ỤBANỤ 22

Undwa iwɛ Iyi Tụtụpa

1Yaa shɛ kaa bụtụ zunji buna kwo kaa ụgwụdụ, baa kwụnɛ kwo kaa bee senji, bɛ shɛ ba tụpa inɛ itɛ tụlụkpashɛ ta buna bu ko, ga tụpa agwụdụ eneshi tụlụkpashɛ tu ụgwụdụ uko.

2Yaa shɛ oo to buzundo ugbe tu boo zundo izunde, oo po bu iyi bee 'wi, i zasa bụtụ be elele na ɛɛ zhɛ a muna tijama ta tụkwụna tu bwa o. 3Ama yaa shɛ uwaŋna bonuonuo bu nazhɛ oo to bu ugbe, asha nazhɛ ɛɛ zhɛ a nda tijama te mehieŋ mu bwa, bi gɛ zhɛ ba tụpa iyi nɛ bee ge zunji tilɛɛ, yaa shɛ baa ga zasa iyi elele, ɛ gɛ zhɛ a sanga bụ iwɛ izunde ibwɛ. 4Yaa shɛ ee te jiteni iyi nɛ buzundo zunji ni i'ɛlɛ ibwɛ ti yaa ta shɛ buumwa, okwo yaa shɛ buna, kwo kaa izhinyɛci, kwo kaa ụgwụdụ, eyebi bɛɛ zhɛ ba tụpa tụlụkpashɛ to bu ko.

5Yaa shɛ bụtụ leneni iyi ibwɛ mabiga maa i yɛ iyimɛyɛ ni itimɛ binya bụtụ okwo yaa shɛ afwafwa, bɛ shɛ ba yalaga inɛɛ nɛ ngezeni na amɛ itimɛ ibwɛ, keeni afwafwa ubwa kpaaŋ, maa tụpa bụtụ ata tụlụkpashɛ. 6Yaa shɛ bụtụ sepi ulwa na ambɛ, woo hwoŋzhinji ambɛ tutu akaraba na suteni, keeni anaa na te shikekeni ni itimɛ ɛtɛ hwɛɛ, bụtụ na sepi ulwa ata zhɛ ba tụpa iyi elele nɛ njɛ ufwu kpaaŋ tilɛɛ.

7Yaa shɛ bụtụ utegeni uyebi ubwa ukwuribi kwo kaa i'wɛŋnɛ tuswaka, nazhɛ ee zunji iŋ nu umwono bụtụ ata, yaa shɛ kaa oo to buzundo ata ugbe, bi zhɛ ba tụpa karɛ yebi. 8Yaa shɛ kaa ee te shi buzundo ata ugbe, nazhɛ ga agwuma umwono ata zhajɛ no ofwo Agwatana, iwɛ maa tatuwa maa shɛ ubwa keri u'ala ni i'wɛŋnɛ uyebi ubwa o.

9N-ndumwa me elele na mu layɛ, okwo yaa shɛ iwɛ buna, kwo kaa iwɛ izhinyɛci, kwo kaa iwɛ ụgwụdụ, kwo kaa iwɛ tugwuno, kwo kaa iwɛ iyi elele nɛ 'inɛ, inɛɛ nɛ bụtụ bu ko hiɛŋ, ijɛ ɛtɛ shɛ inɛ ibwɛ, asha hwɛɛ aba ebe yebi zhɛ e suje unu pa Agwatana, bụtụ na Agwatana peni tụwụma iwɛ ibɛ, bi zhɛ ba tụpa iŋ uyebi ubwa karɛ yebi.

10Yaa shɛ bụtụ peni uyebi ubwa iyi tibiga, okwo yaa shɛ buna kwo kaa izhinyɛci, kwo kaa ụgwụdụ, kwo kaa iyimabiga ye elele, yaa shɛ ijɛ ɛtɛ kaa 'wi, kwo kaa iyi ike gwụcɛnjɛ iŋ, kwo kaa yee leyi na ambɛ, yaa zasa bụtụ be elele na shɛ useyida wa aba, 11asha hwɛɛ aba ebe yebi zhɛ a zha no ofwo AGWANGWAMA, maa bụtụ ata to-tuwa maa shɛ ubwa keri u'ala ni i'wɛŋnɛ uyebi ubwa o, ga agwuma iyi fwacɛ tuta ta ata, ama bi zha shɛ ba tụpa iŋ ya o. 12Ama yaa shɛ kaa tuzundo ee zunji iŋ ni i'ɛlɛ ibwɛ, asha bɛ shɛ ba tụpa bụtụ na ga 'yajɛ iŋ. 13Yaa shɛ kaa usunda-ehilo kwụnɛ iŋ, asha ge suje owunzu ibɛ maa i shɛ bu tiseyida, asha bi zha shɛ ba tụpa ya iyi nɛ usunda-ehilo kwụnɛ o. 14Yaa shɛ bụtụ lụpɛ uyebi ubwa iyi elele, yaa 'yajɛ iyi nɛ gwụcɛnjɛ iŋ, kwo kaa yee 'wi, yaa shɛ agwuma ibɛ zasaba apata, bụtụ ata shɛ ba tụpa iŋ kpaaŋ tilɛɛ. 15Ama yaa shɛ agwuma ibɛ namba apata, asha bi zha shɛ ba tụpa iŋ ya o, yaa shɛ kaa ụgwụ be ge le iŋ, asha ụgwụ ebe ta tɛ zhɛ.#Liv 5:14—6:7; Tɛrɛ 5:5-8

