Job 10
10
1Ạdol phọ mịpher ịmi.
Nạghan emoghi eghiḍim mọ ạmi.
2Kásoph ịiruen úphume ịmi.
Ụḅeni ịmi. Eeghe kụ ologh phọ mị asoor bọ?
3Eḍighi ni elhiom ḍụghum ịduon nạ rụkpilighi bọ ịmi?
Ọḅitonaan ịyaar dị nạ rꞌaloor kụ ạlem?
Kụ ọyigh ophogh ghan igbiighi ạbukaraph awe phọ?
4Nạ rạmiin ghan ni rạraar ịduon yoor rọmiin ghan bọ ḍụghum?
5Aghuḍum mọ ạna akper ri ịduon ọphon ayoor ḍụghum?
6Eeghe kụ iḍighi bọ kụ nạ agbiighi bọ oomo ịkaraph phọ ạmi,
ạḅile ạwa amitiom tọrotoro ọpioman lọ mị ạmoogh.
7Nạ alegheri mọ mị ụ́piom,
ḅịle mọ oye kátue ụphel ịmi ḍịghaagh ạna.
8Ạraghaagh phọ ạna kụ ịlhem ịmi,
kụ nyịidipho iniin phọ ạraghaagh phọ ạna miigulemi ịmi.
9Kábula mọ nạ ụsighe ọposo kụ ụlhemom bọ ịmi.
Nạ rạwa ọgbe ạmi oḅulemi ịsiphe ophugh phọ ḍụghum?
10Nạ ụngo ọde phọ ạmi ịnyaam mọ ụmar ịmi;
nạ aḍighi ịdi mị aphoph sịphe ọkuruḅaka onhiin phọ ạmi.
11Nạ ạḅol loor phọ ạmi adoghoḍi ịḅarara rꞌazin ighiph
kụ ạsighe iphulupul rꞌaruzu aakpereghiom ịḅarara phọ.
12Nạ ụngo ịmi ghuḍum rꞌẹphomoghian dị rémuneen,
kụ ịma ephoghom mọ ạna kụ ịpham bọ ịmi kụ mị odi ghan bọ.
13Kụ ọlo nyịidipho mị malhegheri
mọ oomo amem mọ nạ ạaghian ghan ni agbiighi oḍighi ạmi ịkaraph.
14Nạ ugon ghan ọmiin mụghumo mị kaḍighi ni ịkaraph
pịdi nạ usiph ịmi ịdi ọwilenaan kạ́tol.
15Ịduon mị aḍighi bọ ịkaraph bịn mị aḍigh ịiḅaghami rꞌạna,
kụ ọlo mem lọ mị aḍighi ịlo ẹnighe, mị rạ́moogh ghan ḍịseph.
Mị rạmiinom ni iboom ḅịle umugholoor rusiph ni ịmi.
16Eḍighi ịyaar lọ ạraraar ịnighenaan ịmi,
nạ uusophoghian ịmi ịdipho ạnam-dịka.
Loor ọteenyom ạmi oḍighi ịkaraph nạ ạkar kụ raḍighi ghan ịiḍaany.
17Oomo amem nạ rạmoogh ghan ni weye ọgba ịkaraph ịlo ạmi.
Ọghagh ologhi phọ ạna esi ạmi rapoph ghan bịn;
oomo amem nạ ragbiighi ghan imoom ịlo nạ kuzuom ịmi.
18Eeghe kụ iḍighi, Ẹnaan, kụ nạ ameera bọ mọ ụmar ịmi?
Ọbo mị mumugh kụ oye agbi ọmiin ạmi.
19Ọḍua otu-ọony bịn osuma
mịnighe kẹn ni ịdipho dị úmite romite.
20Ịduon phọ aghuḍum mọ ạmina rámuneen ḍụghum? Ụwile ịmi.
Meera mị ụkelom aani mem mọ ạmuen esugha bọ.
21Kébia ni kụ mị akeel kụ mị kạ́ḅile mun aḅula —
mị rakeel ẹmha ufiri rꞌọto,
22ade ufiri, aroogho ḅịle rꞌịgbaragbara,
ẹmha dị ạḍiḅaal phọ rꞌaloor kụ eḍighi ufiri.
Currently Selected:
Job 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
