1 CORINTIOS 11

1Qankunaqa nuqapaq ñanniyta qatiychis, imaynatachus nuqaqa Cristopaq ñanninta qatini ajinata.

Warmikunapaq yupaychana tantakuypi kanankumanta

2Nuqamanta yuwarikusqaykichismanta jinataq ima puriykunatachus yachachirqaykichis chayta yuwarikuspapuni puriykachasqaykichismantaqa, allintapuni ajinata puriykachakunkichis nispam niykichis. 3Chaywampas nuqaqa Cristopaq sapa uj runajawapi atiyniyuq kasqanta yachanaykichistam munani, jinataq qhariqa warminjawapi atiyniyuqllataqmi, imaynatachus Diosqa Cristojawapi atiyniyuq kachkan ajinata. 4Jayk'aqchus uj qhari runa umanta qatqatakuspa#11.4 Qhari runapaq uma qatqatakusqanmanta: Chhaqay p'unchaykunapiqa, waj dioskunaman jaywaq runakunam umanta qatqatakuspa jaywaq karqanku, chayraykum Pabloqa judiokunapaq puriyninkumanjina, “ama qatqatakuychischu” –nispa nirqan. Diosmanta mañakun jinataq sutimpi willan chhikaqa, pichus uman kachkan chay Cristotam juch'uychachkan. 5Chaywampas uj warmichus umanta mana qatqatakuspa#11.5 Warmikunapaq uma qatqatakunanmanta: Qhariyuq warmikunakaqqa manam imapaqpas umankuta qataqakunankuchu karqan, imaraykuchus puriyninkumanjinaqa wasi ukhupi qusanku ñawpaqinllapim umankuta qataqakunanku karqan. Diosmanta mañakun, manachayqa Diospaq sutimpi willan chhikaqa, pichus uman kachkan chay qharintam juch'uychachkan. Chujchantapas ruturqukuchkanman ajinam chayqa. 6Imaraykuchus uj warmichus umanta mana qatqatakun chhikaqa, astawan allinraqmi kanman ujpita chujchanta ruturqukupunanqa.#11.6 Chujcha ruturquna: Warmikunapaq chujcha ruturqusqa kayqa, ancha p'inqayman chayachkaq juch'uychayninkum karqan. Pi warmikunachus waj qhariwan khuchi juchata ruwasqampi japjachikurqanku chaykunamanmi chujchanta ruturquq karqanku. Chaywampas uj warmichus chujcha khuchurqukunata manachayqa ruturqukunata p'inqakun chhikaqa umanta qatqatakuchun ari. 7Qhariqa manam umanta qatqatakunanchu, imaraykuchus payqa Diospaq uyampas kanman ajinam, jinallataq Diospaq athumpi kaynintam rikuchin. Chaywampas warmikaqqa qharipaq athumpi kaynintam rikuchillantaq, 8imaraykuchus qhariqa manam warminiqmanta jurqusqachu karqan, manachayqa warmikaqmi qharimanta jurqusqaqa. 9Qharitaq manam warmirayku ruwasqachu karqan, manachayqa warmikaqmi qharirayku ruwasqaqa. 10Chayraykupunim warmiqa umanta qatqatakunanqa, ajinamanta qharimpaq jinataq angelkunapaq payjawapi atiyniyuq kasqankuta rikuchinapaq. 11Chaywampas Cristopi iyaw nispa kawsayninchispiqa, qhariqa manam mana warmiwanqa kachkanmanchu, warmipas manallataqmi mana qhariwanqa kachkallanmantaqchu. 12Imaraykuchus, chiqampunim ñawpaqkaq warmitaqa ñawpaqkaq qharimanta jurquspam Diosqa ruwarqan, chiqanllataqmi qhariqa warmimanta paqarispa lluqsisqanqa, jinallataq ima tukuymi Diospi qallariyniyuqqa.

13Warmichus Diosmanta mañakuspa umanta mana qatqatakuchkan chhikaqa, qankuna kikin imaynamampas rikupuychis. 14Kay kawsayninchis kikinmi qhari runapaq chujchan wiñaykuchikunanqa p'inqakunajina kasqanmanta yachachiwanchis; 15chaywampas warmikaqchus chujchanta wiñachikun chhikaqa may sumaqpunim rikukun; imaraykuchus paymanqa umanta qatqatakunampaqmi athun chujchata qukunqa. 16Chaywampas, pichus kaykunata manam allinchu nispa nichkan jinataq chayniqmanta rimanariyta munan chhikaqa, payman kayta nini: nuqanchispas Diospaq iglesiankunapas, waj puriykunamantaqa manam yachachkaykuchu.

