ỤBANỤ 21

Undwa iwɛ Ajama Ehibru

(Undwa 15:12-18)

1Inɛ gɛ ibɛ shɛ andwa na ɛbi zhɛ bo tulonono miaụŋ mi Isrɛl. 2Aka na obu so Bihibru maa sha bujama bụ, shiywa shi cihiŋ baa shɛ ma bụ ndana ugondu, nu uywa ucenje, nazhɛ bɛɛ zhɛ ba bana no olugwo bu maa mama 'yaga uzawa iyi elele tụtụpa.#Liv 25:39-46 3Yaa shɛ bwooko zhajɛ la, asha bwooko du zhɛ bo hwulonono, yaa shɛ kaa ba 'waŋnɛ la biyikwo, asha abana ne biyikwo bwa zhɛ a bana. 4Yaa shɛ kaa agwuma-ihwɛ ibwɛ zenenji bu la biyikwo, bee metenji bu kaa yɛu-ye-eyi kwo kaa yɛu-yo-o, asha agwuma-ihwɛ ibwɛ i zhɛ ba 'yaga biyikwo ata, ta miaụŋ mu bwa, bujama ata kiri zhɛ bo hwulo bwooko. 5Ama yaa shɛ bujama ata jɛmɛ nu upeje kpataa maa, Mo lubo agwuma-ihwɛ mi, te biyikwo mi, keeni miaụŋ mi mi, N zha shɛ ma bana o. 6Asha ga agwuma-ihwɛ ibwɛ shapɛ bụ no ofwo odubo kwo kaa no ofwo i'wɛ'wɛ yo odubo, agwuma-ihwɛ ibwɛ zhɛ a shapa ụshɛmbɛrɛ bo tubo bu ụcɛbɛ, nazhɛ bɛɛ zhɛ ba sha ya bujama bwa unyizo-nom.

7Aka na ta bụtụ senji yɛu ibwɛ yo o maa sha bujama, bujama ata shɛ shɛ bu na bana gana na ta ajama eyi a bana o. 8Yaa shɛ ee ge shileni bu agwuma-ihwɛ, na ba jala maa zana bụ, aka ata yaa shɛ bee jeri shi bu ya, asha ga sangana bụ bishi bwa sasana, ụhwada zaba maa sangana bụ agaiŋ gana na ti bee helekeci bu o. 9Ama yaa shɛ yɛu ibwɛ ye eyi bee peni maa zana bụ, asha bɛ shɛ bu na nda bụ gana maa yɛu ibwɛ yo o. 10Yaa shɛ kaa baa kaanɛ biyikwo bi nya tuzanɛ, asha bɛ shɛ shɛ ba munanana urobwo iyimɛyɛ ibwɛ, to tugwuno tu bwa, ta tuzana tu bwa, nu gana na tu baa ga nda bụ cebe o. 11Yaa shɛ baa ndanɛ shɛ bụ ijɛ itɛtu, asha biyikwo ata shɛ ba bana maa mama 'yaga kwakwa, zawa ukwuribi we elele tụtụpa.

Andwa iwɛ Bụtụ Tụkwụna

12Bụtụ be elele na po bụtụ iyi bee 'wi, tụkwụna du ɛɛ zhɛ a kwụna bụtụ ata.#Ụban 20:13; Liv 24:17; Mat 5:21 13Yaa shɛ u'ala tuhwulo tu baa ga shɛka sụ bụ cebe, aka ata bi eri bo gozhigo maa zha no ofwo na Ngɛɛ zhɛ me hi shilono.#Tɛrɛ 35:10-34; Undwa 19:1-13; Josh 20:1-9 14Ama yaa shɛ bụtụ njɛ isɛbwɛ, baa sukakanɛ binya bwa, baa kwụnɛ bụ ne tukwurimi, asha okwo bee gezhiji baa datanɛ utukwu-ụrụpɛ mu, maa bino, asha bɛ shɛ aa kwụna waa.

15Bụtụ be elele na po bishi bwa kwo kaa bino bwa iyi, tụkwụna ɛɛ zhɛ a kwụna bụtụ ata. 16Bụtụ be elele na zunji bụtụ, kwo kaa bee senji bu, kwo kaa a kwụbɛ bụ ni i'ɛlɛ ibwɛ, tụkwụna ɛɛ zhɛ a kwụna bụtụ ata.#Undwa 24:7 17Bụtụ na twajɛ bishi bwa kwo kaa bino bwa, tụkwụna ɛɛ zhɛ a kwụna bụtụ ata.#Liv 20:9; Mat 15:4; Mak 7:10

Andwa iwɛ Uwuru keeni Ifelu

18Yaa shɛ atwa eyebi o 'wogo, bụtụ bu ko to binya bwa utayɛ, kwo kaa ukwu, bụtụ ata kaa 'wi shi, ama bu weci kaa na adugwa, 19yaa shɛ bɛ ishijɛ ba zha tahaŋnụ no bukwuto, aka ata bụtụ ata go po bu iyi zhɛ ba banangana, semi ụtashɛ ugondu ubwa na ngwuri kiri bɛɛ zhɛ ba tụpa bụ, keeni maa ngbaraka bụ maa zhɛmaanana hwɛɛ.

