1 Kɔlɛ́ntɛ 15
15
Púfuge ya Yésusu
1Bolimóní, ndɔ́mɔ́ goŋaá nnyó eniŋinye Gɛnɔ́gɔ́ gá Cɔ́mɔ gɛ́ɛgɛ mbaá nyó dóógínyóo, no báá gɛ́ gɛ́ndɛ́gɛ́ná, no báá gɔnɔ́ gɛ́ bágódɛna tɛ́ŋɛ́tɛŋɛ. 2Gɛ́ gɛ́ nyó sódonyomú no amɔ́ no gɛ́ gɛ́ndɛgɛna aŋa gɔ́ɔgɔ mmbaá nyó gɛ́ dóógínyóo; aáŋa caá nɔ́ɔ, gioliminyo gɛ́nyɔ́ gɛ́ lɛ́ go dugúnú. 3Mmba dóáná go nyó dúmbinye bɔ́ɔbɔ yɔmɔ́ɔ moatɛ́ mmbaá gɛ́ndɛ́gɛ́ná, bó lɔ́mɔ́: Kilítusu a mba gúé go bɛlɔgɔ bɛ́cɔ́ aŋa Ŋgɔ́ŋɛ́ sɛ́ oyamɔ́. 4Bá báá mo miée, a báá fúfúgé naá nnyimé ya medúgú mádadɔ́ aŋa Ŋgɔ́ŋɛ́ sɛ́ oyamɔ́. 5A bɛ́ɛ́ ɛ́nɛ́gɛ́ná Sɛ́fasɛ, a báá gɔnɔ́ go ɛ́nɛgɛna Bɛɔdɔ́ɔ na bɛ́andɛ́#15.5 go bigísi 3 a húme 5: gig. 3: go ɛ́na Iseyíi 53.5-12 gig. 4 go ɛ́na naá kálata ya Ɛsagɔ 16.10; tɔ́nɔ naá Osée 6.2 gig. 5go ɛ́na Lók 24.34; Mot 28.16-17; Mél 16.14; Lók 24.36; Sáŋ 20.19.. 6Naá nnyimé, a bɛ́ɛ́ ɛ́nɛ́gɛ́ná go oŋɛndɔ táŋɛ́ yúmmue behúúní bá go dómba mantɛdɛ mátáanɔ; bóncodío naá olɔŋɔ yábɔ́, bá gá lɛ́ bɔgɔ́sɔ, kanɛ́ nɛnamá níntió nɛ́ mba gúé. 7Naá nnyimé, a bɛ́ɛ́ ɛ́nɛ́gɛ́ná Sáakɛ, a bɛ́ɛ́ ɛ́nɛ́gɛ́ná gɔnɔ́ baapótɛlɛ biimée. 8Naá mesúgidinye a báá ŋgɛ́nɛ́gɛ́ná tɔ́nɔ, yɔmɔ́ɔ mɔ́ɔnyɔ ndɔ́mɔ́ aŋa gifúnú. 9Ɛɛ́ɛŋ, ndɛ́ hɛómaŋkóma naá olɔŋɔ yá baapótɛlɛ, cɛ háánánáa goŋaá bá tɔ́ŋɛnɔ bá amɔ́ apótɛlɛ, goakɛ́ mmba séésényée boolímínyí Asaŋa#15.9 gig. 8: go ɛ́na naá Meŋ 9.3-6 gig. 9: go ɛ́na naá Meŋ 8.3.. 10Kanɛ́ odɛ́nɛ́ yɔ́ɔyɔ ndɔ́mɔ́ hɔ́ɔ godɔ́ɔdɔ, yó lɔ́mɔ́ go niibo ná Asaŋa; kɔ́ɔ niibo nɛ́ɛnɛ a mbaá ŋŋaáa, nɛ́ dɛ mbó oba go cí. Moatɛ́, mmba yɔgɔ́nɔ́ɔ mbáá dómbá baapótɛlɛ báaba bóntió, caá akɛ́ yɔmɔ́ɔ, kanɛ́ niibo ná Asaŋa nɛ́ɛnɛ nɛ́ lɔ́mɔ́ namɛ. 11Pɛ́la páŋɛ́ɛ ɛ lɔ́mɔ́ goŋaá, akɛ́ bó bɛ́ɛmba yɔmɔ́ɔ akɛ́ bó bɛ́ɛmba bɔ́ɔ, bɔ́ɔbɔ dɛ oyamɔ́ no báá gɔnɔ́ bó oliminyo, bɔ́bɔ́ɔ.
