1 Kɔlɛ̂ŋtɛ 5
5
Tsẅɛ́ kɛpɔŋ yi ɛ́ tsɛt cúꞋlɛ-pʉɔ-Kɛlístɔ
1Pɛ́ sɛ́ ńzúꞋ pɛ́ pɔ́ ɡɔ́ lɑ́ ɛ́sẅíi ŋɡɔ ɛ́ tsɛtsɛt pʉʉ, wɛcɔ́ ŋu pɔ́ ɡú ɛ́fʉꞋ yɛcɔ́ ntɛ́ mɛnu tɛꞋ, yîyɑ́ ntɛ́ tsẅɛ́ pɛ́k pɛknɛ tɛ pɑkɛ́jí Sɛ́ zɛɛ mbɔɔ pɔ́Ꞌɔ ɡɛ. Mɔ sɛ́ ńzúꞋ ŋɡɔ wɛcɔ́ ŋu tsɛtsɛt pʉʉ ḿbɔ́ ɑ tíi nzwɛ́-tɑ́t wɛ. 2Pʉʉ pɔ́ zúꞋu ḿbɔ́ ŋ́ŋɑ́Ꞌlɛ, lɑ mbɔ pʉʉ ḿbɔ́ ŋ́ɡʉ ńdúŋ yîyɑ́ ntɛ́ nu lúŋnɛ, pɛ́ pɛn ɛ́fú tsɛtsɛt pʉʉ ńzuŋ ŋu ẅí ɑ ɡɛnɛ pɔ́Ꞌɔ. 3Pʉʉ kɑ́ pɔ́ ńjʉ́ɔ wɑ́ɑ nɛ́ mík tsɛtsɛt pʉʉ pɔ́. Lɑ́ ɛ́ lɛɛ nǔu tɑ́Ꞌ ntsu wɛkŋɛ m bɔ́ pɔ tsɛtsɛt pʉʉ. Ɛ́ ɡʉ nǔu mɔ, mbɔ mɔ ndɑ́Ꞌ mɔ́ ŋ́ŋɑk ŋu ẅí ɑ kɑ ɡɛnɛ yîyɑ́ nu pɔ pɑ́Ꞌ ŋkɑ́ yi ŋ kɑ pɔ́ pɔ sɛ́ tsɛtsɛt pʉʉ lɑ ńzɑ́p ŋɡɔ: 4«Pʉʉ lɑɑ ńcúꞋlɛ nǔu lík-Tsɑpʉɔ Yɛ́su. Mbɔ ɛ́ ńdɛɛ nǔu tɑ́ ntsu wɛkŋɛ m bɔ́ yɑ́ɑ pɔ sɛ́. Pʉʉ lɔk mɛtʉʉ-Tsɑpʉɔ Yɛ́su, 5ńcɑklɛ ẅîwɑ́ ŋu ŋ́ɡɑ́ mbɔ̌ Sɑ́ttɑ. A sɑt mbɑp-mbʉʉ-ŋɡɑŋ nɛpɔ́ yi ɛ́ ɡʉ ńdɑ́Ꞌ lɛ́Ꞌ yi Tsɑpʉɔ ɡʉ ńdɑ́Ꞌ ńtɔ́, zẅikŋɛ ŋɡɑŋ luk.»
6Ɛ́ kɑ́ pɔŋ ŋɡɔ pʉʉ ŋɑ́Ꞌlɛ nɛ́ yîyɑ́ ntɛ́ nu tsɛtsɛt pʉʉ pɔ́. Pʉʉ kɑ pɔ́ ńjí ŋɡɔ mɔ́zʉꞋ fɛntɛ ɡɛnɛ fɑlîn tsɛpnɛ kɔ́Ꞌ pɔ́ kɛ? 7Pʉʉ cẅɛɛtɛ fɛntɛ-ndwɛn mɑt tsɛtsɛt pʉʉ, ńjí ŋɡɔ pʉʉ ɡʉ ḿbɔ́ kɛ́ lɔ́Ꞌ. Ɛ́ fú pɔ́Ꞌɔ, pʉʉ pɔ́ fɑlîn tsɛpnɛ yi ɛ́ pɛ́t pɔ yi fí, kɛ́ yɛcɔ́ fɛntɛ nǔu. Pʉʉ kɑ zɛɛ mɔ́ ńdɑ́Ꞌ ḿbɔ́ pɔ́Ꞌɔ, mbíꞋŋɡɔ pɛ́ kɑ lɔk Kɛlístɔ ńnɔŋ pɔꞋ, ɛ́ pɔ́ pɑ́Ꞌ wɛkŋɛ mɔ́ɔ-njinjɔ-ndínɑ-Pɑ́skɑ lɑ́. 8Pɔ́Ꞌɔ lɑ́, pɛkŋɛ jʉ́ ndínɑ-pɑ́skɑ nɛ́ mbɛlɛ̂ɛt kɛ́ fɛntɛ, nɛ́ tʉ́m lɛ́ɛnɛ́nɛ, tʉ́m yi ɛ́ sẅíinɛ nu nɛ́nẅín. Kɔɔ pɛkŋɛ ŋ́kwɛ́t mbɛlɛ̂ɛt yi pɛ́ lɔknɛ fɛntɛ-ndwɛn mɑt ńdɔk ńniitɛ, mbɑ mɛfɑꞋ kɛpɔŋ, ḿbɛn ḿbɔ́ yɛ́ nu kɛpɔŋ.