20Yaa shɛ kaa bụtụ po bujama bwa be eyi kwo kaa bu na bo o iyi bee 'wi ni i'ɛlɛ ibwɛ, a zha shɛ a kwụna bu o, ama ɛ zhɛ a muna bụ tijama tilɛɛ. 21Ama yaa shɛ bujama ata 'wi shi nụ ụjita uko kwo kaa ni ijitɛ iyebi, a zha shɛ a muna bụ tijama o, iwɛnɛ ti yaa shɛ ubwa go so bu nu ukwuribi ubwa. 22Yaa shɛ kaa etwenyi a twa ifelu abaaba e leyiteni biyikwo na 'yajɛ ofubo, biyikwo ata beseji, yaa zasa iyi iwɛ inyɛ nɛ njɛ bụ, ɛ zhɛ a muna bụtụ ata leyiteni bu ukwuribi gana na tu ukwuribi na bwolo biyikwo ata jɛmɛ namɛ tilɛɛ, bi zhɛ ba tụpa utashɛ ata gana na ta ajɛmɛ-ụshɛrɛya shiri. 23Ama yaa shɛ iyi iwɛ inyɛ njɛ biyikwo ata, asha tijama tu bwa tɛ shɛ maa ga tụpa uraiŋ tụlụkpashɛ tu uraiŋ. 24Rishe ri zhɛ ra tụpa rishe, rine ri zhɛ ra tụpa rine, u'ala zhɛ wa tụpa u'ala, uvwuna zhɛ wa tụpa uvwuna. 25Tuhwoŋtu ti zhɛ ta tụpa tuhwoŋtu, tụgwụcɛnga ti zhɛ ta tụpa tụgwụcɛnga, udomu zhɛ wa tụpa udomu.#Liv 24:19,20; Undwa 19:21; Mat 5:38

26Yaa shɛ kaa bụtụ po bujama bwa be eyi kwo kaa bu na bo o iyi ne rishe, rishe ru bwa ru bwadụ, bɛ shɛ ba ganga bujama ata bwa maa mama 'yaga iwɛ rishe ru bwa. 27Yaa shɛ kaa boo po bujama be eyi kwo kaa bu na bo o iyi nu unu rine ru bwa ru mwo, bɛ shɛ ba ganga bujama ata bwa maa mama 'yaga iwɛ rine ru bwa.

Andwa iwɛ Iyimabiga

28Yaa shɛ kaa buna to bụtụ mahiuaŋ bee 'wi, ɛ zhɛ a tagana buna ata atayɛ maa 'wo, ama a zha shɛ a ya usunda ubwa o, a zha shɛ kaa du a muna agwangwama ubwa tijama o. 29Ama yaa shɛ buna ata ba shana ba ta bụtụ mahiuaŋ cebe, oo mbiso kaa agwangwama ubwa, bee kepi shi bu, nazhɛ baa kwụnɛ butubwenyi, kwo kaa biyikwo, ɛ zhɛ a kwụna buna ata na atayɛ tutagana, ɛɛ zhɛ kaa a kwụna du agwangwama ubwa. 30Yaa shɛ kaa ee mbishi bu maa sa uhiuhiu ubwa, asha bɛ shɛ ba tụpa te teni cɛŋ nu ulumo na ee shiri. 31Yaa shɛ kaa yɛu-ye-eyi kwo kaa yɛu-yo-o buna ata to mahiuaŋ, ɛ zhɛ a nda bụ gana na tu undwa we ebe uko uko jɛmɛ. 32Yaa shɛ buna to bujama be eyi kwo bu na bo o mahiuaŋ, agwangwama buna ata zhɛ ba tụpa agwangwama bujama ata azụrụfa arinya talacɛ, ɛ zhɛ kaa a tagana buna ata atayɛ maa 'wo.

33Yaa shɛ bụtụ ushiji iyi nɛ ge urigeni unu u'ibwa, kwo kaa bụtụ hini u'ibwa bee urigeni shi uŋ, nazhɛ buna kwo kaa izhinyɛci leyi nu bwa, 34bụtụ na 'yajɛ u'ibwa ata zhɛ ba tụpa tụlụkpashɛ ti ijɛ ɛtɛ, bɛɛ zhɛ kaa ba pana agwangwama ubwa ukwuribi, nazhɛ bɛɛ zhɛ ba shapa ru'wo ru usunda ata.

35Yaa shɛ buna bụtụ bu ko gwụcɛnjɛ buna ba binya bụtụ bee 'wi, asha ɛ zhɛ a sanga buna ata ta shɛ buumwa maa o dwotwogonu ukwuribi ubwa, nazhɛ o dwotwogonu du usunda buna ata 'wi. 36Yaa shɛ e ge mepi maa buna ata ba shana ba ta a na vwɛ mahiuaŋ cebe, agwangwama ubwa kaa kepi shi bu, asha bɛ shɛ ba tụpa tụlụkpashɛ ta buna ata tilɛɛ, nazhɛ bɛɛ zhɛ ba shapa buna ata 'wi.

Currently Selected:

ỤBANỤ 21: RBT

Highlight

Copy