1 Kɔlɛ̂ŋtɛ 6
6
Nu nǔu pɑ́Ꞌ pɔ́ɔpɛ́mɑ́ fɛnnɛ mɛntsɑŋ mɔ́p mbɔ̌ pʉɔ-píi
1Ɛ́ ɡɛ pɑ́Ꞌɑ lɑ ŋu wʉʉ pɔ́p wɛcɔ́ ŋu-Kɛlístɔ ɡẅɛɛ ntsɑŋ ɑ pɛ́t kɛ́ lɔk ŋ́ɡʉ ńjʉ́ɔ pʉɔ-Sɛ́ pɔ́p ŋ́ŋɑk, ŋ́ɡʉ ńjʉ́ɔ pɔ pʉɔ pi pɔ́p kɑ́ jí Sɛ́ pɔ́ ɔɔ? 2Pʉʉ kɑ́ pɔ́ ńjí ŋɡɔ pʉɔ Ndɛ́ɛnɛ Lɛ́ɛnɛ́nɛ ɡʉ ńdɑ́Ꞌ lɛ́Ꞌ ŋ́ŋɑk pʉɔ-ndǔmbí pɔ́ kɛ? Ɛ́ lɑɑ ḿbɔ́ yi pʉʉ ɡʉ ńdɑ́Ꞌ ŋ́ŋɑk pʉɔ-ndǔmbí, mbɔ kʉ̈ɔ́ ḿbɛn ŋ́ɡɛ pʉʉ pɔɔ kuꞋ nɛŋɑk mɛnu mi ɛ́ zɛɛ mbɔɔ yɛcɔ́ yúu kuꞋ? 3Pʉʉ kɑ pɔ́ ńjí ŋɡɔ pɛkŋɛ ɡʉ ńdɑ́Ꞌ ŋ́ŋɑk pɛcʉ̈ɔ́Ꞌ-Sɛ́ pɔ́ kɛ? Tɛ ŋkɑ́ yɛ́sʉ́Ꞌ nǔu mɛnu mɛ́ ŋkɔ̂ɔnɛ? 4Lɑ́ pʉʉ kɛ́ ḿbɔ́ tɛ ntsɑŋ yi ɛ́ líŋɛ́nɛ mɛnu mɛ́ ŋkɔ̂ɔnɛ cẅɛt tsɛtsɛt pʉʉ, pʉʉ ɡɔ́ɔ ńdɔk ŋ́ɡʉ ńjʉ́ɔ pʉɔ pi cúꞋlɛ-pʉɔ-Kɛlístɔ kɑ́ sɑ́ŋ wɔ́p nǔu yɛcɔ́ nu pɔ́, ŋɡɔ pɔ́p ŋ́ŋɑk. 5N dɔk pɑ́Ꞌɑ ńtɛ́m sʉ́ʉ nǔu pʉʉ. Pʉʉ lɔk pɔ́Ꞌɔ, ńjɑ́k njínu tsɛtsɛt pʉʉ ẅi ḿbɔ́ ɑ́ ńnɛn kɛ̂m nǔu nu yi ɛ́ tsɛtsɛt ŋu-Kɛlístɔ pɔ́p wɛcɔ́ kɛkʉ̈ɔ́? 6Lɑ́ ɛ́ tsɛtsɛt pʉʉ, ŋu-Kɛlístɔ lɔk wɛcɔ́ ŋ́ɡʉ zʉꞋ yi pɛ́ ŋɑknɛ mɛtsɑŋ zúꞋu, tɛ ɛ́ zɛɛ ḿbɔ́ pɔ mbi pʉɔ pi pɔ́p kɑ́ zɑ́p tʉ́m nǔu Kɛlístɔ pɔ́. 7Ŋu wʉʉ nɛzɛɛ ńdɔk wɛcɔ́ ŋ́ɡʉ zʉꞋ yi pɛ́ ŋɑknɛ mɛtsɑŋ zúꞋu, ɛ́ lɔk ńnyɛt ŋɡɔ cúꞋlɛ yʉ́ʉ kɑ́ pɔ́ ńnɛn pɔ́. Ɛ́ zɛɛ ŋ́ɡɛ pɑ́Ꞌɑ pɛ́ fɑɑnɛ nu mbɔ̌ ŋu wʉʉ, ŋɡɑŋ pɔɔ sʉk sʉknɛ pɔ́, ńjʉɔ yúu ŋu, ɑ pɔɔ ɡwɑ́k? 8Lɑ́, pʉʉ kɛ́nɛ ḿbɛn ɛ́fɑɑnɛ nu mbɔ̌ pɔ́ɔpɛ́mɑ́ pʉ́ʉ. Pʉʉ jʉɔnɛ yúu pɔ́p. 