Matiye 22
22
Yipə pa te veghe
(LWK 14.15-24)
1Le ghena keyipə pa gezete nda kweci ghena Yɛsə ke mbeli ɓiyitsa. Ma ke sha hɛ: 2«Wa nya wəsə nya keyipə Meghe nya pelɛ ghweme nya, pa kwete meghe ŋzlete nda makwa ke wəzege ta ŋkɛ. 3Pa ŋkɛ ghwenakɛ ka mavashia ŋkɛ kageze nda ke mbeli nyi hekakɛ ŋkɛ yitea veghea shɛ. Keɗe hɛ kase we. 4Zhɛne ne, pa ghweneghe kweci ka mavashi, ma ke: Nahe veghea shɛ kenaka. Mcɛmcɛlia ɗa ba'a zhɛfa lɛməa ɗa yahenemte 'ya. Nde mə yitea veghea shɛ, pe yɛ sha hɛ. 5Ama mbeli nyi geze nda makwa shɛ mbeli ne, kese hɛ kase we. Ketsakɛ hɛ ghena shɛ we, pɛtɛ hɛ lənji yitea slene ta nci, kalə kwete yitea wəza, kalə kwete yitea fəlia ŋkɛ. 6Kakese ka mavashia ŋkɛ kweci kezha ɗa hɛ ba'a kampə hɛ. 7Pa wənəa meghea shɛ zhɛte nda, pa ghwenakɛ ka sewajɛa ŋkɛ kezha mpə mbeli nyi kempəmte mbelia ŋkɛ, pa ndəyite ghwə yitea meleme ta nci. 8Ma ke sha ka mavashia ŋkɛ: Nahe veghea shɛ kenaka, ama kenza mbeli nyi hekakɛ 'ya kehi hi kadzeki we. 9Kwiɗi mə kalə kwa baŋwa ta hweŋkwa, heka ɗa mə yayata wəndə nya nakɛ yɛ. 10Cape ka mavashi kalə kwa baŋwa ta hweŋkwa, pɛtɛ hɛ tseneke mbeli ganji ba'a nyi ndiremi ndiremi, mpɛafe ŋkwa nya ki ghɛ va mbeli.
11Cape meghe kadzeki ghɛ kanewe mbeli nyi kese yitea veghe. Dəkwə ŋkɛ te kwete wəndə nya ɗema lekwesa gəsəkə ve. 12Ma ke shɛ: Mcɛ ɗa, tsema səaki ŋa na kaɗema lekwesa gəsəkə va gha wa? Bivə wəndəa shɛ nzanyɛ, kese ŋkɛ kazhɛne we. 13Ma ke meghe sha ka mene nda slene: Hwepete mə dzeve ta ŋkɛ ba'a seɗa ta ŋkɛ, negheyi mə ŋkɛ pelɛ mbe ŋkwesle, nda nehwene ŋkɛ ba'a nda mpeɗe slene ŋkɛ. 14Kwa nza ŋkɛ ne, kwele kwele mbeli nyi hekakɛ mbeli, ama ɓɛhwɛ mbeli nyi tsehave mbeli.»
Ŋki ta jaɓeregwale ke ŋgwamna
(MRK 12.13-17; LWK 20.20-26)
15Pa ka Fariziyɛn tsenete geva, pa hɛ tsahwe ghena ta nci kezha ŋa nda keleŋa ke Yɛsə laka 'yɛwe ghena. 16Pa hɛ ghwenakɛ kweci hwa mbeli nyi ketəkwə təkwə hɛ ba'a mbelia Hɛrode kalə sha Yɛsə, ma ke hɛ: «Nde sleke n'yɛ, nahe n'yɛ keɗepe ghena nya kaganda yageze na. Ghena ganyɛ yateke nda na ke mbeli kezha nza mbeli kala nya ɗe Shala, kaghazlənə na va wəsə nya zəzə mbeli we, katsakɛ ŋa ghena ta kwele nya geze mbeli we. 17Gezete n'yɛ zəzə ta ŋa te wəsə nya: nahe wəsə mahalegəa ɓəmə kendeke ɓəmə hweŋkwa kaŋki nda jaɓeregwale ke Sɛzar na?» 18Nahe Yɛsə keɗepe ghena kwa ndiremi yaɗe hɛ kazəzə. Ma ke sha hɛ: «Ka mbəɗəkwəa kɛfi! Wa raberə ŋa ɗa keleŋa yɛ wa? 19Ncɛte ɗa mə cɛdɛ nya tepele jaɓeregwalea shɛ yɛ le ga.» Pa hɛ ncɛte nda cɛdɛa shɛ. 20Ma ke sha hɛ: «Ŋa wa pa ta kema ba'a slə nya te wa?» 21Ma ke hɛ zhɛnete: «Ŋa Sɛzar.»
Ma ke Yɛsə sha hɛ: «Yawa, zhɛnave nda mə wəsə nya kenza kaŋa ŋkɛ ke Sɛzar, zhɛnave nda mə wəsə nya kenza kaŋa ŋkɛ ke Shala.»
22Ma kwa fate ghena nya zhɛnete nda Yɛsə ke hɛ hɛ ne, hehake hɛ. Pa hɛ sərəakɛ ŋkɛ ba'a dzeghwanji.
