1 Makabɛ 7
7
Dɛmɛtriyəs kazhɛre kameghe
1Ma mbe va gwəmsə ba'a mcɛfemsə kwetɛŋeghəmbe ne, pa Dɛmɛtriyəs, wəzege ta Sɛləkəs hwɛnyɛ shave mbe Rome ba'a lənyɛ le mbeli ɓɛhwɛ laka meleme nya mɛa ndərə, tagha ne, pa zhɛrenyɛ kameghe. 2Ma vəa ŋkwa nya lə ŋkɛ kadzeki ghɛ meghea ka shihɛnyɛ ne, pa ka sewajɛ keseve Antiyokəs Epator ba'a Lisiyas kezha fə hɛ kase shɛ. 3Ma kwa fate kese ta nci Dɛmɛtriyəs ne, ma ke: «Ncɛ ɗa ma kema ta nci yɛ ma.» 4Tagha gɛ, mɛke ka sewajɛ mpəmte hɛ ba'a tarame Dɛmɛtriyəs pelɛ pasla ta ŋkɛ.
5Pa pɛtɛa ka Israyɛl nyi ndiremi ndiremia mehele ba'a nyi keɗema kahawe va wəsə mahalegə se shɛ. Pa Alkime, wəndə nya te ghəa nci ɗe kanza kawəndə kwelea ka dzeghe Shala. 6Pa hɛ ndeke nda fete ke ka Zhəwif kwa kema ta meghe, ma ke hɛ: «Nahe yɛ Zhəwdas le ka menəhɛnyɛ kezamte sebe te ka mcɛhɛ ŋa ba'a ketazemte n'yɛ shave mbe hɛɗia n'yɛ. 7Ghwenakɛ wəndə nya gezleŋema ghə na ve tsetsenya kezha lə ŋkɛ kanewe pɛtɛa wəshi nyi bezemte hɛ te hɛɗia n'yɛ ba'a dzeyi mbe yɛ wəvea meghe. Geze nda kezha ɗa Zhəwdas, ka menəhɛnyɛ ba'a pɛtɛa mbeli nyi kekemane hɛ ŋkɛ.»
Yɛ Bashidɛs le Alkime mbe Zhəwdɛ
8Pa meghe Dɛmɛtriyəs ntave Bashidɛs nya hwa ka mcɛhɛnyɛa meghe, nya kesleke Siri nya wəba. Nahe ŋkɛ kenza kawəndə nya nza zləvə te hwa mbelia meghe ba'a kawəndə nya kenza dɛŋe dɛŋe te ghena ta meghe. 9Pa Dɛmɛtriyəs ghwenakɛ ŋkɛ le Alkime, nde ndiremia mehele nya veyi ŋkɛ kawəndə kwelea ka dzeghe Shala. Pa ŋkɛ gezete nda kezha zhɛne nda wəsə kwa ndiremia nci kwa ghə ke ka Israyɛl. 10Cape yɛ Bashidɛs le Alkime slə le ka sewajɛ kwele kwele. Ntsehema ta nci mbe Zhəwdɛ ne, pa hɛ ghweneghe nda mbeli ke Zhəwdas ba'a ke ka menəhɛnyɛ kezha ghwete hɛ le ghena ta kwelɛŋe. 11Ama ka Zhəwif nyi kenakɛ hɛ kase le ka sewajɛ kwele kwele ne, kese hɛ kayɛ ghena ta kwelɛŋe ta nci we. 12Ndagwara nahe wəvəsəa ka ɗepe wəsə mahalegə kelə sha yɛ Alkime le Bashidɛs kezha sepa ntsehwelea wəsə nya tiɗiɗi. 13Ma hwa ka Israyɛl ne, ka Hasid ya kaka ghate kaɗe ghena ta kwelɛŋe. 14Ma ke hɛ gezete kwelɛ ghəa nci: «Alkime, nde dzeghe Shala nya kahwelefe ta Aron nde se le ka sewajɛ, katemene ɓəmə wəsə nya ndiremi ŋkɛ we.» 15Pa Alkime gezete nda ghena ta kwelɛŋe ke hɛ ba'a ma ke zemete nda fela ke hɛ: «Katesepa ghen'yɛ kamene ŋayɛ wəsə kwa ndiremi ya ke ka mcɛhɛ ŋayɛ we.» 16Pa hɛ yɛte nda ŋa ŋkɛ, pa kesehwe mbeli ŋkwaŋemsə hwa hɛ ba'a mpəmte hɛ ŋkɛ te vecia shɛnyɛ. Ma ke mbe Palepa: 17«Nahe hɛ ketazeyi geva ta ka ɗepe Shala ba'a keshekeyi mimia nci dzasle yitea Zhɛrəzalɛm, kaɗema wəndə shɛ kezha la hɛ.» 18Tagha gɛ, benake pɛtɛa mbeli nyi mbe meleme va ghazlənə, ma ke hɛ: «Nahe mbeli nyi kenza kaka tseŋwə ba'a kaka mbəɗəkwəa kɛfi, kwa nza ŋkɛ ne, nahe hɛ kedzawanji wəmbəa ghena ta ɓəmə ba'a fela nya zemete hɛ.»
