwa hɛ nde menete wəsə nya ɗe yita wa?» Ma ke hɛ: «Nde ghate.» Ma ke Yɛsə sha hɛ: «Kaganda ne, ma 'ya sha gheyɛ: mpelɛa ka tsehe jaɓeregwale ba'a mi nyi kamene mefətekwə tedzembe Meghe nya pelɛ ghweme ke gheyɛ. 32Kaganda ne, nahe Zhaŋe kese sha gheyɛ kezha ncɛ ŋayɛ hweŋkwa nya tiɗiɗi, ama kese yɛ kayɛ ŋkɛ we. Ma ka tsehe jaɓeregwale ba'a mi nyi kemene mefətekwə ne, nahe hɛ keyɛte ŋkɛ. Ya gheyɛ nakɛ wəshia shɛhɛ ne, kese yɛ kezhɛre wənəa ŋayɛ kwetere wəmbə kezha yɛ ŋkɛ we.»

Yipə pa te ka mene slene nyi 'yaghwa 'yaghwa mehele

(MRK 12.1-12; LWK 20.9-19)

33Fate mə kwete ghena keyipə pa: Pa wəndə ke wəve mɓete yɛ rɛzɛŋe, ŋate zli ntəslə yitea wəvea shɛ, lakwe ŋkɛ sha ŋkwa kehetəsə te keleɓa ba'a ŋakwe ŋkɛ sha ŋkwa keya ŋkwa. Pa ŋkɛ dapate nda ŋkɛ te dzeve ke ka mene slene, cape ŋkɛ kadzehwa mte. 34Ma kwa nakanji wəshia shɛhɛ ne, pa ghweneghe nda ka mavashia ŋkɛ ke ka mene slene ta rɛzɛŋe kezha kele nda zhike ŋa ŋkɛ bela kase. 35Pa ka mene slene kekeseve ka mavashia shɛhɛ, pa hɛ ɗate kwete, pa hɛ peslekɛ kwete, pa hɛ jɛwəmte kwete le pelɛ. 36Pa wəndə ke wəve ghweneghe kweci ka mavashi kwele kwele ma ke nyi te kema, tsagha shɛ menete ka mene slene shɛhɛ le hɛ perə. 37Ma kwa keɗaŋe, pa ghweneghe wəzege ta ŋkɛ, ma ke sha ŋa ŋkɛ: Katehawe hɛ va wəzege ta ɗa. 38Ama kwa nakɛ wəzegea shɛ ka mene slene ne, ma ke hɛ kwelɛ ghəa nci: Yawa, wa nya nde zeme ghɛ nya te kwete və nya gɛ! Ngara ɓəmə. Peslekɛ ɓəmə ŋkɛ yitea nza wəve kaŋa ɓəmə. 39Pa hɛ keseve ŋkɛ, pa hɛ kelemte ŋkɛ shave mbe wəve ba'a peslekɛ ŋkɛ hwa gamba.

40Ma vəa ŋkwa nya tese wəndə ke wəve nyagha ne, tsema temene nda ŋkɛ ke ka mene slene shɛ wa? 41Ma ke hɛ shɛ: «Katempə ka mpə ŋkwa shɛhɛ ŋkɛ kakwa zhɛma heli ba'a katedape nda wəvea ŋkɛ ŋkɛ te dzeve ke kweci mbeli nyi keteve nda wəshi nyi kese te wəve te və nya ɗe ŋkɛ.» 42Ma ke Yɛsə sha hɛ:

«Kegha yɛ kajaŋga Ghena ta Shala wəka? Ma ke:

Ma pelɛ nya neghamte mbeli nyi keŋa ŋkwa ne,

gheŋkɛ nde zhɛrenyɛ kapelɛa megwekwe.

Gheŋkɛ ya kaslene ta Mahwətə.

Wəsə meŋele ŋkɛ kwa ntsə ta ɓəmə.

43Vatse gɛ, ma 'ya sha gheyɛ: katekelehwe geva meghea Shala va gheyɛ kezha ve nda geva ke hwelefe nyi ketemene slene ganyɛ. 44Ma yayata wəndə nya keteteɗe te pelɛa shɛ ne, katehwəshimte geva ŋkɛ. Ma nda pelɛa shɛ nde teɗe te wəndə ne, katehə ŋkɛ ŋkɛ.»

45Kwa fave ghena keyipə pa ta Yɛsə mbeli nyi te ghəa ka dzeghe Shala le ka Fariziyɛn, nahe hɛ keɗepe te ghenci geze geva ŋkɛ. 46Ntake hɛ kasepa ntsehwele kekese Yɛsə, ama kazhɛ nda ghazlənə ke hɛ va mbeli, va nya veyi Yɛsə hɛ kande mɛ ŋkwa.

Currently Selected:

Matiye 21: BEKDC12

Highlight

Copy