ZƐKARIA 2

Bụtụ na 'Waŋnɛ Uhwohwo Tuma Tɛndarɛshɛnga

1Ngee shepi eshe, Ngaa kwụbɛ ta bụtụ bu ko 'waŋnɛ uhwohwo tuma tɛndarɛshɛnga ni i'ɛlɛ ibwɛ! 2Nazhɛ Ngɛɛ hiɛŋ bụ, Cee ɛbi zhɛɛ? Bɛɛ n hiɛŋ, N zhɛ ma manga Jɛrusalɛm maa ma mapa uholo keeni ụnjɛswa ubwa.

3Ngaa kwụbɛ ta butumwa-ba-azuba na ga njɛ n-ndumwa ne mi keeni izhɛ nu umbe, ibɛ butumwa-ba-azuba bi nya zhajɛ bee ci bu. 4Ibɛ po butumwa ebe ga njɛ n-ndumwa ne mi hiɛŋ bụ, Gozhigo, hiɛŋ yɛu ɛtɛ i tisemberi 'waŋnɛ uhwohwo tuma tɛndarɛshɛnga maa, Atwa ofwugwo zhɛ a nama nu Jɛrusalɛm, ti iyimabiga, ibɛ po Jɛrusalɛm zhɛ yo hwulo ugombo maa u 'yaga uba. 5Gamba ni ikɛnyi mi N zhɛ ma shana uŋ uba ulwa na zhɛ wa jilanɛ uŋ. AGWANGWAMA hiɛŋ, Gamba n zhɛ ma shaanana ụjɛrụma na namɛ na amɛ ubwa.

A Suyana Atwa na Namɛ na Ti'ima maa e Jiye

6AGWANGWAMA hiɛŋ atwa ubwa, Zhajɛ ma! Zhajɛ ma! Gozhigo ma maa hi beni na cɛnjɛ tu tuzuba, iwɛnɛ ti yaa shɛ Gamba n hi gereteji la geri geri. 7Ahiɛba atwa Zayon, a na namɛ nu Babulon, bananganɛ ma hi jiye nu Jɛrusalɛm. 8AGWANGWAMA na Hwuri Kpaaŋ, ubwa jɛmɛ iwɛ gɛ, bɛɛ hiɛŋ, Na aba na ti bee m peni ụjɛrụma ata, baa n tumwanɛ maa ma sukakana edenji a na o sugo i'wɛŋnɛ hiŋ. Iwɛnɛ po bụtụ be elele ihi timengeni, asha bi timengeni du iyi ibwɛ yo ogwumishi inɛɛ nɛ i shɛ gana bụzagwụ be rishe ru bwa. 9Hioko ma, AGWANGWAMA na Hwuri Kpaaŋ hiɛŋ, N zhɛ ma haŋpana aŋ u'ala mu, maa ma sukakana aŋ, maa tuba atwa na shɛ la miaụŋ-mu-ugondu ma aba, aba zhɛ o sugo i'wɛŋnɛ ya aba. Aka na ti ijɛ njɛ hwuŋ, nazhɛ ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ.

10Nazhɛ AGWANGWAMA na Hwuri Kpaaŋ hiɛŋ, Oo ahiɛba atwa Zayon, zunga ma azunga, maa hi na bwada du unyasa, iwɛnɛ te me ci maa ma nama na ashashɛ hiŋ.

11Aka ata ci hwuŋ edenji ofwugwo zhɛ momo togwu na AGWANGWAMA, ɛɛ zhɛ a sha atwa ubwa, bi zhɛ ba nama na ashashɛ hiŋ, ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ utumwa no ofwo hiŋ. 12Ibɛ po AGWANGWAMA zhɛ a 'yaga cɛnjɛ tu Juda maa tɛ shɛ iyi ibwɛ ticinji nɛ i shɛ urobwo ubwa na cɛnjɛ te tijilo, bɛɛ zhɛ ba tala du Jɛrusalɛm sasana.

13AGWANGWAMA zhɛ ba banɛ no olugwo ubwa tijilo na baa namɛ, ga bụtụ be elele 'imɛ ilɛmɛ na agba ubwa.

Currently Selected:

ZƐKARIA 2: RBT

Highlight

Copy

Compare