2 Timɔtɛ́ɛ 4
4
Timɔtɛ̂ɛ sɑ́Ꞌ Ŋkʉʉ Sʉ́Ꞌnɛ
1N tʉ́ʉ mbi Sɛ́ mbɑ mbi Yɛ́su Kɛlístɔ wi ɑ tsʉ́Ꞌ ńtɔ́ tɔ́nɛ nɛzɑ́Ꞌ ntsɑŋ yɔ́p pʉɔ ntʉʉ mbɑ yɔ́p pɛpfú, ɛ́fú nǔu pɑ́Ꞌ ɑ ɡʉ ŋ́ɡɛ ńtɔ́ ńnɔŋ nɛfɔɔ nɛ́, n tʉ́ʉ mbi pɔ́p ńcú mbɔ̌ ɡu ŋɡɔ: 2«Sɑ́Ꞌ Ŋkʉʉ Sʉ́Ꞌnɛ-Sɛ́, ńtsuŋ ńzɛ́plɛ ŋkɑ́ yi pʉɔ kɔŋnɛ nɛzúꞋ, kɛ mbɑ ŋkɑ́ yi pɔ́p ŋ́kɔŋ nɛzúꞋ pɔ́, ɔ sɑ́Ꞌ sɑ́Ꞌnɛ. Ŋu fɑɑnɛ nu ɔ kɑkŋɛ wɛ́, ɛ́sɑ́Ꞌ ńdɔk ḿbɑpmɛ wɔ́p, ɛ́sɑ́Ꞌ ńdɔk ńníꞋ mɛtʉʉ mɔ́p. Kɑ́t ŋ́ɡɛ pɔ́Ꞌɔ, ńdɔk sʉktʉ́m ńzíꞋ pʉɔ nɛ́ yúu. 3N cú mbíꞋŋɡɔ yɛcɔ́ ŋkɑ́ ɡʉ ŋ́ɡɛ ḿbɔ́, pʉɔ pɔɔ pɛn ŋ́kɔŋ nɛzẅíꞋlɛ nu nɛ́nẅín yi pɛ́ zíꞋnɛ nǔu Yɛ́su Kɛlístɔ pɔ́, lɑ́ pɑ́Ꞌ pɔ́p kɔŋ nɛzẅíꞋlɛ pɔ nu yi tʉ́m yɔ́p tsɑ́ɑnɛ lɑ́, ńdɔɔ pɔ́p pɑzíꞋ wɔ́p nɛ́ yúu tɛ ɛ́ zɑ́ɑ zɑ́ɑnɛ. Pɔ́p zíꞋ wɔ́p nɛ́ nu yi pɔ́p kɔŋ nɛzúꞋ. 4Pɔ́Ꞌɔ lɑ́, pɔ́p zʉʉnɛ mɛtúutɛ́ mɔ́p, ńtsʉ́Ꞌ ńzẅíꞋlɛ pɔ mɛnu-mɑ́pitsɔ́Ꞌ.» 5Lɑ́ ŋ́ɡʉ nǔu ɡu, ɡɛ yú mbɑ kʉ̈ɔ́ lɑ́ ɛ́ kuꞋ kuꞋnɛ. Ŋɡʉ̈ɔ́Ꞌ kúu wú ɔ sʉk sʉknɛ. Kɛ́ ḿbɔ́ ɛ́fɑꞋ pɔ fɑꞋ yú yi ɛ́ nɛcẅi Ŋkʉʉ Sʉ́Ꞌnɛ-Sɛ́ mbɔ̌ pʉɔ. Ɛ́fɑꞋ fɑꞋ-Sɛ́ yi ɔ nǔu sʉ́Ꞌnɛ.
