2 Kɔlɛ́ntɛ 1
1
Mbédíígí
1Yɔmɔ́ɔ Póolo, ŋgɔ́ŋɛnɔmɔ́ giimbó gá boolímínyí Asaŋa gɛ́ɛgɛ naá Kɔlɛ́ɛntɛ, tɔ́nɔ na boolímínyí Asaŋa biimée báaba bá lɔ́mɔ́ naá gigísi gá cí gá Ekeyíi giimée. Asaŋa mɔ́ɔ a mbaá ŋgiyídé goŋaá mbɛ́ɛmba apótɛlɛ ba Yésu Kilítu; dɛ lɛ́ olɔŋɔ na ondimóní bamɛ naá gioliminyo Timotée. 2Ŋgáa Asaŋa Isée bɛcɔ́ na Daadáa Yésu Kilítu bá nyó boogo, bá nyó fáa buumbénú.
Asaŋa a gíndenye báaba bá lɔ́mɔ́ naá bɛdɔmbɔ
3Ŋgáa Asaŋa, Isée ba Daadáa bɛcɔ́ Yésu Kilítu, Isée ba go gɔ́lɔnɔ batɔ mahana makɔ́nɔ́, mɔ́ɔ mɔ́ɔnyɔ a lɔ́mɔ́ ufuugí ɛdɛ́má ba bɛcamɛna biimée, a bɛ́ɛmba fonáalú#1.3 O bana, go eninye na Iseyíi 40.1; Ɛsagɔ 94.19.. 4A có fuugenye ɛdɛ́má naá duséésényée dɛ́cɔ́ duimée, go busío bá goŋaá a có fáa magɛ́nda má go fuugenye ɛdɛ́má ya biimée báaba bá lɔ́mɔ́ naá bɛdɔmbɔ, go odɛ́má yá go fuuge yɔ́ɔyɔ bɛcɔ́ moatɛ́ dɛ bɛananamɔ́ naá boayá bá Asaŋa. 5Ɛɛ́ɛŋ, caŋa mmue aŋa Kilítusu a mbɔɔ́ ɔ́bɛ́gɔ́nɔ́ɔ makɔ́nɔ́ go busío bɛ́cɔ́, caŋa tɔ́nɔ mmue, naá gobálada gɛ́cɔ́ gɔ́ɔgɔ na Kilítusu, dɛ bɛananamɔ́ go fuuge gɛ́cɔ́ gá odɛ́má. 6Dɛ lɛ́ naá metúkelíe, kanɛ́ bó lɔ́mɔ́ goŋaá Asaŋa a nyó fáa gofuuge odɛ́má, a nyó sódio. Dɛ lɛ́ naá gofuuge gá odɛ́má, kanɛ́ bó lɔ́mɔ́ goŋaá odɛ́má gofuuge yɔ́ɔyɔ no bɛananamɔ́ naá Asaŋa yó nyó fáa go kélemene bɛdɔmbɔ bímmue eé bímmue bɛ́ɛbɛ bɛɛcɔ́ɔ tɔ́nɔ dɛ lɔ́mɔ́ kɔ́ɔ. 7Kɔ́ɔ, mbémineminie yɛcɔ́ yɛ́ɛyɛ dɛ bɛananamɔ́ naá boayá bɛ́nyɔ́ ɛ lɛ́ tɛ́ŋɛ́tɛŋɛ; dɛ íyimene dɛ amɔ́ no gɔ́lɔnɔ bodáŋɔ naá bɛdɔmbɔ bɛ́cɔ́, Asaŋa a nyó fuugenye tɔ́nɔ ɛdɛ́má aŋa a có fúugenyemú bɛɛcɔ́ɔ. 8Mammana, bolimóní, dɛ dɛ lɛ́gálɛ́gáa goŋaá dɛ lɔbɛnɔ kanɛ go nyó lincie goŋaá gɛɛmba gɛ́ɛgɛ dɛ lɔ́mɔ́ luménéelú na gɛ́ naá gigísi gá cí gá Esíi, gɛ́ mba có nɔdɛ́nɔ́ɔ makɔ́nɔ́ bó báá dómbá bogaaga bɔ́ɔbɔ dɛ mbaá lɔmɔ́ na bɔ́ɔ, gó báá ncó go éme goŋaá, dɛ dɛ gɔnɔ́ bɛa akɛ́ mbémineminie ya go pamba.
9Ɛɛ́ɛŋ, dɛ mba bɛáa mbééníŋínyí ya goŋaá medúgú mɛ́cɔ́ má gɛɔyɔ má á sómbɛ́gɛ́ná. Bó mbaá bádómbánáa nɔ́ɔnɔ goŋaá dɛ dɛ gɔnɔ́ go ágá mbémineminie yɛcɔ́ naá bɛcɔ́ moatɛ́, kanɛ́ dɛ yɛ ágá naá Asaŋa mokáa mɔ́ɔnyɔ a fúfunemú begúe. 10Mɔ́ɔ a lɔ́mɔ́ có sódíolú go mbɔ́dɔ ya nigúe aŋa yɛ́ɛyɛ nɔ́ɔnɔ; a nɛ́ ɛ́dana naá busío a có pembenye go nɛ́; dɛ mba ágá odɛ́má yɛ́cɔ́ naá mɔ́ɔ, a ŋgɛ ɛ́dánáa naá busío a có sódonyo gɔgɔ́. 11Bodáŋɔ bɛ́nyɔ́ tɔ́nɔ bó lɛ́ kɔ́ɔ go mbósógólí yɛnyɔ́ go busío bɛ́cɔ́; kɔ́ɔ, niibo nɛ́ɛnɛ dɛ ŋgaá bɛáa naá boayá bá Asaŋa go mbósógólí sá gɛcɛcá gá batɔ, batɔ gɛca tɔ́nɔ bá ŋga béhiigíi Asaŋa go busío bɛ́cɔ́.
