ỤBANỤ 19

E'isrɛl Ci Embi Ishɛmɛ Sainai

1Ti yaa namɛ ipiɛnɛ itɛtu ta miaụŋ mi Isrɛl mu banɛ na cɛnjɛ ti Ijipti, nụ ụjita ata gom ibɛ ee ci Ụshɛka Sainai. 2Ibɛ shɛ gana na ta a banɛ ni Rifidim, miaụŋ mi Isrɛl mi jwe Ugba wa aba ne embi Ishɛmɛ ɛtɛ Sainai.

3Go Moses munji Ishɛmɛ ɛtɛ, bee zhe pa Agwatana, nazhɛ AGWANGWAMA suyanɛ bụ ni Ishɛmɛ ɛtɛ, bɛɛ hiɛŋ bụ, Iyi nɛ ɛbi zhɛ bo mbiso miaụŋ mi Isrɛl mu na mɛ shɛ atwa ihwɛ Jekob na, maa; 4Hiɛ kwụbwa iyi nɛ Ngaa njɛ Ejipti, keeni gana na Ngaa hiɛ 'waŋnɛ gana na ugbeji wa 'waŋna oywoywo ubwa na apiambɛ ubwa, gana ta du Ngee hi suje pi Mi. 5Hwuwayɛ go, yaa shɛ ɛhi zhɛ hia hwuga-unu mu, maa hi untangana unu mu tutwa, asha ahiɛba hi zhɛ hia sha atwa mi na Ngaa 'yajɛ na ashashɛ atwa kpaaŋ, iwɛnɛ po Gamba n 'yajɛ cɛnjɛ tu unyizo kpaaŋ. 6Hi zhɛ hi ma shana cɛnjɛ-ta-tugwama, to onongbo keeni udenji tijilo. N-ndumwa mu na mɛ shɛ maa mbishi miaụŋ mi Isrɛl ta.#Undwa 7:6; 14:2,21; 26:19; Tait 2:14; 1 Pita 2:9; N-ndu 1:6; 5:10

7Go Moses gwure, baa suyanɛ n-nyarɛ ma atwa ata, aa ulwa, bee swegeni aŋ n-ndumwa me elele na AGWANGWAMA peni bu unu muba. 8Ibɛ po atwa ata peni ajɛshɛgwa kpaaŋ aba zhiaaŋ, ɛɛ hiɛŋ, Iyi elele nɛ AGWANGWAMA jɛmɛ, ti zhɛ ta nda iŋ. Go Moses peni AGWANGWAMA ajɛshɛgwa n-ndumwa mu na atawa ata dumanjɛ.

9Nazhɛ AGWANGWAMA hiɛŋ Moses, Hioko, N zhɛ me teni nu udomu na inshi ma zhajɛ pụ bụ, iwɛ maa atwa ata hwụjɛ aka na Ama duma iwɛ na bụ, iwɛ maa a tɛtana n-ndumwa mụ bụ rishe aka elele.

Nazhɛ go Moses mbishi AGWANGWAMA n-ndumwa mu na atwa ata jishijɛ.

10Nazhɛ AGWANGWAMA hiɛŋ Moses, Zhaga no ofwo atwa ata, iwɛ maa njɛ aŋ tijilo hwayɛ ga ni beyi, hiɛŋ aŋ maa ga a nyashɛnjɛ i'wɛŋnɛ ya aba i tu'urugono, 11ga a mama 'imɛ iwɛ wanabeyiko, iwɛnɛ po nụ ụjita ata, Ngɛɛ zhɛ me kezhe ma patana ni Ishɛmɛ Sainai ne eshe atwa ata kpaaŋ. 12Bɛ shɛ ba kapa ishɛmɛ ɛtɛ tutu rungwutwonu, iwɛ atwa ata, mbiso aŋ maa, To mungo ma ishɛmɛ gɛ o, okwo tutumongono kede e timengeni iŋ o; bụtụ be elele na timengeni ishɛmɛ ɛtɛ, ga a kwụnɛ bụ tilɛɛ. 13I zasa u'ala bụtụ be elele zhɛ kaa wo tumongono bu o, ama atayɛ ɛɛ zhɛ a tagana bụ, kwo kaa a'inla; okwo yaa shɛ iyimabiga, kwo kaa bụtụ, bi zha shɛ bo bino. Aka na tu ukakacɛ dumanɛ iwɛ pụụŋ, te ilegeji, nazhɛ ge e munje ya ishɛmɛ ɛtɛ.

