ỤBANỤ 20

Onu-tupana Umpwa

(Undwa 5:1-21)

1Ibɛ Agwatana jɛmɛ n-ndumwa mu ga kpaaŋ, bɛɛ hiɛŋ, 2Gamba n shɛ AGWANGWAMA na shɛ Agwatana bụ, na ubu bɛcinjɛ na cɛnjɛ ti Ijipti, tu na abɛ shɛ la bujama.

3Ta zhɛba tuwa o, semi ga shɛ Gamba.#Ụban 20:23; Undwa 5:7

4Ta mama shabana itɛtɛnuwɛŋ nɛ sụbɛ iyi elele nɛ namɛ na azuba, kwo kaa ụsụbwa iyi nɛ namɛ tuta ta cɛnjɛ tu unyizo, kwo kaa ụsụbwa iyi nɛ namɛ na amɛ meni tuta tu unyizo. 5To kwuzono tuwa te elele kwo kaa maa zhɛbɛ tụ o. Gamba n shɛ AGWANGWAMA na shɛ Agwatana bụ, N zha shɛ mo bu lonono maa na 'yaga tuwa o. N zhɛ ma pana atwa na mo n imo ulwapɛ tutu ajalalo keeni anyabɛshɛ aba.#Ụban 34:17; Liv 19:4; 26:1; Undwa 4:15-18; 27:15 6N zhɛ mo lubo awaŋnɛ igbɛɛ igbɛɛ a na mo n lubo, a na kaa a untangana onu-tupana mi.

7Ta suyana izeci ya AGWANGWAMA na shɛ Agwatana bụ ni iwɛ tɛgadaga o. AGWANGWAMA zhɛ a pana bụtụ be elele na ba suyana bụ ni iwɛ tɛgadaga n-ndumwa-tụwụma.#Liv 19:12

8Ne teyinje Ụjita-ụhinjanụ, maa ubu shanɛ ụjita tijilo.#Ụban 23:12; 31:12-17; 34:21; 35:2,3 9Na amɛ ijitɛ icihiŋ abɛ shɛ ba nda ugondu bu kpaaŋ; 10ama ụjita ucenje ụ shɛ Ụjita-ụhinjanụ wa AGWANGWAMA na shɛ Agwatana bụ, bɛ shɛ shɛ ba nda ugondu we elele nụ ụjita ata o, tu gabụ ta miaụŋ mụ bụ me eyi, ta mu na mo o, ta bujama bụ be eyi, ta bujama bụ bo o, ti iyimabiga bụ, ta alashɛ na namɛ na cɛnjɛ tụ bụ. 11Iwɛnɛ po na amɛ ijitɛ icihiŋ AGWANGWAMA njɛ la cɛnjɛ tu unyizo, ta tụla, ti itekwu, keeni iyi elele nɛ zweni ni ibɛ, boo to ụhinjanụ nụ ụjita ucenje; iwɛbɛ po AGWANGWAMA peni du Ụjita ata Ụhinjanụ uwebiye, baa njɛ uŋ ụjita tijilo.#Umoz 2:1-3; Ụban 16:23; 31:17

12Muna shibi keeni nobu ụjɛrụma, iwɛ maa yɛ urugbo na amɛ cɛnjɛ tu na AGWANGWAMA na shɛ Agwatana bụ zhɛ ma bu pana.#Liv 19:3; Undwa 27:16; Mat 15:4; 19:19; Mak 7:10; 10:19; Luk 18:20; Ɛfɛ 6:2,3

13Ta kwụna bụtụ o.#Umoz 9:6; Liv 24:17; Mat 5:21

14Ta nda tuwɛle o.#Liv 20:10; Mat 5:27

15Ta nda izunde o.#Liv 19:11; Mat 19:18

16Ta la tiseyida tu tukata no ofwo uyebi bu o.#Ụban 23:1; Mak 10:19

17Ta nda ukwedeyi ihwɛ uyebi bu o; ta nda ukwedeyi biyikwo bu uyebi bu o, ta bujama bwa be eyi, ta bujama bwa bo o, ta buna bwa be eyi, ti izhinyɛci ibwɛ, kwo kaa iyi elele nɛ uyebi bu 'yajɛ o.#Rom 7:7; 13:9

Atwa a Nda Inyɛsɛ

(Undwa 5:22-33)

18Ama gana na ta ahaŋsa atwa ata kpaaŋ namɛ no oto ata, tɛ ɛbɛrɛ, ta rụhwụŋ ru ukakacɛ, keeni nshikwo mi ishɛmɛ ɛtɛ, ibɛ po atwa ata njɛ inyɛsɛ, aa zhɛgɛdaga; ee shikekeni taa dụlụ. 19Ɛɛ hiɛŋ Moses, Ga shɛ gabụ bu mo ti mbiso iwɛ, ti zhɛ ta hwuga; ama kede Agwatana iti mbishi iwɛ o, shibwonu ti zhɛ to 'wo.#Ehib 12:18,19

20Go Moses hiɛŋ atwa ata, Ta nda ma inyɛsɛ o; iwɛnɛ po Agwatana zhajɛ maa ma hi manga, iwɛ maa hi na nda inyɛsɛ ibwɛ, iwɛ maa kede hi na nda iwɛwɛ o.

21Ama atwamwa shikekeni taa dụlụ, semi go Moses kiri gwumwonu ne tishi ta ata tu tuzhuuŋ no ofwo na Agwatana namɛ.

Ntatanunwaŋ keeni Otukwu-ụrụpɛ

22Nazhɛ AGWANGWAMA hiɛŋ Moses, Iyi nɛ ɛbi zhɛ bo mbiso miaụŋ mi Isrɛl na, maa: Ahiɛba ni ikɛnyi hiŋ hiɛ kwụbɛ tu Ngaa namɛ na azuba Ngaa jɛmɛ n-ndumwa ne hiŋ. 23Ta mama ndana ma tuwa na azụrụfa keeni azhɛnarɛya, namɛ swooŋ ne mi o.#Ụban 20:3,4; 34:17; Undwa 27:15 24M meni utukwu na cɛnjɛ, unaa na ɛbi zhɛ bu na ma pana arụpɛ tuhwoŋzhingo keeni arụpɛ amɛ-olom, na agwụdụ bụ keeni inɛ bụ, no ofwo elele na Ngee teri maa e ne teyinje izeci mi. N zhɛ ma zhajɛ pụ bụ maa Ma bụ pana uwebiye. 25Yaa shɛ kaa atayɛ ɛbi zhɛ bu ma mana utukwu ata, asha kede i shɛ na atayɛ na ee shebi o. Yaa shɛ ebi timengeni uŋ ni iyi hwoo nɛ lacɛmɛ, asha bi heshigeni uŋ. 26To no mungo kaa utukwu mu ne egenegbe o, iwɛ maa kede a kwụbɛ mohondo mụ bụ nu bwa o.#Undwa 27:5-7; Josh 8:31

Currently Selected:

ỤBANỤ 20: RBT

Highlight

Copy