ZƐKARIA 3

A Njɛ Joshua Shɛshɛshɛ Ee Urigeni bu Otogwo

1Nazhɛ AGWANGWAMA m mbiseni Joshua ata shɛ uhiu wo onongbo, ti bee shikeni nu umbe butumwa ba AGWANGWAMA ba azuba, ge Setan tuba shikeni nu u'ala ubwa ubiye maa suyana bụ ụshɛrɛya.#Ezr 5:2; N-ndu 12:10 2Ama AGWANGWAMA hiɛŋ Setan,#3:2 AGWANGWAMA hiɛŋ Setan: Tɛjɛshɛga tu ko ti hiɛŋ, Butumwa-ba-azuba hiɛŋ Setan. Gamba AGWANGWAMA, N zhɛ ma bu tazhɛgana, Gamba n shɛ AGWANGWAMA na teri Jɛrusalɛm, N zhɛ ma bu tazhɛgana! Bụtụ ga i shɛ gana ukwungwurusu na ɛɛ vwɛ nu ulwa.

3Go Joshua shikeni nu umbe butumwa ata ba azuba, bee urigeni utogwo na 'yajɛ tiri. 4Ibɛ po butumwa ata ba azuba hiɛŋ atwa ata shikekeni pu bwa, Ushigo ma utogwo ata tiri bụtụ ata urigeni. Bɛɛ hiɛŋ Joshua, N sugwo iwɛwɛ bụ, N zhɛ mo bu urugono ya utogwo ufwo. 5Bɛɛ hiɛŋ aŋ, Pala bụ ma#3:5 Bɛɛ hiɛŋ aŋ, Pala bụ ma: Tɛjɛshɛrɛga tu ko ti hiɛŋ, Ngɛɛ hiɛŋ aŋ, Pala bụ ma. ureweni nu uhiuhiu, maa hi urigeni bu otogwo ofwo, ee peri bu ga ureweni ata, ee hwuŋteni bu ga otogwo ata, ama butumwa ata ba azuba tuba shikeni beye dashɛ.

6Ibɛ po butumwa ata ba AGWANGWAMA ba azuba mbishi Joshua, bɛɛ hiɛŋ, 7AGWANGWAMA na Hwuri Kpaaŋ hiɛŋ, Yaa shɛ abụ untanganɛ andwa mi, aba nda kaa ugondu na Ngee bi eni, nazhɛ ɛbi zhɛ ba untangana umwono mu maa no shiyono okpogwu ga rungwutwonu uŋ eshe. Nazhɛ Ngɛɛ zhɛ ma bụ pana ohwolu na ashashɛ atwa ga mi shikekeni epe. 8Oo O-Joshua, gabụ uhiu wo onongbo, shɛlaga, ta atwa vwɛ bụ onongbo a na gɛgajɛ nu umbe bu, hiɛ shɛ atwa na useyida u geri-be-eshe hiŋ zhɛmɛ, N zhɛ mo hi mbisono yɛu mi ugondu igɛtɛ i shɛ a'wa'walụ.#3:8 a'wa'walụ: Gana Abayiburu oko jɛmɛ ta. Ama tɛjɛshɛrɛga tu ko ti hiɛŋ, Agwuma na ee dudugeni mabɛbɛ kwo kaa ee teri. 9AGWANGWAMA na Hwuri Kpaaŋ hiɛŋ, N zhɛ mo shilo utayɛ na 'yajɛ apada ecenje,#3:9 apada ecenje: Tɛjɛshɛrɛga ru ko ti hiɛŋ, eshe ecenje. nu umbe Joshua, N zhɛ ma ta ụŋ i'nyɛtɛ, Ngɛɛ zhɛ mo sugo iwɛwɛ cɛnjɛ tu ga na amɛ ụjita uko gba. 10AGWANGWAMA na Hwuri Kpaaŋ hiɛŋ, Nụ ụjita ata ibɛ bụtụ be elele na ashashɛ hiŋ zhɛ ba suyana yɛu-bino bwa nu uhwuŋnu ikpɛri ya afwafwa ubwa keeni i'wɛ'wɛ ibwɛ yo owowo.

Currently Selected:

ZƐKARIA 3: RBT

Highlight

Copy

Compare