Yerimaiya 49
49
Etob A-abañake Amọn
1Se Abọọñ atañ ado ami: abaña mbon Amọn
“Nte Isrel inieghe adiaakpa?
Ndin nsoo inam nọ Mọlek aben isọñ Kad?
Nsoo inam nọ ikọd Mọlek edʌñ ke mme abio Kad?
2Ado mme usen esʌk edi,” Abọọñ atañ,
“idaha se ami ndiifịt adukpoñ ekọñ
mbaña Raba ke abio Amọn;
anye ayaakappa ado abod nsobo,
ndin eyaesịn ikañ ke mme ñkanñkʌk abio amọ.
Ndin Isrel ayaabịne
mbon se ikibịne anye isio,”
Abọọñ atañ.
3“Hesbọn, tua, sia esobo Ai!
Isio ñkpo, ndufo mme andidʌñ ke Raba!
Isịne afọñikpo inyʌñ ifʌhọ;
ifeeñe ikaa iso ye edem ke mme esịd ndibene,
sia eyaeben Mọlek ekaa asenidịd,
dian ye mme aku ye mme adaaha amọ.
4Nsoo inam nọ ndufo eduaak inua ebaña mme abedeñ ndufo,
eduaak inua ebaña mme abedeñ ndufo naña enwịm mfịd?
Adiaha Amọn mforo,
afo abuọt idem ke mme inie mfo anyʌñ abo,
‘Anie adiinwana ye ami?’
5Ami ñyaaben afai idot ndufo ke idem,
nto afịd mbon e-ebaaha ikanna ndufo,”
Abọọñ atañ, Abọọñ Andikponñkan.
“Eyaebịne afịd ndufo esio,
ndin awo ndomokeed idiikoonoke mbon itọk ñkpakọb ibok.
6“Ke ado amaaboiyo, ami ñyaatịmme ndemme mfọnọñkpọ mbon Amọn,”
Abọọñ atañ.
Etob A-abañake Edọm
7Se ibaña Edọm:
Se Abọọñ Andikponñkan atan ado ami:
“Nte aniọñ ibaaha aba ke Teman?
Nte nnọitem akweeñe akpọñ mbon ndiọọñọidem?
Nte aniọñ ammọ amañ?
8Ikanna iso inyʌñ ifeeñe, idịbe ke mme abaitiad,
ndufo mbon e-edʌññọ ke Dedan,
sia ami ñyaaben nsobo nsọk Isọ,
ke ini se ami ndiimia anye ufen.
9Adieke mbon e-etañña kreb ekpediighe ubịne fiin,
nte ammọ ikpisʌhọke idem kreb ifañ?
Adieke mme inọ ekpediighe ke akonayio,
nte ammọ ikpiyịppe se ammọ eyem ikpọọñ?
10Ado ami ñyaasuuk Isọ ifed;
ami ñyaayaara mme itie udịbe amọ,
mbaak anye adikan adịp idem amọ.
E-esobo mbon ekọñ amọ,
ukem ado ñko ye mme nsaña ye mme mbọhọidʌñ amọ,
tutu awo ndomokeed ibaaha se ibo anye,
11‘Ikpọñ nditọakpa ndufo; ami ñyaanịm ammọ uwem.
Mme ebekpa ndufo ñko ekeme ibuọt idem ke ami.’ ”
12Se Abọọñ atañ ado ami: “Adieke mbon se i-imiidotto adinwọñ kọọb anaaha nte enwọñ anye, nsoo ikpinam nọ afo akpetre adibọ ufen? Afo uduunyọññọ ke umuubọọhọ ufen, ado ana nte anwọñ anye. 13Ami mmenwọñọ ke idem mmi,” Abọọñ atañ, “ke Bosra ayaakappa ado ñwuudo ye isuuñọ, ñkpọ ndịk ye ndọk; ndin afịd mme abio amọ ediido ñwuudo ke nsi-nsi.”
14Ami mmekop etob nto Abọọñ;
emaedọñ isʌñutom nọ aka mme idịd akebo,
“Ibok idem ndufo adinwana ekọñ ye anye!
Idakka ida ke mbeeñeidem ekọñ!”
15“Idahami ami ñyaanam afo asịp ke atu mme idịd,
ubonawo eyausọọn fiin.
16Akpọsọñ ndịk a-afo asịnne
ye ntañidem esịd mfo ubiaña fiin,
afo a-adʌññọ ke mme aba ikpọitiad,
a-adʌññọ ke mme anyọñ abod.
Akpesʌkado afo abọppọ efọk mfo ke anyọñ nte efọk ntrukpuum,
ami ñyaato do udooro fiin nsuuho nnịm ke isọñ,”
Abọọñ atañ.
17“Edọm ayaakappa ado ñkpọ ndịk;
afịd mbon se isaña iboiyo eyaekop ñkpaidem eyaenyʌñ esaha
ato ke afịd mme unan amọ.
18Naña ekedooro Sọdọm ye Komora eduọọk,
ye mme abio mbọhọidʌñ ammọ,” Abọọñ atañ,
“mbaak awo ndomokeed adidʌñ do;
mbon awo ndomokeed idiidʌññọ ke anye.
19“Nte ekpe a-atooho akai Yọdan awuọ
aka isọñ a-ayọhọke ye nti ndidia,
ami ñyaabịne Edọm nsio ke isọñ amọ ini keed.
