1 Makabɛ 13
13
Simon kadzete ŋkwa Zhonatan
1Pa Simon fate nahe Trifon ketsenete ka sewajɛ kwele kwele kezha lə kadzete hɛɗia Zhəwdɛ kezha beze ŋkɛ. 2Ma kwa nakɛ ŋkɛ kabare bare mbeli va ghazlənə ne, pa dzeme Zhɛrəzalɛm ba'a tsenete ka Zhəwif. 3Pa ŋkɛ gwəfəte nda ghə ke hɛ, ma ke sha hɛ: «Nahe yɛ keɗepe pɛtɛa wəshi nyi menete n'yɛ, 'ya, ka kesaka meyɛ ɗa ba'a mbelia n'yɛ kezha ya wəsə mahalegə ba'a ghɛa Shala. Nahe yɛ keɗepe mpa nyi mpahwe n'yɛ ba'a yaka nyi sahwe n'yɛ. 4Tewəmbəreke Israyɛl mpənji ka kesaka meyɛ ɗa. Deke 'ya nde tene tsetsenya. 5Kenza zəzə kembele mpia ɗa va 'ya te vəa yaka we. Kwa nza ŋkɛ kenza 'ya za ma ke ka kesaka meyɛ ɗa we. 6Ama 'ya katewa hwelefe ta ɗa, ghɛa Shala, mia ŋayɛ ba'a ŋwalea ŋayɛ. Kaganda ne, nahe pɛtɛa kweci hwelefefi ketsenete geva kezha za sebe te gheɓəmə, va nya ɗema ntsə ta ɓəmə hɛ.» 7Pa ghena ta Simon nyi ntsəte nda berete ke mbeli. 8Ma ke hɛ zhɛnete nda le berete: «Gha ya kawəndə nya te ghəa n'yɛ te ŋkwa yɛ Zhəwdas le Zhonatan nyi kaka kesaka meyɛ ŋa. 9Nza te ghəa n'yɛ kwamte mpa, katemene yayata ghena nya tegeze n'yɛ na ghen'yɛ.» 10Tagha gɛ, pa Simon tsenete zhili nyi wərə dzemte mpa. Pa ŋkɛ keɗaŋemte ŋa ta zli nya yitea Zhɛrəzalɛm le dera le dera ba'a mtsehete nda berete. 11Pa ŋkɛ ghweneghe Zhonatan, wəzege ta Absalom le ka sewajɛ kwele kwele kadzembe Zhopɛ. Pa Zhonatan kekamte mbeli nyi mbe melemea shɛ ba'a nzanyɛ mbe.
Trifon kaghwete Simon ba'a kapesle Zhonatan
12Cape Trifon slə shave mbe Ptolɛmayis le ka sewajɛ kwele kwele kezha dzembe hɛɗia Zhəwdɛ. Pa ŋkɛ slə le Zhonatan nya keseve ŋkɛ. 13Pa Simon se kamenete ghedəkwəa ŋkɛ mbe Adida kwa kema ta ŋwela. 14Ma kwa fate Trifon nahe Simon kedzete ŋkwa wəza meghekɛ Zhonatan ba'a kehite geva kezha ha nda mpa ne, pa ghweneghe nda mbeli, ma ke hɛ shɛ: 15«Tewəmbəreke mze kwa tɛawetɛa nya hi wəza meyɛ ŋa Zhonatan kaghwene kadzawa səndəkwəa meghe ba'a tewəmbəreke slene nyi mene ŋkɛ keseyi ŋkɛ ghen'yɛ. 16Ma tsetsenya ne, ghweneke kiləwəa mze kwa tɛawetɛa 2.700 ba'a ŋwale tezhilia ŋkɛ bake kambeli nyi fəhwe mbeli. Ma tsagha ne, kateɗema ghena ta n'yɛ ŋkɛ vəa ŋkwa nya tenza ŋkɛ waɗe we.»
