1 Kɔlɛ́ntɛ 14
14
Meelí gɔ́nɔ́ má Gimmúmpúu gá Giliíli
1Fúmbée nɔnɔ kanɛ́ go lɛ́ganalɛgana otóotoɛ yá boóma buimée, no gɔnɔ lɛ́ga tɔ́nɔ pááná sá Giliíli, dómbá dómbáa yɛ́ɛyɛ ya go dúmbenye Nogálɔ aŋa mbúsí sá Asaŋa. 2Mɔtɔ mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée a dɛ gálágáláa go busío bá batɔ, kanɛ́ Asaŋa mɔ́ɔ ɔ ɔ́bɔnɔ. Mɔtɔ a dɛ ɔ́bɔ́nɔ́ɔ nnindíi ya dogálɔ dɔ́ɔdɔ a buŋemú na bogaaga bá Giliíli. 3Kanɛ́ mɔ́ɔnyɔ a dúmbenyemú Nogálɔ aŋa mbúsí sá Asaŋa a gálagalamɔ́ go busío bá batɔ; a bó gúninenye naá gioliminyo, a bó gíndenye, a bó bobonyo ɛdɛ́má. 4Mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée, a bɛanana besé yɛhɛ́ ya mokáa, kanɛ́, mɔ́ɔnyɔ a dúmbenyemú Nogálɔ aŋa mbúsí sá Asaŋa, a ŋanana besé go boolímínyí biimée. 5Ndɛ́galɛga goŋaá bɛɛnyɔ́ɔ biimée no gálagala dogálɔ dɔ́ɔdɔ bá lɔ́mɔ́ bá dɛ íyíménée. Kanɛ́, kɔnɔ dómba go lɛ́galɛga goŋaá no dúmbenye Nogálɔ aŋa mbúsí sá Asaŋa. Mammana, mɔ́ɔnyɔ a dúmbenyemú Nogálɔ aŋa mbúsí sá Asaŋa, a lɛ́ gɛantáa a dómbana mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée, aáŋa bó do bɛ́ɛ́mbá goŋaá mɔ́ɔnyɔ moánɛ a falona dogálɔ dɔ́ɔdɔ goŋaá boolímínyí bá gónɛna naá gioliminyo. 6Bolimóní, ŋgáa dɛ gɔ́lɔ gieninye gɛ́ɛgɛ: caá ŋgúle naá bɛɛnyɔ́ɔ, mbɛ́ɛ́ ɛ́dá go nyó gálagala dogálɔ dɔ́ɔdɔ bá lɔ́mɔ́ bá dɛ íyíménée, aáŋa cɛ nyó dóógínyóo boóma, aáŋa cɛ nyó fáá goíyime, aáŋa cɛ nyó dúmbínyée Nogálɔ aŋa mbúsí sá Asaŋa, aáŋa cɛ nyó húúnényée, cɛ nyó dúgúnée akɛ́ go boóma. 7Bó lɛ́ caŋa mmue aŋa mogóbagóbáa má gibíné mɔ́ɔmɔ mó lɔ́mɔ́ ncolí na timbilí; aáŋa ikelú ya mɔ́ ɛ dɛ báá kókakókáa, bá gaá ná lɛncá goómba gá mɔ́ nɛɛ́nɛ o? 8Aáŋa ɛdɔ́ŋɔ há bidé ɛ dɛ ómbáa hɛ́ selunenye bese, ánɛ́ɛ a gaá ná bégedíe go nɛnoa o? 9Caŋa mmue, aáŋa dogálɔ dɛ́nyɔ́ dó do oyáa boóma bá go ɔ́bɔ, dó dómbana aŋa ufufu. 10Dogálɔ dó lɛ́ mbɔ́dɔ aá mbɔ́dɔ naá cí, kanɛ́ nuimée nó oya boóma. 11Kɔ́ɔ, aáŋa cɛ íyíménée nogálɔ ná mɔ́ɔnyɔ a kálagalamɔ́, ndɛ́ uŋunyí naá boayá bɛ́hɛ́, mɔ́ɔ tɔ́nɔ uŋunyí naá boayá bámɛ. 12Go busío bɛ́nyɔ́, bó lɛ́ caŋa mmue; aŋa no lɛ́galɛgamɔ́ pááná sá Gimmúmpúu gá Giliíli, sɛ́ fúmbéemú nɔnɔ gɛcamɛna giimée na bogaaga, bó bɛ́ɛmba kanɛ́ go goŋaá giimbó gá boolímínyí gɛ́ gónɛna naá gioliminyo. 13Go busío moánɛ gɔ́ɔ, mɔ́ɔnyɔ a gálagalamɔ́ dogálɔ dɔ́ɔdɔ bá lɔ́mɔ́ bá dɛ íyíménée a háanana go bósógolonyo goŋaá a bɛa pááná ya go dó falona. 14Aáŋa mbósógolonyo na dogálɔ dá basɔ́gɔ́ɔ, odɛ́má yámɛ yɔ́ yó lɔ́mɔ́ naá mbósógólí, kanɛ́ muúne mámɛ má dɛ yɔgɔ́nɔ́ɔ.
