ZƐKARIA 1

1Ti ga Darius yɛ tugwama, yaa namɛ shiywa shi yebi, ni ipiɛnɛ itindɛtu, nazhɛ AGWANGWAMA jɛmɛ n-ndumwa ne bigesere gɛ Zɛkaria yɛu-ye-eyi Bɛrakia, bụjalụ Ido, bɛɛ hiɛŋ, #Ezr 4:24—5:1; 6:14 2Gamba AGWANGWAMA, N 'yajɛ isɛbwɛ no ogwunukwoshi hiŋ tebiye. 3Ibɛ po mbiso atwa ata, maa AGWANGWAMA na Hwuri Kpaaŋ hiɛŋ, Gwure ma no ofwo mi, nazhɛ Ngɛɛ zhɛ me gwure no ofwo hiŋ. 4Ta sha ma gana ogwunukwoshi hiŋ o, anaa na egesere mi o mbiso utumwa mu cala cala, ɛɛ hiɛŋ, Jɛshɛrɛga ma maa hi beni ni iyi iwɛ hiŋ keeni ugondu hiŋ ụwɛ. Ama a hwụjɛ shɛ, e peni shi du kaa abashɛ o. 5Ce ogwunukwoshi ata hiŋ namɛ ya hwuwayɛɛ? Egesere ata tubaa, ɛ zhɛ a ya suu uraiŋ unyizo-nom? 6Ama onu mi tụpana keeni shikpogo shi mi, shɛ na Ngee peni la miaụŋ mi mi mu ugondu a na shɛ egesere unu, a 'imɛ shɛ suu ogwunukwoshi ata hiŋ? Ibɛ po aa jɛshɛrɛjɛ-shihaŋsa sha aba, ɛɛ hiɛŋ, AGWANGWAMA na Hwuri Kpaaŋ, bi ti peni ulwapɛ na teni cɛŋ ni ihwɛŋnɛ nɛ ata nda iyi, keeni ugondu na ata ndangana, nu gana na bee heŋshi maa ma tɛ nda.

Asụcɛ Idɛkwɛ nɛ Zweni na Ashashɛ Atụla-ishɛmɛ

7Ti ga Darius yɛ tugwama, yaa namɛ shiywa shi yebi, ni ipiɛnɛ umpwa-nu-boo-ko ni ijitɛ woshi-ni-bɛ-neshi, nazhɛ AGWANGWAMA jɛmɛ n-ndumwa ne mi Gamba gɛ Zɛkaria yɛu Bɛrakia bụjalụ Ido no ozobu nụ ụjita. Ngɛɛ hiɛŋ, 8N kwụbɛ bụtụ na ba suka budakwa bi shenje ti bee shikeni nu ulomu, na ashashɛ atụla-ishɛmɛ oko. Nazhɛ idɛkwɛ ishenje, ti inɛ tubana, keeni inɛ icɛnjɛ shikekeni na aba ubwa.#N-ndu 6:2,4 9Na aka ata Ngee heŋteni bu, Ngɛɛ hiɛŋ, Iyɛri mi, Ataaba naa?

Nazhɛ butumwa ata ba azuba ba njɛ ne mi hiɛŋ, N zhɛ mo bu mbisono iyi nɛ aa shɛ. 10Ibɛ po bụtụ ata na shikeni na ashashɛ atụla ata ishɛmɛ, jishijɛ, bɛɛ hiɛŋ, Atwa ga aba shɛ atwa ata AGWANGWAMA tumwanɛ maa e hikekeni unyizo. 11Nazhɛ ɛɛ jishijɛ butumwa ata ba AGWANGWAMA ba azuba na shikeni na ashashɛ atụla ata ishɛmɛ, ɛɛ hiɛŋ, Tu rungwo unyizo hwɛɛ, tụ kwụbɛ maa unyizo hwɛɛ wa ta ụhinjanụ suu. 12Na aka ata butumwa ata ba AGWANGWAMA ba azuba hiɛŋ, Gabụ AGWANGWAMA na Hwuri Kpaaŋ, aka naa ɛbi zhɛ ba kwụba inyɛmɛnyɛmɛ Jɛrusalɛm keeni ashɛpwụ Juda a na abi 'yajɛ isɛbwɛ na aba shiywa dupu-nu-woshii?

