Matiye 20

Yipə pa ta ka mene slene mbe wəve

1Kaganda deŋwa, kala nya nza ta Meghe nya pelɛ ghweme: pa kwete wəndə shave ki ghɛa ŋkɛ masheke masheke kezha zele ka mene slene mbe wəvea ŋkɛ. 2Pa ŋkɛ tseɓate le hɛ kezha ŋki nda slibə slibə ke hɛ te vəghwə, pa ghweneghe hɛ kadzembe wəvea ŋkɛ. 3Pa ŋkɛ shave ki ghɛ te kwəsərə, pa nakɛ kweci mbeli mentishɛ kaɗema slene va hɛ. 4Ma ke sha hɛ: Kwiɗi mə kalə kamene ɗa slene mbe wəvea ɗa nda ŋki ŋayɛ 'ya tiɗiɗi. 5Cape hɛ kalə. Pa wəndə ke wəve shave kwa ghə veci, zhɛne, kwa mtsa veci ba'a menete tsagha shɛ. 6Kakwa keɗaŋe ne, pa shave takwa veci kapəkwə ba'a sləyi kweci mbeli meghereŋe te ŋkwa kebeke, ma ke sha hɛ: Va wa nza ŋayɛ yɛ teke kavəghwə kaɗema kamene slene wa? 7Ma ke hɛ: Wəndə shɛ kehekakɛ n'yɛ kezha slene we. Ma ke sha hɛ: Ma nda tsagha nde ne, kwiɗi mə kalə kamene slene mbe wəvea ɗa.

8Ma kwa se tɛhwɛɗi ne, ma ke wəndə ke wəve sha wəndə nya te ghəa wəshia ŋkɛ: Hekake ka mene slene ba'a ŋkikɛ nda zhɛme ta ŋkɛ ke yayata wəndə. Kategha na te mbeli nyi fəte 'ya kwa sebe, nda tekeɗaŋe na te nyi keghate. 9Ke mbeli nyi kedzembe slene kwa tɛhwɛɗi ne, pa ŋkikɛ nda slibə slibə ke hɛ. 10Ma kwa se mbeli nyi kedzembe slene masheke ne, ma zəzə hɛ, za ma tenza ŋa nci. Ama kala nya ŋkikɛ nda mbeli ke mbeli nyi kwa sebe ŋkikɛ nda mbeli ke hɛ. 11Ma kakele cɛdɛa shɛ hɛ, ntake hɛ kandəghwə ndəghwə va wəndə ke wəvea shɛ. 12Ma ke hɛ shɛ: Deke lerə kwetɛŋe menete slene mbeli nyi hekakɛ na kwa tɛhwɛɗi. Va wa ŋki n'yɛ cɛdɛ na yipə yipə le hɛ, ghen'yɛ nyi kevəghwə te ghwə ta veci wa? 13Ma ke wəndə ke wəve sha kwete wəndəa nci: Keghwetete ŋa 'ya na mcɛ ɗa. Ashɛ nahe na keyɛte kamene slene kaslibə te vəghwə wəka? 14Kelete cɛdɛa ŋa, kwiɗi ŋa. Tsagha ndeke nda 'ya ke wəndə nya hekakɛ 'ya kakwa keɗaŋe. Va nya ɗe 'ya nda menete 'ya tsagha. 15Ashɛ 'ya kamene kala nya ɗe 'ya le cɛdɛa ɗa wəka? Na, zlɛ zhɛ ŋa va nya nza mehele ta ɗa ndeɗekə na? 16Tagha gɛ, ma ke Yɛsə mtsehete: Tsagha shɛ ne, katenza ka keɗaŋe kaka ghate ba'a katenza ka ghate kaka keɗaŋe.

Yɛsə kageze mte ta ŋkɛ ba'a same ta ŋkɛ kwa kwele kakwa maheke zhigə

(MRK 10.32-34; LWK 18.31-34)

17Ma kwa nza Yɛsə kadzeme Zhɛrəzalɛm ne, pa hekakɛ mbeli nyi ketəkwə təkwə nyi meŋe bakeghəmbe kaghəa nci. Ma ke sha hɛ kwa dzeghwa hɛ: 18«Fa mə, wa nya gheɓəmə nyi kadzeme Zhɛrəzalɛm, katepamte nda Wəzege ta za mbeli ke mbeli nyi te ghəa ka dzeghe Shala ba'a ke ka rafe wəsə mahalegə, kateve nda fete kemte hɛ te ghwə. 19Kateve nda ŋkɛ hɛ ke kweci hwelefefi. Kateŋ'wəshi ŋkɛ hɛ, kateɗa ŋkɛ hɛ le ghweɗa, katebaŋe ŋkɛ hɛ te sheghwə kwa zleŋkwa. Ma te kwa maheke ta hɛ ne, katesame ŋkɛ kwa kwele le mpi.»

