1 Makabɛ 8
8
Zləvəa ka Rome
1Nahe zləvəa ka Rome kedzawa sleme va Zhəwdas: nahe hɛ kenza kaka katsala ka sewajɛ, kaka ganyɛa mehele laka pɛtɛa mbeli nyi kedzete hɛ ba'a kenza ɗeke ɗeke kakese mcɛ le pɛtɛa mbeli nyi kese sha hɛ. 2Pa mbeli ɓelate nda mpa nyi mpahwe hɛ ba'a wəshi nyi menete hɛ te hɛɗia ka Gole. Nahe ka Rome kehərəte hɛ ba'a keŋkeyite hɛ yitea ŋki jaɓeregwale. 3Nahe hɛ kempate mpa te hɛɗia Ɛspanye kezha fə yɛ veyizəa mze kwa tɛawetɛa ba'a mze kwa tere tere nyi mbe. 4Te zlaɓa ta ntsehwelea nci ba'a hwepe ghəa nci ne, pa hɛ kelehwe hɛɗia shɛ ya gheŋkɛ nza cakeɗake yitea Rome. Nahe hɛ kehərəte ka meghea kɛfi nyi kese te hɛɗi nyi cakeɗa cakeɗa kezha mpa le hɛ. Nahe ka Rome keɗate hɛ ba'a kevate ndiremi nya wəba te hɛ. Ma mbeli nyi ketene teghweme ne, kaŋki nda jaɓeregwale hɛ ke hɛ keva keva. 5Nahe hɛ kehərəte Filipe ba'a Pɛrsɛ, ka meghea kɛfi nyi mbe Masɛdowane, tsagha pɛtɛa mbeli nyi kefa nda ma ghena ke hɛ. Nahe hɛ kefəame hɛ mbe dzeve ta nci. 6Nahe hɛ keɗate Antiyokəs nya kwele, meghe nya mbe Azi, nya kehave nda mpa le cɛwea lɛmə gwəmsə ba'a bakemsə, ka zleɗe gədəwəa lɛmə, yɛ wəmata gədəwə ba'a wəvəsəa ka sewajɛ kwele kwele. 7Pa hɛ kesehwe ŋkɛ teghweme. Pa hɛ ŋkeyite ŋkɛ, gheŋkɛ ba'a mbeli nyi ketedzete meghe kwa sebe ta ŋkɛ yitea ŋki nda jaɓeregwale kwele kwele ba'a yitea kese nda mbeli ke hɛ. 8Pa mbeli fəhwe hɛɗia Ɛnde, Mɛdi, Lidi ba'a kweci sla ta hɛɗi nyi ganji ganji ve kezha fə nda hɛ ke meghe Emɛne. 9Pa ka Grɛk tarete kalə kaza sebe te ka Rome. 10Ma kwa fate ghena shɛ ka Rome ne, pa hɛ ghwenakɛ wəndə nya te ghəa ka sewajɛ nahe kezha mpa le hɛ. Kwele kwele ka Grɛk nyi kempəmte geva mbe mpa. Pa ka Rome fəhwe mia nci ba'a ŋwalea nci. Pa hɛ fəhwe wəshia nci, pa hɛ kelehwe hɛɗia nci, pa hɛ ŋzlamte ŋkwa nyi berete berete ta nci ba'a zhɛrete hɛ kaka mavashi pa ɓeshi nya. 11Pa hɛ bezemte ŋkwa ba'a fəhwe mbeli kaka mavashi te kweci hɛɗi meghe ba'a te hɛɗi nyi dzeyi te yɛmə, nyi kese kazhɛne nda ghə ke hɛ. 12Ama laka ka mcɛhɛ nci ba'a laka mbeli nyi kejikəte geva le hɛ ne, pa hɛ yate mcɛa nci. Pa hɛ fəyi ka meghea kɛfia hɛɗi nyi dekwede dekwede ba'a nyi cakeɗa cakeɗa mbe dzeve ta nci. Nahe pɛtɛa mbeli nyi kefa zləvəa nci keghazlənənji va hɛ. 13Kave nda meghe hɛ ke mbeli nyi ɗe meghe hɛ va hɛ. Kakele meghe hɛ va mbeli nyi ɗema meghe hɛ va hɛ. Nahe hɛ kezhɛrenji kaka berete ma te hɛɗi lema. 14Ya kwela nza ŋkɛ tsagha ne, nde Rome shɛ keseɗete derə meghe ya lekwesa meghe kazləvəa ŋkɛ we. 15Pa hɛ menete wəvəsəa mbelia jama kambeli gwəmsə mahekene ba'a bakemsə. Keveci keveci ne, katsene geva mbelia shɛhɛ kezha newe ghena nyi te mbeli yitea nza mbeli ketseɓa tseɓa. 16Keva keva ne, kave nda nza te ghə ba'a sleke pɛtɛa hɛɗi hɛ ke kwete wəndəa nci. Kahawe mbeli pɛtɛ va wəndə nya kwetɛŋea shɛ, wəndə shɛ kamawe nza te ŋkwa ŋkɛ keɗema kazlɛ ve we.
