Job 22
22
Ọghaaph dị amuneniom ịraar
(22.1—27.23)
Ẹlifaz
1-2 #
Job 35.6-8
Oye odi ni ḍụghum, ghạlamo ọkaraghi ọpo ạmoogh bọ oomo olegheri-ịyaar phọ,
dị ạmoogh ịyaar oḍighinom esi Ẹnaan?
3Igey eḍighinom ạraraar phọ ạna kẹngo ni sụo Ẹnaan Oomo Ịikpo ḍụghum?
Ḅịle kẹn ogey oye phọ nạ aḍighi bọ kẹloghonaan ni nyọdi ḍịghaagh?
4Ịphen Ẹnaan rẹliom bọ nyịna
ị́tuan dị nạ ạlogh nyọdi eegu.
5Eeye, ịtuan dị ịkaraph phọ ạna mẹbugh iboom;
ịtuan esi oomo ịkaraph phọ nạ maḍighi bọ.
6Esi oḍighi ịlo umor ạna kạkpe nyịna ọmugh dị ọdi ale ḍịghaagh ạna,
nạ ụsighiogh oomo arukpe ọdi bịn ọdi ọ́moogh ịyaar ọkpologhian.
7Nạ ómeera ọngo mụum weye dị aloor medugh,
ḅịle nạ ómeera ọngo eḍien weye dị ọkoony rasiph.
8Nạ ụsighe ịikpo phọ rꞌạgada phọ ạna
bịn ạsighenom oomo phọ ade phọ.
9Nạ ómeera ọloghonaan ḍịghaagh rukpukele ạnmariir,
nạ ụḅile ghụn kụ ạkpilighi ghan bụnyigo.
10Kụ iḍighi kụ nyịidipho ariini mekoom nyịna,
kụ egina amem aruugu rasiph nyịna.
11Mewil iboom dị nạ ọ́miin mun eten,
ḅịle ạmuum-aḍigho rạmin nyịna.
12Ẹnaan ílho ẹpe ọkar ạsike phọ kụ rapogh ghan rạanaan phọ ẹphen ude,
ghạlamo ịduon bịdi ẹkel aani bọ ni ạnyu phọ ḍụghum?
13Ghạlamo ịduon phọ ni nạ rapuru ghan mọ, “Ẹnaan ilegheri eeghe?
Ọotu ạbooghi ni nyọdi — ọdi kasoph ika ọoruen kụ ụngo iyoor?”
14Nạ ragbiom ghan mọ ọotu phọ rakikima ghan ni nyọdi ọmiin eten,
ịduon ọdi ratelhe ghan bọ ẹpe okuaḍio phọ.
15Nạ ạkaraghi ni ạnya orelhe areten phọ
ạbukaraph awe phọ rọdaph ghan bọ ḍụghum?
16Ạmuum-aḍigho aatol li bịdi ạsighiogh
kụ egbi ọteeny amem mọ ạbidi.
17Bụen phọ kụ awe phọ oghel bọ Ẹnaan Oomo Ịikpo phọ
kụ omeeraam bọ mọ ọdi ịyaar kátue aḍighi bụno.
18Kụ ạri Ẹnaan phọ ni kụ ịngo bọ bịdi ẹelha phọ —
mị útue ụnaghanan ịitughian ạbukaraph awe phọ.
19Igey awe ologhi rạḅaal ghan ni ḅịle awe dị ụ́piom rọmilogh ghan ni rẹer
mem lọ bịdi ọmiin dị rọliom bụkaraph awe phọ.
20Oomo ạraraar lọ ọkaraph oye phọ ạmoogh ropiemi ghan ni,
kụ ạnian rele ghan ni tọrotoro ịyaar lọ esugha.
21Nyịidipho, Job, kịa ạwa ẹepho ḍịghaagh Ẹnaan,
kápogh mun nyọdi ịdipho ẹpomoghian ạna;
eḍighi ịyaar dị nạ aḍighi ịduon phọ, ọdi kạseph ni nyịna.
22Nạghanan ịtughemi phọ ọdi;
lọgh ologhi ạna ikpo ọnhu phọ ọdi.
23Ii, ẹkpianaan ni nyịna osooromi aloor origheel esi Ẹnaan,
ọḅile okunughi ịkaraph phọ ịpe roḍighi bọ ẹpe kꞌạna.
24Toḅologhi sigol phọ ạna;
toḅologhi ọkaraghi igey asigol phọ ạna ẹpe ude ọphiiny phọ.
25Meera Ẹnaan Oomo Ịikpo phọ kụ eḍighi gol ạna,
ḅịle ọdi kụ aḍighi silva dị okpolonaan nyịna.
26Ọpo kụ amem dị oḍuom ologhi phọ ạna kạtol esi Ẹnaan Oomo Ịikpo
kụ nạ ạmiin mọ ọdi kụ azin iboh phọ ạna.
27Mem lọ nạ ạaḅereghi, ọdi kạnaghanan ni nyịna,
ḅịle ịlo nạ aguanaan, nạ kạtuugh ghan ni aḍighi.
28Nạ kạmiin ghan ni igey esi oomo ịlo nạ aḍighi,
ḅịle ạḍiḅaal kẹmu ni sịphe eten phọ ạna.
29Ẹnaan resooromi ghan ni oye lọ aphoophe loor,
ạḅile rapoophe ghan oye lọ asooromi loor.
30Ọdi kạtagharan ni nyịna eḍighi ịyaar lọ nạ ụ́piom,
eḍighi ịyaar lọ ịpe nạ raḍighi bọ kụ eḍighi ni elhiom.
Currently Selected:
Job 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