17Ya kwela ɗepe Simon tseŋwə yasla nda mbelia shɛhɛ ne, pa ghwenakɛ ŋkwa kazele mze kwa tɛawetɛa ba'a ŋwale. Kwa nza ŋkɛ kazhɛ nda ghazlənə va nya teɗema ntsə ta ŋkɛ mbeli. 18Ma ke mbeli sha tegeze: «Nahe Zhonatan kemte va nya ɗema Simon keghweneghe nda mze kwa tɛawetɛa ba'a ŋwale ke Trifon.» 19Tagha gɛ, pa ghweneghe ŋwale ba'a kiləwəa mze kwa tɛawetɛa 2.700. Ama tseŋwə yaslate Trifon, kese ŋkɛ kapele Zhonatan we. 20Kwa sebe ta ŋkɛ, cape Trifon kwa hweŋkwa kalə kakele Zhəwdɛ ba'a kabeze ŋkɛ. Pa ŋkɛ zhɛrete geva le ka sewajɛa ŋkɛ jive laka hweŋkwa kedzembe Adora. Ama hweŋkwa yafɛa nda yɛ Simon le ka sewajɛa ŋkɛ te yayata ŋkwa nya ɗe ŋkɛ kalə. 21Ma vəa ŋkwa shɛ ne, pa mbeli nyi mbe ŋkwa nya berete ta Zhɛrəzalɛm ghweneghe nda mbeli ke Trifon. Pa hɛ səkwəve ŋkɛ kezha se kahe kahe sha hɛ laka ɓerama ba'a kezha ghwene nda wəshi kezeme ke hɛ. 22Tagha gɛ, ntake Trifon kahi pɛtɛa ka zleɗe gədəwəa lɛməa ŋkɛ kezha lə ŋkwa shɛ, ama te viɗia shɛ ne, pa kwacakelɛ nyi kebetakawa geva kwele kwele fɛake ŋkɛ kelə. Cape ŋkɛ jive laka hɛɗia Gala'ad. 23Ma kwa ntsehe ŋkɛ yitea Baskama ne, pa peslekɛ Zhonatan, pa mbeli lamte ŋkɛ te ŋkwa shɛ. 24Kwa sebe ta ŋkɛ, tewətelɛwe Trifon zhɛneghe geva kadzete hɛɗia ŋkɛ.
25Pa Simon ghwenakɛ mbeli kezha kele wəndə kemte mtea wəza meghekɛ Zhonatan, pa lamte ŋkɛ mbe Modine, meleme ta ka shihɛnyɛ. 26Pa pɛtɛa ka Israyɛl nehwenekɛ ŋkɛ kwele kwele ba'a ŋgaɗekɛ ghə kahɛ kwele kwele. 27Pa Simon ŋate ŋkwa biyake kənəa kwele ta yitenyɛ ba'a ŋa ka kesaka meghekɛ kezha newe mbeli cakeɗake. Nahe ŋkwa nya kwa kema ta ŋkɛ ba'a nya kwetere wəmbəa ŋkɛ kenza le pelɛ nyi shɛanɛa shɛanɛa. 28Zhɛne ne, pa Simon ŋate ŋkwa dzəgwəɗəmə dzəgwəɗəmə mberefaŋe kazəɗə bake, kezha yitenyɛ, meghekɛ ba'a ka kesaka meghekɛ wəfaɗe. 29Pa ŋkɛ mɓeyi selə nyi biya biya dzeyi yitea ŋkwa nyi dzəgwəɗəmə dzəgwəɗəməa shɛhɛ. Pa ŋkɛ pesakɛ hɛ le pɛtɛa wəshi kempa ta ka sewajɛ kezha zəzə ka Makabɛ mbeli kaghala ghala. Ma dzeyi vare wəshi kempa ne, pa mbeli feɗete yɛ kwambelə nyi nza pɛtɛa mbeli nyi kedzeghwa te ndərə kanakɛ. 30Ma kwele nya ŋate nya Simon mbe Modine ne, mba ŋkɛ pa ɓeshi nya.
