1 Makabɛ 12
12
Zhonatan kazhɛne kajikə geva le Rome ba'a Sparte
1Ma kwa nakɛ Zhonatan megela wəshi nyi kemenete geva laka gheŋkɛ ne, pa tsehave ka ghwene ba'a ghweneghe hɛ kadzembe Rome. Ma slene ta nci ne, kezha geze ba'a kezha zhɛne kamene jikə geva le ka Rome. 2Pa ŋkɛ zhɛne karafete nda ghena nya kala nyagha ke Sparte ba'a ke kweci meleme. 3Cape ka ghwenea shɛhɛ kadzembe Rome, pa hɛ ntsehe kwa kema ta mbelia jama ta hɛɗi, ma ke hɛ sha shɛ: «Zhonatan, wəndə kwelea ka dzeghe Shala ba'a hwelefe ta ka Zhəwif nde ghweneke n'yɛ kezha zhɛne kamene mcɛ ba'a jikə geva nyi gha yɛ kamenete le hɛ.» 4Pa mbelia jama ta hɛɗi fəave nda yɛ palepa ke hɛ kezha mbeli nyi te ghəa pɛtɛa hɛɗi nyi jive hɛ mbe hɛ, yitea nza hɛ kwelɛŋe hwa'a tezhɛneke geva ta nci kadzembe Zhəwdɛ.
5Wa nyi ghena nyi te palepa nya rafete nda Zhonatan ke ka Sparte nyi: 6«Kanjiŋwe ka Sparte nyi kaka menəhɛ nci Zhonatan, wəndə kwelea ka dzeghe Shala, jikə ta mbelia jama ta hɛɗi, ka dzeghe Shala ba'a pɛtɛa ka Zhəwif nyi ketene. 7Ma vəashi ne, nahe Areyos, meghea ŋayɛ keghweneke nda palepa ke Oniyas, wəndə kwelea ka dzeghe Shala ta n'yɛ, nya kegezete kaka menəhɛ n'yɛ gheyɛ kala nya kegeze geva te palepa nya. 8Nahe Oniyas kekemaneve nde ghwene ta ŋayɛ le zləvə nya wəba. Nahe ŋkɛ keyɛte palepa nya nza ghena ta mene mcɛ ba'a mene jikə geva te megela. 9Ma kaŋa n'yɛ, ya kwela ɗema wəshia shɛhɛ katsakɛ n'yɛ ne, nahe palepa nyi nza ghena ta Shala mbe hɛ nyi mɛa dzeve va ghen'yɛ kenza kagweɗakwe ta n'yɛ. 10Vatse gɛ, kamawe n'yɛ laka ghena shɛ kezha zhɛne kamene mcɛ ba'a jikə geva nya kwelɛ ghen'yɛ le gheyɛ. Kwa nza ŋkɛ kaɗe ghen'yɛ kanza kaka mtake sha gheyɛ we, va nya nza ŋkɛ kwele kwele jivenji va se mɛa və nya ghweneke n'yɛ nde ghwene ta ŋayɛ yɛ. 11Ma laka ŋa n'yɛ bela ne, kegha ghen'yɛ kanza n'yɛ kezəzə ŋayɛ vəa ŋkwa nya dzeghe melɛ ghen'yɛ ba'a nya səkwə ghə ghen'yɛ, hwa gəsəkə nyi jama jama ba'a yɛ vəghwə hwa ghɛ we. Nahe ŋkɛ kenza tiɗiɗi ba'a kehi hi kezha zəzə ka menəhɛ n'yɛ. 12Kazlama n'yɛ te zləvəa ŋayɛ perə. 13Ma kaŋa n'yɛ ne, nahe n'yɛ kesahwe yaka kwele kwele ba'a kempahwe yɛ mpa, kwa nza ŋkɛ nahe ka meghe nyi dzeyi yitea ghen'yɛ kehave n'yɛ mpa. 14Keɗete ghen'yɛ kataze ŋayɛ mehele, ya ke kweci mbeli nyi menete jikə geva ba'a mcɛ ghen'yɛ le hɛ mbe mpa shɛhɛ we. 15Kwa nza ŋkɛ ne, te Shala ve ghə n'yɛ kezha kemane n'yɛ. Gheŋkɛ nde mbeleke n'yɛ va ka ghema ta n'yɛ ba'a nde vate hawe te hɛ.