15Ndɔ́mɔ́ ba go ŋa kanɛ́ nɛɛ́nɛ o? Kaá bósógólónyóo aŋa Giliíli a túfenyemú, kanɛ́ tɔ́nɔ muúne mámɛ kɔ́ɔ. Kaá ágánáa ɛsagɔ aŋa Giliíli a túfenyemú, kanɛ́ kaá yɛ ágánáa muúne mámɛ kɔ́ɔ. 16Kɔ́ɔ, go amɔ́ béhiigi Daadáa goana aŋa odɛ́má yáhɔ yó go dómanamɔ́, aáŋa mɔ́ɔnyɔ a bódólonyomú naá gitúu a dɛ íyíménée bɔ́ɔbɔ go oyamɔ́, nɛɛ́nɛ a lɔ́mɔ́ ba go oliminyo a amɔ́ Aamɛnɛ naá mbósógólí yahɔ ya bibéhiigí o? 17Kanɛ cuŋíi, mbósógólí yahɔ ya bibéhiigí ɛ lɛ́ gɛnɔ́gɔ́, kanɛ́ ɛ dɛ ohígónyóo sɔ́gɔ́ɔ go boóma. 18Mbéhiigi Asaŋa go gɔ́ɔgɔ kálagalamɔ́ dogálɔ dá basɔ́gɔ́ɔ nnyó dómbana bɛɛnyɔ́ɔ biimée. 19Kanɛ́ naá giimbó gá boolímínyí, bó lɛ́ bese kálɛda dogálɔ dótáanɔ dɔ́ɔdɔ bá lɔ́mɔ́ ba go ɔ́bɔ go go húunenye, gó dómba goŋaá kálagala gɛcɛcá gá dɔ́ɔdɔ bá lɔ́mɔ́ bá dɛ ɔ́bɔ́nɔ́ɔ.
20Bolimóní, go mbɔ́dɔ yɛnyɔ́ ya goɛ́nana moóma, no do bɛ́ɛ́mbá aŋa bihelege; naá goŋanana gá bobɛ́, bɛ́ɛ́mba nɔnɔ aŋa bihelege. Go goɛ́nana gɛ́nyɔ́ gá moóma, bɛ́ɛ́mba nɔnɔ bɛgɔ́nɛ́naga bá batɔ. 21Bó lɛ́ naá Ŋgɔ́ŋɛ́ goŋaá: «Daadáa a amɔ́, go batɔ bá nogálɔ núntió, gɔnɔ́ na eŋgúdé yá biinyí, ka ŋga gálágáláa boɛ́nɔ bɔ́ɔbɔ, akɛ́ nɔ́ɔnɔ bó do ŋgá ŋgɔ́bɔ#14.21 Iseyíi 28.11-12..»
22Gɔ́ɔ bó lɔ́mɔ́, dogálɔ dɔ́ɔdɔ bá lɔ́mɔ́ bá dɛ íyíménée dó lɔ́mɔ́ gilincie go báaba bá lɔ́mɔ́ bá dɛ olimónyóo, caá akɛ́ go báaba bó olimonyomú. Go dúmbenye gá Nogálɔ aŋa mbúsí sá Asaŋa gó lɛ́ gilincie go báaba bó olimonyomú, caá akɛ́ go báaba bá lɔ́mɔ́ bá dɛ olímónyóo. 23Ŋgáa dɛ no ága gieninye gɛ́ɛgɛ dɛ amɔ́, boolímínyí biimée bá amɔ́ bá bábándɛgɛna, gɔnɔ́ biimée bá bɛ́ɛ́ ɛ́dá go gálagala dogálɔ dɔ́ɔdɔ bá lɔ́mɔ́ bá dɛ íyíménée, batɔ báaba bá nyó bódólonyomú ɛ́na lí bindiolímínyóo bɛ́ búú úlé bɛ́ bíí íŋéné, bá dɛ gaá nyó gɔ́lɔ́ aŋa begeegú o? 24Kanɛ́ aáŋa biimée bá dúmbenye Nogálɔ aŋa mbúsí sá Asaŋa, gindiolímínyóo ɛ́na lí mɔtɔ mɔ́ɔnyɔ a bódólonyomú a búú úlé a bíí íŋéné, a goó olímínyóo gɛoba gɛ́hɛ́ go bɔ́ɔbɔ a báá nɔ́ ɔ́bɔ́, bó sómba gɛsɛnɛ gɛ́hɛ́. 25Mbééníŋínyí sɛ́ɛsɛ naá odɛ́má yɛ́hɛ́ sɛ́ báa go dambɛmɛda, a lɛ go dába busío go cí a búlugenye Asaŋa a amɔ́: «Mammana, Asaŋa a lɛ́ naá kadɛ́gadɛ́ɛ yɛnyɔ́.»