9-10Pʉʉ kɑ pɔ́ ńjí ŋɡɔ pʉɔ pi pɔ́p ɡẅɛɛnɛ mɑt kɛpɔŋ pɔ́p kɛ́ lɑ́Ꞌ ŋ́ɡẅɛɛ yɔ́p zʉꞋ tsɛt nu-nɛfɔɔ-Sɛ́ pɔ́ kɛ? N dɑꞋ pʉɔ pɑ́Ꞌ pi pɔ́p puutɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ, mbɑ pʉɔ pi pɔ́p ɡúꞋlɛ́nɛ yúu ŋɡɔ ɛ́ mɛsɛ́, mbɑ mbɛ́ɛnɛ pɔ́p pɑŋɡɛ́ pi pɔ́p ɡɛnɛ ɡɑp, mbɑ pɑɡɛ mɛnu shẅɛtshẅɛtnɛ, mbɑ mbɛ́ɛnɛ yi ɛ́ shɔtnɛ́nɛ ŋ́ɡɛ nu-ŋu mbɛ́ɛnɛ pɔ́p mɑŋɡɛ́ tsɛtsɛt pɔ́p kɛ pɑŋɡɛ́ ɔɔ, mbɑ pɛtsɔ́ŋ, kɛ pɑkɔŋ ŋkɑ́p tɛꞋ, pɔ́p pɛpɑ́lɛ́-mɛluꞋ, pɔ́p pɑsẅíŋɛ kɛpɔŋ nǔu mɛlík-pʉɔ, pɔ́p pɑɡẅɛɛ ńcẅɛ́ɛ, líkcɔ́ pʉʉ fúklɛ mbʉʉ yʉʉ nǔu mɔnɛ mɛnu kíi, pîpɑ́ pʉɔ kɛ́ lɑ́Ꞌ ŋ́kúu nǔu nu-nɛfɔɔ-Sɛ́ pɔ́. 11Ɛ́ pɑ́Ꞌ pɛcɔ́ pʉɔ tsɛtsɛt pʉʉ kɑ zɛɛ ḿbɔ́ pɔ́Ꞌɔ. Lɑ́ Sɛ́ kɑ suk mîmɑ́ mɛnu nǔu pʉʉ, ńdɔk wʉ́ʉ ŋ́ɡɛ pʉɔ pɛ́. Sɛ́ wɛkŋɛ kɑ lɔk Zẅikŋɛ yɛ́ ŋ́ɡɛ pʉʉ tsʉ́Ꞌ ḿbɔ́ pɔ pʉɔ pi pɔ́p ndʉ́ŋndʉŋ mbi yɛ́ ntɛ́ Tsɑpʉɔ Yɛ́su Kɛlístɔ. Pʉʉ ɡẅɛɛ mbʉʉ yʉʉ lɑ ńjí ŋɡɔ pʉʉ ńdɔk ŋ́ɡúꞋlɛ Tsɑpʉɔ.
Pʉʉ ɡẅɛɛ mbʉʉ yʉʉ tɛ ńjí ŋɡɔ pʉʉ lɔk ŋ́ɡúꞋlɛ Tsɑpʉɔ
12Pɛcɔ́ pʉɔ tsɛtsɛt pʉʉ, mbɑ wɔ̌ lɑ́ nǔu pɔ́p pɔ́ ńcú ŋɡɔ ɑ ŋ́ɡɛ yɛ́ kʉ̈ɔ́ lɑ́ ḿbɔ́ kɛ́ pɔ́k nɛpʉ́ʉ. Ɛ́ nu lɑ́ yúu tsʉʉ kɑ́ cẅɛ́lɛ́ pɔ́. Ɛ́ nu ŋɡɔ m bɔ́ ŋ́ɡɛ kʉ̈ɔ́ lɑ́ ḿbɔ́ kɛ́ pɔ́k nɛpʉ́ʉ. Lɑ́ m bɔ́ ŋ́kɛ́ mbɔɔ pɛ́m yɛcɔ́ yúu lɔk wɑ́ɑ ŋ́ɡɛ ŋkwɑɑ wɛ pɔ́. 