14Go Moses zwi ishɛmɛ ɛtɛ, bee zhe no ofwo atwa ata baa njɛ aŋ tijilo; aa nyashanjɛ i'wɛŋnɛ ya aba i tu'urugono. 15Go Moses hiɛŋ atwa ata, Mama 'imɛ ma iwɛ wanabeyiko, to togwu ma ne eyikwo hiŋ o.

16Tụ ụjita ata ụtatụ ci, oto kwuni tukala keeni ɛbɛrɛ, udomu na inshi, ubi ihiŋhiŋ ishɛmɛ ɛtɛ, nazhɛ ukakacɛ kwuni tuhwulo na rụhwụŋ rụ 'wụtụ. Iwɛbɛ po inyɛsɛ shɛ atwa elele na namɛ nu ugba ata kpaaŋ, aa zhɛgɛdaga.#N-ndu 4:5 17Go Moses bɛcinjɛ atwa ata nu ugba ata, iwɛ maa e zhe pa Agwatana, ee zhe ee shikekeni ne embi ishɛmɛ ɛtɛ. 18Nazhɛ nshikwo mu urigeni Ishɛmɛ Sainai kpaaŋ, iwɛnɛ ta AGWANGWAMA kezhe baa patanɛ ni ibɛ na amɛ ulwa. Nazhɛ nshikwo ma ata mu munji tuu gana nshikwo mu ulwa ujigo, ibɛ po Ishɛmɛ ɛtɛ yo zhingotu duwa duwa.#Undwa 4:11,12 19Nazhɛ rụhwụnŋ ru ukakacɛ ata ra kaana gu ugombo duwa. Go Moses dumanɛ iwɛ, nazhɛ AGWANGWAMA jishijɛ bụ nu uto.#Ehib 12:18-20 20Nazhɛ AGWANGWAMA kezhe baa patanɛ ni ihiŋhiŋ Ishɛmɛ ɛtɛ Sainai, baa suyanɛ Moses, go Moses munji ni ihiŋhiŋ Ishɛmɛ ɛtɛ. 21Nazhɛ AGWANGWAMA hiɛŋ Moses, Zhaga zwo maa tɛtaganɛ atwa ata unu maa kede ɛ kɛshicɛ ikepi ɛtɛ maa a n zhajɛ igbɛtɛtɛ o, iwɛ aka na atwa ufwugwo aba zhɛ e ilono hwayɛ. 22Okwo onongbo na zhɛ o gwumwonu na AGWANGWAMA, i shɛ tilɛɛ maa a mama nyashɛnjɛ shɛshɛshɛ, shibwonu AGWANGWAMA zhɛ a sukakana aŋ.

23Go Moses hiɛŋ AGWANGWAMA, Atwa ata eri shi e munje Ishɛmɛ Sainai o, iwɛnɛ po gabụ du ni ikɛnyi bụ, bu tu tutwagwanua-unu, ɛbi hiɛŋ, Ge kepi iyi o rungwutwonu ishɛmɛ ɛtɛ, maa a njɛ iŋ tijilo. 24Ibɛ po AGWANGWAMA hiɛŋ bụ, Zhaga zwo, maa zhagajɛ na Aron maa hi munje nu bwa; ama to lono maa onongbo keeni atwa ata o hwuŋzwo maa a zhajɛ no ofwo mi o, iwɛ aka na Ngɛɛ zhɛ ma sukakana aŋ. 25Go Moses zwi ga no ofwo atwa ata, bee mbishi aŋ iwɛ nɛ AGWANGWAMA jɛmɛ.

Currently Selected:

ỤBANỤ 19: RBT

Highlight

Copy