19Cape Bashidɛs shave mbe Zhɛrəzalɛm ba'a lə kanzanyɛ mbe Bɛt-Zayit. Pa ŋkɛ keseve mbeli kwele kwele nyi kejikəte geva le ba'a kweci ka Zhəwif. Pa ŋkɛ sleyite ghə yitea hɛ ba'a beteyi hɛ kwa belageji nya wəba. 20Pa ŋkɛ ndeke nda sla ta hɛɗi ke Alkime ba'a ka sewajɛ kezha kemane ŋkɛ. Kwa sebe ta ŋkɛ pa zhɛneghe geva kalə sha meghe.
21Tagha gɛ, pa Alkime mpate mpa kezha ve ghəa ŋkɛ kawəndə kwelea ka dzeghe Shala. 22Pa pɛtɛa mbeli nyi ketaze mehele ta mbeli zlaɓete geva le. Pa hɛ zhɛrenji kaka sleke hɛɗia Zhəwdɛ ba'a vate ɗa nya wəba te ka Israyɛl. 23Ma kwa nakɛ Zhəwdas za ma wəsə kwa ndiremi nya menete nda yɛ Alkime le mbeli nyi yite ke ka Israyɛl keŋa kweci hwelefefi ne, 24pa ntəsləmte pɛtɛa sla ta hɛɗi nyi mbe Zhəwdɛ kezha ɗa ka mbəɗəkwə nyi kejikəte geva le Alkime ba'a kezha fɛa hɛ kedzeghwa te hɛɗia shɛ.
Meghe kaghwene Nikanor yitea Zhəwdas
25Ma kwa nakɛ Alkime nahe yɛ Zhəwdas le mbelia ŋkɛ kezhɛrenji berete ma ba'a kwa ɗepe ŋkɛ kaɗema ŋkɛ kaghereŋe kwa kema ta nci ne, pa zhɛneghe geva kalə sha meghe ba'a ndeke nda fete ke hɛ te wəshi nyi ndiremi ndiremi ma. 26Pa meghe ghwenakɛ Nikanor, kwete wəndəa mbeli nyi te ghəa ka sewajɛa ŋkɛ nya hwa mbelia jama, nya kezlɛ kwele kwele va Israyɛl. Pa meghe ghwenakɛ ŋkɛ kezha za sebe te hwelefea shɛ. 27Pa Nikanor ntsehe mbe Zhɛrəzalɛm le ka sewajɛ kwele kwele. Ma kezha ghwete yɛ Zhəwdas le ka menəhɛnyɛ ne, pa gezete nda ghena te kwelɛŋe ke hɛ. Ma ke sha hɛ: 28«Kamene geva mpa kwelɛ gheɓəmə, 'ya ba'a gheyɛ we. Katese 'ya sha gheyɛ le ka sewajɛ ɓɛhwɛ kezha begeme le gheyɛ mbe kwelɛŋe.» 29Ma kwa ntsehe Nikanor sha Zhəwdas ne, pa hɛ njenjiŋwakɛ ghə kaɗema ghena mbe. Ama nahe ka ghema kenza ɗeke ɗeke kezha kese Zhəwdas. 30Pa Zhəwdas fave keleŋa ya mbe begeme geva shɛ. Ma kwa zhɛte nda ghazlənə ne, pa ɗema temə te begeme geva le Nikanor. 31Ma kwa ɗepete Nikanor nahe ntsehwelea ŋkɛ kencɛte geva ne, cape ŋkɛ shave mbe Zhɛrəzalɛm kalə kampa le Zhəwdas dekwe yitea Shafarsalama. 32Ma laka bela ta Nikanor ne, gare gwəmsə mcɛfe zhili nyi kempə ba'a nahe kweci mbeli kehwɛnji kadzembe meleme ta David.
