1 Makabɛ 4
4
Zhəwdas kahərə ŋkwa mbe Ɛmawəs
(2 MA 8.23-29, 34-36)
1Pa Gorzhiyas fəte ka sewajɛ nyi le seɗa 5.000 ba'a ka katsala ka zleɗe gədəwəa lɛmə slibə. Cape ka sewajɛa shɛhɛ slə heviɗi 2kezha wəmbə ŋkwa ba'a kezha hərə ka sewajɛa ka Zhəwif. Ma mbeli nyi mbe Zhɛrəzalɛm nya berete ne, ghenci ka ncɛ nda hweŋkwa ke hɛ. 3Ma kwa fate ghena shɛ Zhəwdas ne, cape ŋkɛ slə le ka katsala sewajɛa ŋkɛ kalə kampa le ka sewajɛa meghe nyi mbe Ɛmawəs, 4vəa ŋkwa nya nza ka sewajɛa ŋkɛ mba kwetɛ kwetɛŋe cakeɗake yitea ghedəkwə. 5Ma kwa ntsehe Gorzhiyas le ka sewajɛa ŋkɛ heviɗi mbe ghedəkwəa Zhəwdas ne, wəndə shɛ kesləyi hɛ mbe we. Ma zəzə hɛ ne, hwɛ yahwɛ ka Zhəwif mbe kema ta nci, ntake hɛ kasepa hɛ dzeme hwa yɛ ghweme.
6Ma kwa same veci kwa ghɛ gɛ, pɛkwe yɛ Zhəwdas le ka sewajɛ 3.000 ncake nca te ŋwela. Ama wəshi kempa ya yɛ kafayɛ shɛ va hɛ kala nya ɗete hɛ we. 7Pa hɛ nakɛ ghedəkwəa ka sewajɛa kweci hwelefefi nya berete ba'a nya nza zli yite, ka zleɗe gədəwəa lɛmə nyi keɗepemte mpa ka dzaslete ŋkɛ. 8Ma ke Zhəwdas sha ka sewajɛa ŋkɛ: «Ghazlənəma yɛ va kwele kwelea ka sewajɛ nyi ba'a bare barema yɛ va mpa le hɛ ma. 9Zəzəte mə tsema tsema mbelenji ka shihɛ ɓəmə kwa ndərə kwa Ghɛmɛ vəa ŋkwa nya se Farawon kakeka hɛ le ka sewajɛa ŋkɛ. 10Ma tsetsenya ne, səkwə ɓəmə Shala kezha ve ɓəmə zlaɓa ta ŋkɛ ŋkɛ. Zəzəte jikə geva nya menete ŋkɛ ŋkɛ le ka shihɛ ɓəmə ba'a mpəmte ka sewajɛ nyi ŋkɛ ɓeshi kwa ntsə ta ɓəmə. 11Tsagha gɛ, kateɗepete pɛtɛa hwelefefi, wəndə nya kembeɗe ba'a nya kembele Israyɛl ya shɛ.» 12Nakɛma ta kweci hwelefefi ke ka Zhəwif kase sha hɛ ne, 13pəɗəmə hɛ shave mbe ghedəkwəa nci kezha mpa le hɛ. Kavɛ tereme ka sewajɛa Zhəwdas 14ba'a lewəte hɛ mbe mpa. Hərə kweci hwelefefi nyighɛ ba'a mpesle hwɛ yitea hɛ dzawa laka ŋwela, 15ama nyi kenza kwa sebe ne, selekə lekə hɛ kempə mpə te hɛɗi va kafayɛ. Pa ka Zhəwif kekaghe hɛ hwa'a mbe Gɛzɛr ba'a te ŋwela ta Idəmɛ, Asdod ba'a Jamniya. Gare 3.000 zhili nyi kempə te ŋkwa shɛ.