Jikə geva ta ka Zhəwif le ka Rome
17Pa Zhəwdas ntave yɛ Epolɛme, wəzege ta Zhaŋe ba'a shia Hakos ba'a Zhazon, wəzege ta Ɛlazar. Pa ŋkɛ ghwenakɛ hɛ kadzembe Rome. Ma slene nya lə hɛ yite ne, mene mcɛ ba'a jikə geva le ka Rome. 18Tsagha ne, nahe Zhəwdas kevate ghə tembele ka Zhəwif shave mbe dzeve ta hɛɗi meghea Grɛk nya mbe Siri, nya kezhɛre ka Israyɛl kaka mavashi. 19Cape yɛ Epolɛme le Zhazon kadzembe Rome. Kwa sebe ta dzeghwa nya cakeɗa nya menete hɛ ne, pa hɛ ntsehe kwa kema ta mbelia jama. Ma ke hɛ sha mbeli nyi ketsenete geva: 20«Yɛ Zhəwdas Makabɛ, ka menəhɛnyɛ ba'a ka Zhəwif ka ghweneke n'yɛ sha gheyɛ kezha tseɓa ghena ta jikə geva ba'a ŋa kwelɛŋe le gheyɛ. Kaɗe n'yɛ kanza hwa mbeli nyi kejikəte geva le gheyɛ ba'a hwa ka mcɛhɛ ŋayɛ.»
21Pa mbelia jama shɛhɛ yɛte ghena shɛ. 22Wa ghena nya tsaslate hɛ te mze kwa ghwə ghwə nyi slapesla slapesla ba'a nya ghweneghe hɛ kadzawa Zhɛrəzalɛm kawəsə kezəzə kwelɛŋe ba'a jikə geva nya:
23«Kamawe n'yɛ kezha nza ka Rome ba'a hwelefe ta ka Zhəwif mbe zeɗe nza kaghala ghala te hɛɗi keɗema te ndərə. Nza hɛ keya ya va ka ghema ta nci ba'a va mpa gɛ! 24Ama keseke nda se mpa ke Rome mpelɛa keɗema ke hwelefe nya kejikəte geva le te yayata ŋkwa nya sleke ŋkɛ ne, 25katempa hwelefe ta ka Zhəwif le wənə kwetɛŋe yite kala nza ta se ta mpa shɛ. 26Kala nya tarete ka Rome ne, kateve nda keɗema katenzəɓə nda ha, wəshi kempa, mze kwa tɛawetɛa keɗema yɛ kwambelə mbeli ke ka ghema ta ŋkɛ we, katehawe hɛ va yɛ meɗe mɛa nci kaɗema kakemave kwete wəsə kwa sebe. 27Tsagha shɛnyɛ, ma keseke nda se mpa ke hwelefe ta ka Zhəwif kaba ne, katempa ka Rome le wənə kwetɛŋe kala nza ta se ta mpa shɛ. 28Katenta nda ha, wəshi kempa, mze kwa tɛawetɛa keɗema yɛ kwambelə mbeli ke ka ghema ta nci, kala nya tarete ka Rome we. Ama katehawe hɛ tiɗiɗi va yɛ meɗe mɛa nci.» 29Nya ya kaghena nya mbe jikə geva nya menete ka Rome le ka Zhəwif. 30Ma te kwete hɛ ne, ma ketsahwe hɛɗi nyi bake nyi kambake keɗema kantamte wəsə mbe jikə geva shɛ ne, wərə hɛ kamenete. Katehawe hɛ va wəsə nya mbakete keɗema nya ntamte hɛ. 31Ma te ghəa fete nyi menete nda meghe Dɛmɛtriyəs ke ka Zhəwif ne, wa nya ghena nya rafete nda ghen'yɛ nya: «Va wa sa nda yaka na ke ka Zhəwif nyi kaka mcɛhɛ n'yɛ nyi menete jikə geva ghen'yɛ le hɛ wa? 32Ma kenehwene hɛ va gha zhɛkwa ne, katenza n'yɛ kwetere wəmbəa nci ba'a katempa n'yɛ le gha te ndərə ba'a te hɛɗi.»
Currently Selected:
1 Makabɛ 8: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.