1 Kɔlɛ́ntɛ 16
16
Bɛbáágá go giimbó gá boolímínyí gɛ́ɛgɛ naá Yolósalɛmɛ
1Go bosɔ́mɔ bɔ́ɔbɔ bó núunemú bɛbáágá bɛ́ɛbɛ no bándamɔ́ go boolímínyí bá Yolósalɛmɛ#16.1 Go ɛ́na naá Oló 15.25-26., ndɛ́galɛga caá no biene témbuginye sɛ́ɛsɛ mmbaá fáá boolímínyí báaba naá Galáatɛ. 2Buisí bá busío bá gɛanyɛ, ŋgáa onyɔ moánɛ a ága go boayá bɔ́ɔbɔ a lɔ́mɔ́ ba go bɛ́dɛgɛna, goŋaá bá dɛ gɛ́gánáa gobola gámɛ go go bándɛgɛna bɛbáágá. 3Aŋa nná bolamɔ́, nná dóma báaba no ŋgií iyídé go go ɛ́da síe bɛbáágá bɛ́nyɔ́ naá Yolósalɛmɛ na bakálata bá bosɔ́mɔ. 4Bó amɔ́ bó bɛ́ɛmba goŋaá ŋgɛ́da yɔmɔ́ɔ moatɛ́ moatɛ, nná bɛ́ɛmba olɔŋɔ nabɔ́.
Póolo a kɛsa oŋɛndɔ
5Gɔ́ɔgɔ nnú úlemú naá bɛɛnyɔ́ɔ, nnɛ́ ɛndɛna ya Masɛdóanɛ, goakɛ́ nná fɛ́lɛda hɔ́ɔ#16.5 Go ɛ́na naá Meŋ 19.21.. 6Ndɛ́ ba go dúmbie gɛcamɛna naá bɛɛnyɔ́ɔ, gódaga moánɛ gɛcamɛna gá isió giimée, go goŋaá no ŋgóhiginyo na boóma bá go dúmbenye pɛ́ yamɛ. 7Cɛ lɛ́gálɛ́gáa goŋaá nnyó ɛ́na tómbana go tómbana, kɔ́ɔ mmaamanamɔ́ goŋaá kɛ́gɛda moɔnɔ́ ba gɛcamɛna nɛnyɔ́, Daadáa a amɔ́ o oliminyo. 8Kanɛ́ nná gɛ́ga naá Ɛ́fɛsɛ gó ɛ́da húme naá buisí bá Pantɛkótɛ#16.8 Gibíné gɛ́ɛgɛ Beyúdene bá mbaá lɛ bá leebenye go masáŋa. O bana Ɛmbanɔ 28.26.. 9Gɛantá gá ŋgásɛ́ gɛ́ á bébuuné hɔ́ɔ goŋaá mbáá yɔgɔ́nɔ́ɔ buelí bámɛ, akɛ́ aŋa babɛlɔ́bɛlɔ bámɛ bá lɔ́mɔ́ hɔ́ɔ makɔ́nɔ́#16.9 go big. 8-9: go ɛ́na naá Meŋ 19.8-10.. 10Timotée a amɔ́ u úle hɔ́ɔlɔ́, no mo beŋe bese goŋaá a dɛ bɛáa bofoá naá kadɛ́gadɛ́ɛ yɛnyɔ́, goakɛ́ namɛ nɛhɛ́ dɛ yɔgɔnɔ buelí bá Daadáa. 11Mɔtɔ a dɛ mo fánɛ́ná kanɛ́. Mo fáamɔ́ nɔnɔ boóma bá go mo óhiginyo go pɛ́, a nco kundine odɛ́má na bɛyaŋa, mmo gɛ́gana olɔŋɔ na bolimóní. 12Naá boayá bá ondimóní bɛcɔ́ Apolóso, mmo gúlumeninye gɛcamɛna giimée goŋaá u úle naá bɛɛnyɔ́ɔ olɔŋɔ na bolimóní, kanɛ́ a dɛ lɛ́gálɛ́gáa go úle godɔ́ɔdɔ. A nú úle aŋa a ná bɛamɔ́ gɛcamɛna.
Bɛlɔsɛnɔ bá mesúgidinye na mbédíígí
13Gɛ́gáa nɔnɔ pɔnyɛ́ɛ, no bɛ́ɛmba tɛ́ŋɛ́tɛŋɛ naá gioliminyo, no bɛa nigégé, no bɛ́ɛmba bɛgaaga. 14No ŋanana buimée na gɛnɔ́ɔ́nɛ́nɔ́. 15Bolimóní, gɛlɔsɛnɔ gíntió gɛ́gɔ́ɔ gɛ́ lɔ́mɔ́: no íyime goŋaá Ɛsɛtɛfánasɛ na ncíbo yɛhɛ́ ya batɔ bá lɛ́ boolímínyí bá busío hɔ́ɔlɔ́ naá Ekeyíi. Bá mba bííŋéné go go yɔgɔnɛnɔ basɔ́gɔ́ɔ boolímínyí. 16Olímínyóo nɔnɔ goŋaá batɔ aŋa bɔ́ɔbɔ nɔ́ɔnɔ bá nyó indenye, na uŋkimée mɔ́ɔnyɔ a gɔ́lɔnɔmɔ́ bodáŋɔ naá buelí na bɛdɔmbɔ bábɔ́.
17Ŋgɔ́bɔnɔ bese makɔ́nɔ́ na goúle gá Ɛsɛtɛfánasɛ, Folotonásɛ na Ekeyíkusu, goakɛ́ bá lɛ́ ŋaáalú bɔ́ɔbɔ no mbaá lɔmɔ́ bá go ŋa naá yɔmɔ́ boayá. 18Bá mba fuugíe yɔmɔ́ odɛ́má na yɛ́nyɔ́ kɛ́. Íyíme nɔnɔ kanɛ́ go búlugenye batɔ aŋa bɔ́ɔbɔ nɔ́ɔnɔ.
19Biimbó bá boolímínyí bɛ́ɛbɛ naá gigísi gá cí gá Esíi bɛ́ nyó bédíigenye. Akɛ́lasɛ na Pɛlɛsɛ́ka#16.19 Go ɛ́na naá Meŋ 18.2., na giimbó gá boolímínyí gɛ́ɛgɛ gɛ́ bábándamɔ́ naá nnyaŋá yabɔ́ bá á nyó bédíígíe go ufíno yá Daadáa. 20Bolimóní biimée bá á nyó bédíígíe. Bédíígénínyée nɔnɔ na kude aŋa bolimóní.
21Ombɔ́gɔ yámɛ yá Póolo moatɛ́ yɔ́ yó ɔ́ŋɔmɔ́ mbédíígí yɛ́ɛyɛ. 22Aáŋa mɔtɔ a dɛ maamánáa Daadáa, ŋgáa Asaŋa a mo yɔmɛnɔ. Malaná ta, nɔ́ɔnɔ gó lɛ́ aá: Daadáa, úlé#16.22 Malaná ta: na noalamɛ́ɛ. O bana, go eninye na Tóo 22.20.!
23Ŋgáa niibo ná Daadáa Yésusu nɛ́ bɛ́ɛmba nɛnyɔ́!
24Nnyó maamana bɛɛnyɔ́ɔ biimée naá gobálada gɔ́ɔgɔ na Yésu Kilítu.
Currently Selected:
1 Kɔlɛ́ntɛ 16: YAS
Highlight
Copy
Compare
Share
Want to have your highlights saved across all your devices? Sign up or sign in