13Ibɛ po AGWANGWAMA jishijɛ butumwa ata ba azuba na ba njɛ n-ndumwa ne mi, nu n-ndumwa mu tulubo-ti-biye keeni mu na mi ti'ingatanga. 14Nazhɛ butumwa ata ba azuba na ba njɛ n-ndumwa ne mi hiɛŋ, Duma maa gana AGWANGWAMA na Hwuri Kpaaŋ hiɛŋ na, maa, Iwɛ Jɛrusalɛm keeni Zayon n tɛtajɛ tebiye. 15Amɛ mi kaa hashɛganụ ne edenji ata namɛ nụ ụhinjanụ, iwɛnɛ Ngaa imanɛ atwa mi isɛbwɛ, ibɛ po edenji ata tuba a kaana ụbaụta wa atwa mi. 16Iwɛ inɛ gɛ, ibɛ po AGWANGWAMA hiɛŋ, N gwure nu Jɛrusalɛm nu uwanyi, na amɛ ubwa kaa du ɛɛ zhɛ a ma umwono mu, ɛ zhɛ du kaa a maanana uba Jɛrusalɛm, AGWANGWAMA na Hwuri Kpaaŋ ubwa dumwa. 17Nazhɛ butumwa ata ba AGWANGWAMA ba azuba hiɛŋ, Ugana sasana maa, AGWANGWAMA na Hwuri Kpaaŋ hiɛŋ, Tɛzhɛmana ti zhɛ ta fwunganana na ashɛpwụ mi, AGWANGWAMA zhɛ a ingatanga sasana Zayon, maa tala du Jɛrusalɛm, maa ụ shɛ una ubwa.

Shihiuaŋ shi Neshi Keeni Alụma eneshi

18Ngee shepi eshe, Ngaa mbiyanɛ, Ngaa kwụbɛ shihiuaŋ shi neshi.#1:18 shihiuaŋ shi neshi: Shihiuaŋ shɛ shɛ ụsụbwa ukpahiŋ. Shi neshi shɛ shɛ tusakana ta tụ'ụrɛcɛnga ta akakalụ eneshi unyizo: tuzuba, tuta, uwaŋna-banụ keeni uwaŋna-twonuo. 19Ngɛɛ hiɛŋ butumwa ata ba azuba ba njɛ ne mi, Imbe shihiuaŋ shɛ ga shɛ shɛɛ?

Bɛɛ n jishijɛ, bɛɛ hiɛŋ, Shihiuaŋ shɛ ga shɛba shi gereteji la atwa Juda, ta atwa Isrɛl keeni Jɛrusalɛm. 20Na aka ata ibɛ AGWANGWAMA m mbiseni alụma eneshi. 21Ngee unseni bu, Ngɛɛ hiɛŋ, Imbe atwa ga e ci maa a njɛɛ?

Bɛɛ jishijɛ bɛɛ hiɛŋ, Shihiuaŋ shɛ ga shɛba shi gereteji la atwa Juda, iwɛ maa kede bụtụ be elele ishicinjɛ ya uhiuhiu ubwa o. Ama tuba alụma ga zhajɛ maa e zweni aŋ inyɛsɛ, maa du a 'waŋtatanjɛ shihiuaŋ shɛ ga she edenji anaa na ishicinjɛ shihiuaŋ sha aba maa a sukakanɛ cɛnjɛ tu Juda, maa e gereteji du atwa na jɛjɛ na tuba.

Currently Selected:

ZƐKARIA 1: RBT

Highlight

Copy

Compare