9Ŋ kɑ ńtúu ŋwɑꞋnɛ mbɔ̌ pʉʉ ńcú tsɛtú ŋɡɔ: «Pʉʉ pɑ́ɑ pɑ́Ꞌ pʉʉ pɛ́ pʉɔ pi pɔ́p jʉ́ɔnɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ tɛmtɛ nu.» 10Mɔ ŋkɑɑ ḿbɔ́ ńdɑꞋ pʉɔ tsʉʉ pi pɔ́p tsɛt yɔ ndǔmbí ńtsɛ́t mbɑ wɔ̌ lɑ́ pɔ́p pɛpɔ́p nɔɔ nɔŋnɛ pɔ́, ŋ́kɛ́ ḿbɔɔ ńcú pɛtsɔ́ŋ tsʉʉ pɔ́, ŋ́kɛ́ ḿbɔɔ ńcú ɡɑŋ kɛ́ɡʉ̈ɔꞋ tsʉʉ pɔ́, ŋ́kɛ́ ḿbɔɔ ńcú pɑɡúꞋlɛ yúu ŋɡɔ ɛ́ mɛsɛ́ tsʉʉ pɔ́. MbíꞋŋɡɔ ɛ́ kɑ pɔ́ pɔ́Ꞌɔ, mbɔ pʉʉ kɑ tsʉ́Ꞌ ɛ́fú pɔ tsɛt nɛfɔɔ-ndǔmbí ńcẅɛt. 11Ŋɡɑ́ŋ, ŋ kɑ pɔ́ ŋ́ŋwɑꞋnɛ ńcú mbɔ̌ pʉʉ pɔ ŋɡɔ, pʉʉ pɑ́ɑ ŋu ẅí ɑ tsɛtsɛt pʉʉ ḿbɔ́ ńcú ŋɡɔ ɑ mɔ́ɔmɑ́ wʉ́ʉ nzʉʉ Kɛlístɔ, ḿbɛn ńtsɛ́t mbɑ wɔ̌ lɑ́ pɔ́pnɛ́ nɔɔ nɔɔnɛ, ḿbɔ́ ntsɔ́ŋ, kɛ ḿbɔ́ pɔ ŋu ẅí ɑ ɡúꞋlɛ́nɛ mɛyúu ŋɡɔ ɛ́ mɛsɛ́ ɔɔ, kɛ pɔ ŋu ẅí ɑ sẅiŋɛ́nɛ kɛpɔŋ nǔu mɛlík-pʉɔ ɔ́ɔ, kɛ pɑ́lɛ́-mɛluꞋ ɔɔ, kɛ pɔ ŋu ẅí ɑ kɔŋnɛ ŋkɑ́p tɛꞋ ɔɔ. Kɔɔ pʉʉ pɛ yîyɑ́ ntɛ́ ŋu zɛɛ ńtɛmtɛ yúu ńjʉ́. 12Pɛkŋɛ pɛ́ pʉɔ pi pɔ́p kɑ́ pɔ́ pʉɔ-Kɛlístɔ pɔ́ zɛɛ ŋ́ɡẅɛɛ kʉ̈ɔ́ tɛ ŋ ŋɑk wɔ́p? Pʉʉ ɡẅɛɛ pɔ nɛŋɑk pʉɔ pi pʉʉ pɛ́ pɔ́p pɔ́nɛ ndɑ́.
13Sɛ́ ɡʉ ńdɑ́Ꞌ ŋ́ŋɑk pʉɔ pi pɔ́p kɑ́ pɔ́ pʉɔ-Kɛlístɔ pɔ́. Pʉʉ fú tsɛtsɛt pʉʉ ńzuŋ ŋu kɛpɔŋ.
Currently Selected:
1 Kɔlɛ̂ŋtɛ 5: JGO
Highlight
Copy
Compare
Share
Want to have your highlights saved across all your devices? Sign up or sign in
CABTAL, 2017