Púfuge ya begúe
12Aáŋa bó oya bá amɔ́ Kilítusu a mba fúfúgé naá kadɛ́dadɛ́ɛ ya begúe, nɛɛ́nɛ batɔ bóncodío naá kadɛ́gadɛ́ɛ yɛnyɔ́ bó oyamɔ́ bá amɔ́, púfuge ya begúe ɛ dɛ báá o? 13Aáŋa begúe bá dɛ fúfúgénée, Kilítusu tɔ́nɔ a dɛ mbá fúfuge. 14Kɔ́ɔ, aáŋa Kilítusu a dɛ mbá fúfuge, gooya gɛ́cɔ́ na gioliminyo gɛ́nyɔ́ mó lɛ́ kanɛ ŋgénéménée. 15Gɔnɔ́, bó bédúfenye goŋaá dɛ dɛ báá mammana ŋgominyo sá Asaŋa gɔ́ɔgɔ dɛ oyamɔ́ dɛ amɔ́, Asaŋa a mba fúfúné Kilítusu; asáa gɔgɔ́ a dɛ mbá mo fúfune, aáŋa bó lɛ́ mammana goŋaá begúe bá dɛ fúfúgénée. 16Aáŋa begúe bá dɛ fúfúgénée, Kilítusu tɔ́nɔ a dɛ mbá fúfuge. 17Kɔ́ɔ, aáŋa Kilítusu a dɛ mbá fúfuge, gioliminyo gɛ́nyɔ́ gɛ́ lɛ́ naá bɛanana; no gá lɛ́ naá bɛlɔgɔ bɛ́nyɔ́. 18Gó bayɛga hɔ́ɔlɔ́, akɛ́ báaba ba mbaá gúénénée naá gioliminyo gábɔ́ naá Kilítusu, bá mba solá. 19Aáŋa bó lɔ́mɔ́ goana go moóma má cí gɔ́ɔ dɛ mbaá ágá odɛ́má yɛ́cɔ́ naá Kilítusu, mahana nɛcɔ́ makɔ́nɔ́ naá oŋgíso yá batɔ.
20Kanɛ́ mammana, Kilítusu a mba fúfúgé naá kadɛ́gadɛ́ɛ ya begúe; a lɛ́ ba busío go go dúfie goŋaá báaba bá mbaá gúénénée bá ŋga fúfúgénée tɔ́nɔ. 21Ɛɛ́ɛŋ, aŋa mɔtɔ ummue a mbuú úlé na nigúe, nɔ́ɔ gɔ́ɔ tɔ́nɔ mɔtɔ táŋɛ́ ummue u úlenemú na púfuge ya begúe. 22Aŋa biimée bá gúenenemú go gobálada gɔ́ɔgɔ na Ádama, tɔ́nɔ go gobálada gɔ́ɔgɔ na Kilítusu, biimée bá ŋga bɛáa gɛɔyɔ#15.22 gig. 21-22: go ɛ́na naá Mabayɛga 3.17-19; tɔ́nɔ naá Oló 5.12-21.. 23Na onyɔ moánɛ aŋa púfuge ɛ mbaá bákɛsɛ́dá; Kilítusu a lɔ́mɔ́ ba busío go biimée, naá nnyimé, biimée báaba bɔ́ ɔ́bɛnɔnɔmɔ́ nɛhɛ́ naá gɛcamɛna gɛ́ɛgɛ a ŋgaá ncó gunde. 24Manɛ́ kanɛ́ mesúgidinye má ŋgaá háá aŋa a ŋgaá gundínyée Asaŋa Isée bufuŋe, naá nnyimé ya go níŋiside kɔndɔ́ go cí, gɛmánɛgɛna giimée, bufuŋe buimée na bogaaga buimée. 25Mammana bó háanana goŋaá a nona cí gó ɛ́da húme aŋa a ŋgaá ágá babɛlɔ́bɛlɔ bɛ́hɛ́ biimée naá bɛgɔ́ndɔ́ bɛ́hɛ́ cí#15.25 Go ɛ́na naá Ɛsagɔ 110.1.. 26Obɛlɔ́bɛlɔ ba mesúgidinye ba go mo níŋiside kɔndɔ́ go cí a lɔ́mɔ́ nigúe. 27Bó lɛ́ ɔ́ŋɔ́ɔlú goŋaá: «Asaŋa a mba ágá buimée naá bɛgɔ́ndɔ́ bɛ́hɛ́ cí#15.27 Ɛsagɔ 8.7..»
