ZƐKARIA 4
4
Uteburu Ụsụtụla keeni I'wɛ'wɛ Buta
1Nazhɛ butumwa-ba-azuba ata ga njɛ n-ndumwa ne mi zhagananɛ, bɛɛ n zhingicinjɛ gana maa N go woto malabụ. 2Bɛɛ n hiɛŋ, Imbe abụ kwụbɛɛ?
Ngɛɛ hiɛŋ bụ, N kwụbɛ uteburu ụsụtụla na aa njɛ na azhɛnarɛya, asụtụla ecenje kaa patanganɛ nu ubwa, asụtụla ata ecenje, una una kaa 'yajɛ a'ibwa tuzuzu ti cenje tuhwuŋtongono. 3I'wɛ'wɛ buta iyebi shikekeni to dongonu asụtụla ata, uko shikeni nu u'ala ubiye, una uyebi shikeni nu u'ala ugwulwo.#N-ndu 11:4 4Ngee heŋteni butumwa ata ba azuba ba njɛ ne mi, Ngɛɛ hiɛŋ, Iyɛri mi, Imbe nɛ kwuuŋ?
5Nazhɛ butumwa ata n unseni, bɛɛ hiɛŋ, Bi mepi shi iŋ suu? Ngɛɛ jishijɛ bụ, Ngɛɛ hiɛŋ, Iyɛri, Awo.
6Bɛɛ n hiɛŋ, N-ndumwa mu na AGWANGWAMA 'yajɛ maa mbishi Zɛrubabɛl na, bi hiɛŋ, Shɛ ni ikɛnyi, shɛ nu ukpahiŋ du kaa o, ama semi na Mpiala mi mi.#Ezr 5:2 7Oo ɛ-shɛmɛ gɛ i'wɛtwɛ, imbe abɛ shɛ#4:7 ɛ-shɛmɛ gɛ i'wɛtwɛ, imbe abɛ shɛ: Tɛjɛshɛrɛga tu ko ti hiɛŋ, Gaaba abɛ shɛ, nu umbe Zɛrubabɛl gaa? Bi zhɛ ba sha cɛnjɛ tụ tụndalụụ nu umbe Zɛrubabɛl. Nazhɛ bɛɛ zhɛ ba shapɛ utayɛ uhiuhiu tuta, nazhɛ atwa zhɛ o zwono nu n'ungwa, ɛ hiɛŋ, U pilanụ tebiye! U pilanụ tebiye!
8Nazhɛ AGWANGWAMA m mbishi n-ndumwa mi nya, bɛɛ hiɛŋ. 9Hiɛŋ, Gɛ Zɛrubabɛl, ubwa shiri ukoshilo umwono ga wa Agwatana, ubwa du kaa zhɛ ba ta ụŋ uhiuhiu. Aka ata nazhɛ ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ ga utumwa no ofwo hiŋ. 10Gaaba iwɛ aka na iyi ta namɛ cwɛŋ tatụlanụ sụụ? Ama shɛmɛ sha atwa ga ecenje shi zhɛ sho lomo hwuŋ, na aka na ta a kwụbɛ ti gɛ Zɛrubabɛl untanganɛ meni ma ata mo shikocongo tuma ni i'ɛlɛ ibwɛ. [Asụtụla ata ecenje aba shɛ eshe AGWANGWAMA ecenje a na a kwụba cɛnjɛ tu unyizo hwɛɛ].#N-ndu 5:6
11Nazhɛ Ngee unseni bu, Ngɛɛ hiɛŋ, Imbe shɛ ecilo i'wɛ'wɛ gɛ buta i shikekeni nu u'ala ubiye keeni u'ala ugwulwo wa asụtụla gaa? #N-ndu 11:4 12Ngee unseni bu, na aka yebi, Ngɛɛ hiɛŋ, Imbe a'wa'walụ i'wɛ'wɛ gɛ iyebi nɛ namɛ nụ ụzalụ bo okwokworo ga aa njɛ na azhɛnarɛya, a ga namɛ no olugwo ata aa 'waŋ manɛbɛ ma buta#4:12 manɛbɛ ma buta: Kwo kaa, manɛbɛ ma azhɛnarɛya. tɛjɛshɛrɛga tu ko ti hiɛŋ, manɛbɛ. shɛɛ?
13Bee n unseni, bɛɛ hiɛŋ, Bi mepi shi suu iyi nɛ ijɛ shɛ? Ngɛɛ jishijɛ bụ, Ngɛɛ hiɛŋ, Iyɛri mi, Awo.
14Nazhɛ bɛɛ hiɛŋ, Ijɛ shikeni eshici atwa eyebi a na ee dudugeni manɛbɛ, maa a ndanɛ AGWANGWAMA cɛnjɛ tu unyizo hwɛɛ iyi.
Currently Selected:
ZƐKARIA 4: RBT
Highlight
Copy
Compare
Share
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