33Ma kwa sebe ta wəshia shɛhɛ ne, tarame Nikanor pelɛ ghweme ta Siyon. Pa ka dzeghe Shala ba'a mbelia jama shave mbe ghɛa Shala kezha njiŋwe ŋkɛ le kwelɛŋe ba'a kezha ncɛ nda melɛ kwa tere tere nya dzeghe nda mbeli ke Shala kezha meghe. 34Ama pa Nikanor ɗema ɓela hɛ, pa ŋ'wəshikɛ hɛ ba'a slaghe ghena ŋkele ntsə kənəa hɛ. 35Pa ŋkɛ zemete fela le wənə le wənə, ma ke: «Ma keɗema yɛ kefəame yɛ Zhəwdas le ka sewajɛa ŋkɛ mbe dzeve ta ɗa ɓeshi nya ne, kazeme ŋayɛ 'ya kafela katezhɛne geva 'ya kase kandə ghwə yitea ghɛa Shala nya kiɗima ta mpa.» Cape ŋkɛ slənyɛ le wənə le wənə. 36Pa ka dzeghe Shala zhɛneghe geva kadzeki te ŋwela ba'a ghereŋenji kwa kema ta yɛ reghwetɛ le ghɛa Shala, ma ke hɛ gezete le nehwene: 37«Shala yawe, gha nde ntave ghɛ nya kezha nza nde kaŋa ŋa, yitea nza nde kaghɛ kesəkwə ghə ba'a kempi ŋa dzeve. 38Ɗate wəndə nya ba'a ka sewajɛa ŋkɛ, mpəmte hɛ mbe mpa. Zəzəte yɛ ŋele ta nci ba'a sərəma hɛ na kanza teghweme ma.»
Teɗe ba'a mte ta Nikanor
(2 MA 15.1-36)
39Pa Nikanor shavenyɛ mbe Zhɛrəzalɛm ba'a nzanyɛ mbe Bɛt-Horon nya se ka sewajɛa ka Siri kajikəte geva le mbe. 40Pa Zhəwdas le ŋa ŋkɛ nzanyɛ mbe Hadasha le zhili 3.000. Ma ke Zhəwdas sha səkwəte ghə: 41«Shala yawe, ma te kwete veci ne, nahe ka ghwene ta meghe kebezemte ghena. Taghanyɛ ne, pa nde ghwene ta ŋa ncanyɛ ba'a mpəmte zhili 185.000. 42Tsagha shɛ ne, mpəmte ka sewajɛ nyi kwa kema ta n'yɛ nyi ɓeshi. Tagha gɛ, kateɗepe mbeli nyi ketene teghweme nahe Nikanor keŋelekɛ ghɛa ŋa nya keveyi geva tekeleke. Mehate ghwə te kala 'yaghwa mehele ta ŋkɛ.»
43Pa ka sewajɛ ghate mpa mbe hɛ meŋe mahekeneghəmbe mbe terea Adar, pa ka sewajɛa Nikanor mpəmte geva, gheŋkɛ le ghəa ŋkɛ yaghate mbeli kapesle mbe mpa. 44Ma kwa nakɛ ka sewajɛ nahe ŋkɛ kemte ne, pa hɛ betakɛ wəshi kempa ta nci ba'a hwɛnji. 45Veci veci ka Zhəwif kakeka hɛ se mbe Hadasha hwa'a mbe Gɛzɛr, pa hɛ vɛte yɛ tereme kwa sebe ta nci. 46Kashave mbeli mbe pɛtɛa yɛ meleme nyi dzeyi yitea Zhəwdɛ. Kaha nda mpa hɛ ke ka ghema mbe kema ba'a mbe sebe, kazhɛne kweci ka sewajɛ hɛ kadzehwa kweci mbelia nci. Pa pɛtɛa ka sewajɛa Nikanor mpənji, wəndə shɛ ketene teghweme we. 47Keliɓə ka Zhəwif fəhwe wəshi kempa ba'a wəshi nyi wəfəyite ka ghema. Pa hɛ slahwe ghəa Nikanor ba'a dzeve kwa zeme ta ŋkɛ nya se ŋkɛ kakafe le ŋkele ntsə. Pa hɛ fəte hɛ kezha bete hɛ kwa ntsə ta ka Zhɛrəzalɛm. 48Pa mbeli zlamate zlama kwele kwele ba'a menete gəsəkə te vecia shɛ kala vecia zlama nya wəba. 49Pa ka Zhəwif tarete kamene gəsəkəa shɛ keva keva mbe hɛ kwa meŋe mahekeneghəmbe ta terea Adar. 50Pa hɛɗia Zhəwdɛ ŋ'wete kwelɛŋe kavə ɓɛhwɛ.
Currently Selected:
1 Makabɛ 7: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.