Job 21
21
Job
1-2Nạghanan ịphen mị rạḅem bọ;
ịphen kụ oomo ịidereghi dị mị rạwa ḍịghaagh ạna.
3Ụngo ịmi ọgel ọghaaph aani kụ mem dị mị mạmadan
kụ agbi nụun ọmilogh ạmi ịlo ẹḅeeraan nyịna.
4Ọruonu phọ ạmi ólho esi oye dị kamugh ni.
Ẹkaraghi ni ẹkpianaan dị mị kạ́kparam mun.
5Uphogh ịmi. Ẹkpe ni dị keḍigh ruugu esi ạna
bịn kụ nạ ạnmagharan aḅoorian kụ uphogh ghan ịmi ḍụghum?
6Mem dị mị ạatughian ịphen mimitenaan bọ ịmi,
reḍigh ghan ni ruugu esi ạmi.
7Eeghe kụ iḍighi kụ Ẹnaan emeera bọ
mọ ịkaraph awe ọrol ghan oḍum ọḅile ọkpo?
8Bịdi rọmoogh ghan nmụny ḅịle rꞌạnmuny oko,
kụ ọtol ọmiin dị oomo phọ ạbidi koḍumogh.
9Ẹnaan répiemi ghan ruutu phọ ạbidi,
bịdi rọ́tol ghan rꞌeepuph.
10Ii, oomo ạsinam ạbidi rẹmaraghian ghan ni
kụ rẹmar ghan rꞌẹwoor.
11Ạnmuny ạbidi rokilighuan ghan kophegh ịdipho ạnmuny iyool-ịga,
12ọḅile ọkerogh ịḅa mem lọ roti ọne ọḅile ropula ọkuodu.
13Bịdi rọtol ghan sighuḍum mọ ạbidi rꞌẹepho,
ḅịle roḍighi ghan lẹeph bịn komugh dị ụ́miinom.
14Ạbukaraph awe phọ rọḅeni ghan Ẹnaan mọ ạkporion bụno ḍịghaagh;
bịdi ụ́wa olegheri ogbi phọ ọdi dị egbolomaam sighuḍum ạbidi.
15Bịdi rogbiom ghan mọ ẹekpia okumu Ẹnaan Oomo Ịikpo phọ ílho,
ḅịle kẹn mọ ạsuo ólho ọoḅereghi ọdi.
16Bịdi rọḅem ghan mọ aghuḍum mọ ạbuno esi ẹkpar ạbuno ni,
kụ ọlo mị kátue ameeraam ịpe bịdi rọotughian bọ.
17Moḍime ghan ni ọtozi ọkaraph oye ḍụghum?
Ạraraar ọnyo ạbidi meegulaan ghan ni ḍụghum?
Ẹnaan mẹlhiom ghan ni ọkaraph oye esi ọghagh ologhi ḍụghum?
18Ạḅile apula bịdi ạsighiogh ịdipho ịpherepher,
ọbo ọbo ịdipho ophugh dị oghim maḅoorogh?
19Nạ rạḅem ghan mọ Ẹnaan rẹliom ghan ni mọony loor esi ịkaraph ọde phọ ọdi.
Eeye! Ẹnaan ẹliom ghan buḍighinom ịkaraph rꞌaloor ạbidi
aḍeenaan ghan mọ ọdi rạliom loor esi ịkaraph phọ ạbidi!
20Abuḍighinom ịkaraph phọ orool ghan ịikpia ịkaraph phọ ạbidi,
bịdi ologhoma ghan ghẹlhe Ẹnaan Oomo Ịikpo phọ.
21Mem dị aghuḍum oye maten,
aḍigey ạdol ạnmuny phọ ọdi katue ni ạḅile ạaḅaghami nyọdi ḍụghum?
22Oye katue ni ạtughemi Ẹnaan phọ ẹpe reegbo ghan bọ ịiruen kẹngo
ghạlamo awe dị ọrolom igbogh ạsigada ịtooghi?
23-24Abuniin awe romoon ghan ni bịn tụtu ẹteeny ḍio dị komugh;
bịdi romugh ghan rꞌọḅaal ologhi,
asiloor phọ ạbidi ẹmaar ẹbughogh.
25Ạbunon awe rọ́moogh ghan iboh rꞌẹnum;
bịdi rọtol ghan kọḅile omugh rꞌeghiḍim sịphe ologhi phọ ạbidi.
26Kụ ọlo oomo awe romugh ghan ni ḍiniin aḍuugh phọ kọḅile oḍi; ạsileegbem reekpereghiom ghan ni oomo phọ ạbidi.
27Mị alegheri ni ịitughian ạrigilaam dị nạ ạmoogh.
28Nạ apuru mọ, “Otu ogbogh oye phọ odi ẹghen nyịidipho,
oye phọ ọpo raḍighi ghan bọ ịkaraph phọ?”
29Nạ kọ̋ḅaanaan ghan weye dị rọki ghan erelhe?
Nạ ólhegheri dom dị bịdi rọpam ghan korighelom?
30Ḍio phọ ạḍiphe Ẹnaan rẹkagh bọ ologhi kụ rẹliom bọ
ọkaraph oye phọ ghụn kụ ẹdi ropogh ghan kọwile.
31Oye ọgba ịkaraph ọḅam ẹmhu ọkaraph oye phọ
rꞌọkpe esi oomo ịpe ọdi maḍighi bọ rạ́tol ghan.
32Mem dị orool nyọdi osiemi ẹpe ẹkaraph eḍum mọ,
sịphe oḍi phọ ọdi ọmaar bọ oselemi,
33ạsimuunir awe kụ rọdaph ghan igbe phọ mem lọ rọki oḍi,
ghạlamo ade phọ bịn remiigha ghan ni loor kụ keekpereghiom ḍizu phọ ọdi.
34Kụ nạ! Nạ rụudereghiom ghan ịmi élegheri-ịyaar.
Tọrotoro ọphagharanaan lọ nạ ạngo pọ ọkpe ni.
Currently Selected:
Job 21: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