Dɛmɛtriyəs nde bake kayɛ jikə geva le ka Zhəwif
31Ma vəa ŋkwa shɛ ne, pa Trifon pamte meghe Antiyokəs nya kamempɛhweta ba'a pa peslekɛ ŋkɛ. 32Pa ŋkɛ dzetenyɛ te ŋkwa ŋkɛ, pa zhɛrenyɛ kameghea Siri nya wəba ba'a vate ndiremi nyi dzawe dzawe te hɛɗi.
33Ma Simon le ŋa ŋkɛ ne, pa zhɛne kaŋate ŋkwa nyi berete berete ta Zhəwdɛ, pa dzaslete hɛ le ŋkwa keya ŋkwa nyi biya biya ba'a zli nyi biya biya. Le wəshi keŋzle nyi berete berete ŋzlete geva yɛ gelembe ta nci. Pa ŋkɛ beteyi wəshi kezeme mbe hɛ. 34Pa ŋkɛ tsehave ka kele ghena ba'a ghwenakɛ hɛ sha meghe Dɛmɛtriyəs nde bake kezha sərə Zhəwdɛ ŋkɛ keŋki nda jaɓeregwale, kwa nza ŋkɛ nahe Trifon kefəhwe wəshi nyi te hɛɗia shɛ. 35Pa meghe Dɛmɛtriyəs zhɛnete nda 'yɛwe ta ŋkɛ ke Simon, pa rafete nda palepa, ma ke: 36«Kanjiŋwe Simon, wəndə kwela ka dzeghe Shala ba'a mcɛnyɛa meghe, tsagha mbelia jama ba'a hwelefe ta ka Zhəwif meghe Dɛmɛtriyəs. 37Nahe ghen'yɛ kekemave derə meghe mze kwa tere tere ba'a dzeve ta peha nya ghweneke n'yɛ yɛ kawəsə gəmə. Ɗeke ɗeke n'yɛ kezha mene kwelɛŋe nya fəyitekeghə le gheyɛ ba'a kezha rafe nda palepa ke ka mene slene kezha pele ŋayɛ hweŋkwa hɛ kaɗema kaŋki jaɓeregwale. 38Nahe ghen'yɛ keghereŋe te pɛtɛa wəshi nyi zəzəte ghen'yɛ laka gheyɛ, nahe ŋkwa nyi berete berete nyi ŋate yɛ kenza kaŋa ŋayɛ. 39Nahe ghen'yɛ kekelemte beze ghena ba'a fete nyi menete yɛ pa ɓeshi te wənə, kazhɛne yɛ kaŋki nda jaɓeregwale ke meghe we. Ma kegezete mbeli kaŋki kwete wəsə mbe Zhɛrəzalɛm ne, katezhɛne yɛ kaŋki tsetsenya we. 40Ma kenza nde mbeli nyi wərə kanza kaka ya meghe ya shɛ hwa gheyɛ ne, kayɛ hɛ n'yɛ. Zhɛneyi geva kwelɛŋe kwelɛ gheɓəmə!»
41Ma mbe va gwəmsə ba'a mberefaŋemsə ne, kezhɛne Israyɛl kanza mbe dzeve ta kweci hwelefefi. 42Ma ke mbeli ghate karafe yɛ və te yɛ palepa ba'a ghena nyi tsahwe mbeli: «Mbe kwa ghate ta va ta Simon, wəndə kwelea ka dzeghe Shala, wəndə nya te ghəa ka sewajɛ ba'a nya te ghəa ka Zhəwif mbe meghe.»
