Job 8
8
Bịldad
1-2Nạ maghirighian ạmadan eepu ọghaaph phọ ạna ḍụghum?
3Ẹnaan rékiton ghan iiḅi ịiruen;
ọdi rạ́bile ghan oḍighi ịpe eḍighi bọ elhiom.
4Iini ạnmuny phọ ạna moḍighi ni ịkaraph esi Ẹnaan
kụ iḍighi kụ ọdi mạlhiom bịdi ịdi ẹkpianaan.
5Kụ ọlo, ghiighiraan ạaḅereghian Ẹnaan Oomo Ịikpo phọ;
6Eḍighi ịyaar dị nạ ạser-sẹr ạḅile aseleman,
pọ Ẹnaan ketu ni ẹloghonaan nyịna ḍịghaagh,
ạḅile aḅulemi eghunotu phọ ạna ạngo nyịna.
7Oomo ẹelha phọ ạna ephe bọ kẹ́man ịyaar ọtomaam
ịpe ọdi kạngo bọ nyịna.
8Pogh ẹphurukpu amem olegheri-ịyaar ageedi phọ;
mạar aphogh igey phọ ịpe ạburude phọ ayira ọtuugha bọ.
9Aghuḍum mọ ayira akper ri, yira mạar úlegheri;
yira roten ghan ịdipho oogho sịen ade phọ.
10Kụ ọlo, awe olegheri ịyaar ageedi phọ ọtughemi nyịna!
Nạghanan ịpe bịdi ọghaaph bọ:
11“Iiphoghoḍian kétue esi esi lọ ạmuum úlho;
rọ́miin ghan bịdi esi lọ íḍighi ighool.
12Eḍighi ịyaar lọ ạmuum mọ amooph, bịdi kụ kẹpu emuughu,
mem dị bịdi eghom ni ẹphughan oḍighinom ịyaar.
13Awe dị Ẹnaan úlegheri ọkigh iipoghoḍian phọ ịpe phọ;
oḍuom ologhi phọ ạbidi maphe, ịduon bịdi mowula bọ Ẹnaan phọ.
14Bịdi oḍuom ologhi iri — iri ọseki-ọotaku.
15Eḍighi ịyaar lọ bịdi ọbedenom ọseki-ọotaku, katue ni ạpam bịdi ḍụghum?
Eḍighi ịyaar lọ bịdi ọphamanam iri, ketue ni ẹmeremi bịdi ḍụghum?”
16Ạbukaraph awe roḍum ghan ịdipho ạroogho esi ogogo,
ịdipho ạroogho dị amuza ozo.
17Ạsini phọ ạbidi rẹpiiny ghan rạna phọ,
ḅịle kẹn reḅol ghan kegheelom tọrotoro aḍighiigh.
18Kụ ọlo, ọpham bịdi oruphuron —
pọ oye kálegheri mun mọ bịdi ụrol ghan ni sịphe.
19Ii, emuton ịpe phọ, iboh dị ịkaraph awe ọmoogh ílho.
Ạbunon awe kụ kotu ọsighiogh riisi phọ ạbidi.
20Kụ ọlo Ẹnaan kẹ́ḅitonaan weye omeeraam,
ḅịle kẹn kẹ́loghonaan ḍịghaagh ịkaraph awe.
21Ọdi kạbile ni nạ ạmilogh ạḅile ạlho,
22kụ ọlo ọdi kaafolomi ni bụphe ọlogh bọ nyịna ḍien phọ,
ḅịle aruutu ịkaraph awe phọ kepe ni.
Currently Selected:
Job 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
