1 Bụo ạTesalonika 2
2
Oḍighi phọ ạPol aḍighi bọ ẹpe Tẹsalonika
1Bụo asiya, nyina rꞌaloor anyina elegheri ni mọ ịdipho yoor oru bọ ịteeny inyina ípe oopho. 2#Iiḍ 16.19-24; Iiḍ 17.1-9Nyina elegheri ni mọ tụtu yoor kotu bọ ịteeny inyina mụmiine ni iyoor ọḅile usiphiom iyoor umugholoor ẹpe Filipai. Ghạlamo ịdipho aweye ụmerenyan bọ ni iyoor, Ẹnaan phọ ayira ịngo ni iyoor ạkpo ologhi ọghaaphom ooḅi ọghaaph phọ ọdi ọḅeni anyina. 3Ẹghaaphom mọ ayoor íḍighi ẹlo amabi rꞌipesi rꞌịḅughaḅugha. 4Yoor ụghaaph ghan ịdipho awe dị Ẹnaan mẹma ẹsighe ooḅi ọghaaph phọ ẹlogh rạghaagh, kị́lo kẹgbaanyan we, ịlo ọḅaalami ologhi Ẹnaan phọ rẹeḅeghion ghan bọ iloghi phọ ayoor. 5Ịdipho nyina elegheri bọ ni, yoor inyina íitumeni ghan, ḅịle ụ́kaaph ghan ọghiom ologhi iigbegheḍiom dị yoor kọmooghom sụo. Ẹnaan kụ ilegheri. 6Yoor ụ́wa rughuenian esi anyina mꞌạbunon, 7ọbo ọtuan ịdipho yoor oru bọ butelhedom mọ aKraist ẹkpe ni dị yoor mụwa. Kụ yoor usooromi ni loor ogbo phọ anyina, ịdipho onhiin dị ạpham nmụny. 8Ịdipho yoor ịphomoghian bọ inyina kụ nyina ẹman bọ ni ịyaar iboom, yoor ụnya ni ọkuom aghuḍum mọ ayoor kụ ọḅaram ooḅi ọghaaph phọ Ẹnaan ọngo anyina. 9Bụo asiya, nyina elegheri ni rukumuan phọ rꞌọkpar aloor phọ ayoor. Mem mọ yoor rọkaaph bọ ooḅi ọghaaph phọ Ẹnaan kịḅeni inyina, yoor ukumuan ghan ni ḍughul rꞌootaany, ọbo oḍighi ikpoki kisoroghuom ghan bọ inyina.
10Nyina rꞌẸnaan elegheri ni, ịdi ạroozo phọ yoor ịzoom bọ inyina ạbuphe memeeraam bọ eeleeny ni, ọpioman ụ́tol, ḅịle ịyaar ị́biph. 11Ịdipho nyina elegheri bọ ni, yoor ụrolom tọrobo ọnyo anyina ịdipho ọde raakonom ghan bọ nmụny ọdi. 12Yoor iromoghiom ghan ni inyina, ọkparami ghan iloghi anyina, ịkpaariom ghan inyina ọrol ạdol phọ ạḍiphe ẹḅeeraan bọ Ẹnaan, ịdipho mịmagh bọ inyina ẹlogh ọmar eghuan phọ ọdi.
13Yoor ọḅile ni rọseph Ẹnaan mọ, mem mọ yoor ọsighe bọ dom mọ Ẹnaan iruom inyina, nyina ịnaghan ni ẹmaghami ịyaar. Nyina ịsighe ni mọ kádom awe, mọ adom Ẹnaan phọ ni reḍighi bọ oḍighi loor anyina phọ memeeraam bọ — kụ ạri ịduon phọ ni. 14#Iiḍ 17.5Bụo asiya, ọdo phọ ịpe emitenaan bọ bụo ạsiosi phọ Ẹnaan ẹpe Judia, bụphe oḍighi bọ bụo ạJizos Kraist, kụ ịdi iḍighi aani bọ ni inyina. Ịdipho awe phọ anyina ịgbiphoghom bọ inyina, kụ ịdi bụo aJu phọ ọgbiphoghom ni bụphe aJudia. 15#Iiḍ 9.23, 29; 13.45, 50; 14.2, 5, 19; 17.5, 13; 18.12Bụo aJu phọ kụ ughiigh bọ ni Jịzos Ọmoogh-we phọ, ọze riil phọ Ẹnaan, ọḅile uroph iyoor ogbeph, oḍighi yogh ịdi Ẹnaan ị́ḅeeraan, ọmerenyan oomo awe, 16ịdi eḍighi bọ bịdi umirighan ni iyoor ọghaaph adom mọ ọḅeni aruuruen phọ mọ ọmoogh aani pẹleeny. Bịdi mokpologhi sịpioghom mọ ạbidi omuzeḍi, kụ ọghagh ologhi phọ Ẹnaan masoorom bịdi ḅeer ạmadan.
ẠPol ạwa ọḅile ọghi ọmiin ạbidi
17-18Bụo asiya, mọony amem mọ ạmuen yoor rꞌanyina ẹgbaranaan bọ, kụ ọlo yoor inyina íwula. Inyaam anyina isiph ni iyoor iboom, ịphu ni iyoor dị yoor ọnya ni ọḅile oru ọmiin anyina. Mị ạPol bịn aakolobian bọ epel eniin amem, kụ aSetan ómeera mọ yoor oru. 19Kụ ạri nyina kụ ẹmhu oḍuom ologhi rꞌọḅaal ologhi rꞌeghoony iphelegbe phọ yoor kozua bọ oḅoom ḍio phọ ạJizos Ọmoogh-we phọ ayira katu bọ. 20Ọkar igey ni, nyina ịlogh ni iyoor ọman ịngoom iyoor ọḅaal ologhi.
Currently Selected:
1 Bụo ạTesalonika 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
