Yerimaiya 50
50
Etob A-abañake Babilọn
1Ikọ se Abọọñ aketañ ato inua prọfed Yerimaiya abaña Babilọn ye isọñ Babilọn ado ami:
2“Isian inyʌñ itañ ke atu mme idịd,
idịppe mme afọñidiọọñọ inyʌñ itañ anye anwa-anwa;
ikiisʌhọ ñkpọ ndomokeed, ado ebo,
‘Eyaemʌm Babilọn;
eyaesịn Bel ke abuud,
Maduk ayaayọhọ ye akpọsọñ ndịk.
Mme usioidem amọ eyaekịt abuud
ndin mme ubobodñkpọ amọ eyaeyọhọ ye akpọsọñ ndịk.’
3Idịd a-atooho adoro ayaanwana mme anye
anyʌñ anịm isọñ amọ anaan.
Awo ndomokeed idiidʌññọ ke anye;
mme awo ye unam eyaefeeñe ewuọ.
4“Ke mme usen ado, ke ini ado,” Abọọñ atañ,
“mbon Isrel ye mbon Yuda eyaediana keed
ekaa ke mmọọñayịd adiyem Abọọñ Abasi ammọ.
5Ammọ eyaebịp usʌñ a-akaaha Saiyọn,
enyʌñ ekanna iso ammọ ese udo.
Ammọ eyaedi edibọp idem ammọ edian ye Abọọñ
ke nsi-nsi edioomo
a-awo imiidiifreke.
6“Ikọd mmi edo mme edọñ e-esoppo usʌñ;
mbon se ikpeme ammọ emaetịn ammọ usʌñ,
enyʌñ enam ammọ edutịn ke mme anyọñ ikpọabod.
Ammọ eyooñ esaña ke anyọñ ikpọabod ye ntəkabod,
ndin efre mme itie nduọkadudu ammọ.
7Mbio se ikikịt ammọ emaeta ammọ;
mme asua ammọ emaebo, ‘Ñnyịn idueghe,
sia ammọ emaenam idiọọkñkpọ ye Abọọñ, nseghe isọñ mbunwịm ammọ,
Abọọñ, idodanyen mme eteete ammọ.’
8“Ifeeñe iwuọñọ ke Babilọn;
ikpọñ isọn mbon Babilọn,
inyʌñ iba nte mme ebod edatta udịmedọñ usʌñ.
9Sia ami ñyaademme udọñ mme ikpọ idịd ke isọñ adoro, ñnyʌñ nnam
ammọ ebọp idiọọk edioomo ebaña Babilọn.
Ammọ eyaedat itie mbeeñeidem ekọñ ebaña anye,
ndin tọọñọ ke adoro eyaesịn anye ukad.
Mme idañ ammọ ediiba nte idañ mme nta mbon uko
i-imiisinyọññọ ubọk ñkaña.
10Ndin eyaebịme Babilọn ekoono;
afịd mbon se ibịme anye eyaenie uyʌkkọ,”
Abọọñ atañ.
11“Sia ndufo emedaara e-enyʌñ enem esịd,
ndufo e-ekoonoke udeeme mmi ke ñkanubọk,
sia ndufo emenek nte ñyịn enañ ke afe abakpa,
enyʌñ esio uyio nte ñyaara enañmbakara.
12Eka ndufo ayaakop ekamba abuud;
eyaesuenne anye a-akimanna ndufo.
Anye adiido andisịb ñkan ke atu mme idịd,
anaan, nsaad isọñ, akpautatan.
13Ke ntak iyadesịd Abọọñ awo idiidʌññọ ke anye,
ado adiina ukpọk ataa afịd-afịd.
Afịd mbon se isaña iboiyo ke Babilọn eyaeba ke ñkpaidem;
ammọ eyaesaha ato ke afịd mme unan amọ.
14“Idat itie ekọñ ndufo ikanna Babilọn,
afịd ndufo mme atop utịgha.
Itop anye! Ikiisʌhọ idañ ndomokeed,
sia anye anam idiọọkñkpọ ye Abọọñ.
15Ibọọñ ñkpo ye anye ke afịd idaha!
Anye akpeubọk, mme tọwa amọ eduọññọ,
ewuut mme ndibene amọ.