16Vatse ntave Nəmɛniyəs, wəzege ta Antiyokəs ba'a Antipatɛr, wəzege ta Zhazon ghen'yɛ. Nahe ghen'yɛ keghwenakɛ hɛ kalə sha ka Rome kezha zhɛne kamene mcɛ ba'a jikə geva nya gha ghen'yɛ kamenete le hɛ. 17Nahe n'yɛ kegezete nda ke ka ghwene ta n'yɛ kalə sha gheyɛ kezha njiŋwe ŋayɛ ba'a kezha zhɛne kave ŋayɛ palepa ta n'yɛ te ghəa zhɛne kamene jikə geva ba'a nza ta ɓəmə kaka menəhɛ. 18Kasəkwə ŋayɛ n'yɛ kezha ve n'yɛ zhɛne yɛ te ghəa ghena nya.»
19Wa nyi ghena nyi gha mbeli karafeghe nda ke Oniyas nyi: 20«Kanjiŋwe wəndə kwelea ka dzeghe Shala Oniyas, Areyos, meghea ka Sparte. 21Nahe n'yɛ kentsate mbe kwete palepa kaka menəhɛ ka Sparte le ka Zhəwif ba'a kahwelefefia Abraham hɛ bake nci. 22Nahe ghen'yɛ keɗepete ghena shɛ tsetsenya, ganyɛke ŋkɛ kerafeke n'yɛ ghena yɛ te ghəa nza ta ŋayɛ. 23Ma laka ŋa n'yɛ bela ne, ma ke ghen'yɛ sha zhɛne ŋayɛ: ‹Veyi mə wəshi keseɗa ta n'yɛ ba'a wəshia n'yɛ kala wəshi nyi va gheyɛ ba'a veyi ŋa ŋayɛ n'yɛ kala wəshi nyi va ghen'yɛ.› Vatse geze nda ghen'yɛ ke ka ghwene ta n'yɛ kezha geze ŋayɛ yɛ zəzə ta n'yɛ.»
Ka sewajɛa Dɛmɛtriyəs kahwɛ va Zhonatan
24Pa Zhonatan fate nahe mbeli nyi te ghəa ka sewajɛa Dɛmɛtriyəs kezhɛneke geva le ka sewajɛ kwele kwele ma ke kwa ghate ta zhigə kezha mpa le. 25Cape ŋkɛ slə shave mbe Zhɛrəzalɛm kalə kabegeme le hɛ te hɛɗia Hamat. Kwa nza ŋkɛ ne, kaɗe ŋkɛ kapele hɛ kadzete hɛɗia ŋkɛ we. 26Pa ŋkɛ ghwenakɛ ka newe ŋkwa kadzembe ghedəkwəa nci. Pa hɛ zhɛneke geva ba'a gezete nda geva yahi ka ghema kezha wəmbə hɛ heviɗi. 27Ma kwa pəkwə veci ne, pa Zhonatan gezete nda ke ka sewajɛa ŋkɛ kezha nza le ntsə ba'a ɗeke ɗeke le wəshi kempa mbe dzeve kezha mpa kahɛ. Pa ŋkɛ nteyi ka ya ŋkwa dzasle yitea ghedəkwə perə. 28Ma kwa fate ka ghema nahe yɛ Zhonatan le ka sewajɛa ŋkɛ kehite geva kezha mpa ne, pa hɛ ghazlənənji. Ma kwa dakenji hɛ ne, pa hɛ mehate yɛ ghwə mbe ghedəkwəa nci ba'a hwɛnji. 29Ama masheke ɗepete slə ta nci yɛ Zhonatan le ka sewajɛa ŋkɛ, kwa nza ŋkɛ tse ta yɛ ghwə yanewe hɛ mbe ghedəkwə shanda. 30Tereŋe Zhonatan yitea kakeka hɛ, ama shaŋe ŋkɛ kakeka hɛ, kwa nza ŋkɛ nahe hɛ kezlakemte hələa Ɛləwtɛre.
