1 Bụo ạTesalonika 3
3
1 #
Iiḍ 17.15
Ekureriom mọ, yoor útue mun ubigh ekpom kụ yoor oopuruan olegheri ọrol Ạtens 2kụ yoor orom bọ Timoti, ọnyo asiya phọ ayira ọpo rꞌayoor rokumu bọ Ẹnaan kọghaaph ghan ooḅi ọghaaph phọ aKraist. Yoor urom nyọdi oru ọngo anyina ịnyaam, rꞌoromoghiom anyina ịlo omeeraam mọ, 3mọ ọnyo anyina kụ́tuan ịgbiphoghom mọ ịphen úpogh ọman. Nyina elegheri ni mọ ịphen phọ ịgbiphoghom dị Ẹnaan kụ ịgianaan ni iyoor. 4Mem mọ yira ọrolan bọ, yoor ịphur ri inyina rụru mọ ịgbiphoghom kemite ni. Kụ ịdipho nyina elegheri bọ ni, ịphen kụ ọkaraghi ịdi memite bọ. 5Esi dị mị útue mun ubigh ekpom, kụ mị arom bọ Timoti oru olegheri ịlo omeeraam mọ anyina odi. Mị ughiilaan ni mọ ịdipho oḍighom ịyaar kụ Eru meru ịdeghogh inyina epogh, nyina emeel eḍighanaan, bịn oḍighi phọ ayoor ape oopho.
6 #
Iiḍ 18.5
Kébia aTimoti arigheel bọ ụteeny iyoor, ọdi ụḅeni ni iyoor mọ nyina edi ni ḍiiḅi ạdol dị omeeraam mọ rꞌẹphomoghian phọ anyina ẹkpar ri iboom. Ọdi ạkaaph ni mọ nyina rịitughianam ghan ni iyoor igey oomo amem. Mọ rịphu ni inyina ọmiin ayoor, ịdipho rịphu aani bọ ni iyoor. 7Bụo asiya, ịphen phọ mịngo iyoor ạkpo ologhi sịen ịiḅaghami phọ rꞌịgbiphoghom mọ ayoor. Omeeraam mọ anyina kụ ạkparami bọ iloghi phọ ayoor. 8Sịen yoor mọnaghan bọ mọ omeeraam mọ anyina esi Ọmoogh-we phọ rạ́kporokporo phọ, pụruku ologhi ayoor mạpho, 9ịdi eḍighi bọ nyịidipho yoor kighol li inyina ọseph Ẹnaan. Yoor rọseph ni Ẹnaan phọ ayira esi ọḅaal ologhi phọ yoor ịtuan bọ inyina ọmoogh ghisigh ọdi. 10Yoor úsoph mem, ḍughul rꞌootaany ọoḅereghi ghan rꞌoomo iloghi phọ ayoor ịlo ọḅile oru ọmiin anyina, rꞌọkparami esi lọ esughanam sịphe omeeraam mọ anyina.
11Yoor rọoḅereghi ghan mọ Ẹnaan Ọde phọ ayira rꞌaloor ọdi, rꞌạJizos Ọmoogh-we phọ ayira, useleminaan iyoor eten phọ ịlo yoor kotu ịteeny inyina. 12Mọ Ọmoogh-we phọ ạbughe ẹphomoghian ẹlo oye rꞌoye sịphe ogbo phọ anyina rꞌạbunon awe, tụtu eleeny ịdipho ẹphomoghian phọ ẹpe yoor ịmooghom bọ inyina. 13Ịduon kụ ịdi ọdi kạkparami iloghi phọ anyina, ọbo nyina ewopha yogh eseleman risigh Ẹnaan Ọde phọ ayira, mem mọ ọpo ạJizos Ọmoogh-we phọ ayira kạpam bọ we aruukuan phọ ọdi atumom.
Currently Selected:
1 Bụo ạTesalonika 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