6Ɛ́ ɡʉ nǔu mɔ, mbɔ wɑɑ nɛfú ndǔ tsɛtsɑ́Ꞌ ŋ́ɡʉ sɛ́ ŋ́kuꞋ. Ŋkɑ́ kuꞋ pɑ́Ꞌ pɛ́ ɡʉ ńjẅí wɑ́ɑ, ɛ́ lɔk ḿbɔ́ pɑ́Ꞌ wɑ́ɑ pɔꞋ ẅi pɛ́ nɔɔnɛ mbi Sɛ́. 7Ŋ kɑ kɛ́ ḿbɔ́ ḿmɑꞋ yɑ́ɑ pɔ ntsɔ sʉ́Ꞌnɛ, ŋ kɑ kʉɔ ndʉ́ɔlɛ́ tɛ ŋ́kúu ndẅiklɛ. Ŋ kɑ kɛ́ ḿbɔ́ ńzɑ́p pɔ tʉ́m nǔu Yɛ́su. 8Ɛ́ nǔu ŋkɔ̂ɔnɛ, mbɔ tsɔ́ꞋfɑꞋ yi pɛ́ ɡɑ́nɛ mbɔ̌ ŋu ẅí ɑ kʉɔnɛ ndʉ́ɔlɛ́ tɛ ńjʉ́ sɛ́ ḿbyɛ́p wɑ́ɑ. Yîyɑ́ tsɔ́ꞋfɑꞋ ɛ́ pɑ́Ꞌ ŋ ɡɛnɛ nu yi ɛ́ ndʉ́ŋndʉŋ. Tsɑpʉɔ ẅi ɑ zɑꞋnɛ ntsɑŋ pɔ ndʉ́ŋndʉŋ, ɑ ŋ́ɡɛ ŋ́ɡɑ́ mbɔ̌ mɔ nǔu lɛ́Ꞌ yi ɑ ɡʉ ńzɑ́Ꞌ mɛtsɑŋ. A kɛ́ lɑ́Ꞌ ŋ́ɡɑ́ pɔ ndɑꞋ mbɔ̌ mɔ pɔ́. A ɡʉ ńdɑ́Ꞌ ḿbɛn ŋ́ɡɑ́ mbɑ mbɔ̌ pʉɔ pi pɔ́p sɛ́ ńtsɑ́ɑ nɛjʉ́ɔ ŋkɑ́ yi ɑ ŋ́ɡɛ ńcẅɛt.
Pɔ̂l sɛ́ ŋ́ɡɑ́ ndẅiknzʉʉ sẅiŋɛ mbɔ̌ Timɔtɛ̂ɛ
9Sɑ́Ꞌ tʉʉ fɛ́Ꞌnɛ ńtɔ́ ŋ́kẅɛ́ɛtɛ wɑ́ɑ zɑ́Ꞌnɛ. 10MbíꞋŋɡɔ Ndɛmɑs ḿmɛꞋ wɑ́ɑ, ɑ kɔŋ yúu-ndǔmbí tɛꞋ. Yîyɑ́ kɑ ɡɛnɛ ɑ ɡʉ nɛ́ tʉ́sɔŋ-Tɛsɑlɔnik. Kɛlɛ́sɛn ɡʉ nɛ́ pɑk-ŋɡɔŋ-Ŋɡɑlɑ̂t, Titɛus ɡʉ nɛ́ pɑk-ŋɡɔŋ-Ndɑlmɑtîi. 11Pɛk Lúkɑ́shi tsʉ́Ꞌnɛ ḿbɔ́ zɑ́Ꞌnɛ. Ɔ lɑɑ ŋ́ɡɔ ńtɔ́, pʉʉ Mɑ́lɛ́kúshi pɔ́nɛ, mbíꞋŋɡɔ ɑ ɡʉ ńtsuŋ ńcẅɛ́lɛ́ wɑ́ɑ nǔu fɑꞋ-Sɛ́. 12Ŋ kɑ ńtúu Tishik tʉ́sɔŋ-Ɛ́fɛ̂zɛ. 13Ɔ lɑɑ ḿbɔ́ ńtɔ́, ɔ lɔk ndẅí-fɑ́k yɑɑ yi ŋ kɑ nɑ́nɛ tʉ́sɔŋ-Tɔ̂lɑ́s njɛ́Ꞌ Kɑlpûs ńdɔk ńtɔ́, ḿbɛn ńdɔk mbɑ mɛŋwɑꞋnɛ ńtɔ́, kɔɔ likŋɛ mi ɛ́ pɔ́ pɔ ŋɡup-nɑɑ lɑ́.