16Ma kwa zhɛneke geva Zhəwdas le ka sewajɛa ŋkɛ sheke kwamte keka ŋkwa ne, ma ke sha hɛ: 17«Dambeghəma ŋayɛ yɛ yitea wəshi nyi fəke mbeli hwa mpa ma. Kwa nza ŋkɛ ne, mba kwete mpa kaneghe ɓəmə. 18Nahe yɛ Gorzhiyas le ka sewajɛa ŋkɛ kenza dzeme hwa ghweme dekwe yitea gheɓəmə. Hite mə geva yitea ka ghema ta ɓəmə ba'a mpa mə le hɛ. Kwa sebe ta ŋkɛ gɛ, katefə wəshi yɛ le gezleŋema ghə.» 19Kiɗima ta geze ghena ta Zhəwdas ne, pa mbeli nakɛ wəvəsəa ka sewajɛ kwa ghəa ghweme kanewe ŋkwa. 20Newe ke hɛ ne, nahe mbeli kehərəte ka sewajɛa nci ba'a ghwə nde tse yitea ghedəkwəa nci. Nahe ɗələ ta n'yi nya kedzeme yitea ghweme kencɛte wəsə nya kemenete geva. 21Ma kwa nakɛ wəvəsəa shɛ hɛ ne, pa ghazlənə keseve hɛ kwele kwele. Ma kwa nakɛ ka sewajɛa Zhəwdas hɛ te ŋwela ɗeke ɗeke kezha mpa perə ne, 22pɛtɛ hɛ hwɛnji kalə kadzete hɛɗia ka Filisti. 23Tagha gɛ, pa Zhəwdas zhɛneke geva kadzembe ghedəkwəa ka ghema kezha fə wəshi. Pa ka Zhəwif ŋasete wəshi kwele kwele: mze kwa tere tere, mze kwa tɛawetɛa, zlave nyi le yirə kwa ndereme ndereme ba'a kwa lɛa lɛa ghweme, tsagha kweci mcɛlə kwele kwele. 24Ma kwa zhɛneke geva hɛ ne, ma ke hɛ tsahekɛ ba'a tsate nda hana ke Shala: «Ganyɛke ŋkɛ ba'a kakiɗi ɗe ta ŋkɛ we.» 25Ma vecia shɛ ne, veci kembele ŋkwa nya wəba ŋkɛ mbe Israyɛl. 26Pa ka sewajɛa kweci hwelefefi nyi kembelenji se kaɓelate nda pɛtɛa wəsə nya kemenete geva ke Lisiyas. 27Ma kwa fate ghena shɛ ŋkɛ ne, pa mehele ta ŋkɛ tazenyɛ ba'a pa geva ta ŋkɛ mtenyɛ. Kwa nza ŋkɛ ne, kemenete geva mpa le Israyɛl kala nya ɗete ŋkɛ we, tekeleke wəsə nya kemenete geva le nya gezete nda meghe.
Kwa ghate ta mpa ta Lisiyas
(2 MA 11.1-12)
28Ma mbe va nya kedzeghə ne, pa tsenete ka katsala ka sewajɛ 60.000 ba'a ka zleɗe gədəwə 5.000 kezha mpa le ka Zhəwif. 29Cape hɛ kalə kadzembe Idəmɛ ba'a kanzanji mbe Bɛt-Səwr. Pa Zhəwdas lə le ka sewajɛ 10.000 kezha mpa le hɛ. 30Ma kwa nakɛ ŋkɛ bereteke ka sewajɛa kweci hwelefefi ne, ma ke səkwəte ghə: «Kewəpi wəpi na, nde mbele Israyɛl. Ma laka dzeve ta David ne, nahe na kefɛamte ɗa ta Goliyat nya biya, gha nde fəyi ka sewajɛa ka Filisti mbe dzeve ta Zhonatan, wəzege ta Sawəl ba'a ke nde mene slene ta ŋa nya kefə wəshi kempa ta ŋkɛ. 31Ma kala nyagha shɛ ne, fəyi ka sewajɛa ka ghema mbe dzeve ta ka Israyɛl, mbelia ŋa. Pəliave nda hawe ke hɛ le ka sewajɛa nci ba'a le ka zleɗe gədəwəa lɛməa nci. 32Vame ghazlənə mbe hɛ ba'a zamte sebe te ve ghə ta nci te berete ta nci. Bare bare hɛ va nya nza mbeli tehərə hɛ. 33Mpəmte hɛ laka kafayɛa mbeli nyi keɗe ŋa. Ma tsagha katetsahe ŋa pɛtɛa mbeli nyi keɗepe sləa ŋa kwa cimə.»