Meghekɛa yɛ Zhake le Zhaŋe ka'yɛwe ghena va Yɛsə

(MRK 10.35-45)

20Pa meghekɛa ŋwalea Zɛbɛdɛ se sha Yɛsə le ŋwalea nta, gwəɗəŋə nde te kema ta Yɛsə kezha 'yɛwe wəsə ve. 21Ma ke Yɛsə shɛ: «Wa yaɗe na wa?» Ma ke shɛ: «Zəzəte yitea nza ŋwalea ɗa nyi bake nyi vare gha veci nya tenza na kameghe, te kwa gwela ta ŋa kwete, te kwa zeme ta ŋa kwete.» 22Ma ke Yɛsə shɛ: «Keɗepe wəsə nya 'yɛwe yɛ yɛ we. Kapesle yɛ yitea sa yaka nya tesa 'ya na?» Ma ke hɛ shɛ: «Kapesle ghen'yɛ yite.» 23Ma ke Yɛsə: «Wərə yɛ kasahwe yaka nya sa 'ya. Ama 'ya nde nta wəndə nya kentishɛ laka bela kwa zeme ta ɗa ba'a nya laka kwa gwela we. Ma ŋkwa shɛ ne, kaŋa mbeli nyi hite nda ŋkɛ Yiteyɛ ɗa ke hɛ tenza ŋkɛ.»

24Ma kwa fate ghena shɛ ka təkwə təkwə Yɛsə nyi ketene meŋe ne, pa hɛ hwepete wənə va ŋwalea malea shɛ. 25Pa Yɛsə hekakɛ hɛ pɛtɛ, ma ke sha hɛ: «Nahe yɛ keɗepe kamene kwele mbeli nyi te ghəa mbeli ba'a mbeli nyi te ghəa hɛɗi te mbeli. 26Kahi ŋkɛ kanza tsagha kwelɛ gheyɛ we. Ma wəndəa ŋayɛ nya keɗe kanza te ghə ne, zhɛrete ghəa ŋkɛ ŋkɛ kande mene slene ta ŋayɛ. 27Ma wəndəa ŋayɛ nya keɗe kanza kande ghate ne, zhɛrete ghəa ŋkɛ ŋkɛ kamava ta ŋayɛ. 28Tsagha ɗema Wəzege ta za kese kezha mene nda slene mbeli, ama nahe ŋkɛ kese kezha mene nda slene ke mbeli ba'a kezha ve mpia ŋkɛ kambeɗe mbeli kwele kwele.»

Yɛsə kapele nda ntsə ke ka ghwələa kɛfi bake

(MRK 10.46-52; LWK 18.35-43)

29Ma kwa shave Yɛsə mbe Zhɛriko ne, kwele kwele mbeli nyi kezelete ŋkɛ. 30Bake kweci ka ghwələa kɛfi tagha mentishɛ mɛa hweŋkwa. Ma kwa fave hɛ Yɛsə nde dzeyi vare hɛ ne, ma ke hɛ tsate lewela: «Nde sleke ŋkwa, hwelefe ta David, zhɛ heli yitea ghen'yɛ gi!» 31Ntake mbeli kaŋele hɛ kezha nza hɛ divə, ama ma ke hɛ tsate lewela le berete ɓiyitsa: «Nde sleke ŋkwa, wəzege ta David, zhɛ heli yitea ghen'yɛ gi!» 32Pa Yɛsə ghereŋe ba'a hekakɛ hɛ, ma ke sha hɛ: «Wa yaɗe yɛ kamene ŋayɛ 'ya wa?» 33Ma ke hɛ shɛ: «Nde sleke ŋkwa, pelemte n'yɛ ntsə ta n'yɛ.» 34Pa Yɛsə zhɛakɛ heli yitea hɛ, pa kwaɗakɛ ntsə ta nci. Taghanyɛ ne, ntake hɛ kanewe ŋkwa. Ntəŋə hɛ yitea Yɛsə.

Currently Selected:

Matiye 20: BEKDC12

Highlight

Copy