13Pʉʉ pɛn ḿbɔ́ ńcú ŋɡɔ: «Pɛ́ kɑ ɡɛ yúupɛ́jʉ́ mbíꞋ nɛpɛm, ŋ́ɡɛ nɛpɛm mbíꞋ yúupɛ́jʉ́.» Ɛ́ nu nɛ́nẅín lɑ́ Sɛ́ ŋ́ɡɛ ɛ́sɑt yúupɛ́jʉ́ mɛꞋ, ḿbɛn ɛ́sɑt nɛpɛm. Mbɑ pɔ́Ꞌɔ, mbɔ ŋu pɔɔ lɔk mbʉʉ yɛ́ ŋ́ɡɛ mbɑ kʉ̈ɔ́ lɑ́ yi ɑ tsɑ́ɑnɛ pɔ́, mbíꞋŋɡɔ mbʉʉ-ŋu yɛ Tsɑpʉɔ, Tsɑpʉɔ líŋɛ́nɛ nu ŋ́ɡɑ́ nǔu. 14Líkcɔ́ pʉʉ likŋɛ ŋɡɔ Sɛ́ ẅi ɑ kɑ zẅíimɛ́nɛ Tsɑpʉɔ nǔu nɛvú, ɑ ɡʉ ŋ́ɡɛ ńdɔk mɛtʉʉ mɛ́ ḿbɛn zẅíimɛ wɛkŋɛ ɡúu nǔu nɛvú. 15Pʉʉ kɑ́ pɔ́ ńjí ŋɡɔ mbʉʉ yʉʉ mɛkɛm-mbʉʉ-Kɛlístɔ pɔ́ kíi? Ŋ ɡʉ ńdɔk kɛm-mbʉʉ-Kɛlístɔ ńdɔk ŋ́ɡɛ kɛm-mbʉʉ-ŋkɑttʉ́ mɑŋɡɛ́? Ŋɡɑ́ŋ, 16ńjí ŋɡɔ pʉʉ kɑ pɔ́ ńjí ŋɡɔ ŋu pɔ́p ŋkɑttʉ́ mɑŋɡɛ́ lɑɑ ńtɛmtɛ, mbɔ pɔ́pnɛ́ tsʉ́Ꞌ ḿbɔ́ pɔ tɑ́Ꞌ mbʉʉ pɔ́ ɔɔ? ŊwɑꞋnɛ-Sɛ́ zɛɛ ńcú ŋɡɔ: «Pɔ́p pɛ́pɑ́ ɡʉ ńtsʉ́Ꞌ ḿbɔ́ pɔ tɑ́Ꞌ mbɑp-mbʉʉ.» 17Lɑ́, ŋu ẅí ɑ lɑtnɛ yɛ́ mbʉʉ pɔ nǔu Tsɑpʉɔ, pɔ́pnɛ́ tsʉ́Ꞌ ŋ́ɡẅɛɛ pɔ tɑ́Ꞌ Zẅikŋɛ. 18Pʉʉ niitɛ ḿbɑ́ɑ nɛlɔk mbʉʉ yʉʉ ŋ́ɡɛ kʉ̈ɔ́ lɑ́ yi pʉʉ kɔŋnɛ. Mɛcɔ́ mɛnu kɛpɔŋ mi pʉɔmɛsɔŋ ɡɛnɛ, ɛ́ nǔu pɔ́p ḿbɔ́ pɔ nzɛmpíi. Lɑ́ ḿbɔ́ yi ŋu lɑɑ ńdɔk mbʉʉ yɛ́ ŋ́ɡɛ kʉ̈ɔ́ lɑ́, mbɔ ɑ shɔtnɛ ŋ́ɡɛ nu kɛpɔŋ pɔ nǔu yɛ́. 19Pʉʉ kɑ́ pɔ́ ńjí ŋɡɔ mbʉʉ yʉʉ ndɑ́-Zẅikŋɛ Lɛ́ɛnɛ́nɛ pɔ́ kíi? Yîyɑ́ Zẅikŋɛ tsẅɛ́ tsɛtú, mbɔ Sɛ́ kɑ ɡɑ́nɛ mbɔ̌ pʉʉ. Pʉʉ pɔɔnɛ ɡẅɛɛ túmbʉʉ yʉ́ʉ pɔ́. 20Sɛ́ kɑ ɡɑ́nɛ yúu ńdɔk ɛ́fú ndɑ́-kwɑɑ ńtsúꞋ wʉ́ʉ. Pʉʉ kɛ́ ńdɔk pɔ mbʉʉ yʉʉ ŋ́ɡɑ́ mɛkuꞋ mbɔ̌ Sɛ́.
Currently Selected:
1 Kɔlɛ̂ŋtɛ 6: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
