1 Kɔlɛ́ntɛ 13
13
Gɛnɔ́ɔ́nɛ́nɔ́ naá bolimóní
1Gɔ́ɔgɔ ka ŋgaá gálágáláa dogálɔ dá batɔ, akɛ́ dá bɛɛ́ŋgɛlɛsɛ, aáŋa cɛ báá na gɛnɔ́ɔ́nɛ́nɔ́, ndɛ́ goana aŋa ŋgóŋó yɛ́ɛyɛ yɛ ɔ́ŋɔnɔmɔ́ na incéŋé hɛ́ɛhɛ hɛ́ gidemú. 2Gɔ́ɔgɔ ka ŋgaá bɛáa bogaaga bá go dúmbenye dogálɔ dá mbúsí sá Asaŋa; akɛ́ mbɛa goɔ́bɔ gá moóma má nnindíi muimée, akɛ́ mbɛa goíyime gá buimée; akɛ́ mbɛa gɛantáanta gá gioliminyo gá go bála ɛgɔndɔ#13.2 O bana, go eninye na Mot 17.20; 21.21; Mél 11.23., aáŋa cɛ bɛanánáa gɛnɔ́ɔ́nɛ́nɔ́, cɛ báá boóma. 3Gɔ́ɔgɔ ka ŋgaá abánáa bancanáncana bonɔ́mɛ bámɛ buimée, gɔ́ɔgɔ akɛ́ ka ŋgaá bɔ́dɔ́yɛ́gɔ́, aáŋa cɛ báá na gɛnɔ́ɔ́nɛ́nɔ́, bɔ́ɔbɔ bó lɛ́ go dugúnú.
4Gɛnɔ́ɔ́nɛ́nɔ́ gɛ́ lɛ́ na gobánona gá odɛ́má, gɛ́ yɔgɔnɛnɔ basɔ́gɔ́ɔ. Gɛ́ lɛ́ kanɛ hɛagá, gɛ́ dɛ gayábáa, gɛ́ dɛ béségíségíi. 5Gɛ́ dɛ ŋanánáa boóma bá odóɛ gonóa. Gɛ́ dɛ fúmbée besé ya gɛ́ mokáa, gɛ́ dɛ ɔ́bɔ́nɔ́ɔ mpímí, gɛ́ dɛ bábɛ́dɛ́gánáa bobɛ́. 6Gɛ́ dɛ békelényée na moóma má mmɛndɛ́ɛ, gɛ́ ɔ́bɔnɔmɔ́ besé na mammana. 7Gɛnɔ́ɔnɛ́nɔ́ gɛ́ héehinenye buimée, gɛ́ olimonyo buimée, gɛ́ lɛ́ na mbémineminie go buimée, gɛ́ bánona odɛ́má go buimée.
8Gɛnɔ́ɔ́nɛ́nɔ́ gɛ́ dɛ ŋgá mana; cɔ́mɔ sá mbúsí sá Asaŋa sɛ́ ŋga sómbɛ́gɛ́ná, dogálɔ dó ŋga maná, goíyime gó ŋga sómbɛ́gɛ́ná. 9Goíyime gɛ́cɔ́ gó lɛ́ gigísi, godúmenye gɛ́cɔ́ gá cɔ́mɔ sá mbúsí sá Asaŋa gó lɛ́ gigísi. 10Aŋa gɔ́ɔgɔ bɔ́ɔbɔ bó dómbamɔ́ bese makɔ́nɔ́ bó ŋgaá bɛ́ɛ́mbá, bá gigísi bó ŋga sómbɛ́gɛ́ná.
11Gɔ́ɔgɔ mmbaá lɔmɔ́ gihelege, mmba lɛ́ kálagala, mbéeniŋenye, kundenye aŋa gihelege. Aŋa mmbɛɛ́ ɛ́yá ogɔ́nɔ́, mbáá bófoolío moóma má buhelege. 12Godɔ́ɔdɔ dɛ ɛ́nana moóma fiífií, dɛ mó ɛ́nana aŋa naá gɛbálɛ́ŋana. Kanɛ́ naá goɛ́da go úle, dɛ ŋgɛ ɛ́nánáa dalaŋanyɛ. Godɔ́ɔdɔ goíyime gámɛ gó lɛ́ gigísi, kanɛ́ naá goɛ́da goúle, ka ŋgi íyímé Asaŋa go busío buimée aŋa mɔ́ɔ a ŋgíyimenemú.
13Godɔ́ɔdɔ, moóma má módadɔ́ mɔ́ɔmɔ mó lɔ́mɔ́ gioliminyo, mbémineminie na gɛnɔ́ɔnɛ́nɔ́ mɔ́ mó síenemú; kanɛ́, gɛnɔ́ɔ́nɛ́nɔ́ gɛ́ lɛ́ gɛantáanta gɛ́ dómba muimée.
Currently Selected:
1 Kɔlɛ́ntɛ 13: YAS
Highlight
Copy
Compare
Share
Want to have your highlights saved across all your devices? Sign up or sign in