'Yɛwe te same ta mbeli kwa kwele
(MRK 12.18-27; LWK 20.27-40)
23Te vecia shɛnyɛ, pa kweci ka Sadəsɛyɛn se sha Yɛsə. Ma zəzə ne, kasame mbeli kwa kwele le mpi we. Ma ke hɛ 'yɛwete ghena ve: 24«Nde sleke n'yɛ, wa nya ghena nya gezete Moyize nya: Ma kemtenyɛ wəndə kaɗema ŋkɛ keyake wəzege sawa hwa male ta ŋkɛ ne, nda wəza meghekɛ kakele malea shɛ kezha ya nda hwelefefi ŋkɛ sawa hwe. 25Kweci mbeli ya shɛ hwa ghen'yɛ mberefaŋe kaŋwalea male. Wəmakwe Tezhɛa megheyɛa nci sha male, mtiwə ŋkɛ kaɗema keyake wəzege hwe, pa meɗeyi nda malea shɛ ke wəza meghekɛ. 26Tsagha menete nda geva ŋkɛ ke nde bake ta wəza meghekɛ, tsagha kaŋa nde maheke, tsagha kaŋa nci mberefaŋe nci. 27Mtiwə malea shɛ kwa sebe ta nci perə. 28Yawa, ma te veci nya tesame mbeli pɛtɛ kwa kwele le mpi ne, ŋa wa tenza male hwa mbeli nyi mberefaŋe nyi wa? Kwa nza ŋkɛ ne, nahe nde kese yitea hɛ pɛtɛ.»
29Ma ke Yɛsə sha hɛ: «Nahe ghena kezave ŋayɛ za va nya ɗepema Ghena ta Shala ba'a berete ta ŋkɛ yɛ. 30Ma vəa ŋkwa nya tesame mbelia kwahɛɗi kwa kwele ne, mba yɛ zhili le mi kawəme geva we, kala ka ghwene ta Shala tenza mbeli pɛtɛ pelɛ ghweme. 31Ma te ghəa same ta mbeli kwa kwele le mpi ne, kegha yɛ kajaŋgate ghena nya gezete ŋayɛ Shala wəka? Ma ke: 32'Ya ya kaShala ta Abraham, kaShala ta Izak ba'a kaShala ta Zhakob. Kenza Shala kaShala ta ka mpə mpə we, ama nahe ŋkɛ kenza kaShala ta mbeli nyi teghweme.»
33Heheɓake mbeli nyi kefave ghena shɛ va wəsə nya tekete nda Yɛsə ke mbeli.
Nyama ya kwele ma hwa wəshi mahalegə wa
(MRK 12.28-34; LWK 10.25-28)
34Ma kwa fate ka Fariziyɛn nahe Yɛsə kendɛkwemte ka Sadəsɛyɛn ne, pa hɛ tsenete geva. 35Pa kwete nde rafe wəsə mahalegəa Shala hwa hɛ ɗe kaŋa nda keleŋa ke Yɛsə, ma ke shɛ: 36«Nde sleke ɗa, nyama ya kwele ma hwa wəshi mahalegə wa?» 37Ma ke Yɛsə shɛ: «Ɗe Mahwətə Shala ta ŋa le pɛtɛa wənəa ŋa, le pɛtɛa mehele ta ŋa ba'a le pɛtɛa zəzə ta ŋa. 38Nya ya kwele ma ba'a za ma. 39Wa nya kwa bake nya kwele kala nya keghate nya: ɗe nde ghedəkwəa ŋa kala nya ghəa ŋa. 40Te ghena nyi bake nyi ghereŋe pɛtɛa wəsə mahalegəa Shala ba'a ghena nyi gezete ka mɛ ŋkwa.»
Tsema se Kriste nda nza ŋkɛ kahwelefe ta David wa
(MRK 12.35-37; LWK 20.41-44)
41Ma kwa nza nde ketsene tsene ka Fariziyɛn tagha ne, ma ke Yɛsə 'yɛwete ghena va hɛ: 42«Tsema zəzə yɛ te ghəa Mɛsi tse wa? Ŋa wa ŋkɛ hwelefe pe yɛ sha geze tse wa?» Ma ke hɛ zhɛnete: «Hwelefe ta David ŋkɛ.» 43Ma ke Yɛsə sha hɛ: «Tsema se ŋkɛ nda heka David ŋkɛ kaNde sleke ŋkɛ kwa nza Sefəa Shala mbe wa? Ma ke David:
44Ma ke Mahwətə sha Nde sleke ɗa:
Ntishɛ ŋa te kwa zeme ta ɗa,
nda ŋkeyi ka jaga ta ŋa 'ya mbe hwəa seɗa ta ŋa.
45Ma kenza nde Nde sleke ɗa heka Mɛsi David ne, tsema nza ŋkɛ kawəzege ta David tsagha wa?»
46Wəndə shɛ kapesle yitea zhɛne nda ghena ya kwetɛŋe we. Se te vecia shɛ, wəndə shɛ kazhɛne ka'yɛwe ghena ve we.
Currently Selected:
Matiye 22: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