Aŋa ŋgɔ́ŋɛ́ yɛ oyamɔ́ goŋaá: «Buimée bó lɛ́ naá bɛgɔ́ndɔ́ bɛ́hɛ́ cí,» bó lɛ́ mammana goŋaá Asaŋa mɔ́ɔnyɔ a mbaá ágá buimée naá bɛgɔ́ndɔ́ bɛ́hɛ́ cí, mɔ́ɔ moatɛ́ a dɛ báá kɔ́ɔ. 28Aŋa bá ŋgaá ágá buimée naá bɛgɔ́ndɔ́ bɛ́hɛ́ cí, manɛ́ kanɛ́ Moɔnɔ́ moatɛ́ moatɛ a ŋgaá bésiisíe naá cí ya bɛgɔ́ndɔ́ bá mɔ́ɔnyɔ a mbaá mo ágɛ́ná buimée naá bɛgɔ́ndɔ́ cí, go goŋaá Asaŋa a bɛ́ɛmba uŋkimée naá biimée.
29Batɔ bóncodío bá béyumeninye go ufíno yá begúe. Boóma moánɛ bó bó dúgune go ɛkádɛ o? Aáŋa begúe bá dɛ fúfúgénée, goakɛ́ bá béyumeninyemú go ufíno yábɔ́ o? 30Bɛɛcɔ́ɔ moatɛ́ dɛ básɛncɛganamɔ́ naá nigúe gɛcamɛna giimée goakɛ́ o? 31Bolimóní, mbásɛncɛgana miisí miimée naá nigúe bó lɛ́ mammana; bó lɛ́ tɔ́nɔ mammana goŋaá ŋgɔ́bɔnɔ bese nɛnyɔ́ naá gobálada gɔ́ɔgɔ na Yésu Kilítu, Daadáa bɛcɔ́. 32Gɔ́ɔgɔ mbaá noanánáa na nnyama sá bɛsɔgɔ naá Ɛ́fɛsɛ, bó mba lɛ́ bá go túgune goakɛ́ aáŋa bó mba lɛ́ go goɛ́na gá batɔ o? Aáŋa begúe bá dɛ fúfúgénée, ŋgáa dɛ nyáanya dɛ nyóanana goŋaá nembeli dɛ gaá gúé#15.32 Iseyíi 22.13.. 33No do bébelé, bɛbɛ́ bá megúle bɛ́ díeŋenye bɛnɔ́gɔ́ bá ndoŋá. 34Ncó no gunde uŋkimée uŋkimée bɛnyɔ́ naá mammana ya pɛ́, no dɔmbɔ go lɔgɔ, ŋgaá gálɛ́dá nɔ́ɔnɔ go odóɛ nnóa yɛnyɔ́, degédegé naá bɛɛnyɔ́ɔ ɛ dɛ íyíménée Asaŋa.