Anie ado awo a-ami ndiimek adidọñ utom ami?
Anie aba nte ami, anie anyʌñ akeme adidomo idem ye ami?
Anie akpemeedọñ anyʌñ akeme adida ñnwana ye ami?”
20Ke ntoro, ikop se Abọọñ aduak adinam Edọm,
se anye abiide abaña mbon e-edʌññọ ke Teman:
Eyaedʌt mme ñyịn edọñ esịññe ekpọñ udịmedọñ;
mme inwañ ndidia ammọ eyaeba ke ñkpaidem ke se iwuọñọ ammọ.
21Ke uyom iduọ ammọ ekondo ayaanyeeñe;
ntuaña ammọ ayaatop akewuọ Ndad-Ndad Akpainyañ.
22Se! Ntrukpuum ayaafuurọ adọọk anyọñ, anyʌñ asọiyọ ke isọñ,
ataat mba amọ afʌk Bosra.
Ke usen ado esịd mbon uko ekọñ Edọm
ediiba nte esịd awonwaan a-abaaha ke ubiakuman.
Etob A-abañake Damaskọs
23Ke abaña Damaskọs:
“Hamad ye Apad e-enie ayeeme nsia,
sia ammọ emaekop idiọọk etob.
Ammọ e-enie iduọesịd,
a-afịna ammọ nte akpainyañ ammiiduọkkọ adudu.
24Udịd a-abọkkọ Damaskọs,
anye a-akanna iso adifeghe
ndịk a-anyʌñ amʌm anye;
ntuaña ye ubiak e-emʌm anye,
ubiak nte awonwaan a-abaaha ke ubiakuman.
25Nsoo inam nọ mme awo imiifegheke ikpọñ awuọ etob abio,
abio se ami nnem esịd mbaña?
26Ke akpanikọ, ñkparawa amọ eyaeduọññọ ke mme efaak;
eyaekʌp afịd mbon ekọñ ammọ inua ke usen ado,”
Abọọñ Andikponñkan atañ.
27“Ami ñyaakịm ikañ nsịn ke mme ndibene Damaskọs;
anye ayaata ñkpọsọñ itie Ben-Hadad.”
Etob A-abañake Keda ye Hasọ
28Ke abaña Keda ye mme abio Hasọ, a-Nebukadnesa adidem Babilọn akenwanake:
Se Abọọñ atañ ado ami:
“Dakka da, nyʌñ nwana ye Keda,
nyʌñ sobo mbon edem usakkautịn.
29Eyaeben mme atayad ammọ ye udịmedọñ ammọ;
eyaekoono mme itie idʌñ ammọ enyọñ,
ye afịd ñkpọudua ye mme kamel ammọ.
Mme awo eyaebọñ ñkpo ebo ammọ,
‘Afai ke afịd itie!’
30“Ifeghe ke usọp inyọñọ!
Idịbe ke mme ntotəño abaitiad ndufo mbon e-edʌññọ ke Hasọ,”
Abọọñ atañ.
“Nebukadnesa adidem Babilọn a-akọọk afia anịm inọ ndufo;
anye anie idiọọk akikere ibaña ndufo.
31“Idakka ida inyʌñ inwana ye idịd a-abaaha ke emem,
a-adʌññọ ke uko,”
Abọọñ atañ,
“idịd a-adooho inieghe mme inuaatob ye mme aba;
mbon amọ edʌñ enyọọñ usʌñ ekpọñ afanekọñ.
32Eyaebịme mme kamel ammọ,
ndin uwak udịmenañ ammọ ediido mbịme ñkpọ ekọñ.
Ami ñyaasuan mbon e-ebaaha ke anyan itie ndọñ ke afịm,
ñnyʌñ mben nsobo ke afịd itie nsọk ammọ,”
Abọọñ atañ.
33“Hasọ adiido ñkpọ ubịne anọ mme ewaikọd,
itie a-awo imiidʌññọ ke nsi-nsi.
Awo ndomokeed idiidʌññọ do;
mbon awo ndomokeed idiidʌññọ do.”
Etob A-abañake Elam
34Ikọ Abọọñ se ikisịm prọfed Yerimaiya ke abaña Elam ado ami, ke ntọọñọ ukara Sedekaiya adidem Yuda:
35Se Abọọñ Andikponñkan atañ ado ami:
“Se, ami ñyaabuuñ utịgha Elam,
asaña-asaña adudu ammọ.
36Ami ñyaaben afịm mbañ inaañ ndot Elam
ato ke mbañ hefịn inaañ;
ami ñyaasuan ammọ nnọ mbañ afịm inaañ,
ndin idịd idiibaaha
a-mbon itọkekọñ Elam imiidiikaaha.
37Ami ñyaasuan Elam ke iso mme asua ammọ,
ke iso mbon e-eyemme adiwot ammọ;
ami ñyaaben nsobo nsọk ammọ,
kpa ye ataa iyadesịd mmi,”
Abọọñ atañ.
“Ami ñyaabịne ammọ ke akañkañ
tutu nnam ammọ ekịt utịd.
38Ami ñyaadaaha ebekpo ubọọñ mmi ke Elam,
ñnyʌñ nsobo adidem amọ ye mme adaaha amọ,”
Abọọñ atañ.
39“Kpayeado ami ñyaatịmme ndemme uforo Elam
ke mme usen se idiidi,”
Abọọñ atañ.
Currently Selected:
Yerimaiya 49: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
