APOCALIPSIS 17

Mana allin puriykachaq khuchi warmi

1Qanchis angelkuna pikunachus qanchis pusillukuna aparisqa kachkarqanku chaykunamanta ujkaq jamuspa ajinata nirqawan: “Jamuy, pichus unu patapi tiyqatasqa kachkan chay mana allin puriykachaq khuchi warmipaq manchay asut'iynintam rikuchisqayki. 2Tukuy kaypachapi kaq qhapaq suyu apaykachaq runakunam chay warmiwan khuchi ruwaykuna ruwanaman churakupunku, kaypacha runakunapas chay khuchi ruwayninkunawanmi machaykukupunku” –nispa.

3Chhikamantataq, imatachus musquypijina Ajayu rikuchichkarqawan chaypiqa, ch'usaq qasi pampaniqmanmi angelqa pusarqawan.

Wak'a patapi tiyqatasqa warmi

Uj puka wak'a patapi tiyqatasqa warmitam chaypi rikurqani, chaytaq Diospaq imaymana mana allin sutikunawan qilqarqusqam karqan, chay wak'aqa qanchis umakunayuq jinataq chunka waqrakunayuqmi karqan. 4Chay warmiqa yanaman samachkaq puka p'achawan p'achalliykusqam karqan, jinaspataq quriwan, lliphipichkaq rumikunawan jinataq pirlakunawan wallqaykusqam karqan. Makimpitaq uj quri pusillu aparisqam karqan, chaytaq imaymana millay kaqkunawan jinataq khuchi ruwayninkunawan junt'aykusqam karqan; 5uma pata mat'impitaq uj mana riqsisqa sutiwan qilqaykusqam karqan, chaytaq ajinatam nirqan: “Athun Babilonia llaqta, millay khuchi juchakuna ruwaqkunapaq jinataq tukuy imachus millay kachkan chaykunapaq maman” –nispa. 6Chhikamantataq chay warmipaq machasqa kasqantam ripararqani, payqa ch'uwa llaqtapaq jinataq pikunachus Jesuspaq irkataqninkuna kasqankurayku wañuchisqa karqanku chaykunapaq yawarninwan machaykusqam karqan. 7Chhikataq angelqa ajinatam nirqanwan: “¿Imamantataq muspharachkankiri? Chay warmipaq jinataq payman apachkan chay qanchis umakunayuq jinataq chunka waqrakunayuq wak'apaq ima pakasqa sut'inchaychus kachkan chaypaq sut'inchaynintam nisqayki. 8Ima wak'atachus rikuchkarqanki chayqa, ñawpaqpachakunapi kawsachkarqan chaymi, chaywampas manañam kapunchu. Chaywampas manaraq q'ala t'unarqukuyninman purichkanqa chhikam ukhupachamanta chimpamunqa. Pikunachus kaypacha tiyaykuchisqa kachkarqan chhikamantapacha mana kawsay p'anqapi qilqaykusqa kachkarqanku chay runakunaqa, pichus ñawpaqpi kawsarqan jinaspataq manaña kapurqan chaywampas wajmanta jamunqa chay wak'ata rikuspaqa anchatam muspharanqaku.

9“Kaypim pichus yachayniyuq jinataq ch'iki yuwayniyuq kachkan chayqa yachakunqa: Qanchis umakunaqa, maykaq qanchis urqukuna patapichus chay warmi tiyqatasqa kachkan chaytam niyta munan; qanchis umakunaqa, qanchis qhapaq suyu apaykachaqkuna niytapas munallantaqmi. 10Chay qanchis qhapaq suyu apaykachaqkunamantaqa, phichqayuqmi wañurapunku, ujkaqqa kunanmi qhapaq suyuta apaykachachkan ujkaqtaq manaraqmi jamuchkanchu, chaytaq manam suyachkanchu usqhayllatam jamunqa. 11Chay ñawpaq pachapi kawchachkarqan jinataq manaña kapunchu chay wak'ataq pusaqkaq qhapaq suyu apaykachaqmi; chay wakin qanchis kaqkunamanta ujkaqnin kachkan chhikapas, kunantaq payqa wañunanmanmi purqaruchkan.

12“Chay chunka waqrakunata rikuchkarqanki chaykunaqa, manaraq qhapaq suyukuna apaykachayta qallarichkanku chay chunka qhapaq suyu apaykachaqkunam kanku. Chaywampas uj pachallam wak'awan kuska atiyta jap'iqaspa qhapaq suyukunata apaykachanqaku. 13Kay chunka qhapaq suyu apaykachaqkunaqa uj yuwayniyuqllam kanqaku, jinaspataq atiyninta jinataq apaykachaytaqa wak'amanmi qupunqaku. 14Paykunataq Uwijawanmi maqanakunqaku; chaywampas pikunachus mana iskayakuspa paywan kanku chay Diospaq wajakusqankunawan jinataq ajllikusqankunawan kasqanrayku Uwijaqa atipanqam, imaraykuchus Uwijaqa tatakunapaq Tatan jinataq qhapaq suyu apaykachaqkunapaq apaykachaqninmi” –nispa.

15Angelqa ajinata nirqallawantaqmi: “Ima unukunatachus rikuchkarqanki, chay patapitaq mana allin puriykachaq khuchi warmi tiyqatasqa kachkan chaykuna rikusqaykiqa, llaqtakuna, runakuna, imaymana rimaykuna jinataq suyukunam chaykunaqa. 16Ima chunka waqrakunatachus rikuchkarqanki chaykuna jinataq wak'apiwanqa, chay mana allin puriykachaq khuchi warmitaqa chhiqnikunqakum jinaspataq sapanta jinataq q'arapachatam saqiwachapunqaku; paypaq aychantam mikhunqaku jinaspataq ninawanmi ruphaykuchinqaku. 17Diosmi paykunaman munayninmanjina ajina ruwanankupaq yuwayta qun. Paykunaqa imatachus Dios nichkarqan chay junt'akunankamam qhapaq suyu apaykachanapaq atiyniyuq kachkanku chay atiyta wak'aman qupunapaq uj yuwayman chayanqaku. 18Ima warmitachus rikuchkarqanki chayqa, mayqin llaqtachus kaypacha qhapaq suyu apaykachaqkunata apaykachachkan chaymi” –nispa.

Currently Selected:

APOCALIPSIS 17: QNBNT

Highlight

Copy

Compare