Job 23
23
Job
1-2Mị ạḅile ni rạḅa esi Ẹnaan;
mị kátue ạbile ịkuph phọ ạmi.
3Ḅẹlee mọ mị alegheri ni esi lọ mị kạmiin nyọdi,
ạḅile alegheri ịlo orelhe kụ osi ẹpe ọdi odi bọ.
4Ọbo mị mụkaaph ḍighiton phọ ạmi risigh ọdi,
ạḅile ạmaaghi oomo ịlo miḍighi kụ aḍighiton phọ igheel ịmi.
5Mị rạwa olegheri ịpe ọdi mụḅem bọ,
ḅịle rꞌịpe ọdi mụphagharanaan bọ ịmi.
6Ẹnaan kẹsighe ni oomo ịnyaam mọ ọdi kụ isomoriom ịmi ḍụghum? Eeye, ọdi kạnaghanan ni ịduon mị rạkaaph bọ.
7Mị ọkpe rạ́gba, mị mutue ni ạmoogh ruupuruan rꞌẸnaan; ọdi mutue ni ạḅem mọ mị ụ́piom bịn emuneen.
8Mị mạwa ni ẹpe erumuḍio phọ remite ghan bọ, kụ ọlo Ẹnaan ẹpe ílho.
Mị ụ́miin nyọdi mem dị mị ạwa bọ ẹpe erumuḍio phọ remeel ghan bọ.
9Ẹnaan meḍighi oḍighi ẹpe ephunom mọ ḅịle rꞌẹpe esoorom mọ,
kụ ọlo mị kọ̋miin kẹn ni nyọdi.
10Ghạlamo ịduon phọ ni Ẹnaan elegheri ni oomo ịgbaranuom aruwol ạmi;
eḍighi ịyaar dị ọdi uphogh ịmi, ọdi kạmiin ni mọ mị aseleman ni.
11Mị ạkaraghi ni kụ rạdaph eten phọ ẹpe ọdi ạsaḅar bọ,
ḅịle mị rꞌamem ụ́gbol ụki ḍịghaagh.
12Oomo amem mị raḍighi ghan ịpe Ẹnaan ẹto bọ;
mị rạdaph ghan ogbi phọ ọdi kị́lo ịḅeeraan ịmi.
13Ọdi ránmia ghan. Oye ólho dị katue ạmerenyan nyọdi
ọbo ọbo akikima nyọdi oḍighi ịlo ọdi rạwa oḍighi.
14Ọdi kaḍighi ni amuneni ịlo ọdi mugbiighinaan ịmi;
ogbi phọ ọpo aḍighi oniin bịn esi ịbadi ịdi ọdi ạmoogh.
15Loor esi oghiilaan mị rakpereghaan ghisigh ọdi.
16-17Ẹnaan Oomo Ịikpo phọ maphiemi ạkpo ologhi phọ ạmi.
Ẹnaan phọ kúfiri kụ eḍighi bọ ịdi aruugu rusiph ịmi —
ghạlamo ịduon ufiri maḍighi bọ ịdi mị eten ụ́miin mun.
Currently Selected:
Job 23: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