31Tagha gɛ, pa Zhonatan zhɛrete geva yitea ka Arab nyi heka mbeli kaka Zabadɛ. Pa ŋkɛ ɗate hɛ ba'a fəhwe wəshia nci. 32Kwa sebe ta ŋkɛ, cape ŋkɛ slə shave mbe ghedəkwə, pa ntsehe mbe Damas ba'a dzeghwamte pɛtɛa hɛɗia shɛ.
33Ma Simon le ŋa ŋkɛ ne, cape ŋkɛ slə ba'a dzeghwave dzeghwa hwa'a mbe Askalon ba'a mbe ŋkwa nyi berete berete dzeyi yite. Slə tagha ne, ntəŋə ŋkɛ jive laka Zhopɛ ba'a pa kelehwe ŋkɛ. 34Nahe ŋkɛ kefate kaɗe mbeli nyi mbe meleme kave nda ŋkwa nya beretea shɛ ke ka sewajɛa Dɛmɛtriyəs. Pa ŋkɛ ghweneghe ka sewajɛ kezha ya ŋkwa shɛ.
Zhonatan kaŋa zli yitea Zhɛrəzalɛm
35Ma kwa zhɛneke geva Zhonatan kadzembe Zhɛrəzalɛm ne, pa tsenete mbelia jama nyi hwa mbeli. Pa ŋkɛ tsahwe le hɛ kezha ŋa ŋkwa nyi berete berete mbe Zhəwdɛ, 36kezha mbake biya ta zlia Zhɛrəzalɛm ba'a kezha ŋa zli nya biya kwelɛ yɛ ŋkwa nya berete le meleme kezha nehe hɛ. Gheŋkɛ ɗe kezha nza ka sewajɛa Dɛmɛtriyəs pelɛ ŋwela fate fate yitea ŋkwa nya berete ba'a kezha fɛa hɛ kepa keɗema kepamte wəshi. 37Pa mbeli nyi mbe meleme tsenete geva kezha zhɛne kaŋa meleme, kwa nza ŋkɛ nahe kwete bela ta zli nya laka zlərəa ŋkwa kesame ta veci keŋzlanyɛ. Kazhɛne mbeli kahi ghedəkwə nya heka mbeli kaShafenata perə. 38Ma Simon le ŋa ŋkɛ ne, pa zhɛne kaŋate meleme ta Adida nya te hɛɗi nya kwake kwake. Pa ŋkɛ ŋeyite zli yite ba'a leyi yɛ gelembe nyi nza wəshi keŋzle te hɛ mɛ.