Simon kakele Gɛzɛr ba'a ŋkwa nya berete ta Zhɛrəzalɛm
43Ma te vəashi ne, pa Simon have nda mpa ke meleme ta Gɛzɛr. Pa ŋkɛ dzaslete ŋkɛ le ka sewajɛa ŋkɛ, pa ŋate ŋkwa keya ŋkwa nya nza seɗa ta wəmata yite ba'a nzereghe ŋkɛ kalə kadzeyitea meleme. Pa ŋkɛ have nda mpa ke kwete ŋkwa keya ŋkwa ba'a kelehwe ŋkɛ. 44Pa mbeli nyi pelɛ ŋkwa keya ŋkwa shɛ ŋslakawa bale kadzawa meleme ba'a ndeke nda ghazlənə ke mbeli nyi mbe. 45Pa mbeli nyi mbe meleme dzeme zli le mia nci ba'a ŋwalea nci. Pa hɛ ŋkwahemte yɛ lekwesa ta nci, tsate lewela le berete ba'a 'yɛwakɛ nza kwelɛŋe va Simon. 46Ma ke hɛ: «Mene n'yɛ ma wəsə kwa ndiremi nya menete ghen'yɛ na ma, ama zhɛ heli yitea ghen'yɛ.» 47Pa Simon tseɓate ghə le hɛ ba'a ghereŋete mpa. Ama ŋkwase ŋkɛ ŋkamte hɛ shave mbe meleme ba'a yaɓemte ghɛ nyi se wəshi nyi zhɛrete mbeli kashala dzeyi ki hɛ wɛŋe. Kwa sebe ta ŋkɛ, shilimə ŋkɛ mbe Gɛzɛr le geza ba'a cimə ketsa hana. 48Pa ŋkɛ zamte sebe te pɛtɛa wəshi nyi kese kazhɛre melemea shɛ wale wale ba'a beteyi mbeli nyi dɛŋe dɛŋe te wəsə mahalegəa Shala mbe. Pa ŋkɛ zhɛrete ŋkɛ bereteke ba'a ŋate ghɛ mbe.
49Ma mbeli nyi mbe ŋkwa nya berete ta Zhɛrəzalɛm ne, nahe hɛ kefɛake geva keshave kezha pave keɗema kezha pamte yayata wəsə te hɛɗia shɛ. Dzawe dzawe zhɛte nda ma ke hɛ ba'a kwele kwele mbelia nci nyi kempənji va ma. 50Pa hɛ mpiyi nda dzeve ke Simon kezha nza kwelɛŋe le hɛ, tsagha ŋkɛ menete nda ke hɛ. Ŋkwase ŋkɛ ŋkamte hɛ shave mbe ŋkwa nya beretea shɛ ba'a wɛŋe ŋkɛ yaɓemte ŋkɛ va wəshi nyi kezhɛrete ŋkɛ wale wale. 51Pa ka Zhəwif dzembenji mbe ŋkwa nya beretea shɛ mbe hɛ bakemsə mahekeneghəmbe ta tere kwa bake mbe va gwəmsə ba'a mberefaŋemsə kwetɛŋeghəmbe le gaghwe ba'a le yɛ dzeve ta peha yitea gaka ta yɛ ŋgwəleŋə, yɛ ciŋəci, yɛ getsepele, yɛ geza ba'a kweci cimə. Kwa nza ŋkɛ ne, nahe nde ghema nya wəba kenza kehərə hərə ba'a keŋkamte geva shave mbe Israyɛl. 52Pa Simon gezete kezha mene gəsəkəa vecia shɛ mbeli keva keva le zlama. Pa ŋkɛ ŋeyite zli yitea ghweme ta ghɛa Shala, laka ŋkwa nya berete ba'a pa nzanyɛ tagha le ka sewajɛa ŋkɛ. 53Newe ke Simon ne, nahe Zhaŋe, wəzege teza ta ŋkɛ kemenete za. Pa ŋkɛ veyi ŋkɛ te ghəa pɛtɛa ka sewajɛ. Pa Zhaŋe nzanyɛ mbe Gɛzɛr.
Currently Selected:
1 Makabɛ 13: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.