34Pa wəvəsəa ka sewajɛ nyi bake shɛhɛ begeme kwa ghwa mpa, tagha gɛ, pa ka Zhəwif mpəmte ka sewajɛa Lisiyas gare 5.000. 35Ma kwa nakɛ Lisiyas nahe mbeli kehərəte ka sewajɛa ŋkɛ ba'a kenakɛ berete ta ka sewajɛa Zhəwdas nyi keveyi ghə le nza teghweme keɗema le mte ne, cape ŋkɛ kalə kadzembe Antiyoshe nya fəte kweci ka sewajɛ ŋkɛ mbe kezha zhɛne kadzembe Zhəwdɛ le ka sewajɛ nyi kwele kwele ma.
Ve ta ghɛa Shala wɛŋe
36Ma ke yɛ Zhəwdas le ka menəhɛnyɛ: «Ma kwa nza ŋkɛ hərə ka ghema ta ɓəmə tsetsenya ne, ngara ɓəmə kadzeme Zhɛrəzalɛm kezha ve ghɛa Shala wɛŋe ba'a kezha zhɛne kave ŋkɛ tekeleke.» 37Pa pɛtɛa ka sewajɛ tsenete geva ba'a dzemenji pelɛ ghweme ta Siyon. 38Pelɛagha hɛ nda nakɛ ghɛa Shala hɛ dɛghwɛrɛŋe, kebeze beze reghwetɛ ba'a ketere tere yɛ gelembe. Kepese pese ŋwalea yɛ wəfe dzeyi te yɛ ŋwela kala nya mbe ghɛa wəfe keɗema dzeme hwa ghweme, keŋzla ŋzla yɛ cɛ. 39Tagha gɛ, pa hɛ ŋkweŋkwahemte lekwesa ta nci, pa hɛ veyi nehwene kewəbanyɛ ba'a bebehwemte ghəa nci le pəsəɗə. 40Gwegwəɗəŋə hɛ ntiŋə ghə mbe hɛɗi, ma kwa vɛte geva tereme ne, katsa nda lewela hɛ ke Shala.
41Ma kwa sebe ta ŋkɛ ne, pa Zhəwdas gezete nda ke kweci ka sewajɛ kezha mpa le mbeli nyi kwa ŋkwa nya berete, vəa ŋkwa nya ve ghɛa Shala ŋkɛ wɛŋe. 42Zhɛne ne, pa tsehave ka dzeghe Shala nyi ɗema fete te hɛ ba'a nyi kenza dɛŋe dɛŋe te wəsə mahalegəa Moyize. 43Pa hɛ veyi ghɛa Shala wɛŋe ba'a fəmte pelɛ nyi wale wale kadzete ŋkwa nya wale wale. 44Kazəzə wəsə nya temene nda mbeli ke reghwetɛ kedzeghe melɛ kwa tere tere, nya zhɛrete kweci hwelefefi wale wale mbeli. 45Pa mbeli kelete zəzə keŋzla ŋkɛ yagha ŋkɛ tenza kawəsə hawe te hɛ, va nya nza ŋkɛ nahe kweci hwelefefi kezhɛrete ŋkɛ wale wale. Pa hɛ ŋzlamte reghwetɛa shɛ 46ba'a pa hɛ beteyi yɛ pelɛa ŋkɛ te ŋkwa nya kehi pelɛ ghweme nya nza ghɛa Shala pelɛ kezha neghe se ta nde mɛ ŋkwa nya ketegeze wəsə nya temene mbeli le hɛ. 47Ma kala nya gezete wəsə mahalegə ne, pa hɛ fəte pelɛ nyi ketsehema ba'a zhɛne pate reghwetɛ yipə yipə le nya vəashi. 48Pa hɛ hite ghɛa Shala ba'a ŋkwa nya mbe hwəa ŋkɛ, pa hɛ zhɛrete ŋkwa nya te ŋwela ta ŋkɛ wɛŋe. 49Pa hɛ zhɛne menete wəshi kemene slene mbe ghɛa Shala, pa hɛ veyi wəsə kentare yɛ paterela, reghwetɛ ketere 'wərdə ba'a tabele mbe mbe. 50Pa hɛ terekɛ 'wərdə te reghwetɛ, tseyi ghwə kwa yɛ paterela nyi te wəsə kentare hɛ kezha waŋe ŋkwa nya mbe ghɛa Shala. 51Tereke hɛ beteyi ɗafa te tabele, pa hɛ pepelete yɛ mayafe ba'a kiɗimte slene nyi keseve hɛ kamene.