Nnyɔ́dɔ ya báaba bá ŋgaá fúfúgé
35Mɔtɔ a lɛ́ ba go úhune kanɛ́ nɛɛ́nɛ begúe ba fúfugenemú o? Nnyɔ́dɔ ɛhanɛ́ bá ŋgaá bɛ́ɛ́mbá na yɛ́ o? 36O lɛ́ kanɛ nciŋí o? Gɔ́ɔgɔ go ágamɔ́ camɔ́ go cí, ɛ lɛ go basa. 37Bɔ́ɔbɔ o gónamɔ́ bó do báá mbɔ́gɔ́ ya boóma bɔ́ɔbɔ bó gaá ná basá, bó lɔ́mɔ́ goana camɔ́, akɛ́ ɛ bɛ́ɛmba ya mbasa akɛ́ ya bogónɛ́dá bóhanɛ́ɛ. 38Asaŋa a lɛ go yɛ fáa nnyɔ́dɔ aŋa a lɛ́gamɔ́; camɔ́ iŋkimée na mbɔ́gɔ́ ya yɛ́ kóka.
39Bigedie biimée bɛ́ɛbɛ bɛ́ ɔyɔmɔ́ bɛ́ dɛ báá na mbɔ́dɔ ya nnyɔ́dɔ táŋɛ́ mmue; tádoga ɛ lɛ́ hɔ́ɔ na nnyɔ́dɔ ya mɔtɔ, ya nnyama, ya munoní, ya moɔbɔ́. 40Caŋa mmue, bigedie bá mmoɛná bɛ́ lɛ́ hɔ́ɔ, bá cí bɛ́ lɛ́ hɔ́ɔ; biimée bɛ́ dɛ bósó go bɛanana bonɔ́gɔ́ búmmue eé búmmue. 41Buisí bó bonya kóka, ofɛ́ kóka, muotóti kóka, naá muotóti moatɛ́, gobonya gá mɔ́ gó lɛ́ kóka aá kóka.
42Bó lɛ́ nɔ́ɔ caŋa mmue na púfuge ya begúe; bɔ́ɔbɔ bá mienenemú bó lɛ́ giyiki, aŋa bó fúfugemú, bó do gɔnɔ́ gúenene. 43Bɔ́ɔbɔ bá mienenemú bó lɛ́ mahana kanɛ bogaaga, aŋa bó fúfugemú, bó lɛ́ na nigúmi, bɔ́ na magɛ́nda. 44Bɔ́ɔbɔ bá mienenemú bó lɛ́ nnyɔ́dɔ ya dugúnú aá dugúnú, aŋa bó fúfugemú, Giliíli ba Asaŋa a lɛ go bó fáa mammana ya gɛɔyɔ. Aáŋa nnyɔ́dɔ ya dugúnú aá dugúnú ɛ lɛ́ hɔ́ɔ, yɛ́ɛyɛ Gimmúmpúu gá Giliíli a yɛ fáananamɔ́ gɛɔyɔ, ɛ lɛ́ hɔ́ɔ. 45Ŋgɔ́ŋɛ́ yɛ oya goŋaá: «Mɔtɔ ba busío Ádama a mba lɛ́ gigedie, ɔ ɔyɔ#15.45 Mabayɛga 2.7..» Kanɛ́ Ádama ba mesúgidinye a lɛ́ dácɛ na Giliíli, a dúmbeninye gɛɔyɔ. 46Nnyɔ́dɔ ya dugúnú aá dugunu yɛ́ ɛ́ lɔ́mɔ́ ya busío; yɛ́ɛyɛ ya Giliíli ɛ lɛ go ɛndɛga. 47Mɔtɔ ba busío mɔ́ɔnyɔ bá mbaá gedíe na cánɔ́#15.47 Mabayɛga 2.7., ɔ ɔ́bɛnɔnɔmɔ́ na cí; ba gáandɛ́ɛ mɔ́ɔ ɛ ɛ́damɔ́ go úlene naá mmoɛná. 48Aŋa mɔtɔ ba cí a mbaá lɔ́mɔ́, tɔ́nɔ nɔ́ɔ batɔ bá cí bá lɔ́mɔ́. Aŋa mɔtɔ ba mmoɛná a lɔ́mɔ́, tɔ́nɔ nɔ́ɔ batɔ bá mmoɛná bá ŋgaá bɛ́ɛ́mbá.