Mana allin ruwaykuna

17Imatachus kunanmanta ñawpaqman qilqamuchkani chaypiqa, manam qankunaman allintam ruwachkankichis nispa nichkaykichismanchu, imaraykuchus tantakuyniykichisqa qankunaman yanaparichkaytaqa mana allinkunaman chayachipuchkasunkichis. 18Ñawpaqta, jayk'aqchus iglesiajina tantakunkichis chhikaqa, qankunapura ch'aqwaraspa puriykachasqaykichistam willawanku; uj chhikataqa kaypaq chiqa kasqantam nuqa yuwayakuni. 19¡Chiqampiqa, tukuy kaykuna ajinatapunim ruwakunanqa, ajinamanta maykaqchus astawan chaniyuq kachkan chayta riqsinapaqqa! 20Chayjina ch'aqwarasqa pusiykachasqaykichisraykum tantakuyniykichispi Tatapaq mikhuynin ruway ruwasqaykichisqa manaña imaynatachus ruwakunan kachkarqan ajina chaniyuqta ruwapunkichischu. 21Imaraykuchus mikhuna pacha chayampun chhikaqa, sapa ujmi pay kikimpaq mikhuynin mikhukuq ñawparipun; chhikankamataq wakinkunaqa yariqasqa qhiparapunku, wajkunataq machaykunkama ujyaykupunku. 22¿Qankunaqa manachu mikhunapaq jinataq ujyanapaq wasiyuq kachkankichisri? ¿Imamantataq Diospaq iglesianta juch'uychankichis jinataq pist'achikuqkunaman p'inqayman churachkankichisri? ¿Kunanqa, imanisqaykichistaqri? ¿Allintam ruwachkankichis nispachu nisqaykichisri? ¡Kaykuna ruwasqaykichismantaqa manapunim allinmi nispa nichkaykichismanchu!

Tata Jesuspaq ch'isi mikhuy mikhusqan

(Mt 26.26-29; Mc 14.22-25; Lc 22.14-20)

23Kay ruwaytaqa Tatapaq saqisqan puriymantam nuqaqa jap'iqarqani, chay ruwaytataq nuqaqa qankunaman yachachipuykichis: Jayk'aqchus Tata Jesusqa ranqaykusqa kachkarqan chay kikin tuta, makinkunapi t'ant'ata jap'irqan 24Diosman yuspärayta quspa phatmispataq ajinata nirqan: “Kayqa qankunarayku wañuyman qusqa nuqapaq aychaymi. Kaytaqa nuqamanta yuwarikunaykichispaq ruwaychispuni” –nispa. 25Ajinallatataq, ch'isi mikhuyta mikhurqan chhikamantaqa, makinkunapi pusilluta jap'irqan jinaspataq ajinata nirqan: “Kay pusilluqa yawarniywan uj musuj rimthapiyta sut'inchachkan chaymi. Sapa kuti ujyankichis chhikaqa, nuqamanta yuwarikunaykichispaq ruwaychis” –nispa. 26Ajinaqa, sapa kuti qankuna kay t'ant'amanta mikhunkichis jinataq kay pusillumanta ujyankichis chhikaqa, Tata Jesuspaq wañusqantam ima p'unchay kutimunankama willachkankichis.

Imaynatachus Tatapaq mikhuynin ruwanamanta

27Ajinaqa, maykaqpas Tatapaq t'ant'anmanta jinataq pusillunmanta mana chiqan sunquyuq kachkaspa ujyan, manachayqa mikhun chayqa, Tatapaq aychanjawapi jinataq yawarninjawapim juchata ruwan. 28Chayrayku, sapa ujniyuqmi allinta sunqunku ukhuta qhawaqarikunanku manaraq t'ant'amanta mikhuykuchkaspa jinataq pusillumantapas ujyaykuchkaspaqa. 29Imaraykuchus mana Tatapaq aychan kasqanta yachachkaspa mikhun jinataq ujyan chhikaqa, pay kikimpaq asut'iynimpaqmi mikhukuchkan jinataq ujyakuchkampas. 30Chayraykum qankunamanta achkhayuq unqusqa jinataq pisi kallpa kakuchkankichis, jinallataq wakinkunapas wañupunku ima. 31Nuqanchis kikinmanchus allinta qhawaqarikuchuwan chhikaqa manam Tataqa asut'ichkawanchismanchu, 32Tata asut'iwanchis chhikapas, yachaqananchispaq jinataq kaypachapi kaq runakunawan kuska ama juchanchasqa kananchispaqmi asut'iwanchis.

33Ajinaqa, wawqipanaykuna jayk'aqchus mikhunapaq tantakunkichis chhikaqa qankunapura suyanarikuychis. 34Jinataq maykaqpas yariqachikun chhikaqa pay kikimpaq wasimpi mikhukumuchun, ajinamanta yanjakusqanrayku Diosqa chay tantakuyta ama juchanchanampaq. Wakin tapukuykunakaqmantaqa jayk'aqchus qankunaman rikuq jamuchkasaq chhikan allich'asunchis.

Currently Selected:

1 CORINTIOS 11: QNBNT

Highlight

Copy

Compare