Andwa iwɛ Iyi nɛ Bụtụ Njɛ Bwooko

16Yaa shɛ butubwenyi helekeci yɛu-yo-o nɛ te mepi shi butubwenyi, nɛ kaa ee te peni shi tụmbụla, bee weci ni ibɛ, bɛ shɛ ba nda cɛnɛ ti ibɛ maa zana iŋ ya tilɛɛ. 17Yaa shɛ kaa bishi ibɛ lacɛ maa pana bụ maa zana, asha bɛ shɛ ba tụpa utashɛ ubwa kwakwa gadaga, gana na ta a tụpa utashɛ yɛu-yo-o nɛ te mepi shi butubwenyi.#Undwa 22:28,29

18To lono maa bukwupenyi be elele yɛ uraiŋ o.#Liv 20:27; Undwa 18:10,11 19Bụtụ be elele na kaa weci nu usunda, bɛ shɛ bo 'wo tilɛɛ.#Liv 18:23; 20:15,16; Undwa 27:21 20Bụtụ be elele na to ụrụpɛ na tuwa, ti yaa shɛ shɛ Gamba AGWANGWAMA kiri, ga a kwụnɛ bụ.#Undwa 17:2-7

21Ta nda bugaiŋ tawɛ tawɛ o, ta nda bụ kaa umungwuta o, iwɛnɛ ta abɛ shɛwa la du bugaiŋ na cɛnjɛ ti Ijipti. 22Ta nda bululo, kwo kaa yɛu-bu'weteji alaacɛ o.#Ụban 23:9; Liv 19:33,34; Undwa 24:17,18; 27:19 23Yaa shɛ abɛ njɛ aŋ alaacɛ, ee n keri n'ungwa N zhɛ ma hwuga n'ungwa ma aba, maa Mo mbiyono aŋ tilɛɛ. 24Isɛbwɛ mi kaa zhɛ yɛ ishijɛ, Ngɛɛ zhɛ kaa ma hiɛ kwụna nu ujasa, maa eyikwo hiŋ shɛ du olulo, miaụŋ mi hiŋ mi zhɛ ma sha du e'weteji mu na eshi aba 'wi. 25Yaa shɛ abụ unanjɛ bụtụ be elele na shɛ bukofwo na ashashɛ atwa mi a na namɛ pụ bụ ukwuribi, ta nda bụ gana na atwa na a unanga bụtụ ukwuribi a nda o, ta muna bu kaa tupatana tu bwa o.#Liv 25:35-38; Undwa 15:7-11; 23:19,20 26Yaa shɛ uyebi bu ubu peni tugwuno tu bwa ufwafwa, bɛ shɛ bo gwuricingono bu tu nazhɛ uwaŋna teni; 27iwɛnɛ po iyi nɛ baa 'yajɛ maa urugono tu'waba tu bwa ta kiri, imbe tuba bɛɛ zhɛ bo urugono hwayɛ maa wotoo? Yaa shɛ kaa bee n keri n'ungwa, N zhɛ ma hwuga, iwɛnɛ tu Ngaa shɛ bụkwụbɛ bi inyɛmɛnyɛmɛ.#Undwa 24:10-13

28Ta twaga Agwatana o, ta kalana kaa ehiu atwa bụ unu o.#Ugo 23:5

29Ta nda ti'insu maa m peni upwaŋ iyi nɛ ebi jicinje ne ehilo, keeni meni mụ tụ'walụ ta afwafwa bụ o.

M peni yɛu bu ye eyi nɛ ebi meci hiiŋ.#Ụban 23:16,19; Undwa 26:1-11 30Gabata du abɛ shɛ ba nda ni inɛ bu, ta agwụdụ bụ. Ga i nama pe bino bi ibɛ ijitɛ icenje, nụ ụjita ụtụndatụ nazhɛ ɛbi zhɛ bu ma m panɛ iŋ.

31Ahiɛba hiɛ shɛ atwa mi tijilo, iwɛbɛ po ta ya ma usunda we elele na usunda-ehilo kwụnɛ na ambɛ o, kalana ma shiwawa una ata.#Liv 7:24; 17:15

Currently Selected:

ỤBANỤ 22: RBT

Highlight

Copy