Gokɛsa gá mbúlugie naá giimbó gá boolímínyí
26Bolimóní, dɛ lɔ́mɔ́ bá go ŋa kanɛ́ nɛɛ́nɛ o? Gɔ́ɔgɔ no bábándɛgɛnamɔ́, ummue naá bɛɛnyɔ́ɔ a lɛ́ ba go ágana osagɔ, ummue a húunenye, uncodío a dúmbenye Nogálɔ aŋa mbúsí sá Asaŋa; uncodío gɔnɔ́ a lɛ́ ba go gálagala dogálɔ dɔ́ɔdɔ bá lɔ́mɔ́ bá dɛ íyíménée, ɛ́na lí, a dó falona. Ŋgáa buimée bó báŋa goŋaá biimée bá gónɛna naá gioliminyo. 27Aáŋa batɔ bá gálagala dogálɔ dɔ́ɔdɔ bá lɔ́mɔ́ bá dɛ íyíménée, ŋgáa báandɛ́ ɛ́na lí bádadɔ́ bá gálagala, go ummue go ummue. Kanɛ́, ŋgáa mɔtɔ ummue a falona. 28Aáŋa mɔtɔ ba go falona a dɛ báá, ŋgáa mɔ́ɔnyɔ a gálagalamɔ́ naá gitúu a dɔmbɔ go gálagala ukelú naá mmoɛná, o oya ŋkanɔ́ na Asaŋa naá mɔ́ odɛ́má. 29Go báaba bá dúmbenyemú Nogálɔ aŋa mbúsí sá Asaŋa, ŋgáa báandɛ́, ɛ́na lí bádadɔ́ bá gálagala, báaba bóncodío bá hɛnyahɛnya bɔ́ɔbɔ bá gálagalamɔ́. 30Kanɛ́ ummue naá báaba bá lɔ́mɔ́ hɔ́ɔ a amɔ́ a bɛa nogálɔ nɔ́ɔnɔ Asaŋa a mo dóoginyomú, ŋgáa mɔ́ɔnyɔ a gálagalamɔ́ a máma. 31No lɛ́ ba go dúmbenye Nogálɔ aŋa mbúsí sá Asaŋa, onyɔ moánɛ naá nnyimé ya sɔ́gɔ́ɔ, go goŋaá no bɛa nciŋí no bégúluminye naá gioliminyo. 32Báaba bá dúmbenyemú dogálɔ dɔ́ɔdɔ nɔ́ɔnɔ aŋa mbúsí sá Asaŋa, bá sɛmɛganana go bégumbene odɛ́má. 33Ɛɛ́ɛŋ! Asaŋa a dɛ báá Asaŋa ba go beŋgelenye, kanɛ́ a lɔ́mɔ́ Asaŋa ba buumbénú.
Aŋa bó báŋananamɔ́ naá biimbó bá boolímínyí Asaŋa biimée, 34ŋgáa bakɔ́dɔ bá mámana naá biimbó. Bá dɛ bɛanánáa nɛgaŋa ná go gɔ́lɔ nogálɔ; bá háanana go bésiisie, aŋa gicele gá Mɔ́sɛsɛ gɛ́ oyamɔ́. 35Aáŋa bá lɛ́galɛga go íyime boóma, onyɔ moánɛ a háanana go gúluge u úhune onɔ́mɛ naá nnyaŋá. Bó do báá bese goŋaá okɔ́dɔ a gɔ́lɔ nogálɔ naá giimbó gá boolímínyí. 36No béeniŋenye no amɔ́ nogálɔ ná Asaŋa nó mbaá ncó go úle naá bɛɛnyɔ́ɔ lí? No lɛ́ bákáa bá go nó gɛ́ndɛgɛna lí? 37Aáŋa mɔtɔ a béeniŋenye a amɔ́ a lɛ́ mbúsí ya Asaŋa ɛ́na lí, a bɛanana pááná ya Gimmúmpúu gá Giliíli, a háanana go lɛnca goŋaá bɔ́ɔbɔ nnyó ɔ́ŋɛnɔmɔ́ bó lɔ́mɔ́ gɛlɔsɛnɔ gá Daadáa. 38Aáŋa mɔtɔ a dɛ íyímé nɔ́ɔnɔ, bó dúfenye goŋaá Asaŋa tɔ́nɔ a dɛ mo íyíménée. 39Gɔ́ɔ, bolimóní, fúmbée nɔnɔ na bogaaga goŋaá no dúmbenye dogálɔ aŋa mbúsí sá Asaŋa, kanɛ́, no do legé goŋaá batɔ bá gálagala dogálɔ dɔ́ɔdɔ bá lɔ́mɔ́ bá dɛ íyíménée. 40Ŋanánáa nɔnɔ buimée naá puuu na naá gokɛsa.
Currently Selected:
1 Kɔlɛ́ntɛ 14: YAS
Highlight
Copy
Compare
Share
Want to have your highlights saved across all your devices? Sign up or sign in