Sia ami adooho usiene iyadesịd Abọọñ,
esio anye usiene;
enam ye anye kpa naña anye akenam ye mbon mfen.
16Ikpịkke atọinwañ isio ke Babilọn,
ye andidọk ye ikwa ukpeeñe amọ.
Ke ntak akañkañ afiikawo
yak afịd awo etịmme enyọñ ebịne mbon ammọ,
yak afịd awo efeghe eka isọñ ammọ.
17“Isrel ado udịmedọñ a-amaakesuana,
a-mme ekpe ekebịneke esio.
Akpa andikita ammọ
akedo adidem Asiria;
akpatre andikiboom akpọ ammọ
akedo Nebukadnesa adidem Babilọn.”
18Ke ntoro se Abọọñ Andikponñkan, Abasi Isrel, atañ ado ami:
“Ami ñyaamia adidem Babilọn ye isọñ amọ ufen,
kpa naña ñkemia adidem Asiria.
19Ado ami ñyaamaana mben Isrel ñnyọñ ndi isọñ awawa mbid ammọ,
ndin anye ayaata mbid ke isọñ Kamel ye Basan;
iwʌd amọ ayaakop uyʌkkọ
ke mme abod Ifrem ye Kilied.
20Ke mme usen ado, ke mme ini ado,” Abọọñ atañ,
eyaenam nduuñọ ebaña mme ndudue Isrel,
ado awo idiikịtte ndomokeed,
enyʌñ eduuñọ ebaña ndiọiñkpọ Yuda,
ado awo idiikịtte ndomokeed,
sia ami ñyaafeen mme nsʌhọ a-ami nnịmme.
21“Nwana ye isọñ Merataim
ye mbon se idʌñ ke Pekod.
Bịne, wot nyʌñ sobo ammọ ataa afịd-afịd,”
Abọọñ atañ.
“Nam afịd ñkpọ se ami udọñ fiin.
22Uyom ekọñ aba ke isọñ,
uyom ekamba nsobo!
23Se naña ebuuñ enyʌñ esuan
ukọññkpọ afịd ekondo!
Ñwuudo Babilọn abadie
ke atu mme idịd!
24Babilọn, ami mmaakọọk afia unọ fiin,
ndin emaumʌm fiin mbemiso afo adiọọñọ;
emaukịt fiin enyʌñ umʌm
sia afo amaasọñ iwuod ye Abọọñ.
25 Abọọñ abeere itie unịm ñkpọekọñ amọ
anyʌñ asịññe mme ñkpọekọñ iyadesịd amọ,
sia Abọọñ Andikara ye Andikponñkan anie utom adinam
ke isọñ mbon Babilọn.
26Ito anyan itie idi ibịne anye.
Ibom mme itie unịmndidia amọ;
Ikọọk anye nte mme ebono ñkpasi.
Isobo anye ataa afịd-afịd
ikiinyʌñ iyaak nsʌhọ ndomokeed aba.
27Iwot afịd mme ñyịn ñyaaraenañ amọ;
yak ammọ eka ke itie uwot unam!
Adọdiọọk anọ ammọ! Sia usen ammọ adisịm,
ini adimia ammọ ufen.
28Ikpañ utọñ inọ mbon e-efeeñeke itọk ye mme ifʌn e-etooho Babilọn
etañ ke Saiyọn
naña Abọọñ Abasi ñnyịn asio usiene,
usiene anọ tembịd amọ.
29“Ikoot mme atobidañ nọ enwana ye Babilọn,
afịd mbon e-edʌttọ utịgha.
Inam nnaaekọñ ikanna anye ikʌk;
ikiiyak awo ndomokeed abọkkọ.
Isio anye usiene idiọọk amọ;
inam ye anye naña anye ñko anam.
Sia anye a-amiom Abọọñ,
Adisana Abasi Isrel.
30Ke ntoro, ñkparawa amọ eyaeduọññọ ke mme efaak;
eyaekʌp mbonekọñ amọ inua ke usen ado,”
Abọọñ atañ.
31“Se, ami mmenwana ye afo, afo awo ntañidem,”
Abọọñ atommo, Abọọñ Andikponñkan,
“sia usen mfo adikem,
ini afo adibọ ufen.