14Jí ŋɡɔ Alɛkzɑ̂ŋndɛlɛ ẅi ɑ tɑ̌ɑlɑɑ lɑ́, kɑ ɡɛ nu kɛpɔŋ nǔu mɔ tɛꞋ. Tsɑpʉɔ ɡʉ ńdɑ́Ꞌ ńtsɔ́Ꞌ fɑꞋ yɛ́ nǔu mɛnu mi ɑ kɑ ɡɛnɛ. 15Mbɑ ɡu yú lʉ́ɔꞋ wɛ́, mbíꞋŋɡɔ ɑ kɑ tɔꞋ nu yi pɛk kɑ pɔ́ ńzíꞋ pʉɔ tɛ ńzɑ́Ꞌ ŋkwɑɑ.
16Ɛ́ ɡʉ nǔu nu yɑ́ɑ, mbɔ ŋ kɑ pɔ́ nduŋmbi ŋkɑ́ yi ŋ kɑ ɡʉnɛ zʉꞋ-ntsɑŋ zɔŋ tú yɑ́ɑ. Pʉɔ tsʉʉ ḿmɛꞋ wɑ́ɑ, n cẅɛt zɛ́nɛ mɔ. Sɛ́ likŋɛ yîyɑ́ nu ŋ́ɡɑ́ mbɔ̌ pɔ́p! 17Pɔ́p kɑ mɛꞋ wɑ́ɑ pɔ́Ꞌɔ, Tsɑpʉɔ pɔ́ ńtɔ́ɔtɛ wɑ́ɑ. Ɛ́fú ntsu-pɛpúꞋntʉʉ ńcẅɛɛtɛ wɑ́ɑ, ŋ́ɡɑ́ mɛtʉʉ mbɔ̌ mɔ, n cẅi Ŋkʉʉ wɛ́ pɑ́Ꞌ ɛ́ sɛ́ ḿbíkŋɛ ŋɡɔ pɛ́ cẅi, tɛ pʉɔ pi pɔ́p kɑ́ pɔ́ pɑyúdɑ pɔ́ zúꞋ pɛtsʉʉ. 18Tsɑpʉɔ ɡʉ ŋ́ɡɛ ɛ́fú nǔu nu kɛpɔŋ ntɛ́ nɛ́ ntɛ́ ńcẅɛɛtɛ wɑ́ɑ, ŋ́ɡɛ ńduk nɛpɔ́ yi ŋ ɡʉ ŋ́kúu tsɛt nɛfɔɔ nɛ́ tʉ́nɛ́pú. Gúꞌlɛ pɔ́ mbɔ̌ Tsɑpʉɔ mɛŋɡuꞋ mɛŋɡuꞋ. Ɛ́ pɔ́Ꞌɔ.
CɛꞋlɛ
19CɛꞋlɛ Pɛlɛsîl pɔ́p Akilɑs ŋ́ɡɑ́ mbɔ̌ mɔ. ŃcɛꞋlɛ mbɑ pʉɔ-njɛ́Ꞌ-Ɔnɛzifɔɔ. 20Ɛlɑstɛ kɑ ɡɔ́ŋ tʉ́sɔŋ-Kɔlɛ̂ŋntɛ. Ŋ kɑ nɑ́ Tɔlɔfîm tʉ́sɔŋ-Milɛ̂ ɑ pɔ́ ŋ́ɡɔɔ. 21Sɑ́Ꞌ tʉʉ ńtɔ́ lɑ ŋkɑ́-fɑ́k zɛ. Ɛbulûs, mbɑ Pudɛ̂ns, mbɑ Linus, mbɑ Kɛlɔ́dyɑ ŋ́ɡɛ pɔ́ɔpɛ́mɑ́ tsʉʉ sɛ́ ńcɛꞋlɛ wú. 22Tsɑpʉɔ pɔ́ nɛ́ ɡu! Ḿbɔ́ ńníꞋ mbɔ́tnɛ yɛ́ tʉ́m pʉʉ pɛtsʉʉ.
Currently Selected:
2 Timɔtɛ́ɛ 4: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