Póolo a á gundíe oŋɛndɔ yɛ́hɛ́ na nnyimé
12Ɛɛ́ɛŋ, gobéségisegi gɛ́cɔ́ gó lɔ́mɔ́ goŋaá odɛ́má yɛ́cɔ́ yó do có goománɛ́náa go boóma, dɛ mbɔ ɔyɔ́ naá boayá bá batɔ bá cí, dómbá dómbáa naá bɛɛnyɔ́ɔ na ibésiisie na bummúmpúu, mɔ́ɔmɔ mó ɛ́damɔ́ go úlene naá Asaŋa, caá akɛ́ go nciŋí ya batɔ, kanɛ́ na niibo ná Asaŋa. 13-14Dɛ dɛ nyó ɔ́ŋɛ́nɔ́nɔ́ɔ kanɛ́ boóma búncodío, aáŋa caá goana bɔ́ɔbɔ no banamɔ́, no gɔnɔ go ɔ́bɔnɔ. A nco go éme godɔ́ɔdɔ, no có ɔ́bɔnɔ gigísi. Kanɛ́ mbémineminie yɛcɔ́ ɛ lɔ́mɔ́ goŋaá no có ɔ́bɔ púmú púmú. Mammana, dɛ lɔ́mɔ́ dɛ amɔ́, dɛ béségisegi gɛ́nyɔ́; caŋa mmue aŋa bɛɛnyɔ́ɔ no ná béségisegimú gɛ́cɔ́ naá buisí bá Daadáa Yésusu goncogunde. 15Na toodo odɛ́máa yɛ́ɛyɛ gɔ́ɔ ŋgaá lɔmɔ́ ndɛ́galɛga go manɛ dómba naá bɛɛnyɔ́ɔ go goŋaá no gɔnɔ ŋgɛ́na, bɛyaŋa bɛ́nyɔ́ bɛ́ gɔnɔ bɛ́ɛmba makɔ́nɔ́. 16Ndɛ́ hɔ́ɔlɔ́ naá bɛɛnyɔ́ɔ, ŋgɛ́da naá Masɛdóanɛ, ŋgúlukie naá Masɛdóanɛ, nco gunde naá bɛɛnyɔ́ɔ, go goŋaá no kedinye buimée bɔ́ɔbɔ bó lɔ́mɔ́ bá go túgune go oŋɛndɔ yámɛ naá Yudée. 17Naá nokɛsa námɛ nɔ́ɔnɔ, bó do mbáa lɛ goŋaá ndɛ́ kanɛ nciŋí, ɛ́na lí bó lɔ́mɔ́ bɛsaŋasaŋa bá batɔ; gó nco go éme goŋaá mbɛ́ɛmba mɔtɔ ba bɛlɛ́mbɛ bɛ́andɛ́; na «Ɛɛ́ɛŋ» na «Akɛ́ɛ.» 18Mammana Asaŋa a lɛ nnyimé yamɛ, nogálɔ nɔ́ɔnɔ dɛ mbaá nyó dúmbínyée nó do mbáa lɛ ná bɛlɛ́mbɛ bɛ́andɛ́, nɔ́ɔ «Ɛɛ́ɛŋ», nɔ́ɔ «Akɛ́ɛ.» 19Ɛɛ́ɛŋ! Moɔnɔ́ ba Asaŋa, Yésu Kilítu, mɔ́ɔnyɔ dɛ mbaá nyó dúménínyée, yɔmɔ́ɔ Póolo, Sɛlɛfɛ́ŋɛ na Timotée#1.19 Go ɛ́na naá Meŋ 18.5., a dɛ mbáa lɛ ba bɛlɛ́mbɛ bɛ́andɛ́, mɔ́ɔ «Ɛɛ́ɛŋ», mɔ́ɔ «Akɛ́ɛ», a lɔ́mɔ́ goana «Ɛɛ́ɛŋ.» 20Mammana! «Ɛɛ́ɛŋ» mɔ́ɔnyɔ mɔ́ɔ a hóogonyomú tánɔ sá Asaŋa iŋkimée. Tɔ́nɔ gɛ́hɛ́ gɔ́ɔ dɛ oyanɛnamɔ́ Asaŋa go nigúmi nɛ́hɛ́ dɛ amɔ́ Aamɛnɛ. 21Asaŋa mɔ́ɔ a mbaá có iyídé, mɔ́ɔ a gɔnɔmɔ́ có gíndenye nɛnyɔ́ kɛ́ naá gobálada gɔ́ɔgɔ na Kilítusu. 22Mɔ́ɔ a mbaá gɔnɔ́ có ágá gibélincígínyí gɛ́hɛ́, a báá có fáá Giliíli bɛhɛ́ naá odɛ́má, bó dúfenye goŋaá dɛ ɔ́bɛnɔnɔ nɛhɛ́. Giliíli moánɛ mɔ́ɔ a lɔ́mɔ́ bodáŋɔ bá busío naá madáŋɔ máama a có bɛ́dɛganɛnamɔ́. 23-24Ɔ́bɔ́ nɔnɔ kanɛ́ bese bese, aáŋa ndɛ́ kanɛ go nco gunde naá Kɔlɛ́ɛntɛ, bó mbaá lɛ goŋaá cɛ ncó nyó ágá naá gɛdɔmbɔ. Asaŋa a lɛ́ ŋgominyo yamɛ, aáŋa mbelebele, ŋgáa kúe.
Currently Selected:
2 Kɔlɛ́ntɛ 1: YAS
Highlight
Copy
Compare
Share
Want to have your highlights saved across all your devices? Sign up or sign in