52Ma mbe hɛ bakemsə mcɛfeghəmbe te tere kwa mesli, nya heka mbeli kaKisləw te va gwəmsə ba'a wəfaɗemsə degheseghəmbe ne, pepelɛhetɛme ka Zhəwif sate te ŋkwa masheke masheke, 53pa hɛ dzeghekɛ melɛ kala nya gezete wəsə mahalegə te reghwetɛ mɛnɛfɛ kedzeghe melɛ kwa tere tere nya pate hɛ. 54Ma yipə le və nya zhɛrete reghwetɛ kweci hwelefefi wale wale ne, pa mbeli menete gəsəkəa ve ta reghwetɛ mɛnɛfɛ tekeleke le gaka ta yɛ cimə, getsepele, ŋgwəleŋə ba'a livə. 55Ntake mbeli pɛtɛ kagwəɗəŋə ntiŋə ghə mbe hɛɗi kezha hawe va Shala. Pa hɛ tsahekɛ Shala nya kendeke nda hərə ŋkwa ke hɛ. 56Pa hɛ menete gəsəkəa ve ta reghwetɛ tekeleke kahɛ deghese. Pa hɛ dzeghekɛ melɛ kwa tere tere le zlama nya wəba, tsagha melɛ kejikə ghə ba'a ketsa hana. 57Pa hɛ pesakɛ ŋkwa nya kwa kema ta ghɛa Shala le derə meghe mze kwa tere tere ba'a kweci wəshi. Pa hɛ zhɛne kamenete yɛ ŋkwa kedzeki ba'a yɛ cɛ, pa hɛ zhɛne kameneyi yɛ gelembe mɛa hɛ. 58Pa zlama nya wəba veyi geva hwa mbeli, va nya nza ŋkɛ nahe hawe nya vate kweci hwelefefi te hɛ kekelemte geva. 59Pa Zhəwdas, ka menəhɛnyɛ ba'a pɛtɛa jikə ta ka Israyɛl tarete mene gəsəkəa ve ta reghwetɛ tekeleke te və nya kwetɛŋe keva keva kahɛ deghese, se mɛa kwa bakemsə mcɛfeghəmbe ta hɛa terea Kisləw le zlama ba'a farefa. 60Ma te vəa shɛ ne, pa hɛ ŋeyite zli nya biya ba'a ŋkwa keya ŋkwa nyi berete berete yitea ghweme ta Siyon, yagha kweci hwelefefi tese kaŋkeɗe ŋkwa shɛhɛ kala nya vəashi. 61Pa Zhəwdas veyi kwete wəvəsəa ka sewajɛ tagha kezha ya ghɛa Shala. Pa ŋkɛ mtsehete nda berete ke Bɛt-Səwr kezha nza ŋkwa nya berete va mbeli kwa kema ta Idəmɛ.
Currently Selected:
1 Makabɛ 4: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.