Zhonatan kadzembe dzeve ta Trifon
39Ntake Trifon kazele kanza te ghəa Siri nya wəba, kanza kameghe ba'a kezha kese meghe Antiyokəs. 40Ama pa ghazlənə zhɛte nda va Zhonatan yagha ŋkɛ tefɛa ŋkɛ keyipə zəzə ta ŋkɛ ba'a tese kaha nda mpa. Ntake ŋkɛ kazele ntsehwele kekese ŋkɛ kezha pesle ŋkɛ. Cape ŋkɛ kwa hweŋkwa, pa ntsehe mbe Bɛt-Shɛyan. 41Pa Zhonatan lə shɛ le ka katsala kɛfia ka sewajɛ 40.000, pa ntsehe mbe Bɛt-Shɛyan perə. 42Ma kwa nakɛ Trifon nahe Zhonatan kese le ka sewajɛ kwele kwele ne, pa ɗema kese ŋkɛ. 43Ama pa kemaneve ŋkɛ le zləvə ba'a fəave nda wəshi gəmə, ba'a gezete nda ke pɛtɛa ka mcɛhɛnyɛ ba'a ka sewajɛa ŋkɛ kezha hawe va Zhonatan kala ghəa ŋkɛ. 44Ma ke sha Zhonatan: «Va wa leɓekɛ pɛtɛa ka sewajɛ nyi na kaɗema gheɓə mbe mpa wa? 45Zhɛneghe ka sewajɛa ŋa kalə sha ghɛa nci, tsehave ka sewajɛ ɓɛhwɛ hwa hɛ kezha beghe ŋa ba'a nde kwa sebe ta ɗa kadzembe Ptolɛmayis. 'Ya kateve ŋa melemea shɛ ba'a kweci ŋkwa nyi berete berete, tsagha ka sewajɛ ba'a ka mene slene nyi mba mbe. Kezha gheŋkɛ se 'ya kadzembe Bɛt-Shɛyan. Kwa sebe ta ŋkɛ, katezhɛne geva 'ya kalə sha ghɛa ɗa.»
46Pa Zhonatan yɛhwe nda ŋa ŋkɛ ke Trifon ba'a menete kala nya gezete ŋkɛ. Pa ŋkɛ zhɛneghe ka sewajɛa ŋkɛ kalə kadzete hɛɗia Zhəwdɛ. 47Pa ŋkɛ sərəakɛ ka sewajɛ 3.000 yite. Kwa sebe ta ŋkɛ, pa nteyi kweci mbelia nci 2.000 mbe Galilɛ, vəa ŋkwa nya beghe ŋkɛ kweci nyi slibə. 48Ama dzembema ta Zhonatan ke Ptolɛmayis ne, pa mbeli nyi mbe ŋzlete yɛ degha ta meleme. Pa hɛ keseve Zhonatan ba'a mpəmte mbeli nyi kedzembe melemea shɛ yite le kafayɛ. 49Tagha gɛ, pa Trifon ghwenakɛ ka sewajɛ nyi le seɗa ba'a ka zleɗe gədəwəa lɛmə kadzembe Galilɛ ba'a kadzete ŋwela nya wəba kezha za sebe te pɛtɛa ka sewajɛa Zhonatan. 50Pa mbelia shɛhɛ fate nahe wəndə kwelea ka dzeghe Shala kekesehwe geva ba'a kepeslekɛ geva zlaɓe le mbeli nyi kebeghakɛ ŋkɛ. Pa hɛ ntsəte nda berete ke ghəa nci ba'a pate geva jaslɛ, ɗeke ɗeke yitea mpa. 51Ma kwa nakɛ mbeli nyi kekeka hɛ kezha mbele mpia nci mpa hɛ ne, pa hɛ zhɛrete geva dzeyi te sebe. 52Pa pɛtɛa ka sewajɛ kezhɛneke geva kadzembe Zhəwdɛ le kwelɛŋe, pa hɛ nehwenekɛ yɛ Zhonatan le mbeli nyi yite. Ntake ghazlənə nya wəba kazhɛ nda ke hɛ. Nahe pɛtɛa ka Israyɛl kenza mbe nehwene nya wəba. 53Ntake pɛtɛa hwelefefi nyi dzeyi yitea hɛ kazele kezha za sebe te hɛ. Ma ke hɛ mbe ghəa nci: «Kezhɛne wəndə nya te ghə keɗema nde kemane hɛ kanza va ka Zhəwif we. Have nda ɓəmə mpa ke hɛ ba'a zamte ɓəmə sebe te hɛ kezha ɗema mbeli zhɛne kazəzə hɛ.»
Currently Selected:
1 Makabɛ 12: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.