49Caŋa mmue aŋa dɛ lɔ́mɔ́ bɛ́ɛ́mbáalú naá púényí ya mɔtɔ ba cí, dɛ ŋga bɛ́ɛ́mbá tɔ́nɔ púényí ya mɔtɔ ba go ɛ́da go úle naá mmoɛná. 50Bolimóní, ndɔ́mɔ́ caá, bɔ́ɔbɔ bó lɔ́mɔ́ gedíelú na nnyɔ́dɔ na manɔ́ŋɔ́, bó do ŋgá bɛa bodáŋɔ naá bufuŋe bá Asaŋa; akɛ́ bɔ́ɔbɔ bó yɛkamɔ́ bó do ŋga bɛa bodáŋɔ naá bɔ́ɔbɔ bó lɔ́mɔ́ bó do gúénénée.
51Godɔ́ɔdɔ, nnco nyó dóoginyo boóma bá nnindíi; bó lɔ́mɔ́ goŋaá, bó do báá bɛɛcɔ́ɔ biimée bá dɛ ŋgaá gúé. Kanɛ́ bɛɛcɔ́ɔ biimée dɛ ná bénúgie. 52Bó ŋgaá bá ŋaáa naá gigeléŋéndée, aŋa gokéfimide, aŋa cɛ́bá ya mesúgidinye ɛ ŋgaá góbá. Gɔ́ɔgɔ cɛ́bá ɛ ŋgaá góbɛ́dá, begúe bá ŋgaá fúfúgénée na nnyɔ́dɔ ya kanɛ go yɛka, bɛɛcɔ́ɔ dɛ ná bénúgie#15.52 go big. 51-52: o bana, go eninye na 1 Tɛs 4.15-17.. 53Bó háanana goŋaá nnyɔ́dɔ yɛ́ɛyɛ ɛ yɛkamɔ́ ɛ bɛ́ɛmba goŋaá ɛ dɛ gɔnɔ́ yɛka. Gɔnɔ́, nnyɔ́dɔ yɛ́ɛyɛ ɛ gúenenemú, ɛ bɛ́ɛmba goŋaá ɛ dɛ gɔnɔ́ gúenene. 54Kanɛ́ gɔ́ɔgɔ nnyɔ́dɔ ya go yɛka yɛ́ɛyɛ ɛ ná ŋamɔ́ ɛ dɛ gɔnɔ́ bɛ́ɛmba ya go yɛka, gɔnɔ́, nnyɔ́dɔ ya go gúenene yɛ́ɛyɛ ɛ ná ŋamɔ́ ɛ dɛ gɔnɔ́ bɛ́ɛmba ya go gúenene, gɔ́ɔ nogálɔ ná Asaŋa nɔ́ɔnɔ nó ŋgɛɛ́ ɛ́nánɛ́náa. Nó lɔ́mɔ́ goŋaá: «Nigúe nɛ́ á maná, gɛmánɛgɛna gɛ́ lɛ́ go busío buimée. 55Nigúe, gɛmánɛgɛna gáhɔ gɛ́haágɛ o? Nigúe, bogaaga báhɔ bá go óna bɔ́ bóhaábɔ#15.55 go gig. 54: Iseyíi 25.8 go gig. 55: Osée 13.14, naá ŋgɔ́ŋɛ́ sá nogɛlɛ́gɛ sá cóá cóá. o?» 56Bogaaga bá nigúe bó úlenemú naá gɛlɔgɔ, gicele gɛ́ fáanana gɛlɔgɔ bogaaga.
57Ŋgáa dɛ béhiigi Asaŋa mɔ́ɔnyɔ a có fáananamɔ́ gɛmánɛgɛna gá Daadáa bɛcɔ́ Yésu Kilítu. 58Gɔ́ɔ, bámɛ bá odɛ́má, bɛ́ɛ́mba nɔnɔ tɛ́ŋɛ́tɛŋɛ no do bádɛ́ɛ́ná, no yɔgɔnɔ buelí bá Daadáa kanɛ tɔmbɛ́nɔ́ɔ, no íyime goŋaá gɛdɔmbɔ gɛ́ɛgɛ no gɔ́lɔnɔmɔ́ go busío bɛ́hɛ́ gɛ́ dɛ solánáa.
Currently Selected:
1 Kɔlɛ́ntɛ 15: YAS
Highlight
Copy
Compare
Share
Want to have your highlights saved across all your devices? Sign up or sign in
