Job 9
9
Job
1-2 #
Job 4.17
Ii, mị mạnaghan ni oomo phọ ịpe phọ atene.
Kụ ọlo oye kaḍighi ika kụ ạmoogh akeel dị Ẹnaan rꞌọdi kụ ọokonoghian?
3Oye kaḍighi ika kụ ạagbaghanaan rꞌọdi?
Ọdi katue ni apuru oniin ọonir asipuru
dị oye kátue ạpanyanaan.
4Ẹnaan ẹmoogh ni iboom ịikpo rꞌolegheri ịyaar;
oye kátue ạmerenyan nyọdi.
5Ekperenom ọdi kapighemi ni rạaḅaraph
kụ esi ọghagh ologhi aagulemi bịdi.
6Ẹnaan epighemi de phọ iniin ariisi eḅomoghian;
ọdi apighemi rọko phọ erool bọ de phọ.
7Ọdi katue ni akikima erumuḍio mọ kímite,
ḅịle kẹn rạanaan phọ mọ kị́mu ḍughul.
8Oye ọ́lhoghonaan ḍịghaagh Ẹnaan phọ kụ ạatarion bọ sịke phọ,
ọbo ọbo ạazeghi bọ ọman elhom ẹnam ọphiiny phọ.
9 #
Job 38.31; Ẹmos 5.8 Ẹnaan kụ ịde oomo ạraanaan ẹpe okuaḍio phọ —
Egbogh Ẹenaan ạBeya, Orion, rꞌạPledis, ḅịle rꞌạraanaan ẹpe esoorom mọ.
10Yira kótue ọnaghanan igbogh ạraraar phọ ọdi raḍighi ghan bọ,
ḅịle kẹn esi ịiḍaany phọ ọdi eekuna ílho.
11Ẹnaan reten ghan ni ịduon phọ kụ ọlo mị kátue ạmiin nyọdi.
12Ọdi rạsighe ghan ịlo ọdi rạwa, oye kátue akikima nyọdi;
oye kámighiron apuru nyọdi, “Ịphen nạ raḍighi bọ ịghen?”
13Ọghagh ologhi Ẹnaan phọ ránmia ghan. Ọdi aagulemi bụmulogh-ḍien phọ ọdi,
bụphe ọloghonaan bọ ḍịghaagh Rehab, elhom ẹnam ọphiiny phọ, kụ eenan bọ nyọdi.
14Kụ iḍighi kụ mịna kạmoogh bọ ẹghen ikpo ọnhu ọsighe ọphagharanaan Ẹnaan?
15Ghạlamo ịduon mị ụ́piom bọ ni, oomo ịdi mị katue aḍighi
ọlom ọnma ighirigiir esi Ẹnaan oogboom ịiruen phọ ạmi.
16Kụ ghạlamo ịduon phọ kẹn ni ọdi ameera mọ mị ụkaaph,
mị kátue ameeraam mọ ọdi kụnaghanan ni ịmi.
17Ọdi atom oghim mọ ukuphogh ịmi aḍighi yogh rạraar elegh,
dị ịyaar mị úḍighi.
18Ọdi kámeera mọ mị upooghu;
ọdi mạsighe eghiḍim amuzeḍi ghuḍum ạmi.
19Mị kạnmagharanam nyọdi ḍụghum? Ạnmagharanam Ẹnaan phọ ni?
Mị kạki otu iilogh asi sịagba? Oye katue ni aporogh nyọdi ḍụghum?
20Mị ịyaar ụ́piom kụ Ẹnaan kőghel, kụ ọlo ikpo ọnhu phọ ạmi ẹkigh mụdi mị ạpiom ni,
kụ tọrotoro ịyaar lọ mị ạḅem ẹḅile bịn rịngo ghan ịmi apum.
21-22Mị ịyaar ụ́piom kụ ọlo mị rạ́aḅaghamian mun loor.
Ạdol phọ mịpher ịmi. Ẹlo ẹmoogh mạar oḍighinom ílho mun.
Mị ạpiom mị ụ́piom, Ẹnaan kiigulemi ni iyira.
23Mem dị oye dị ụ́piom kụ amugh ekperenom,
Ẹnaan rẹmilogh ghan ni.
24Ẹnaan ịngo aḅirini phọ bụkaraph awe.
Ọdi aḍighi ịdi abuugboom ịiruen phọ eten rọ́miin mun.
Kụ eḍighi ịyaar dị Ẹnaan kụ ịduon phọ úḍighi, ạnhian kụ aḍighi bọ?
25Asiḍughul-otu phọ ạmi reegborion ni keten, rꞌaḍiniin ị́nighe.
26Aghuḍum ạmi aagborion raten ịdipho oghuugh dị raagborion,
raagborion ịdipho uga dị rạsighe ḍiwoor.
27-28Eḍighi ịyaar lọ mị ạyigh aani kụ eenaan owula eephina phọ,
oomo ịminimiin phọ ạmi reḅula ghan kịwa ịmi ẹmiin.
Mị alegheri ni mọ Ẹnaan mesoph ni ọoruen iphume ịmi.
29Loor esi dị ọdi muphume bọ ni ịmi, mịna kạḅile ạkaaph eeghe?
30Ạsaḅa ólho dị katue aatol ịkaraph phọ ạmi.
31Ẹnaan miroph ịmi esumeeny ooni ẹenir,
kụ umugholoor ạmi rasiph ni ghạlamo rꞌạrusuoma phọ ạmi.
32Mụghumo Ẹnaan iḍighi oye, mị mutue ni ạphagharanaan nyọdi;
yoor mụki ni otu iilogh kụ ọgbaaghian.
33Kụ ọlo oye dị kụugbarion iyoor ólho —
oye ólho dị kasoph ọoruen ạngo Ẹnaan rꞌạmi.
34Ịmi kụ́lhiom mun, Ẹnaan.
Kẹle yogh rạraar aruugu phọ ạna.
35Mị rákiilaan. Mị kạkaaph ni
loor esi dị mị alegheri ni ologhi phọ ạmi.
Currently Selected:
Job 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