32Awo ntañidem ayaatuak ukod anyʌñ aduọ,
ndin awo ndomokeed idiinwamma adidịppe anye ndaaha;
ami ñyaasịn ikañ ke mme abio amọ
se idiita afịd mbon se iba ikpere anye.”
33Se Abọọñ Andikponñkan atañ ado ami:
“E-efiik mbon Isrel,
ukem ñko ye mbon Yuda.
Afịd mbon se imʌm ammọ
emʌm ammọ ekama ubọk asọñ,
esịn adisaana ammọ ñyaak.
34Ado Andifak ammọ asọñ adudu;
Abọọñ Andikponñkan ado anyịñ amọ.
Anye ayaabọọrọ ikọ anọ ammọ ke afịd adudu
nọ ato do anye asịn emem ke isọñ ammọ,
ado ndutịme aba ke atu mbon e-edʌññọ ke Babilọn.
35“Akañkañ ayaadoro mbon Babilọn!”
Abọọñ atañ
abaña mbon e-edʌññọ ke Babilọn,
ye mme adaaha amọ ye ntaifiọk amọ!
36Akañkañ ayaadoro mme nsu-nsu prọfed amọ!
Ammọ eyaekappa edo mbon ndisịme.
Akañkañ ayaadoro mbon uko amọ!
Ammọ eyaekop akpọsọñ ndịk.
37Akañkañ ayaadoro mme enañmbakara ye mme sariọd amọ,
ye afịd mme isenawo ke nsio-nsio ndaha amọ!
Ammọ eyaekappa edo mbon idek.
Akañkañ ayaadoro mme ñkpọuto amọ!
Eyaebịme ammọ.
38Nsaad isọñ ayaasịm mmọọñ amọ!
Ammọ eyaesaat.
Sia anye ado isọñ mme ubobodñkpọ,
mme ubobodñkpọ e-ediidamma ye ndịk.
39“Ke ntoro mme unam akpautatan ye mme haiyena eyaedʌñọ do,
ndin do ke mme ñkịdikịd ediidʌñ.
Awo idiidʌññọ ke anye aba ke nsi-nsi,
inyʌññọ idʌñ do ke emana ke emana.
40Naña ami ñkedooro Sọdọm ye Komora nduọọk
ye mme mbọhọidʌñ abio ammọ,”
Abọọñ atañ,
“mbaak awo ndomokeed adidʌñ do;
mbon awo ndomokeed idiidʌññọ ke anye.
41“Se! Udịmekọñ asʌk ato adoro abio adi;
edịppe nduduai ekamba idịd ye uwak mme ndidem,
tọọñọ ke mme utịd ederimbod.
42Ammọ ebana idem ye mme utịgha ye mme eduad;
ammọ edo ibak inyʌññọ itua mbọm.
Ammọ enam uyom nte mbufịd akpainyañ adakka
naña ammọ ewat ke mme enañmbakara ammọ;
ammọ esaña edi nte ideen ke udịmekọñ
edunwana fiin, Adiaha Babilọn.
43Adidem Babilọn akop mme etob abaña ammọ,
ndin ubọk amọ atọ atekke.
Afanekọñ asịm anye,
ubiak nte ake awonwaan a-abaaha ke ubiakuman.
44Kpa nte ekpe a-atooho akai Yọdan awuọ
adika isọñ a-ayọhọke ye nti ndidia,
ami ñyaabịne Babilọn nsio ke isọñ amọ ini keed.
Anie awo ido anye a-ami mmekke adidọñ utom ami?
Anie awo iba nte ami, ñko anie akeme adidomo idem ye ami?
Anie akpemeedọñ akeme adidomo idem ye ami?”
45Ke ntoro, ikop se Abọọñ aduak adinam ye Babilọn,
se anye adioomo abaña isọñ mbon Babilọn.
Eyaedʌt mme ñyịn edọñ esịññe ekpọñ udịmedọñ;
mme inwañ ndidia ammọ eyaeba ke ñkpaidem ke se iwuọñọ ammọ.
46Ke uyom ediimʌm Babilọn, ekondo ayaanyeeñe;
ntuaña amọ ayaatop awuọ ke atu mme idịd.
Currently Selected:
Yerimaiya 50: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
